كوردستان

kurdish weblog

My Photo
Name:
Location: Melbourne, VIC, Australia

Monday, October 31, 2005

کێ له‌ پشت ته‌قینه‌وه‌کانی سلێمانییه‌وه‌یه‌؟

کێ له‌ پشت ته‌قینه‌وه‌کانی سلێمانییه‌وه‌یه‌؟
حسه‌ین یه‌زدانپه‌نا

رۆژی سێشه‌ممه‌ 3/خه‌زه‌ڵوه‌ری/2705، رێکه‌وتی 25/ ئۆکتۆبری/2005، دۆخی هێمن و ئاسایی شاری سلێمانی به‌ هۆی دوو ته‌قینه‌وه‌ی یه‌ک له‌ دوای یه‌کدا شڵه‌ژا. به‌ وردبوونه‌وه‌ و سه‌ر‌نج له‌م ته‌قینه‌وانه‌ ده‌توانین کۆمه‌ڵێ راستی حه‌شاردراو هه‌ڵنجین و هه‌ڵێده‌ین کێیان له‌ پشته‌وه‌ راوه‌ستاوه‌!

- ته‌قینه‌وه‌ و کرداریی تیرۆریستی‌ له‌ به‌غدا و هێندێ شاری دیکه‌ی عێراق بووه‌‌ته‌ دیارده‌یه‌کی رۆژانه‌. هه‌رچه‌ن زۆربه‌یان له‌ شکل و شێوازدا وه‌کیه‌ک یان له‌ یه‌ک ده‌چن، به‌ڵام زۆرجار ئامانج و نێوه‌ڕۆکی کوێرانه‌ و ره‌مه‌‌کییان هه‌یه‌. واته‌ گرینگ ئه‌وه‌یه‌که‌"جووڵه‌" هه‌بێ، ته‌قینه‌وه‌ هه‌بێ و خوێن بڕژێ!

- هه‌ر ئه‌و ته‌قینه‌وانه‌ له گه‌ڵ ئه‌و ته‌قینه‌وانه‌ی‌ له‌ کوردستانی ژێر ده‌سه‌ڵاتی حکومه‌تی کوردستان ده‌کرێن، له‌ شکل و شێوازدا وه‌کیه‌کن، له هه‌ردولا ئۆتومبیلی TNT رێژکراو‌، تیرۆریستیی خۆکوژ، یان ریموت کۆنترۆڵ به‌ کار ده‌هینرێ. به‌ڵام پله‌ و ئاستی ئامانجداریی ته‌قینه‌وه‌کان له‌ کوردستان دیارتر و سیاسیتر و ته‌گبیر کراوه‌ترن. واته‌ ئامانجه‌کان پێش، ئه‌وه‌ی ئامانجی سه‌ربازیی بن، ئامانجی سیاسیین. تیرۆره‌کانی کوردستان، هۆکاری سیاسییان هه‌یه‌، په‌یامی سیاسیی ده‌نێرن و بۆ کاریگه‌ریی له‌ سه‌ر حیزب و حکومه‌ت و بۆشایی دروست کردن رێکده‌خرێن. تیرۆری فره‌نسوهه‌ریری، تیرۆری سه‌رنه‌که‌وتووی د. به‌رهه‌م ئه‌حمه‌د ساڵه‌ح، شه‌وکه‌تی حاجی موشیر، یه‌کی شوبات، تیرۆری ئه‌نوه‌ری حاجی عوسمان و ته‌قینه‌وه‌کانی رۆژی25/10ی سلێمانی، ئه‌و بۆچوونه‌ ده‌سه‌لمینن. ئه‌وانه‌ی بوونه‌ نیشانه‌ی ئه‌و تیرۆرانه‌ هه‌رکام به‌ شێوه‌ی خۆیان ده‌وری تایبه‌تیان هه‌بووه‌ له‌ قه‌واره‌ی حیزب و حکوومه‌تدا.

- ئامانجی سه‌ره‌کیی تیرۆریستان له‌ کوردستان په‌کخستنی پڕۆژه‌ی نه‌ته‌وایه‌تی کورد،‌ به‌ هه‌موو لایه‌نه‌کانی سیاسی، ئابووری، فه‌رهه‌نگییه‌وه‌یه‌‌. ئه‌گه‌ر له‌ به‌غدا، هێزی ئه‌مریکی و"داگیرکه‌ر" له‌ هه‌موو شوێنێک ئاماده‌یه‌، له‌ کوردستان هێزی ئه‌مریکی یان فره ‌ره‌گه‌ز به‌ ده‌گمه‌ن ده‌بینرێن و ده‌ورێکیان له‌ ژیانی رۆژانه‌ی خه‌ڵکدا نییه‌. ئه‌گه‌ر"ده‌سه‌ڵات" له‌ به‌غدا به‌ ده‌ستنیای بێگانه‌ داده‌نرێ، له‌ کوردستان له‌ ساڵی91 ه‌‌وه ‌ئه‌و ده‌سه‌ڵاته‌ هه‌یه‌ و هه‌ڵقوڵاویی هه‌ناوی کورده‌وارییه‌.

- هیچکام له‌ ده‌وڵه‌ته‌کانی ترکیا‌ و ئێران و سووریا حه‌ز به‌ ئازادیی کوردستان ناکه‌ن و هه‌موویان دژی سه‌قامگیریی سیاسی و پێشکه‌وتنی ئابووری کوردستانن. به‌ڵام قسه‌ و کردار و ره‌فتاری هه‌رکامیان به‌ شێوه‌ی خۆیانه‌ و له‌ یه‌ک جیاوازن. سووریا‌ زۆر تێکه‌ڵاوی هاوکێشه‌که‌ نییه‌، به‌ڵام ترکیا و ئێران، باشووری کوردستان بووه‌ته‌ خه‌می رۆژانه‌یان! ‌

- گوشار و دژایه‌تی ترکان له‌ سه‌ر باشووری کوردستان، روون و ئاشکرایه‌. ئه‌وان کارته‌کانی "برایم خه‌لیل"، "پ.ک.ک" و تورکمانیان هه‌یه‌. برایم خه‌لیل داده‌خه‌ن و هاتووچۆ دژوار ده‌که‌ن، به‌ بیانووی PKK هه‌ڕه‌شه‌ی سنوور به‌زاندن ده‌که‌ن، یان تاقمه‌ ئاڵقه‌له‌گوێکانیان به‌ ناوی پارستنی مافی " تورکمان" به‌ کاردێنن. ترکان تا ئێستا تخوونی تیرۆر و ته‌قینه‌وه‌ نه‌که‌وتوون.
- ئێران بنکه‌ی سه‌ره‌کیی تیرۆریزمه‌ له‌ جیهاندا. ناوه‌ندی به‌رهه‌مهێنانی فکری تێرۆر و توندوتیژییه‌. بنکه‌ی هاویشتنی ئه‌و‌ فکره‌یه‌ بۆ هه‌موو وڵاتانی ده‌وروبه‌ر و وڵاتانی ئیسلامی، مۆڵگه‌ی هه‌موو ده‌سته‌و تاقمه‌ تیرۆریستییه‌کانی جیهانه‌. شوێنی راهێنانی ئه‌ندامانی ده‌سته‌و تاقمه‌ تیرۆریستییه‌کانه‌. سوپای تایبه‌ت به‌ ده‌ستێوره‌دان و چالاکیی له‌ نێو وڵاتانی هه‌یه‌. باڵاترین ده‌وری تێکده‌رانه‌ی له‌ عێراقدا گێڕاوه‌. ئه‌ندامانی "هێزی قودسی سوپای پاسداران" رێکخه‌ر و به‌ڕێوبه‌ریی زۆر له‌ کرده‌وه‌ تیرۆریستییه‌کانی نێو‌ عێراقن. ئه‌وه‌ جگه‌ له‌و باڵاده‌ستییه‌ سیاسییه‌ی به‌ هۆی لایه‌نه‌ شێعه‌کانی عێراقه‌وه‌ له‌ عێراقدا هه‌یه‌تی.
- ئێران له‌ ساڵی 1991ه‌وه‌، ده‌ستی کێشاوه‌ته‌ به‌شه‌ ئازاده‌که‌ی با‌شووری کوردستان و له‌ پاڵ نووسینگه‌ فه‌رمییه‌کانی، ده‌یان بنکه‌و مۆڵگه‌ی نهێنی بۆ عه‌مه‌لیاتی تیرۆریستی دژی تێکۆشه‌رانی حیزب و لایه‌نه‌ سیاسییه‌کانی رۆژهه‌ڵاتی کوردستان دانا بوو. سه‌دان که‌س له‌و تێکۆشه‌رانه‌ که‌وتنه‌ به‌ر په‌لامار و پیلانه‌ تیرۆریستییه‌کانیان. کاتی خۆی هاوارمان له‌ براکانمان له‌ باشووری کوردستان ‌کرد که‌ پاش ئێمه‌ نۆره‌ ده‌گاته‌ خۆتانن!

- چه‌ن مانگ له‌مه‌وبه‌ر " ئه‌نوه‌رحاجی عوسمان" یه‌کێ له‌ کاربه‌ده‌ستانی یه‌کێتی نیشتمانی کوردستان و به‌رپرسی ئاسایشی حه‌ڵه‌بجه‌، تیرۆرکرا. بکوژانی ئه‌نوه‌ر حاجی عوسمان له‌ ئێرانه‌وه‌ هاتبوون و بۆ ئێرانیش گه‌ڕانه‌وه‌. ئه‌نوه‌ر، ده‌ورێکی گرینگی له‌ رێگرتن له‌ دزه‌ی تیرۆریستان له‌ ئیرانه‌وه‌ بۆ عێراق هه‌بوو و زانیاری باشی له‌ سه‌ر ده‌سته‌و تاقمه‌ تیرۆریسته‌کانی نیشته‌جێی له‌ ئێران هه‌بوو. زانیارییه‌کانی ئێمه‌ ده‌یسه‌لمێنن، ئێران رێکخه‌ری ئه‌و تیرۆره‌ بووه‌.

- سلێمانی له‌گه‌ڵ ئێران هاوسنووره‌. سنووری هاوبه‌ش و سروشتی ده‌سه‌ڵاتی سیاسیی ئێران و پێوه‌ندییه‌کانی و چه‌ن فاکته‌رێکی دیکه‌، وا ده‌که‌ن بڵێین له‌ بارودۆخی ئێستادا هیچ چه‌شنه‌ کرده‌وه‌یه‌کی تێرۆریستی وا به‌بێ ئێران، له‌ سلێمانی و ئه‌و ده‌ڤه‌ره‌ روونادا. ئێران پشتی جه‌بهه‌ی ئه‌نساروالئیسلام و ئه‌نساروالسونه‌یه‌. کۆماری ئیسلامی ئه‌و ده‌سه‌ڵاته‌ی به‌سه‌ر ئه‌و گروپانه‌دا هه‌یه‌ که‌ رێ له‌ چالاکییه‌کانیان له‌ سلێمانی بگرێ. هه‌روه‌ک تواناشی هه‌یه‌ به‌ریان بۆشل بکا یان به‌ کاریان بێنێ. ئه‌وانه‌ی رۆژی 25/10/2005 ته‌قینه‌وه‌کانیان به‌ڕێوه‌ برد، سه‌ره‌ڕای ئه‌وه‌ی خاوه‌نی چ پێناس و ره‌گه‌زنامه‌یه‌کی یاسایی بووبن، ئێرانیان له‌ پشته‌وه‌ راوه‌ستاوه!

- ئه‌و ته‌قینه‌وانه‌، په‌یامێکی سیاسی بوون بۆ یه‌کێتی نیشتمانی کوردستان. په‌یامێک بۆ سنوور دانان و راوه‌ستاندنی ی ن ک له‌ ده‌وره‌ سیاسییه‌که‌ی. ئه‌و ده‌وره‌ی له‌ یه‌کبوونی ئێراده‌‌ و گوتاری یه‌کگرتووی کورد دا هه‌یه‌تی. ئه‌و یه‌کگرتووییه‌ی که له‌گه‌ڵ پارتی دیمۆکراتی کوردستان‌ جه‌لال تاڵه‌بانی گه‌یانده‌ سه‌رۆکایه‌تی عێراق و ئاخافتن به‌ کوردی له‌ کۆبوونه‌وه‌ی نه‌ته‌وه‌یه‌کگرتووه‌کان و مه‌سعود بارزانی کرده‌ سه‌رۆکی هه‌رێمی کوردستان و به‌ جلی کوردییه‌وه‌ گه‌یاندییه‌ کۆشکی سپی و به‌ زمانی کوردی له‌ گه‌ڵ جۆرج بووشدا قسه‌ی کرد. بێجگه‌ له‌وه‌ش وریاکردنه‌وه‌ی یه‌کێتی نیشتمانی کوردستان بوو له‌ دامه‌زرانی ئه‌مریکییه‌کان له‌ سنووره‌کانی به‌ر ده‌سه‌ڵاتی.

- فێڵ و ته‌ڵه‌که‌ له‌ کۆنه‌وه‌ یه‌کێ له‌ شێوه‌کانی سیاسه‌تکردنی ئێرانییه‌کان بووه‌. ئه‌وان بۆ سه‌رخستنی پیلانه‌کانیان له‌ سه‌ره‌خۆ و ورد و به‌داو و ده‌ون. زانیارییه‌کانی ئێمه‌ ده‌یسه‌لمێنن، ستاڤی کۆماری ئیسلامی له‌ سلێمانی، 4-3 رۆژ پێش ته‌قینه‌وه‌کانی سلێمانی، ئه‌و شاره‌یان به‌جێ هێشتوه‌ و جێی خۆیان به‌ ستافنێکی نوێ داوه‌. روونه،‌ ستاڤی نوێ ته‌نیا یه‌ک وه‌ڵامیی پێیه‌،"ئێمه‌ تازه‌هاتووین، ئاگامان له‌ هیچ نییه"‌![1]

***************
[1] - ئه‌م بابه‌ته‌ له‌ ژێر چاپدا بوو که‌، به‌ڕێوه‌ به‌رایه‌تی ئاسایشی سلێمانی رایگه‌یاند: " ئه‌و تیرۆریسته‌ی سه‌رپه‌ره‌شتی ته‌قینه‌وه‌ی سلێمانیی کردووه‌ ئێرانی بووه"‌.

کوژرانی پاسدارێکی خانه‌نشین کراو‌ له‌ گوندی
"ئالیاوا"ی مه‌ریوان

به‌ پێی هه‌واڵێک له‌ مه‌ریوانه‌وه‌، له‌ گوندی"ئالیاوا" پاسدارێکی خانه‌نشین کراو به‌ ناوی"عه‌لی جانی" له‌ لایه‌ن که‌سێک به‌ ناوی"ئه‌حمه‌د خامه‌"، به‌ زه‌بری گوله‌ کوژراوه‌. ئه‌م رووداوه‌ له‌ ئاکامی ئه‌وه‌دا بووه‌ که‌"علی جانی" به‌ پشت ئه‌ستووریی به‌ سوپای پاسداران، ئاماده‌ی دانه‌وه‌ی حیسابێکی مادیی نه‌بووه‌ که‌ هی "ئه‌حمه‌د خامه‌" بووه‌ و که‌وتووه‌ته‌ لای.
کێشه‌ی نێوان ئه‌حمه‌د خامه‌ و عه‌لی جانی 4 ساڵ بووه‌، له‌ دادگای مه‌ریوان له‌ چاوه‌ڕوانی یه‌کلا کردنه‌وه‌دا بووه‌، به‌ڵام کاربه‌ده‌ستانی دادگا له‌به‌ر لا‌گیرییان بۆ پاسداری خانه‌نشین کراو، یه‌کلاکرانه‌وه‌ی کێشه‌که‌یان وه‌دوا خستووه.

یه‌کێتی شۆڕشگێڕانی کوردستان
8/خه‌زڵوه‌ری/270530/ئۆکتۆبری/2005

گرتنێ دوکتور که‌ماڵ سه‌ێد قادر

گرتنێ دوکتور که‌ماڵ سه‌ێد قادر
هیوا گوڵ محه‌مه‌دی

به‌ گۆێره‌ێ ئه‌و هه‌ۆاڵانه‌ێ که‌ ده‌گه‌ن دوکتور که‌ماڵ سه‌ێد قادر که‌ مروڤێکێ یاسا ناس و نوسه‌ر و کوردێکێ نه‌ته‌وێی و دڵسۆزه‌ ، له‌ لایه‌ن ده‌زگای ئاسایشی سه‌ر به‌ پارتی دیموکراتی کوردستانه‌وه‌ بێ سه‌ر و شۆێن کراوه‌. دوکتور که‌ماڵ ماوه‌یه‌که‌ دژی بنه‌ماڵه‌ی بارزانی و به‌تایبه‌ت شه‌خسی مه‌سعود بارزانی وکوڕه‌که‌ی مه‌سرور بارزانی ڕاوه‌ستاوه‌ و چه‌ندین به‌ڵگه‌ی له‌سه‌ر بڵاو کردونه‌ته‌وه‌ و هاوکات له‌ دادگای هه‌ۆلێر داوای له‌سه‌ر تۆمار کردون و له‌ مانگی ڕابردوو دا گه‌ڕایه‌وه‌ کوردستان که‌ ڕوبه‌ڕوی بنه‌ماڵه‌ی ناوبراو بێته‌وه‌ ، به‌ڵام وه‌ک دوکتور که‌ماڵ له‌ نوسینێک دا بڵاوی کردوه‌ ، بنه‌ماڵه‌ی بارزانی وازیان لێ هێنا ...؟
دوای ئه‌وه‌ی که‌ مه‌سعود بارزانی وه‌ک سه‌رۆکی کوردستان بانگه‌هێشتی کۆشکی سپی کرا ، دام و ده‌زگای سه‌ر به‌ پارتی دیمه‌کرات پێوه‌ندیان به‌ دوکتور که‌ماڵه‌وه‌ گرت که‌ ئه‌گه‌ر ڕاست ئه‌کا بگه‌ڕێته‌وه‌ کوردستان... دوکتور که‌ماڵ که‌ که‌سێکی خاوه‌ن بڕوا و یاساناسێکی ناونه‌ته‌وه‌ێیه‌ به‌ بێ ترس گه‌ڕایه‌وه‌ کوردستان. ئه‌مڕۆ هه‌وڵای بێ سه‌رو شۆێن کردنی بڵاو کرایه‌وه‌ ، ئه‌مه‌ش ئه‌و ڕاستیه‌ ده‌گه‌یه‌نێ که‌ له‌ باشوری کوردستان دا سیسته‌م ته‌نێا به‌ ناو گۆڕاوه‌ ، مروڤ حه‌قی ڕه‌خنه‌ گرتنی هه‌یه‌ تا ئه‌و کاته‌ی که‌ باسی بنه‌ماڵه‌ی بارزانی نه‌کا ، هه‌روه‌ک چۆن له‌ کاتی سه‌دام حسێن دا ناو هێنانی سه‌دام به‌ بێ وشه‌ی خۆا بی پارێزێ تاوان بو. دوکتور که‌ماڵ خۆی خۆازیاری لێکۆڵینه‌وه‌ی دادگا و یاسا بو ، به‌ڵام ئاسایش هیچ پێوه‌ندیه‌کی به‌و کاره‌وه‌ نیه‌ و تێکڵاو بونی ئاسایش واتای ئه‌وه‌یه‌ که‌ ژیانی تاکه‌کان له‌ کۆمه‌ڵگای کوردستان دا ناپارێزرێ و ئه‌وه‌ی ڕه‌خنه‌ی هه‌بێ ، بێده‌نگ ئه‌کرێ. بێگومان هه‌م دوکتور که‌ماڵ و هه‌م ئێمه‌ش بڕوامان وایه‌ که‌ هه‌رکه‌س هه‌ڵه‌ی کرد ده‌بێ ڕوبه‌ڕوی دادگا بێته‌وه‌ ، به‌و مه‌رجه‌ دادگاکان سه‌ربه‌خۆ بن و لایه‌نی که‌س نه‌گرن...
من چاوه‌ڕوانی ئه‌نجامی هه‌ڵس و که‌وتی دادگا و داوه‌ر ده‌که‌م که‌ بزانم چون و به‌ چ شێوه‌ێه‌ک هه‌ڵس و که‌وت له‌گه‌ڵ ئه‌م مه‌سه‌له‌یه‌ ده‌که‌ن. دوکتور که‌ماڵ تاوانبار نیه‌ و نابێ به‌ هیچ شێوه‌یه‌ک ئاسایش ته‌داخول بکات و بشداری کردنی ئاسایش کێشه‌که‌ ئاڵۆزتر ده‌کا. نابێ پارتی دیموکرات و ئاسایشه‌که‌ی ئه‌وه‌ له‌ بیر که‌ن که‌ دوکتور که‌ماڵ هاو وه‌ڵاتی ئه‌وروپایه‌ و ئه‌م کرده‌وه‌یه‌ی ئه‌وان مورکی ڕه‌ش به‌ ناوچاوانی خه‌باتی ڕزگاریخۆازانه‌ی گه‌له‌که‌مانه‌وه‌ ئه‌نێ. نه‌ ئاسایشی هه‌ولێر به‌ ئه‌ندازه‌ی ئیستخبارتی عێراقی و نه‌ پارتی دیموکراتی مه‌سعود با رزانی به‌ ئه‌ندازه‌ی حیزبی به‌عسی عه‌ره‌بی ده‌سه‌ڵاتیان هه‌یه‌ . ده‌با ئه‌وه‌یان له‌ به‌ر چاو بێ که‌ دنێا هه‌روا نابێ و گۆڕانی به‌ سه‌ر دا دێ... لێ گه‌ڕێن یاسا و دادگا کاری خۆیان بکه‌ن ، ئه‌گه‌ر یاسا و دادگا له‌ باشور دا هه‌ن و ڕه‌واجیان هه‌یه‌...؟ ئه‌گه‌ر دوکتور که‌ماڵ نه‌خۆشی نه‌فسی هه‌بێ ئه‌وا بێ گومان به‌ حکومی سه‌رۆک وه‌زیرانی هه‌ولێر ئازاد ئه‌کرێ، ده‌نا ده‌بێ چاوه‌ڕوانی کاره‌سات بین...؟؟؟

051029

Friday, October 28, 2005

له‌ شاری مهاباد جارێکی دیکه‌ سه‌رهه‌ڵدان


له‌ شاری مهاباد جارێکی دیکه‌ سه‌رهه‌ڵدان

ده‌وروبه‌ری نیوه‌شه‌وی سێشممه‌ 25ی ئۆکتۆبه‌ر ژماره‌یه‌ک له‌لاوانی شاری مهاباد له‌ چوار ڕێی سه‌ربه‌خۆیی واته‌ ئیستقلالی مهاباد سه‌باره‌ت به‌ ده‌رکردنی بڕیاری ئێعدام بۆ یه‌کێک له‌ گیراوه‌کانی سه‌رهه‌ڵدانی چه‌ند مانگی ڕابردوو شاری مهاباد، به‌ هۆی کوشتنی یه‌کێک له‌ ئه‌فسه‌رانی ڕژیم له‌ مهاباد به‌ زه‌بری چه‌قۆ، کۆبوونه‌وه‌و‌ به‌ دژی ئه‌و بڕیاره ناڕه‌زایه‌تیان ده‌ربڕی.
ئه‌وکه‌سه‌ که‌ ده‌گوترێ له‌ لایه‌ن دادگای کۆماری ئیسلامیه‌وه‌ بڕیاری ئێعدامی بۆ دراوه، ناوی مسته‌فا ڕه‌سوڵ نیایه‌ که‌ له‌ ڕۆژانی سه‌ر هه‌ڵدانی مهابادو شاره‌کانی دیکه‌ی ڕۆژهه‌ڵاته‌وه‌ له‌ لایه‌ن هێزه‌کانی ڕژیمه‌وه‌ بنچاڤکراوه‌. ده‌گوترێ خۆپیشانده‌ران دروشمی دژی ڕژیمیان داوه‌و داوای ئازادی به‌ندییه‌ سیاسیه‌کان و هه‌ڵوه‌شانه‌وه‌ی بڕیاری ئێعدامی مسته‌فا ڕه‌سوڵ نیایان ‌کردوه‌.
"مارف سه‌مه‌دی شاره‌داری مهاباد به‌ گێڕانه‌وه‌ له‌ دادستێنی ئه‌وشاره‌ ‌ڕایگه‌یاند که‌ له‌ماوه‌ی چه‌ند مانگی ڕابردوه‌وه‌ هیچ بڕیارێکی ئێعدام له‌ دادگاکانی مهاباده‌وه‌ ده‌رنه‌چوه‌ و سه‌‌باره‌ت به‌ فاییلی که‌سی گومان لێکراو به‌ کوشتنی ئه‌فسه‌رێکی ئاسایش، هێشتا له‌ قۆناخی سه‌ره‌تایی دایه‌و تا ئێستا هیچ بڕیارێکی له‌سه‌ر نه‌دراوه‌."
هه‌روه‌ها"جافری ئایین په‌ره‌ست نوێنه‌ری مهاباد له‌ پارلمانی ئێران به‌ بی‌بی سی گوتوه‌ که‌ ده‌سه‌ڵاتدارانی پایه‌به‌رزی هێزی دادوه‌ری له‌ تاران ئه‌ویان دڵنیا کردوه‌ که‌ هیچ بڕیارێکی ئێعدام له‌‌م په‌یوه‌ندییه‌دا ده‌رنه‌چووه‌."
بێگومان ئه‌م ده‌ربڕینانه‌ ده‌گه‌ڕێنه‌وه‌ بۆ ترسی هێزه‌کانی ڕژیم و ده‌سه‌ڵاتداران سه‌باره‌ت به‌ سه‌رهه‌ڵدانه‌وه‌‌ی بێزاریی و توڕه‌یی جه‌ماوه‌ری ڕۆژهه‌ڵاتی کوردستان له‌ ڕژیم.
جێی وه‌بیرهێنانه‌وه‌یه‌ که‌ حکومه‌تی کۆماری ئیسلامی، له‌ دوای ڕووداوه‌کانی ئه‌م دواییه‌ی شاری مه‌هاباد، به‌رده‌وام هێزه‌کانی به‌ناو ئاسایش پارێزی له‌و گه‌ڕه‌کانه‌ که‌ به‌ گه‌ڕه‌که‌ مه‌ترسیداره‌کانیان ناو ده‌بن جێگیر کردوه‌ و گوێقوڵاخی ده‌نگ و جوڵه‌ی جه‌ماوه‌ری تێکۆشه‌ر بوون. پاش ئه‌و کۆبوونه‌وه‌ جه‌ماوه‌رییه‌ ڕژیم هێزێکی زۆری به‌ره‌و ئه‌و گه‌ڕه‌که‌ هێناوه‌و پاش ئه‌وه‌ی کۆبوونه‌وه‌که‌ بۆته‌ خۆپیشاندان، له‌ درێژه‌ی خۆپێشاندانه‌که‌دا له‌ نێوان هێزه‌کانی به‌نێو ئاسایش پارێزو خه‌ڵک تێکهه‌ڵچوون هاتۆته‌ ئاراوه‌. هێزه‌کانی ڕژیم‌ له‌و خۆپێشاندانه‌ دا چه‌کیان به‌ کار هێناوه‌ و به‌ پێی هه‌واڵه‌کان له‌و پێکدادانانه‌دا ژماره‌یه‌ک له‌ جه‌ماوه‌ری توڕه‌ بریندار بوون و هێزه‌کانی ڕژیمیش زیانیان پێگه‌یشتوه‌. ژماره‌یه‌ک له‌ به‌شداربوانی خۆپێشاندانه‌که‌ له‌ لایه‌ن هێزه‌ داپڵۆسێنه‌ره‌کانه‌وه‌ بنچاڤکراون. ڕاده‌ی به‌شدارانی خۆپیشاندانان به‌ سه‌دان که‌س مه‌زه‌نده‌ کراوه‌. ده‌گوترێ که‌ مسته‌فا ڕه‌سووڵ نیا، که‌ له‌ ئه‌نجامی ڕووداوه‌کانی دوای کوشتنی شوانه‌ سه‌ید قادری به‌ تۆمه‌تی کوشتنی ئه‌فسه‌رێکی هێزی به‌ ناو ئاسایش پارێز، ده‌ستگیر کرابوو وه‌ به‌ هۆی لێدان و ئه‌شکه‌نجه‌یه‌کی زۆر دیانی به‌وه‌دا داناوه‌ که‌ له‌ کوشتنی ئه‌و ئه‌فسه‌ره‌ دا ده‌ستی هه‌بوه‌، به‌ڵام له‌ کاتی دادگاییکردنییدا حاشای له‌و تۆمه‌ته‌ کردوه‌ و پێی له‌سه‌ر ئه‌وه‌ داگرتوه‌ که‌ ئه‌و نه‌یکوشتوه‌.
"ژماره‌ی کوژراوانی هێزه‌کانی به‌ نێو ئاسایش پارێزی ڕژیم که‌ تا‌ نیوه‌ی یه‌که‌می ئه‌م ساڵ له‌ ماوه‌ی شه‌ش مانگدا له‌ تێکهه‌ڵچوون له‌ ناوچه‌کانی ڕۆژهه‌ڵاتی کوردستان کوژراون، 120 که‌سن و 62که‌سیش بریندار بوون.
به‌وجۆره‌ی که‌ به‌رپرسانی هێزی دادوه‌ری ئێران ڕایانگه‌یاندووه‌ زۆربه‌ی ئه‌و کوژراوانه‌ له‌ تێکهه‌ڵچوونی ناوچه‌ سنوریه‌کاندا کوژراون، جگه‌ له‌ که‌سێکیان که‌ له‌ شاری مهاباد و به‌ زه‌بری چه‌قۆ کوژراوه‌، که‌ پێیده‌چێ هه‌ر ئه‌وه‌ بێ که‌ گویا مسته‌فا ڕه‌سوڵ نیا کوشتویه‌تی و هه‌ر له‌سه‌ر ئه‌وه‌ش بڕیاری ئێعدامی بۆ بڕاوه‌ته‌وه و سه‌ره‌نجام ئه‌و خۆپیشاندانه‌ی ڕۆژی سێشه‌ممه‌ی لێکه‌وتۆته‌وه‌."

سه‌رچاوه‌: بی بی سی ، سایتی ڕۆژهه‌ڵات، ئاڕشیوی کوردستان

Tuesday, October 25, 2005

پارلمان


سه‌باره‌ت به‌ ڕه‌نگدانه‌وه‌ی په‌یڤه‌کانی عامر موسا له‌ ناو پارلمانی باشوری کوردستاندا له‌ لاپه‌ڕه‌ی سێهه‌می هه‌فته‌نامه‌ی مێدیادا چه‌ند سه‌رنج و ڕامانێکی پارلمانتاره‌کانی پارلمانی باشوری کوردستان لێره‌ بخوێنه‌وه‌...

نه‌ده‌بوو ڕێگه‌ به‌ سه‌رۆکی کۆمکاری عه‌ره‌بی بداریه‌ بێته‌ کوردستان؟

نه‌ده‌بو ڕێگه‌ به‌ سه‌رۆکی کۆمکاری عه‌ره‌بی بدرایه‌ بێته‌ کوردستان؟!!
نوسینی: هیوا گوڵ محه‌مه‌دی

عه‌مرو موسا سه‌رۆکی کۆمکاری وه‌ڵاتانی عه‌ره‌بی هاوبیر و هاو پیاڵه‌ی سه‌دام حسێن و هاوپه‌یمانی حیزبی به‌عس بوه‌ و هاوکات له‌گه‌ڵ کورد کۆژی و کۆمه‌ڵکوژی حیزبی به‌عسی عه‌ره‌بی و ئه‌نفال کردن و شیمیاباران کردنی کوردستان ، عه‌مرو موسا سه‌ردانی عێراقی ئه‌کرد و له‌ به‌رده‌م سه‌دام حسێن دا ئه‌نوشتایه‌وه‌ و سوجده‌ی بۆ ئه‌و کارانه‌ ئه‌برد و به‌ شان و باڵی سه‌دامی هه‌ڵ ده‌گوت و کۆشتن و ڕاو نانی کوردانی به‌ ڕه‌وا ئه‌زانی... ئه‌وکاته‌ که‌ سه‌دام حسێن کوردی ژێنوساید ئه‌کرد و به‌ به‌شداری چالاکی هاوپه‌یمانه‌ عه‌ره‌به‌کان و له‌ سه‌روی هه‌موانه‌وه‌ عه‌مرو موسا ، ویژدانی یه‌ک تاکه‌ عه‌ره‌ب ڕانه‌چڵه‌کی و نه‌یانوت به‌سه‌...

ئێستا که‌ سه‌دام له‌ قه‌فه‌سی تاوان کراوه‌ و وه‌ڵاتانی عه‌ره‌بی و سه‌روکه‌کانیان ناتوانن و ناوێرن له‌ کوله‌که‌ی ته‌ڕا بانگ بده‌ن ، که‌وتونه‌ته‌ پیلان گێڕان بۆ ئه‌وه‌ی عێراق بلکێته‌وه‌ به‌یه‌که‌وه‌ و کورد وه‌ک جاران ببێته‌وه‌ قوربانی ئه‌و وه‌ڵاته‌ ناباوه‌ و سه‌روه‌ت و سامانی نه‌ته‌وه‌که‌مان به‌ تاڵان به‌رن....

عه‌مروموسا سه‌روکی کۆمکاری وه‌ڵاتانی عه‌ره‌بی هاتوه‌ بۆ عێراق و سه‌ردانی کوردستانیشی کرد که‌ گویا ئه‌یه‌وێ کێشه‌ی نێوان لایه‌نه‌ عێراقیه‌کان نه‌هێلێ و یه‌کیان بخات. ئه‌وه‌ی که‌ بۆ عه‌ره‌بستان ئه‌گه‌ڕێته‌وه‌ هیچ پێوه‌ندی به‌ منه‌وه‌ نیه‌ و پێشم وانیه‌ به‌ عه‌مروموسا و به‌ هه‌مو وه‌ڵاتانی عه‌ربیش چاره‌سه‌ری کێشه‌کانیان بکرێ ، له‌به‌ر ئه‌وه‌ وه‌ڵاتانی عه‌ره‌بی له‌ دواکه‌وتوێی و ژێر ده‌سه‌ڵاتی دیکتاتوری دا ئه‌ژین .

سه‌رۆکی کوردستان به‌ڕێز مه‌سعود بارزانی نه‌ده‌بو پێشوازی له‌ عه‌مروموسا بکات و ئه‌گه‌ریش پێشوازی لێ کرد نه‌ده‌بو ئاڵای کوردستانی بشاردایه‌ته‌وه‌ و ده‌بو ئه‌و کابرایانه‌ ببردایه‌ته‌ ژێر ئاڵای کوردستان و هه‌ر له‌ ژێر ئه‌و ئاڵایه‌ش دا داوای لێبوردنی له‌ گه‌لی کورد بکردایه‌ بۆ ئه‌و جرم و جینایه‌تانه‌ی له‌ حه‌فتا ساڵی دواێیا عه‌رره‌ب به‌ کوردیان کردوه‌ و ناوبراویش ماوه‌ی زیاتر له‌ 25 ساڵ شاهید و شه‌ریکی ڕاسته‌وخۆ بوه‌... گه‌وره‌ترین هه‌ڵه‌ی سه‌رانی کورد وه‌ک هه‌مو کاتێ له‌وه‌ دایه‌ که‌ خۆیان له‌ عه‌مروموسا پێ بچوکتره‌ و به‌ شانازیه‌وه‌ پێشوازی لێ ئه‌که‌ن و نه‌ک هه‌ر ناوێرن پێی بڵێن که‌ دان به‌ ڕابردووتا بنێ ، به‌ڵکو ئه‌یبه‌نه‌ پارله‌مانی کوردستان که‌ له‌وێ قسه‌یان بۆ بکات و پێان بڵێ ئێوه‌ به‌شێکن له‌ کۆمه‌ڵگای عه‌ره‌بی عه‌زیم و ئه‌مانیش چه‌پڵه‌ی بۆ لێ ده‌ن...

نه‌ده‌بو مام جه‌لال و کاک مه‌سعود به‌ جیا دیداریان له‌گه‌ڵ دا بکردایه‌ و زور گرینگ بو که‌ په‌رله‌مانی کوردستان پێشوازی لێ بکردایه‌ و پاشان مامه‌ و کاکه‌ له‌ هه‌ڵه‌بجه‌ چاویان به‌ عه‌مروموسا بکه‌وتایه‌ و ناوبراو له‌ به‌رده‌م گۆڕستانی شیمیا بارانکراوانی هه‌ڵه‌بجه‌ دا سه‌ری دانه‌وانایه‌... زور جێگای داخه‌ که‌ مام جه‌لال و کاک مه‌سعود ئێستاش له‌ جێگا و مه‌قامی خۆیان تێ ناگه‌ن و هه‌روا ئه‌زانن سه‌دام له‌ سه‌ر حوکمه‌ و ئه‌مانیش له‌ عه‌مروموسا ئه‌پاڕێنه‌وه‌ که‌ چاوپێکه‌وتنیان له‌گه‌ڵ دا بکات... ئه‌مڕۆ عه‌ره‌ب پێویستیان به‌ کورد هه‌یه‌ و له‌وه‌ ئه‌ترسن که‌ کورد بکه‌وێته‌ به‌ره‌ی ئیسرائیل و ئیمریکا ( ئه‌گه‌ری چی ده‌بێ ئه‌و کاره‌ بکات) و ئه‌یانه‌وێ کورد وه‌ک عێراقی بمێنێته‌وه‌....

ئه‌و پارله‌مانتاره‌ کوردانه‌ و سه‌روک و بن سه‌رۆکی پارله‌مان ده‌بێ داوای لێ بوردن له‌ گه‌لی کورد بکه‌ن که‌ ده‌می خۆیان به‌ست و نه‌یان وێرا به‌ عه‌مروموسا بڵێن : کورد به‌شێک له‌ کۆمه‌ڵگای عه‌ره‌بی نیه‌ و به‌شێکه‌ له‌ کومه‌ڵگای کوردی کوردستانی گه‌وره‌...
ئێوه‌ ئه‌ی پارله‌مانتارانی کورد له‌ پارله‌مانی کوردستان که‌ مانگانه‌ به‌ هه‌زاران دولار وه‌ر ئه‌گرن و سۆێندتان خۆارد که‌ به‌رژه‌وه‌ندیه‌ به‌رزه‌کانی گه‌له‌که‌تان بپارێزن ، تاوانبارن ، که‌ نه‌ک هه‌ر به‌رژه‌وه‌ندیه‌کانتان نه‌پاراست به‌ڵکو پێناسه‌ و ناسنامه‌ی نه‌ته‌وه‌یشتان خسته‌ ژێر پرسیار و کردنتانه‌ پاشکۆی عه‌ره‌ب...

ئه‌مجاره‌ش پێچه‌وانه‌ی چاوه‌ڕوانیه‌کان سه‌روکی حیزبه‌ کوردیه‌کان هه‌رکامه‌یان چونه‌ باره‌گاکانیان و که‌وتنه‌ مه‌عامه‌له‌ کردن و پاراستنی به‌رژه‌وه‌ندیه‌ تایبه‌تیه‌کانی خۆیان ، ده‌نا عه‌مروموسا نه‌ده‌بو ڕێگای پێ بدرێ بێته‌ کوردستان ئه‌گه‌ر ئاماده‌ نه‌بایه‌ داوای لێبوردن له‌ گه‌لی کورد بکات و مافی نه‌ته‌وه‌ێی گه‌لی کورد به‌ ڕه‌سمی بناسێ .

ئاخر ئه‌گه‌ر له‌ سه‌ر کورسی سه‌رۆکی کوردستان ئاڵای کوردستان نه‌شه‌کێته‌وه‌ و له‌ پارله‌مانی کوردستان دا مارشی عێراق پێش سرودی نه‌ته‌وایه‌تی کورد بخۆێنرێ ، عه‌مروموساش هه‌ر ئه‌و هه‌ڵۆێسته‌ ئه‌گرێ که‌ گرتی و به‌ خۆشی ده‌ڵێ ئه‌مانه‌ هه‌ر هه‌مان که‌سه‌ بچکوله‌کانن که‌ ناتاونن سه‌رۆکایه‌تی نه‌ته‌وه‌که‌یان بکه‌ن و منیش نابێ زور گه‌وره‌یان که‌مه‌وه‌...

من تێ ناگه‌م سرودی نیشتمانی عێراقی بۆ ده‌بێ له‌ پارله‌مانی کوردستان دا پێش سرودی ئه‌ی ڕه‌قیب بخرێ ...؟؟

051024

Sunday, October 23, 2005

یه‌کیه‌تی نیشتمانی بنکه‌یه‌کی حیزبی دیموکراتی کوردستانی ئێرانی داخست

یه‌کیه‌تی نیشتمانی بنکه‌یه‌کی حیزبی دیموکراتی کوردستانی داخست
نوسینی: هیوا گوڵ محه‌مه‌دی

حیزبی دیموکراتی کوردستان له‌ گه‌لاوێژی هه‌زار و نوسه‌د و چه‌ل و شه‌ش له‌ مه‌هاباد دامه‌زرا و پێشه‌وا قازی محه‌مه‌دی وه‌ک ڕێبه‌ر هه‌ڵبژارد ، ئه‌و ڕێبه‌ره‌ی که‌ بۆ به‌ یه‌که‌م سه‌رۆک کۆماری کورد و تا دواێین هه‌ناسه‌ به‌ گه‌ل و نیشتمان و به‌ڵێنه‌کانی وه‌فادار مایه‌وه‌.

کاتێک که‌ به‌ پیلانێکی نامروڤانه‌ ده‌سه‌ڵاتی پاشایه‌تی له‌ ئێران دا گێانی گرته‌وه‌ و هێرشی کرده‌ سه‌ر کوردستان و به‌ هوی خه‌یانه‌تی سه‌روک عه‌شیره‌ته‌کانی ئه‌وکاته‌ی ڕۆژهه‌ڵاتی کوردستان و نه‌بونی پشت و په‌نایه‌ک ، کۆماری کوردستان دوای یازده‌ مانگ ڕوخا ، پێشه‌وا قازی محه‌مه‌د هه‌مو ئێمکانێکی هه‌بو که‌ هه‌ڵێ و کوردستان به‌ جێ بێلێ و له‌ سۆڤیه‌تی ئه‌وکات ببێته‌ په‌نابه‌ر. به‌ڵام پێشه‌وا ژیانی کورت و سه‌ربه‌رزانه‌ی هه‌ڵبژارد و ئاماده‌ نه‌بو پشت له‌ گه‌له‌که‌ی بکات و به‌جێیان بێلێ که‌ ببنه‌ قوربانی هێزه‌ قین له‌ دڵ و داگیرکه‌ره‌ ئێرانیه‌کان و سه‌ر به‌رزانه‌ سه‌ری خۆی برده‌ بن داری بێداد.

ئه‌و کرده‌وه‌یه‌ی پێشه‌وا ڕێبوارانی ڕێگاکه‌ی و خه‌باتگێڕانی حیزبی دیموکراتی کوردستانی فێر کرد که‌ سه‌ربه‌خۆ بژین، ئه‌گه‌ر نرخه‌که‌شی گران بێت . هه‌ر بۆیه‌ له‌ ماوه‌ی په‌نجا ساڵی ته‌واو دا بێجگه‌ له‌ ده‌ورانێکێ که‌م نه‌بێ حیزبی دیموکرات به‌ یه‌کێک له‌ حیزبه‌ خاوه‌ن هه‌ڵۆێست و سه‌ربه‌خۆکانی کورد ده‌ژمێردرێ.

ئه‌و ده‌ورانه‌ که‌مه‌ش که‌ حیزبی دیموکرات که‌وته‌ بن ده‌ستی بارزانی له‌ باشوری کوردستان ، گیانی به‌رپرسێاره‌تی له‌ ده‌س نه‌داو و به‌ لابردنی ئه‌حمه‌د توفێق سکرێتری ئه‌وکاته‌ی حیزب ، سه‌ربه‌خۆێی خۆی پاراست ،هه‌رچه‌ند به‌ گیانی باشترین ڕۆڵه‌کانی گه‌لی کورد و کادره‌کانی ئه‌و حیزبه‌ ، به‌هاکه‌ی درا.

له‌ 1979 تا 1990 حیزبی دیموکراتی کوردستان له‌ شه‌ڕێکی دژوار دا بووه‌ به‌رانبه‌ر به‌ هێزه‌کانی کۆماری ئیسلامی ئێران. حیزبی دیموکراتی کوردستان بۆ ئه‌وه‌ی بتوانی ئه‌و خه‌باته‌ی به‌ڕێوه‌ به‌رێ ناچار بوه‌ که‌ له‌ ئیمکاناتی حکومه‌تی عێراق که‌ڵک وه‌ر گرێ ، به‌ڵام پاش ڕوخانی حکومه‌تی حیزبی به‌عس و سه‌دام حسێن ، یه‌ک به‌ڵگه‌نامه‌ی بچوک ده‌ر نه‌که‌وت که‌ ئه‌و حیزبه‌ له‌ ماوه‌ی 30 ساڵ هاوپه‌یمانه‌تی دا له‌گه‌ڵ ئه‌و ده‌سه‌ڵاته‌ هاوکاریه‌کی نابه‌جێی کردبی یان دژی جوڵانه‌وه‌ی باشوری کوردستان توشی هه‌ڵه‌ بوبێ.
دیاره‌ له‌ ماوه‌ی ئه‌و یازده‌ ساڵه‌ دا حیزبی دیموکراتی کوردستان بێجگه‌ له‌ پارتی دیموکراتی کوردستان ، دوستایه‌تی و له‌ هێندێ قۆناغیش دا هاوپه‌یمانی هه‌بوه‌ له‌گه‌ڵ حیزبه‌کانی باشور و له‌ سه‌روی هه‌موانه‌وه‌ یه‌کیه‌تی نیشتمانی کوردستان.

حیزبی دیموکراتی کوردستان به‌ سه‌رۆکایه‌تی شه‌هیدی سه‌رکرده‌ دوکتور عه‌بدولڕه‌حمانی قاسملو ، زور جار گێانی ده‌یان ئه‌ندام و بگره‌ هه‌مو سه‌رکردایه‌تیه‌که‌شیان خستوه‌ته‌ مه‌ترسیه‌وه‌ له‌ پێناو یه‌کیه‌تی نیشتمانی و وه‌ک نمونه‌ ئه‌وکاته‌ی که‌ یه‌کیه‌تی نیشتمانی پێش پاسداره‌کانی ئێرانی که‌وتبو و ببوه‌ به‌شێک له‌ قه‌رارگای ڕه‌مه‌زان ، حکومه‌تی عراقی ئاوری له‌ سێبه‌ری یه‌کیه‌تی نیشتمانی و پێشمه‌رگه‌ی ئه‌و به‌شه‌ی وه‌ڵاته‌که‌مان به‌ر ئه‌دا . به‌ڵام برینداره‌کانی یه‌کیه‌تی نیشتمانی له‌ بنکه‌کانی حیزب دا، داو و ده‌رمان ئه‌کران و مام جه‌لال له‌ نه‌خۆشخانه‌ی حیزب دا پێشوازی لێ ده‌کرا و چاره‌سه‌ری نه‌خۆشیه‌کی ئه‌کرا و ڕێبه‌رایه‌تی حیزبی دیموکرات وازیان له‌ کاره‌کانی خۆیان ئه‌هێنا و به‌ دیار سه‌ریه‌وه‌ ده‌بون.

له‌ 1991 دوای کۆڕه‌وه‌که‌ و کێشانی هێڵی 36 ده‌ره‌جه‌ ، مام جه‌لال سه‌ردانی سه‌رکردایه‌تی حیزبی دیموکراتی کوردستانی کرد له‌ بناری قه‌ندیل و داوای لێ کردن که‌ دژی هێزه‌کانی کۆماری ئیسلامی ئێران جم وجوڵ نه‌که‌ن و هه‌ل و مه‌رجی ناسکی ئه‌وان له‌ به‌رچاو بگرن.

شه‌هید دوکتۆر سه‌عید ( دوکتۆر سادق شه‌ره‌فکه‌ندی) سکرتێری ئه‌و کاته‌ی حیزب له‌ وه‌ڵامی مامه‌ دا وتی: ئێمه‌ ئاماده‌ین واز له‌ چه‌که‌کانمان بێنین له‌ پێناو ئه‌م به‌شه‌ی نیشتمانه‌که‌مان دا و ئه‌وه‌ش هه‌ر هه‌مان هه‌ڵۆێستی پێشه‌وای نه‌مری نیشان ئه‌دایه‌وه‌ که‌ له‌ دادگا دا به‌سه‌ر جه‌لاده‌کانی دا گۆڕاند و وتی : مه‌لامه‌سته‌فا بارزانی بێگانه‌ نیه‌ و هاتوه‌ بۆ وه‌ڵاتی خۆی.

له‌ ده‌ورانی شه‌ڕی یه‌کێتی و پارتی دا حیزبی دیموکرات بێده‌نگی هه‌ڵبژارد و نه‌بوه‌ ئامرازی ئه‌و ئاگره‌ ناڕه‌وایه‌ و هه‌ر چه‌ند به‌ له‌ ده‌س دانی هه‌زاران ئه‌ندام و کادر و پێشمه‌رگه‌یان ته‌واو بو و له‌ نێو ئه‌وانه‌ش دا مه‌نسور ڕه‌شه‌ هه‌ورامی ئه‌ندامی سه‌رکردایه‌تی ، سه‌ی مه‌نسور ، شاروخ مورادی و ....ده‌یان که‌سی دیکه‌ هه‌ن که‌ ده‌یان ساڵ دژی کۆماری ئیسلامی ئێران له‌ سه‌نگه‌ری پێشه‌وه‌ دا بون و له‌ لای خه‌ڵکی ڕۆژهه‌ڵاتی کوردستانه‌ جێگای خۆشه‌ویستی و هیوا بون.

له‌وه‌ته‌ی باشوری کوردستان له‌ هێرشی سه‌دام حسێن پارێزراوه‌ و هه‌تا ئێستاش حیزبی دیموکراتی کوردستان له‌ لایه‌ن یه‌کێتی نیشتمانی کوردستانه‌وه‌ گه‌وره‌ترین بێ ڕێزی پێ کراوه‌ و ده‌کرێ و گۆڕه‌پانی خه‌باتی لێ به‌رته‌سک ده‌کرێته‌وه‌ و ئه‌وه‌ی کۆماری ئیسلامی ئێران پێی ناکرێ و نه‌کراوه‌ یه‌کێتی نیشتمانی کوردستان به‌ ئاسانی ئه‌نجامی ئه‌دات.

ئه‌گه‌ر چی حیزبی دیموکراتی کوردستان وه‌ک ئه‌زموون‌ و پێگه‌یشتن و تێگه‌یشتنی خۆی پشوی له‌ سه‌رخۆیه‌ و ده‌نگ هه‌ڵنابڕێ و ئه‌و زه‌لیلیانه‌ هه‌ڵ ده‌بژێرێ له‌ به‌رانبه‌ر به‌ستراوه‌ێی و لایه‌نگری دا ، به‌ڵام له‌وه‌ ئه‌چێ یه‌کیه‌تی نیشتمانی کوردستان سنورێک بۆ ئه‌و کرده‌وانه‌ی نه‌ناسێ و به‌رده‌وام بێ بۆ خزمه‌ت کردنی کۆماری دژی گه‌ل ، دژه‌ مرۆڤ و دژه‌ کوردی کۆماری ئیسلامی ئێران.

دوو ساڵ له‌مه‌وبه‌ر حیزبی دیموکراتی کوردستان له‌ ڕێگای ئه‌ندام و لاینگرانیه‌وه‌ پاره‌یه‌کی زۆری کۆ کرده‌وه‌ بۆ دامه‌زراندنی کاناڵێکی ڕاگه‌یاندنی ساتالایتی و له‌گه‌ڵ کۆمپانیایه‌کی بڵاوکردنه‌وه‌ی ئیمریکایش دا ڕێک که‌وتن و قه‌رار وا بۆ له‌ باشور بنکه‌ی بۆ بکه‌نه‌وه‌ و به‌رنامه‌ بۆ ڕۆژهه‌ڵاتی کوردستان بڵاو بکه‌نه‌وه‌ ، به‌ڵام یه‌کێتی نیشتمانی کوردستان ڕێگای پێ نه‌دان و له‌ وه‌ڵامی داواکاریه‌که‌ی حیزبی دیموکرات بۆ وه‌رگرتنی موڵه‌تی بنکه‌ دانان دا وتی ئه‌گه‌ر زۆری له‌سه‌ر بڕۆن ڕادیوکه‌شتان دائه‌خه‌ین ....

حه‌وتوی ڕابردوو هێزه‌کانی ئاسایشی یه‌کێتی نیشتمانی به‌ شێوه‌یه‌کی کوت و پڕ و چاوه‌ڕوان نه‌کراو هه‌ڵیان کوتایه‌ سه‌ر بنکه‌ی حیزبی دیموکراتی کوردستان له‌ شاری سلێمانی و ئه‌ندامانی حیزبیان وه‌ده‌ر ناو و بنکه‌که‌یان داخست .
بیانوی یه‌کێتی و ئاسایشه‌که‌ی ئه‌وه‌یه‌ که‌ ئه‌و بنکه‌یه‌ موڵه‌ته‌ی یاساێی نیه‌ ، به‌ڵام له‌ ڕاستی دا ته‌نیا خزمه‌ت کردنه‌ به‌ کۆماری ئیسلامی ئێران و شه‌رمێکی دیکه‌یه‌ به‌ ناوچاوانی سه‌رکردایه‌تی چه‌واشه‌کاری یه‌کیه‌تی نیشتمانی کوردستان...

له‌ ده‌ورانی ده‌سه‌ڵاتی حیزبی به‌عس دا حیزبی دیموکراتی کوردستان به‌رده‌وام له‌ شاری سلێمانی بنکه‌ی هه‌بوه‌ و خه‌ڵکی ئه‌و شاره‌ به‌ ڕێزه‌وه‌ سه‌یریان کردوه‌ و قه‌ت جارێ له‌ جاران ئه‌ندامێکی ئه‌و حیزبه‌ بچوکترین هه‌ڵه‌ی به‌را‌نبه‌ر به‌ دانیشتوانی ئه‌و ناوه‌ نه‌کردوه‌ ، که‌چی ئێستا ده‌سه‌ڵاتی یه‌کێتی به‌ ناوی موڵه‌تی یاساێی و ...ناهێڵێ بچوکترین ئاسه‌وار له‌ حیزبی دیموکراتی کوردستانی بهێڵێ که‌ ببێته‌ هوی نیگه‌رانی سه‌رانی کۆماری ئیسلامی ئێران له‌ کاتی سه‌ردانێان له‌ سه‌رکردایه‌تی ئه‌و حیزبه‌ و حسێنیه‌کانی سلێمانی.

ئه‌گه‌رچی حیزبی دیموکراتی کوردستان بێده‌نگه‌ و هیچ ناڵێ و ئه‌مه‌ش گه‌وره‌ێی و هه‌ست به‌ برپرسێاره‌تی ئه‌و جه‌ره‌یانه‌ سیاسیه‌ ده‌گه‌یه‌نێ ، ده‌بێ یه‌کێتی نیشتمانی کوردستان ئاوڕێک له‌ ڕابردوو بداته‌وه‌ و تێبگات که‌ ئه‌وه‌ حیزبی دیموکراتی کوردستان و گه‌لی کورد له‌ ڕۆژهه‌ڵاتی کوردستانن که‌ به‌رده‌وام له‌ سه‌نگه‌ری ئه‌وان دا ئه‌مێنن و پشتیوانیانن. کۆماری ئیسلامی ئێرانیش وه‌ک شا و سه‌دام مه‌حکومی له‌ نێۆ چونه‌... که‌وا بو سه‌رکردایه‌تی یه‌کێتی نیشتمانی کوردستان سنورێک بۆ ئه‌م کاره‌انه‌یان دانێن که‌ بتوانن له‌ داهاتو دا شه‌رم نه‌یانگرێ و بتوانن چاو له‌ چاوی گه‌له‌که‌یان له‌ ڕۆژهه‌ڵات بکه‌ن.

تێبینی: من له‌م نوسینه‌ دا باسی هێندێ شتم کردوه‌ که‌ هه‌موویان ئه‌سڵی مێژویان هه‌یه‌. من نه‌ ویستومه‌ لایه‌نی حیزبی دیموکرات بگرم و نه‌ ئه‌ندامی ئه‌و حیزبه‌شم و نه‌ بۆ ماستاو سارد کردنه‌وه‌ش ئه‌م هه‌ڵوێسته‌م گرتوه‌ ، به‌ڵکو وه‌ک کوردێکی نه‌ته‌وه‌ی خۆم به‌ به‌رپرسیار ئه‌زانم و ئه‌وه‌ی پێم ڕاست و به‌ جێ بێ ئه‌ینوسم.

051024

Saturday, October 22, 2005

سه‌رۆکی هه‌رێمی کوردستان به‌بێ ئاڵای کوردستان له‌گه‌ڵ عامر مووسا دانیشت

سه‌رۆکی هه‌رێمی کوردستان به‌بێ ئاڵای کوردستان له‌گه‌ڵ عامر مووسا دانیشت

عامر موسا گه‌یشته‌ کوردستان و له‌ فڕگه‌ی نێونه‌ته‌وه‌یی هه‌ولێره‌وه‌ له‌ لایه‌ن سه‌رۆکی حکومه‌تی هه‌رێمی کوردستان- هه‌ولێره‌وه‌ پێشوازی لێکرا و به‌ره‌و سه‌رۆکایه‌تی ئه‌نجومه‌نی شالیارانی کوردستان بردیان و له‌وێش له‌ لایه‌ن سه‌رۆکی هه‌رێمی باشوری کوردستانه‌وه‌ پێشوازی لێکراوه‌. وه‌ک په‌یامنێر بڵاویکرده‌وه‌ و کوردسات و کوردستان تیڤیش وه‌شاندیان کۆبوونه‌وه‌که‌ به‌رده‌وام بوه‌و بڕیاره‌ له‌ کۆتاییدا بۆ ده‌زگاکانی ڕاگه‌یاندن بدوێن. ڕه‌نگه‌ ئێستا که‌ من ئه‌و هه‌واڵه‌ی ده‌نوسم کۆبوونه‌وه‌که‌یان ته‌واو کردبێ.

هه‌واڵه‌ نوسراوه‌که‌ی په‌یامنێر سه‌رنجی ڕانه‌کێشام به‌ ڕاده‌ی ئه‌وه‌ی وه‌ک خۆیان ئێژن "وێنه هه‌واڵ"ه‌که‌. چاوێک له‌وێنه‌که‌ بکه‌ن، ده‌بینن سه‌رۆکی هه‌رێمی باشوری کوردستان ئه‌گه‌رچی وه‌ک سه‌رۆکی هه‌رێمی کوردستان له‌گه‌ڵ سه‌رۆکی کۆمه‌ڵه‌ی وڵاتانی عاره‌بی دانیشتوه‌ و هه‌واڵه‌کانیش وائێژن، که‌چی ئاڵاکه‌ی کوردستان که‌ وه‌ک باوه‌ له‌ لای شانی ڕاستی بارزانیه‌وه‌ داده‌نرێ دیار نیه‌. ئه‌وه‌ جێی پرسیاره‌، بۆ ئاڵاکه‌ لابراوه‌؟ بۆ ئاڵاکه‌ له‌ ڤێره‌ نه‌ماوه‌، له‌سه‌ر داوی کێ شاردراوه‌ته‌وه‌ و له‌ پێناوی چی ئه‌مکاره‌ کراوه‌. بێگومان بارازانی وه‌ک که‌س ئاساییه‌ به‌ بێ ئاڵاو هێما له‌ هه‌ر شوێنێک و له‌گه‌ڵ هه‌ر که‌سێک ڕۆنیشێ و بپه‌یڤێ. به‌ڵام مادام ئێژن سه‌رۆکی هه‌رێمی کوردستان گه‌ره‌که‌ ڕێز له‌ شوێنه‌که‌ی بگرێ و بۆ هیچ شتێک به‌ بێ ئه‌و هێمایه‌ له‌ هه‌رێمی کوردستان و له‌ ناو داموده‌زگا فه‌رمیه‌کان و به‌تایبه‌ت له‌ ناو کۆشکی شالیارانی هه‌رێمدا خۆی نیشان نه‌دا و کۆنه‌بێته‌وه‌!. بێگومان وه‌ک سووننه‌کان چۆن له‌ مسگتێکدا له‌گه‌ڵ ئه‌و کابرایه‌ کۆبوونه‌وه‌ ئه‌و به‌ڕێزه‌ش ده‌یتوانی له‌ ماڵی خۆی له‌ هۆتێلێک یان له‌ هه‌ر شوێنێکی دیکه‌ له‌گه‌ڵیا وه‌ک مه‌سعود بارزانی یان وه‌ک سه‌رۆکی حزبه‌‌که‌ی دابنیشێ. ئاخر ئه‌و عاره‌به‌ بێ حه‌گاله‌ هه‌موو هه‌وڵی ئه‌وه‌ بوو که‌ له‌ ده‌ستوردا ئێراق به‌ کوردستانیشه‌وه‌ بکاته‌ نیشتمانی خزمه‌کانی. تۆ بڵێ چ دیاریه‌ک جگه‌ له‌ به‌ عاره‌بی کردنه‌وه‌ی ئێراق به کوردستانه‌وه‌‌ی پێبێ وا سه‌رۆکی هه‌رێمی کوردستان ئاماده‌ بوو ئاڵاکه‌ی ته‌نیشتی خۆی لابه‌رێ! و گوێنه‌داته‌ شوێن و جێگاو هه‌ستی خه‌ڵکی هه‌رێمه‌که‌ی. وڵامه‌که‌ی .............

Monday, October 17, 2005

نه‌ته‌وه‌یه‌ک که‌ ته‌نێا حه‌قی هه‌یه‌ بڵێ ، به‌ڵێ!!!


نه‌ته‌وه‌یه‌ک که‌ ته‌نێا حه‌قی هه‌یه‌ بڵێ ، به‌ڵێ!!!
نوسینی: هیوا گوڵ محه‌مه‌دی
کورد زیاتر له‌ چوار سه‌د ساڵه‌ بن ده‌سته‌ و هه‌روا به‌ بن ده‌ستیش ماته‌وه‌ ، له‌م بن ده‌ست بونه‌ش دا ته‌نێا نه‌یاران و داگیرکاران تاوانبار نین ، به‌ڵکو کورد بۆ خۆی تاوانباری سه‌ره‌کیه‌. قه‌بوڵ کردنی بن ده‌ستی گه‌وره‌ترین تاوانه‌ ، رازی بون به‌ بن ده‌ستی تاوانه‌ و ڕێگه‌ خۆش کردن و ڕێ کردنه‌وه‌ بۆ زۆڵم تاوانه‌ ، خه‌تایه‌ و شه‌رم. ئه‌وکاته‌ی که‌ گه‌لان بناغه‌ی ده‌سه‌ڵاتی نه‌ته‌وه‌یان دا ئه‌مزراندن ، سه‌رۆک عه‌شیره‌کانی کورد به‌ربوبونه‌ گێانی یه‌ک و هه‌رکامه‌یان په‌نای ده‌برده‌ به‌ر پاشایه‌کی بێگانه‌ و ئه‌بوه‌ ئاڵقه‌ له‌ گۆێ له‌ دژی لایه‌نه‌که‌ی دیکه‌ دا و دوژمن یان پاشایه‌که‌ش هیچ جایاوازیه‌کی له‌ نێوان ئه‌و دوو کورده‌ دا نه‌ئه‌کرد و که‌ کاره‌که‌ی ته‌واو ده‌بو و به‌ ئامانجه‌کانی ده‌گه‌یشت ، کورده‌ خۆفروشه‌که‌شی وه‌ک دوژمن حیساب ئه‌کرد... کورد له‌ دنیای شارستانیه‌ت به‌ جێ مان له‌ پێناو گه‌لانی دیکه‌ دا. بوینه‌ پرد و هه‌زاران که‌سمان کرده‌ پاشا و سه‌روه‌ر و سۆجده‌مان بۆ بردن به‌ڵام قه‌ت له‌ به‌رانبه‌ر خۆمانا سه‌رمان دا نه‌ نه‌وان.
له‌م چوارسه‌د ساڵه‌ دا هیچ گۆڕانێک به‌ سه‌ر ئه‌قڵ و تێگه‌یشتن و حاڵی بونمان دا نه‌هاتوه‌. ئێستاش که‌سانێک ئه‌کینه‌ گه‌وره‌ و ڕابه‌ر که‌ ئه‌وانیش ئه‌چن که‌سانێکی بێگانه‌ ئه‌که‌نه‌ ڕابه‌ری خۆیان و نه‌ته‌وه‌ و مافی نه‌ته‌وه‌که‌یان فه‌راموش ئه‌که‌ن و بۆ به‌ ده‌س هێنانی ماڵ و موڵک بۆ خۆیان هه‌مو فێڵێک له‌ نه‌ته‌وه‌که‌یان ئه‌که‌ن. ئێمه‌ی کورد له‌ سه‌ره‌تای سه‌د ساڵی بیست و یه‌که‌م دا ، نه‌ له‌ دیموکراسی تێ ده‌گه‌ین و نه‌ گێانی نه‌ته‌وایه‌تی و که‌سایه‌تی نه‌ته‌وه‌یمان به‌ هێزه‌.

له‌ کۆمه‌ڵگای ئێمه‌ دا هه‌تا ئێستاش ده‌نگی جیاواز نابیسرێ. هه‌مو که‌س ده‌بێ وه‌ک یه‌ک بیر بکه‌نه‌وه‌ ، هه‌مو که‌س ده‌بێ بچوک بن ، زه‌لیل و چاوله‌ده‌س بن... که‌ سه‌رۆکێک یان گه‌وره‌پیاوێک وتی به‌ڵێ: ده‌بێ هه‌موومان بڵیێن به‌ڵێ . ئه‌گه‌ر وتی نا ، ده‌بێ ئێمه‌ش بڵێین نا. پێچه‌وانه‌که‌ی خه‌یانه‌ته‌.

کاتێک ده‌ڵێین بۆ باسی سه‌ربه‌خۆێی ناکه‌ن ، ئاخر بوچی خۆمان به‌ وه‌ڵاتانی داگیرکه‌ره‌وه‌ به‌به‌ستین و بۆچی نابێ ڕاست و ڕه‌وان بڵێین که‌ مافی خۆمان ده‌وێ ، وه‌ڵاتی خۆمان ده‌وێ و ئاڵای خۆمان ده‌وێ...ده‌ڵێن کاکه‌ بێده‌نگ بن، ئێوه‌ ئاژاوه‌گێڕن ، ئێوه‌ تێ ناگه‌ن ، چوارده‌وره‌مان گیراوه‌، ده‌بێ هه‌مومان بکه‌وینه‌ خزمه‌ت ئه‌و توزقاڵه‌ به‌شه‌وه‌ که‌ وه‌رمان گرتوه‌ ، نابێ دڵی دراوسێکانمان بڕه‌نجێنین و ...

کوردستان وه‌ڵاتێکه‌ که‌ چوار سه‌د و په‌نجا هه‌زار کیلومتری چوارگوشه‌یه‌ و چل ملیون مروڤی تێدا ئه‌ژی و چوار وه‌ڵات ده‌وره‌یان داوه‌ ، به‌ڵام ئێسرائیل په‌نجا هه‌زار کیلومتری چوار گوشه‌ و سێ ملیون نه‌فه‌ر بون کاتێک له‌ ناوجه‌رگه‌ی هه‌ژده‌ وه‌ڵاتی عه‌ره‌بی دا ئاڵی سه‌ربه‌خۆێی خۆیان هه‌ڵ کرد... ئه‌زانم قسه‌ی هه‌مو جارێ ئه‌که‌ن و ئه‌ڵێن ئاخر ئه‌وان ئیمریکایان له‌ پشت بو ، به‌ڵام بڕواتان هه‌بێ ئه‌گه‌ر جوله‌که‌ بۆخۆیان ئێراده‌ی سه‌ربه‌خۆێخۆازیان نه‌بایه‌ قه‌ت ئیمریکا نه‌یئه‌توانی ڕزگاریان کات... ڕێبه‌رانی جوله‌که‌ سه‌ره‌ڕای ئه‌وه‌ی گه‌وره‌ترین ناکۆکیان له‌ نێوان دا هه‌بو له‌ سه‌ر یه‌ک خاڵ ده‌ستیان دایه‌ ده‌ستی یه‌ک و ئه‌ویش به‌رژه‌وه‌ندیه‌کانی کۆمه‌ڵگای جوله‌که‌ و ئیسرائیل بو...

له‌ کوردستانی ئێمه‌ دا هه‌رکه‌سه‌ و به‌ سازی خۆی هه‌ڵ ئه‌په‌ڕێ ، که‌س که‌سی قه‌بوڵ نیه‌ و هه‌مویان له‌ به‌رانبه‌ر داگیه‌رکه‌را سه‌ر له‌به‌ر و ئاماده‌ی خزمه‌تگوزارین و له‌ به‌رانبه‌ر یه‌کیتریشا ، سینگ له‌ پێش و خاوه‌ن هێزن.
گه‌لی کورد له‌ باشوری کوردستان هه‌مو فیداکاریه‌کی کرد بۆ ئازادی و پچڕاندنی په‌تی کۆیله‌یه‌تی و هه‌ڵکردنی ئاڵای سه‌ربه‌خۆێی ، که‌چی له‌ ماوه‌ی چوارده‌ ساڵا یه‌کیه‌تی و پارتی نه‌یانتوانی ده‌ستوریک بنوسنه‌وه‌ که‌ کورد چون ئه‌توانی بژی و زاگونێکی نه‌ته‌وه‌یان دانه‌ڕشت که‌ مافی هاووه‌ڵاتیان بپارێزێ و هه‌تا ئێستاش دوو نوێنه‌رایه‌تی له‌ ده‌روه‌ و ناوه‌وه‌ نوێنه‌رایه‌تی سلێمانی وهه‌ولێر ئه‌که‌ن .له‌ کاتێک دا که‌ ئێمه‌ ده‌ستوری دیاریکراوی خۆمان نیه‌، بۆچی خه‌ریکی نوسینه‌وه‌ی ده‌ستوری عێراق بین و خۆمان به‌ کارێکه‌وه‌ خه‌ریک بکه‌ین نه‌ کاری ئێمه‌یه‌ و نه‌ هیچ له‌ به‌رانبه‌ری دا به‌رپرسیارین؟ هه‌زار ده‌ستور بۆ عێراق بنوسرێته‌وه‌ و به‌ ته‌نیا کورد بۆ خۆی بینوسێته‌وه‌ هێشتا له‌ بن ده‌ستی ڕزگارمان ناکات ، ئاخر ئێمه‌ یان ده‌بێ کورد و کوردستانی بین یان بن ده‌ست و بێ ماف و عێراقی ، ڕێگای سیهه‌م نیه‌..

که‌ من ده‌ڵێم مام جه‌لال حه‌قی نیه‌ له‌ جیاتی گه‌لی کورد قسه‌ بکات و بڵێ کورد سه‌ربه‌خۆێی ناوێ و کاک مه‌سعود بارزانی حه‌قی نیه‌ کڵاو له‌ سه‌ر خه‌ڵکی کورد بنێ و بڵێ ئه‌و ده‌ستوره‌ واتای مافی چاره‌ی خۆنوسینه‌ و کاتێک ده‌ڵێین ئه‌و ده‌ستوره‌ ئه‌وه‌ نیه‌ که‌ ته‌رجومه‌ کراوه‌که‌یان بڵاو کردوه‌ته‌وه‌ و کاتێک ده‌ڵێن عه‌دنان موفتی به‌ چ حه‌قێک ده‌ڵێ ئێمه‌ ڕازی نه‌بوین که‌ بنوسرێ کوردی هه‌رێم به‌شێکن له‌ کوردی کوردستانی گه‌وره‌ له‌به‌ر ئه‌وه‌ دڵێ دراوسێکانمان نه‌ڕرنجن ، که‌س نیه‌ به‌وان بۆێرێ و دژیان ڕاوه‌ستێ و داخی دڵی خۆیان به‌ ئێمه‌ ئه‌ڕێژن و جنێومان ئه‌ده‌نێ و ئه‌ڵێن به‌عسی و ئیتلاعاتین و ناۆێرن بڵێن سه‌رۆکه‌کانیان خاوه‌ن فایلی ئیستخبارات وئیتلاعاتن... ئه‌و ده‌ستوره‌ی که‌ گه‌لی کورد به‌ چاوبه‌سراوی له‌ سه‌ر ڕێنوماێی سه‌رۆکی هێژا کاک مه‌سعود و به‌ فه‌رموده‌ی جه‌نابی مام جه‌لال به‌ڵێ بۆ وت ، گه‌وره‌ترین ته‌وقه‌ که‌ ئه‌چته‌ گه‌رنمان و ئاره‌زومه‌ندانه‌ ئه‌مانکاته‌ عێراقی...

ئاخر ئه‌و ده‌ستوره‌ شتێکی نه‌گۆڕ نیه‌ و ئه‌گه‌ر له‌ داهاتویه‌کی نێزیک دا عه‌ره‌به‌کانی عێراقی کێشه‌کانی نێوانیان نه‌ما و زوورایه‌تیان له‌ په‌رله‌مانی عێراق دا هێنا ، ئه‌وا ئه‌توانن به‌ زوربه‌ی ده‌نگ ده‌ستوریکی نۆێ بنوسنه‌وه‌ و هه‌ر پرس و ڕا به‌ کوردیش نه‌که‌ن...هه‌ربۆیه‌ کورد ده‌بێ جه‌خت له‌سه‌ر ئه‌وه‌ بکات که‌ کێشه‌که‌ی ببێته‌ کێشه‌یه‌کی ناوده‌وڵه‌تی و لایه‌نی سێهه‌م به‌شداری له‌ چاره‌سه‌ری دا وه‌ک بکات ته‌میموری ڕۆژئاوا یان ئاچه‌ و فه‌له‌ستین و تێکه‌ڵ به‌ کێشه‌ی عه‌ره‌ب و شیعه‌ و سونه‌ نه‌کرێ. هاوپه‌یمانی مام جه‌لال و کاک مه‌سعود ، جه‌عفه‌ریه‌ که‌ هه‌ر له‌ یه‌کم ڕۆژی به‌ ده‌سڵات گه‌یشنیه‌وه‌ فێڵی له‌ کورد کرد و ئێستاش له‌ سه‌ر هه‌مان به‌رنامه‌ی سه‌دام حسێن خه‌ریکی به‌ عه‌ره‌ب کردنی که‌رکوکه‌..که‌چی نوسه‌رانی ده‌رباری یه‌کیه‌تی و پارتی جنیو به‌ ئێمه‌ ئه‌ده‌ن و ئه‌ڵێن بۆ باسی ڕاستیه‌کان ئه‌که‌ن...کاتێک نوسراوه‌که‌ی حاکم قایرم خۆێنده‌وه‌ ڕوشانه‌وه‌م هات ، نه‌ته‌وه‌یه‌ک ئه‌وه‌ کادێر و شۆڕشێک ئه‌وه‌ حاکمی بێ قۆڕ به‌ سه‌ری...له‌ جیاتی ئه‌وه‌ به‌ شێوه‌یه‌کی هاوچه‌رخ وه‌ڵامی ڕه‌خنه‌گرانی بداته‌وه‌ بێ مانترین وشه‌ی به‌کار هێناوه‌ که‌ من له‌ دووپات کردنه‌وه‌ی خۆم ئه‌پارێزم...
سایتێکی کوردی که‌ له‌ خۆا به‌ زیاد بێ سایتێکی سه‌ربه‌ خۆیه‌ ، له‌ سه‌روه‌ و له‌ یه‌کم لاپه‌ڕه‌ی دا نوسیوۆه‌ که‌ بابه‌تێک بڵاو ناکینه‌وه‌ بێ ڕێزی به‌ که‌سێکی دیکه‌ی تێدا بێ !؟ که‌چی هه‌شتا له‌ سه‌دی بابه‌ته‌کانی جنێۆنامه‌ن...ئاخر نه‌ته‌ویه‌ک که‌ له‌ ڕه‌خنه‌ تێ نه‌گا و نه‌توانی به‌شۆین ڕاستیه‌کانا بڕۆات هه‌روا بن ده‌ست و بێ داهاتو دبێ و تاوانباری ئه‌سڵیش خۆیه‌تی. من ڕێزم هه‌یه‌ بۆ ئه‌و که‌سانه‌ی ڕه‌خنه‌م لێ ئه‌گرن و له‌ ڕێگای ڕه‌خنه‌کانیانه‌وه‌ خاڵه‌ لاوازه‌کانی خۆم ئه‌ناسم و خۆم پێش ئه‌خه‌م..به‌ڵام هه‌رگیز له‌وانه‌ تێ ناگه‌م که‌ جنێو ئه‌ده‌ن و سوکایه‌تیم پێ ئه‌که‌ن ، له‌ ڕاستی دا دڵم بۆیان ئه‌سوتێ و حه‌ز ئه‌که‌م لێیان تێ بگه‌م و یارمه‌تیان بده‌م.

له‌ ناوچه‌ی سلێمانی و ژێر ده‌سه‌ڵاتی یه‌کیه‌تی دا بنه‌ماڵه‌ی مام جه‌لال و کۆسره‌ت ڕه‌سوڵ ، مه‌لا به‌ختیار ، عومه‌ری سه‌ی عه‌لی و ئه‌ندامانی سه‌رکردایه‌تی و کادره‌کانی یه‌کیه‌تی خاوه‌ن هه‌مو شتێکن و هه‌رچیان پێ خۆش بێ ئه‌یکه‌ن . منداڵه‌کانیان جۆانترین جل وبه‌رگ له‌به‌ر ئه‌که‌ن ، نۆێترین تێکنیکی سه‌رده‌میان له‌ خزمه‌ت دایه‌ ، باشترین مودێلی سه‌یاره‌یان له‌ ژێر دایه‌ و له‌ مه‌کته‌بیشا بزانن و نه‌زانن ده‌رئه‌چن و که‌سناۆێرێ پێان بڵێ پشت چاوتان برویه‌.. واته‌ ئه‌گه‌ر دیسان جنێو نوسه‌کان په‌لاماری قه‌ڵه‌مه‌کانیان نه‌ده‌ن که‌ شڕه‌ جنێوم بکه‌ن، ئه‌وا ده‌بێ بڵێم هه‌ر ڕێک وه‌ک ده‌ورانی سه‌دام و دار و ده‌سته‌که‌ی ، ئاخر له‌ خۆتان ناپرسن ئه‌وانه‌ چون و بۆ ده‌بێ وا بکه‌ن ئه‌ی ئێمه‌ چین و کێین و کۆا ئه‌نجامی خۆێن و خه‌باتمان..

بنه‌ماڵه‌ی بارزانی ئه‌مڕۆ له‌ هه‌وڵێر و ناوچه‌کانی ژێر ده‌سه‌ڵاتیان دا گاڵته‌ به‌ خه‌ڵک ئه‌که‌ن و هه‌مو پۆست و جێگا حه‌ساسه‌کان هی خۆیانه‌ و چه‌ند که‌سێکی سورانیشیان وه‌ک به‌رده‌ست ڕاگرتوه‌ که‌ ناوێرن له‌ کوله‌که‌ی ته‌ڕا بانگ بده‌ن و نێچیرڤان وه‌ک پاشاکانی ئه‌فریقا ده‌سه‌ڵاتی ماڵ و ناموسی خه‌ڵکی هه‌یه‌ و به‌وه‌شه‌وه‌ نه‌وه‌ستاون و چوارسه‌د که‌سیان له‌ بنه‌ماڵی بارزانی ناردوه‌ته‌ وه‌ڵاتانی ده‌ره‌وه‌ بۆ خۆێندن و به‌ سه‌روه‌ت و سامانی ئێمه‌ی هه‌ژار خۆشترین ژیانیان بۆ دابین کردون و تا ساڵی 2007 قه‌راره‌ شه‌هاده‌ی باڵا وه‌رگرن که‌ دیاره‌ بۆیان ئه‌کڕن و هه‌مویان وه‌ک دوکتور له‌ بواری جیاوازا ئه‌گه‌ڕێننه‌وه‌ کوردستان و هه‌مو پۆسته‌کانیان ئه‌خه‌نه‌ به‌رده‌ست و هه‌مو کۆمه‌ڵگا به‌ یه‌کیه‌تیشه‌وه‌ زه‌لیل و زه‌لیلتر ئه‌که‌ن ... ئێوه‌ی هه‌ژاریش به‌ ده‌سه‌ڵاتدار و خاوه‌ن پاره‌کان ناۆێرن و به‌ربونه‌ته‌ گێانی ئێمه‌ی هه‌ژار... من دژی یه‌کگرتنی یه‌کیه‌تی و پارتی نیم ، به‌ڵام به‌ربه‌رکانێ بۆ په‌ره‌پێدانی کۆمه‌ڵگا پێویسته‌ له‌ سه‌ر ئه‌ساسی ئه‌سڵه‌ دیموکراتیکه‌کان... ئه‌وه‌ی که‌ یه‌کیه‌تی و پارتی لێک نێزیک کردوه‌ته‌وه‌ ئه‌و سه‌روه‌ت و سامانه‌ ڕژاوه‌یه‌ و زه‌لیل کردنی کۆمه‌ڵگا و پاراستنی خۆشگوزه‌رانی خۆیان نه‌ک به‌رژه‌وه‌ندی نه‌ته‌وه‌...

کاتێک له‌ ئینگلیز تونی بلیر سه‌رکوه‌زیرانی ئێستای ئه‌و وه‌ڵاته‌ زوربه‌ی ده‌نگه‌کانی هێنایه‌وه‌ و پارته‌که‌ی له‌ په‌رله‌مان دا ئه‌کسه‌ریه‌تی ته‌واوی هێنا ، ناوبراو وتی زورم پێ ناخۆشه‌ که‌ ئوپوزیسیونێکی به‌هێزم نیه‌ ... هه‌روه‌ها کاتێک حیزبی سوسیال دیموکراتی سویدی بۆ جاری سیهه‌م له‌ سه‌ریه‌ک زورینه‌ی ده‌نگی هێنایه‌وه‌ بۆ پارله‌مان یه‌کێک له‌ سیاسه‌تمه‌دارانی ئه‌و حیزبه‌ وتی: زور به‌داخه‌وه‌م که‌ دیموکراسی له‌ مه‌ترسی دایه‌ و نابێ حیزبێک چه‌ند جار له‌سه‌ر یه‌ک ده‌سه‌ڵات بگرێته‌ ده‌ست.. له‌ لای ئێمه‌ نه‌ک هه‌ر ده‌سه‌ڵاتی ئێستا به‌ڵکو ده‌سه‌ڵاتی په‌نجا ساڵی داهاتوشیان مه‌سه‌وه‌گه‌ر کراوه‌ و نه‌ بڕوایان به‌ کۆمه‌ڵگا و دیموکراسی و نه‌ تێگه‌یشتنیان بو ده‌نگی جیاواز هه‌یه‌...

کورد وه‌ک نه‌ته‌وه‌ هێشتا کاڵ و کرچه‌ و له‌ هێز و تواناکانی خۆی تێ نه‌گیشتوه‌ و هێشتا چاوی له‌ ده‌ستی سه‌رۆک و بێگانه‌ و نه‌یارانه‌ و هێشتا وه‌ک نه‌ته‌وه‌ له‌ داخوازه‌کانی به‌رگری ناکا. خه‌باتی کورد له‌ سه‌ر ئه‌ساسی عاتیفه‌ و ئێحساسه‌ و حیزب ئه‌بێته‌ په‌رستگا و سه‌رۆکی حیزبه‌کانیش ئه‌بنه‌ شێخ و مه‌شایه‌خ و ده‌بێ سوجده‌یان بۆ ببردرێ. کورد له‌ به‌رانبه‌ر چاره‌نوسی خۆی دا جه‌سور نیه‌ و بیر له‌ پاشه‌ڕۆژی دوور ناکاته‌وه‌ و ته‌نیا بۆ ئه‌مڕۆ ئه‌ژی و ئه‌وه‌ش زوور مه‌ترسیداره‌. کورد وه‌ک نه‌ته‌وه‌ ته‌نیا بوی هه‌یه‌ بڵێ به‌ڵێ ، ئه‌ویش کاتێک ده‌بێ بڵێ به‌ڵێ که‌ سه‌رۆکه‌کان له‌گه‌ڵ یه‌ک ڕێک که‌وتبن و به‌ڵێیان بۆ ئه‌و بابه‌ته‌ وتبێ... ڕه‌خنه‌ گرتن خزمه‌تی پێشکه‌وتن ئه‌کا و ڕێگره‌ له‌ به‌رده‌م گه‌نده‌ڵی و سوئیستیفاده‌ و حه‌رف و مه‌یل کردنا و چاو و گۆێی خه‌ڵک ئه‌کاته‌وه‌، هه‌تا کۆمه‌ڵگای ئێمه‌ش له‌ ڕه‌خنه‌ گرتن و دیالوگی زانستیانه‌ تێ نه‌گا و هه‌تا نوسه‌رانی کورد ئاڵقه‌ له‌ گۆێی ده‌سه‌ڵات بن و ڕۆشنبیرانی کورد بۆ ژه‌م و ده‌م بنوسن و هه‌تا... حاڵمان له‌مه‌ باشتر نابێ.

051016

Sunday, October 16, 2005

هونه‌رمه‌ند حه‌مید حه‌میدی کۆچی دوایی کرد

هونه‌رمه‌ند حه‌مید حه‌میدی کۆچی دوایی کرد

به‌داخێکی زۆره‌وه‌ هونه‌رمه‌ندی ده‌نگخۆش و خاوه‌ن هه‌ستی ڕۆژهه‌ڵاتی کوردستان حه‌مید حه‌میدی له‌ڕۆژی ده‌ی ئۆکتۆبه‌ری 2005، کۆچی دوایی کردوه‌. به‌م بۆنه‌وه‌ له‌ خۆمان و له‌ ئه‌ویندارانی هونه‌رو گۆرانی کوردی و که‌سوکاری سه‌ره‌خۆشی ده‌که‌ین.

به‌ش به‌ حاڵی خۆم ده‌نگی به‌سۆزو دڵگری ئه‌م هونه‌رمه‌نده‌م سه‌ره‌تا ساڵی دوهه‌زار که‌ بۆ مه‌به‌ستێکی تایبه‌تی ماوه‌یه‌ک بوو له‌ شاری قه‌یسه‌ری تورکیه‌ مابوومه‌وه‌، له‌ ماڵی دۆستێکی هێژا گوێ لێبوو. هه‌ر ئه‌وکات دڵم گرتی و هه‌ر له‌به‌ر ئه‌وه‌ش ئه‌و دۆسته‌ هێژایه‌ کاسێته‌که‌ی پێشکه‌ش کردم. گوێگرتن له‌ده‌نگی حه‌مید حه‌میدی چێژێکی تایبه‌تی هه‌یه‌و ده‌ت باته‌وه‌ ناو جیهانی خه‌ون و خه‌م و ئازاره‌کان. کۆچی دوای ئه‌و هێژایه‌ خه‌سارێکی دیکه‌یه‌ که‌ له‌ بزاڤی هونه‌ری کوردی به‌گشتی ده‌که‌وێ و جێی ئه‌و به‌ سێنایی پڕنابێته‌وه‌. ئه‌و هێشتا گه‌نج بوو ده‌یتوانی‌ گه‌لێک به‌رهه‌می ناوازه‌ پێشکه‌شی بواری موزیک و گۆرانی کوردی بکا و مخابی مه‌رگ وه‌ک دێوه‌زمه‌یه‌ک گیانی ئه‌ویشی ستاندو ماڵئاویی لێکردین. ئه‌گه‌رچی حه‌مید به‌رهه‌مه‌کانی که‌من به‌ڵام به‌و که‌مه‌شه‌وه‌ جێگای و شوێنی خۆی له‌ گۆڕه‌پانی هونه‌ردا بۆخۆی گرتبوو بۆیه‌ دڵنیام که‌ ده‌نگه‌ به‌ سۆزه‌که‌ی و به‌رهه‌مه‌کانی ڕێ له‌ مردنی ئه‌و ده‌گرن و جگه‌ له‌ جه‌سته‌ی که‌ به‌ جێمان دێڵی به‌رهه‌مه‌کانی هه‌رده‌م له‌ ناو دڵ و گوێماندا ده‌مێننه‌وه‌ و هه‌ر به‌نه‌مری ده‌مێننه‌وه‌. ڕۆحی شاد.

ئه‌م بابه‌ته‌ی له‌ خواره‌وه‌ داده‌نرێ، له‌ نوسینی برایم فه‌ره‌شی‌یه‌ که‌ له‌ سایتی هه‌ڵوێست و ڕۆژهه‌ڵات(بۆکان)دا سه‌باره‌ت به‌ حه‌مید حه‌میدی و کۆچه‌ ناوه‌خته‌که‌ی ، بڵاوکراوه‌ته‌وه‌، بۆ ئه‌وانه‌ی نایناسن به‌که‌ڵکه‌.

حه‌مید حه‌میدی، ده‌نگێکی جوانه‌مه‌رگ و ئه‌وینێکی زی ندوو!
برایم فه‌رشی

له‌ رۆژگارێکدا که‌ له‌ مه‌یدانی گۆرانی و کلیپی کوردیدا مرۆڤ که‌متر هونه‌ر ده‌بێنێ، حه‌مید حه‌میدی کاری هونه‌ری به‌رچاوی ئه‌نجام ده‌دا، به‌ تایبه‌ت گۆرانی و کلیپه‌کانی ته‌ژی له‌ هونه‌ر و زه‌وق و جوانی و ناوه‌رۆکی ئینسانی بوو! یه‌کێک له‌ نوێترین کلیپه‌کانی گۆرانیه‌که‌ به‌ ناوی سه‌فه‌ر! سه‌فه‌ری مه‌رگ. ئه‌و ئه‌ڵێ:" دنیا سه‌فه‌ره‌ و گشتمان میوانین!" حه‌مید له‌و کلیپه‌دا کاتێک به‌ کۆڵانێکدا تێ
ده‌په‌ڕێ چاوی به‌ ئاگاداری مه‌رگی خۆی ده‌که‌وێ، که‌ به‌ دیواره‌کانه‌وه‌ هه‌ڵواسراوه‌. ئه‌و له‌ گه‌ڵ خه‌ڵک ته‌رمی خۆی به‌ره‌و گۆرستان به‌رێ ده‌کات. کاتێک له‌ ناو گۆڕی ده‌نین، هه‌ردووک چاوه‌کانی کراوه‌یه و چاو له‌ زیندووان ده‌کات‌! چیرۆکی ئه‌م کلیپه‌ له‌ لایه‌ن شکسپیره‌وه‌ نه‌نووسراوه‌. ئازاره‌کانی که‌ له‌م شیعره‌دا بوونه‌ته‌ گۆرانی، ئازاره‌کانی لاوه‌کانی ئه‌مرۆی وڵاته‌که‌ی حه‌میده‌ و شیعره‌کانی ئه‌م گۆرانیه‌، ئازارای وڵاته‌که‌ی ئێمه‌ی له‌ خۆیدا گرتووه‌، که‌ حه‌مید زۆر هونه‌رمه‌ندانه‌ ده‌یچڕێ. بینینی ئه‌م کلیپه‌ خه‌م و بیرکردنه‌وه‌ ده‌خوڵقێنێ، خه‌می ژیان و بیرکردنه‌وه‌ی مه‌رگ. حه‌مید باسی مه‌رگ ده‌کات و خۆشی ئاکتۆری کلیپی مه‌رگه‌. حه‌مید باس له‌ ژیان ناکات باس له‌ سه‌فه‌ری یه‌کجاری ده‌کات. حه‌مید ئه‌گه‌ر گۆرانی هه‌ڵپه‌رکێش ده‌چڕێ هه‌ر دیسان باس له‌ مه‌رگ ده‌کات:"گه‌نم گه‌ڕه‌جۆ پشتم ژان ده‌کات، عیزرائیل هاتگه‌ و داوای گیان ئه‌کات." دڵ و دوروونی حه‌مید خه‌م دایگرتووه‌ و خه‌م ده‌چڕێ و له‌ گه‌ڵ زیندووان ده‌دوێ، ئه‌و باس له‌و ده‌مه‌ کورته‌ی ژیان ده‌کات، حه‌مید به‌ هه‌موو وجودیه‌وه‌ هاواری خۆشه‌ویستی ده‌چڕێ. بینینی کلیپه‌کانی حه‌مید بۆ من موژه‌ده‌یه‌کی گه‌وره‌ بوو، ئه‌و هیوایه‌ی له‌ دڵمدا گه‌رم کردبوو، که‌ موسیقای کوردی شاسواری هه‌یه‌ به‌ڵام نادیارن، بێ موده‌عان، هات و هاواریان نیه‌! حه‌مید لای‌ خه‌ڵکی کوردستان به‌ تایبه‌ت سنه‌ و کرماشان و لای ئه‌وانه‌ی که‌ نرخی هونه‌ر ده‌زانن گه‌ڵێک خۆشه‌ویست بوو.
ئه‌مرۆ 11.10.2005 سه‌عات 10‌ی به‌یانی ته‌له‌فونی سه‌رکاره‌که‌م ده‌نگی لێ بڵیند بوو:"بابی ئێستا له‌ سنه‌وه‌ ته‌له‌فونیان کرد و کوتیان که‌ حه‌مید دوێنێ سه‌کته‌ی کردووه‌!؟" بیستنی ئه‌م هه‌واڵه‌ ره‌نگی رووی گۆڕاندم، هاوکاره‌که‌م ده‌پرسێ چی رووی داوه‌؟ چیرۆکی کلیپی سه‌فه‌ر و هه‌واڵی مه‌رگی حه‌میدی بۆ ده‌گێڕمه‌وه‌. حاڵه‌تی ده‌گۆڕدرێ و سه‌ری داده‌خات. ئه‌و پسپوڕی بواری فه‌لسه‌فه‌یه‌ و‌ ده‌یان نمونه‌ی جیهانی له‌ بواره‌کانی هونه‌ر و بیر و موسیقا ده‌هێنێته‌وه‌. ئه‌و ده‌ڵێت:" ئه‌و که‌سانه‌ سنوری ئاسایی ژیان و بیر و زه‌وقی ئینسانی تیک ده‌شکێنن، هێندێک له‌وانه‌ عاسی ده‌بن و ئه‌و کارانه‌ ده‌که‌ن که‌ مرۆڤی تر به‌ بڤه‌ی ده‌زانن، ئه‌وانه‌ به‌گژ ئه‌م جیهانه‌دا ده‌چن." حه‌مید پاش بڵاوکردنه‌وه‌ی کلیپی سه‌فه‌ر پرسیارباران ده‌کرێ. دایکی که‌ دوو ساڵ به‌ر له‌ ئێستا کوڕێکی تری به‌ ناوی سه‌عید له‌ مانگی ره‌مازاندا به‌ کاره‌ساتی ماشێن جوانه‌مه‌رگ ده‌بێ،ده‌ڵێ:"رۆڵه‌ ئه‌م کارگه‌له‌ چیه‌ ده‌یکه‌ی؟" کلیپی سه‌فه‌ر بۆ زۆر که‌س پرسیارێکی گه‌وره‌ بوو. به‌ڵام ئه‌مرۆ وه‌ک سناریۆی مه‌رگی هونه‌رمه‌ندێک دێته‌ به‌رچاو که‌ له‌ دنیای هونه‌ر و موسیقادا که‌م وێنه‌یه‌ و تراژدییه‌کی تاڵه‌!

حه‌مید به‌ تێکست و موسیقا و ده‌نگ و شێوه‌ی گوتنه‌که‌ی و به‌کارهێنانی ئه‌ندامه‌کانی له‌شی کاری ده‌کرده‌ سه‌ر مێشک و ده‌روون و دڵی من، وام ده‌زانی که‌ ئه‌و بۆمن گۆرانی ده‌ڵی و تێکست و شیعره‌کانی من ده‌چڕێ. من چاوم به‌ حه‌مید نه‌که‌وتبوو، به‌ڵام هه‌ستم ده‌کرد له‌ مێژ ساڵه‌ ده‌یناسم، ئه‌وه‌ش هه‌ست و بۆچوونی من به‌ ته‌نیا نیه‌. حه‌مید له‌ رۆژگاری بێ رێزکردنی موسیقادا هونه‌ری ده‌خوڵقاند، به‌وه‌ش خۆشه‌ویستی من بوو. ئه‌و سنوره‌ ته‌سکه‌کانی تێکست و موسیقا و ده‌نگی شکاند و گاشه‌ به‌ردێکی هاویشته‌ ناو گۆمێکی مه‌ند و وێستاو. ئه‌و بیرو و بیرکردنه‌وه‌ی هێنایه‌ ناو موسیقای تایبه‌تی سه‌رده‌م. ئه‌و شه‌یدایه‌کی وشه‌ و موسیقا بوو! حه‌مید لای من گۆرانبێژێکی رۆشنبیر بوو له‌ فۆرماتێکی بانتردا. مخابن ئه‌ویش به‌ چاره‌نووسی گۆرانیبێژه‌کانی هاوشانی خۆی ، فه‌رهای فارس زمان و ئه‌حمه‌د کایای زمان قه‌ده‌غه‌کراو چوو. یادی گه‌رم و زیندوو بێ.

ژیان سه‌فه‌ره‌ و
ئینسان موسافر.
سه‌فه‌ری بێ رێگا،
ژیانی بێ سه‌فه‌ره‌،
که‌ له‌ وه‌ستاندا
ته‌واو ده‌بێ و
موسافر به‌ موسافر
ده‌گۆڕێته‌وه‌.

11،10،2005 ئاڵمان

ئه‌م بابه‌ته‌ هاوکات له‌ ماڵپه‌ڕی رۆژهه‌ڵات (بوکان) یشدا بڵاو بووه‌ته‌وه‌

Saturday, October 15, 2005

مارگرێت تاچێر دیمه‌نێکی دژ به‌ ژن یان پێشه‌نگ بۆ ژن؟

مارگرێت تاچێر ڕوخسارێکی دژ به‌ ژن یان پێشه‌نگ بۆ ژنان؟

مارگارێت تاچێر، ئه‌وژنه‌ی که‌ دوانزده‌ ساڵی ته‌واو سه‌رۆک شالیاره‌تی بریتانیای له‌ ئه‌ستۆ بوو، چوه‌ ناو هه‌شتایه‌مین ساڵی ژیانی خۆی. ئه‌و که‌ دواتر به‌ ژنه‌‌ ئاسنینه‌که‌ ناسرا، هێمایه‌ک بوو که‌ سوڕێکی کۆنه‌پارێزی یان پارێزگارانه‌ی ده‌یه‌ی هشتای تێدا به‌رجه‌سته‌ ببوو، تاچێر به‌ باوه‌ڕی قوڵی به‌ ئازادی ئاوسارپچڕاوی بازاڕ، له‌ قۆناخی کۆتایی جه‌نگی سارددا ده‌ورێکی گاریگه‌ری گێڕا. ئه‌و که‌ به‌ باوه‌ڕی زۆربه‌ی فێمینیسته‌کان که‌سایه‌تیه‌کی نه‌ویستراو بوو بۆ بزوتنه‌وه‌ی ژنان، به‌ڵام ... کاتێک تاچێر پێنایه‌ ناو کۆشکی سه‌رۆک شالیاره‌تی له‌ شه‌قامی داونینگی له‌نده‌ن، په‌یامێکی دۆستانه‌ی بۆ خه‌ڵکه‌که‌ی ڕاگه‌یاند. ئه‌و ووتی:" شوێنێک که‌ ناکۆکی باڵی به‌سه‌ره‌دا کێشا بێت ده‌بێ پێکه‌وه‌ژیان بێته‌ کایه‌وه‌".

تاچێر به‌ ئێژانی ئه‌م گوته‌یه‌ی فرانس فۆن یه‌که‌مین ڕۆژی خزمه‌تی خۆی به‌ناوی سه‌رۆک شالیاریه‌تی بریتانیا ده‌ست پێکرد، له‌ ڕواڵه‌تێکی بێ ئازارو جلوبه‌رگێکی له‌مۆد که‌وتوو. به‌ڵام ئه‌و هه‌موو شتێک بوو، ته‌نیا ئه‌و ڕواڵه‌ته‌ نه‌بێ که‌ له‌ ڕۆژی یه‌که‌می شالیاره‌تیه‌که‌ی پێشانی دا.

بێئا که‌مپێڵ ڕۆژنامه‌ نوسی فێمێنیست ئێژێ: " له‌ به‌رامبه‌رمان ژنێک ڕاوه‌ستابوو که‌ بوونی له‌ ڕواڵه‌تدا هێزو وزه‌ی به‌ژنان ده‌دا به‌ڵام له‌ پشته‌وه‌ی ئه‌م ڕواڵه‌ته‌، هزرینی پێاوسالارانه‌و قووڵی کۆنه‌په‌رستانه‌ خۆی مڵاس دابوو. ئه‌و ده‌سه‌ڵاتی خۆی به‌ نرخی پاڵه‌په‌ستۆ خستنه‌ سه‌ر ژنانی دیکه‌ وه‌چنگ هێنا".

گرنگترین تۆمه‌ت و توکی بزاڤی فێمینیستی دژی تاچێر تا ئه‌مڕۆ ئه‌وه‌ بووه‌ که‌ ئه‌و له‌ پێناوی ژنان هیچ هه‌نگاوێکی هه‌ڵنه‌هێنا. له‌ ڕاستیدا یه‌کسانی مافی ژنان و داخوازییه‌کانی بزاڤی ئه‌وان هیچکات به‌شێک نه‌ بووه‌ له‌ که‌ڵکه‌ڵه‌ی هزری خۆ‌پارێزان. تاچێریش هیچ کاتێک بۆ بزاڤی ژنان نرخی دانه‌نا. ئه‌و بۆخۆی له‌ پێوه‌ندییه‌دا ئێژێ: " ژنانێکی وه‌کو من به‌ سه‌رکه‌وتن له‌ کاریاندا به‌ به‌بێ بزاڤی ژنان به‌ مافی خۆیان گه‌یشتوون، پێش ئه‌وه‌ی له‌بنه‌ڕه‌تدا بزاڤی ژنان بوونی هه‌بوو بێت".

تاچێر هیچ کات حه‌زیی نه‌کرد که‌ به‌ یه‌کێک له‌و ژنانه‌ دابنرێ که‌ بۆ مافی ژنان تێکه‌ڵ به‌ کاروباری سیاسه‌ت ده‌بن و داخوازیه‌کانی ژنانیش بۆ ئه‌و گرنگ نه‌بوون یان له‌ گۆڕێدا نه‌بوون. ئه‌و پێیوابوو که‌ ده‌بێ ده‌سه‌ڵات له‌ چوارچێوه‌ی کێشه‌ تایبه‌تیه‌کانی شارۆمه‌ندان دوری بکات و یاساکانی جێکه‌وتوو به‌ سه‌ر بازاڕو ئابووریدا ده‌بێ کۆمه‌ڵ مۆدێرنیزه‌ بکات. ئه‌و به‌ توندوتیژی سه‌باره‌ت به‌ داخوازییه کۆمه‌ڵایه‌تیه‌کان و پێداگری سه‌رڕه‌قانه‌ بۆ پێشکه‌وتنی کاپیتالیزم تۆمه‌تبار کرابوو. به‌ڵام هاریت جۆنز مێژووناسی ئینگلیسی ده‌ڵێ ئه‌و به‌ هێمایه‌کی بێوه‌ێنه‌ ده‌ژمێردرێ.

"بۆ فێمێنیسته‌کان ئه‌مه‌ گه‌لێک به‌ ئازارو دڵساردکه‌ره‌وه‌ بوو که‌ تاچێر به‌ هێچ جۆرێک تێکه‌ڵ به‌ کێشه‌کانی ئه‌وان نه‌ده‌بوو و گوێی نه‌ده‌دایه‌ داخوازیه‌کانی ئه‌وان".

" به‌ڵام هه‌ر له‌وکاته‌دا ئه‌وان ئه‌وه‌یان ده‌بینی که‌ ئه‌و ژنێکه‌ که‌ سه‌رکه‌وتنی له‌ کارو بنه‌ماڵه‌که‌ی له‌گه‌ڵ یه‌کدی تێکه‌ڵ کردوه‌ و له‌ژێر قورسایه‌که‌شی هاتۆته‌ده‌ر. نه‌ک هه‌ر به‌سه‌ریدا سه‌رکه‌وتووه‌ به‌ڵکوو گه‌یشتۆته‌ لوتکه‌ش و له‌ ده‌ورانی کۆتایی هێنانی جه‌نگی ساردیش نه‌خشێکی فره‌ گرینگی گێڕاوه‌." به‌ بۆچوونی هاریت جۆنز" ئه‌و به‌وکاره‌ی ڕه‌نگه‌ زیاتر له‌ هه‌ر بزاڤێکی ژنان که تا ئه‌و سه‌رده‌مه‌ سه‌رقاڵی ‌ شه‌ڕه‌ده‌مه‌ی زمانی و نڤیسیاری بوون خزمه‌تی به‌ ژنان کردبێ".

چونکه‌ تاچێر به‌ چوونه‌ ناو گۆڕه‌پانێکی به‌ته‌واوی پیاوانه‌ به‌ربه‌سته‌ نه‌ریتیه‌کانی تێکوپێک شکاند. هه‌روه‌ها دیمه‌نێکی نوێ له‌ ژنی ئینگلیسی پیشاندا. تاچێر ژنی جنگین بوو، ئه‌و به‌ سێنایی ملی نه‌ده‌داو سانتیمێنتاڵ نه‌بوو. تاچێر ژنێک بوو که‌ له‌خۆڕادیویی خۆی پێش ده‌خست. ئه‌و له‌و باوه‌ڕه‌دا بوو که‌ ژنان ده‌بێ بۆخۆیان بۆ پێشکه‌وتنیان تێبکۆشن. به‌ بۆچوونی هاریت جۆنز، مارگارێت تاچێر له‌وانه‌یه‌ هه‌رگیز هێمایه‌کی دیار نه‌بێ بۆ ژنان، به‌ڵام بێ گومان ئه‌و پێشه‌نگێکی بێ وێنه‌یه‌ بۆ ژنان.

ئامۆژگاری مایکڵ دین(ئینتێرپرایس) بۆ کۆشکی سپی

ئامۆژگاری مایکڵ دین(ئینتێرپرایس) بۆ کۆشکی سپی
فارسه‌کانی ئێران له‌ که‌مایه‌تیدان و ئه‌ژمارده‌ له‌سه‌ر نه‌ته‌وه‌کانی دیکه بکه‌ن


ئینستیتۆی ئینته‌رپڕایسی ئه‌مریکا که‌ سه‌باره‌ت به‌کاروباری سیاسی، نیزامی و ئابووری لێکۆڵینه‌وه‌ ده‌کات و ڕاپۆرته‌کانی خۆی وه‌کوو ئامۆژگاری ئاراسته‌ی ده‌وڵه‌تی ئه‌م وڵاته‌ ده‌کات، له‌ نوێترین ڕاپۆرتیدا، ئاوڕی له‌ کێشه‌ی نه‌ته‌وه‌یی له‌ ئێران داوه‌ته‌وه‌ و به‌ موزایک بوونی ئێران وجه‌نگی نێۆخۆیی له‌ ئێرانی وه‌ک یه‌کێک له‌ خاڵه‌به‌هێزه‌کانی (Capacity) ئێران به‌ پێشنیارێک خستۆته‌ پێشچاوی کۆشکی سپی."مایکڵ دین" که‌سی یه‌که‌می ئه‌م دامه‌زراوه‌یه‌. له‌ ڕاپۆڕته‌که‌دا ئاوا ده‌خوێنینه‌وه‌:
شالیاره‌تی ده‌ره‌وه‌ی ئه‌مریکا، ئێرانی وه‌ک هۆکار(عامل)ی تێرۆریزم له‌ جیهاندا ناساندوه‌ که‌چی هه‌موو وتووێژه‌کان له‌سه‌ر کێشه‌ی ئه‌تۆمی له‌ ئێرانه‌ و داهاتووی ڕژیم به‌ده‌گمه‌ن ده‌که‌وێته‌ به‌رباس. سه‌ره‌ڕای ئه‌وه‌ی ئێران له‌ گروپ گه‌لی جۆراوجۆری نه‌ته‌وه‌یی پێکهاتووه‌، هێشتا بووش به‌مه‌ی نه‌زانیوه‌ که‌ فارسه‌کان حه‌شیمه‌تیان که‌مترینه‌و زۆرتری حه‌شیمه‌تی ‌ئێران سه‌ربه‌ ئازه‌ربایجانیه‌کان، کورده‌کان، بلوچه‌کان، تورکمان و عاره‌بی خوزستانن. بێ گومان له‌ داهاتوودا که‌ ده‌وڵه‌تی ئێران سه‌رونخون بێت، ئه‌م گروپه‌ نه‌ته‌وه‌ییانه‌ نه‌خشێکی گرینگ ده‌گێڕن.
سه‌رچاوه‌: په‌یک نێت

Friday, October 14, 2005

ناساندنی کتێبێکی کاک هاشم که‌ریمی

ناساندنی کتێبی:
ئایین و ده‌سه‌ڵات له‌ پڕۆسه‌ی مێژووی رۆحانییه‌تی شیعه‌دا
خه‌لیل خه‌زه‌ڵی


له‌م رۆژانه‌دا کتێبێکی پربایه‌خ و به‌ناوه‌رۆک به‌ کتێبخانه‌ی کوردی ئیزافه‌ بووه‌ .کتێبێکی که‌م وێنه‌ که‌ توانیویه‌ به‌ خێرایی بچێته‌ ریزی کتێبه‌ دیار و به‌ که‌ڵکه‌کانی کوردیه‌وه‌ .کتێبێک که‌ له‌ مێژوویه‌کی زۆر گرینگ ده‌دوێ . دین و ئایین و ده‌سه‌ڵاتدارانی. واتا مه‌لا و ئه‌ستوونه‌کانی دین . ئه‌م کتێبه‌ به‌سه‌ردێڕی " ئایین و ده‌سه‌ڵات له‌ پرۆسه‌ی مێژووی رۆحانییه‌تی شیعه‌ دا" بڵاو کراوه‌ته‌وه‌. که‌ ئه‌نجامی ئه‌رک و ماندووبوونی که‌سایه‌تیی خۆشناو و تێکۆشه‌ر به‌ێز کاک "هاشمی که‌ریمی"یه‌.

کتێبه‌که‌ به‌ مێژووی ئایین و مه‌زهه‌ب دا چوه‌ته‌ خواره‌وه‌ و تا گه‌یشتووه‌ته‌ بیدایه‌تی سه‌رهه‌ڵدانی . پاشان به‌ شێوه‌یه‌کی لوژیکی به‌و مێژووه‌دا گه‌ڕاوه‌ و لایه‌ن و کون و قوژبنه‌کانی هه‌ڵداوه‌ته‌وه‌ و به‌ به‌ڵگه‌ و سه‌رچاوه‌ی جێ موتمانه‌وه‌ له‌ هه‌موو قۆناخه‌ جۆربه‌جۆره‌کانی کۆلیوه‌ته‌وه‌ و تا گه‌یاندوویه‌ به‌ ئیمڕۆ . بایه‌خ و لایه‌نی گرینی ئه‌م کتێبه‌ ئه‌وه‌یه‌ که‌ نووسه‌ره‌که‌ی ، به‌رێز هاشمی که‌ریمی ، ئه‌گه‌رچی ئینسانێکی لائیک و چه‌په‌ ،به‌ڵام به‌ ئه‌مانه‌ته‌وه‌ رووداوه‌کانی گێڕاوه‌ته‌وه‌ و خۆی له‌ گێژه‌نی ئیدئولوژیدا قه‌تیس نه‌کردووه‌ . گه‌رچی له‌ هه‌رشوێنێ پێویست بووه‌ ڕای خۆی ده‌ربڕیوه‌ ، به‌ڵام تووشی ده‌مارگرژی و یه‌ک لایه‌نه‌ بینین نه‌بووه‌ . قسه‌یه‌ک هه‌یه‌ که‌ ده‌ڵێ هه‌رکه‌س مێژوو ده‌نووسێته‌وه‌ له‌ فیلتێری به‌رژه‌وه‌ندیی چینایه‌تیی خۆیه‌ و تێپه‌ڕی ده‌کات . کاک هاشم تا ڕاده‌یه‌کی زۆر ئه‌و سنووره‌ی شکاندووه‌ . گرینگی کاره‌ که‌ی کاک هاشم له‌وه‌دایه‌ که‌ ئیدئولوژیک بیری نه‌کردووه‌ته‌وه‌ و بابه‌ته‌کانی به‌ شێوه‌ی مه‌رامی ده‌سچین نه‌کردووه‌ . بۆیه‌ زۆرجار له‌به‌ر ئه‌وه‌ی باسه‌که‌ی ته‌سک نه‌کردبێته‌وه‌ ، له‌مه‌ر رووداوێکی میژوویی چه‌ند بۆچوونی جیاوازی له‌ سه‌رچاوه‌ی جیاوازه‌وه‌ هێناوه‌ته‌وه‌ . به‌ گشتی به‌ڕێز که‌ریمی زانستیانه‌ و به‌ به‌ڵگه‌‌وه‌ توانیویه‌ پێوه‌ندیی و تێکه‌ڵیی ئایین و ده‌سه‌ڵات و ئاکامه‌کان و شووێنه‌واریان له‌سه‌ر کۆمه‌ڵگه‌ ‌ به‌ جوانی و روون بخاته‌ به‌ر ده‌ستی خوێنه‌ر .

به‌ داخه‌وه‌ ئه‌م کتێبه‌ له‌ ئاستێکی که‌مدا بڵاو بووه‌ته‌وه‌ و ته‌نیا 1000 دانه‌ی له‌ باشووری کوردستان( سلێمانی) لێ چاپ کراوه‌ . دیاره‌ ئه‌وڕاده‌که‌مه‌ ناتوانێ وه‌ڵامده‌ری نیازی خوێنه‌ری کورد بێ . ئه‌م کتێبه‌ گه‌رچی بۆ هه‌رکوردێک له‌ هه‌رکام له‌ پارچه‌کانی کوردستان به‌که‌ڵکه‌ ، به‌ڵام بۆ هاونیشتمانانمان له‌ رۆژهه‌ڵاتی کوردستان گرینگییه‌کی تایبه‌تی هه‌یه‌ . چوونکه‌ ئه‌وان هه‌ر ئیستا ( شان به‌ شانی خه‌ڵکانی دانیشتووی ئێران) ده‌سه‌ڵاتێک به‌سه‌ریاندا حکوومه‌ت ده‌کات که‌ ئه‌و کتێبه‌ به‌جوانی سه‌رتاسه‌ری ته‌مه‌ن و مێژووی پڕ تاوان و ته‌ماحی شی کردووه‌ته‌وه‌ .

دیاره‌ که‌ هه‌ر ئێستا له‌ باشووری کوردستانیش ، به‌هۆی ره‌ها بوونی مه‌زهه‌بی شیعه‌ ، و ده‌ستێوه‌ردانه‌کانی حکوومه‌تی ئێران ، ده‌وری ئایین له‌ کۆمه‌ڵگه‌دا زه‌قتر له‌ ڕابردوو خۆی ده‌نوێنێ . بۆیه‌ ئه‌م کتێبه‌ له‌م به‌شه‌ی کوردستانیش ده‌توانی بۆ رۆشنبیران سه‌رچاوه‌یه‌کی باش بێت بۆ بانگه‌شه‌ی سکۆلاریزم و ناساندنی مه‌ترسیه‌کانی ده‌خاله‌تی ئایین له‌ سیاسه‌ت و ده‌سه‌ڵاتدا. شتێک که‌ رێبه‌رانی شیعه‌ به‌ توندی هه‌وڵی بۆ ده‌ده‌ن.

پێشنیاری هه‌ڵوێست بۆ نووسه‌ری به‌ڕێزی ئه‌م کتێبه‌ ئه‌وه‌یه‌ که‌ : به‌ له‌به‌ر چاو گرتنی ئه‌وه‌ی که‌ به‌رێزی به‌مه‌به‌ستی رۆشنگه‌ریی و ئاگاکردنه‌وه‌ ،ئه‌وهه‌موو ئه‌رک و زه‌حمه‌ته‌ی قبووڵ کردووه‌ و له‌ ڕاستیدا کتێبه‌که‌ی بۆ کۆمه‌ڵ و کۆمه‌ڵگه‌ نووسیووه‌ و هیچ حیسابێکی بازرگانیی بۆ نه‌کردووه‌ ، وا باشتره‌ به‌ مه‌به‌ستی ئه‌وه‌ی خه‌ڵکێکی زۆرتر ده‌ستیان به‌و کتێبه‌ بگات و له‌ ناوه‌رۆکی سوود وه‌رگرن ، بیخاته‌ سه‌ر ئینتێرنێت . واتا فایله‌کانی نووسینه‌که‌ی له‌ سه‌ر ئینتێرنێت بڵاو بکاته‌وه‌ . بێگومان ئه‌وه‌ یه‌کێک له‌ باشترین رێگه‌کانه‌ که‌ هه‌موو "قه‌ده‌غه‌کان " و سانسۆره‌کان پووچه‌ڵ ده‌کاته‌وه‌ .
چاو خشانێکی کورت به‌ سه‌ر
کتێبی "ئایین و ده‌سه‌ڵات له‌ مێژووی رۆحانییه‌تی شیعه‌دا"
له‌ نووسینی به‌رێز هاشمی که‌ریمی
نوسینی: خه‌لیل خه‌زه‌ڵی

سایتی هه‌لوێست له‌ وتارێکدا کتێبی " ئائئن و ده‌سه‌ڵات له‌ پرۆسه‌ی مێژووی ڕوحانیه‌تی شیعه‌دا" له‌ نووسینی به‌رێز "هاشمی که‌یمی" ی به‌ خوێنه‌رانی ناساند . له‌و وتاره‌دا به‌ڵێن درابوو که‌ به‌جیاواز چاوێک به‌ ناوه‌رۆکی ئه‌م کتێبه‌ به‌رنرخه‌دا ده‌خشێنین.

کتێبی " ئائئن و ده‌سه‌ڵات له‌ پرۆسه‌ی مێژووی ڕوحانیه‌تی شیعه‌دا" له‌لایه‌ن دوکتور که‌مالی میراوده‌لی‌یه‌وه‌ وێڕای پێدا چوونه‌وه‌ ، سه‌ره‌تایه‌کی بۆ نووسراوه‌ . دوکتور میراوده‌لی له‌م ‌ سه‌ره‌تایه‌دا به‌ جوانی کتێبه‌که‌ و لایه‌نه‌ گرینگه‌کانی به‌ خوێنه‌ر ناساندووه‌ . دکتور میراوده‌لی ئه‌نجامی قسه‌کانی به‌ کۆبه‌ندێک له‌ کتێبه‌که‌ به‌م شێوه‌یه‌ کۆتایی پێ‌دێنێ"...باسه‌که‌ی کاک هاشم پڕه‌ له‌ گێڕانه‌وه‌ی تاوانی بێ‌سنوور. هه‌ر له‌ سه‌ره‌تای ده‌سه‌ڵاتی ئایدئولوژیی نه‌ته‌وه‌یی ئومه‌ویه‌کانه‌وه‌ که‌ مه‌زهه‌بی سونی‌یان بۆ سه‌پاندنی ده‌سه‌ڵات و کولو‌نیالیزمی عه‌ره‌ب به‌کار برد ،تا ئیسماعیلی سه‌فه‌وی و خومه‌ینی که‌ مه‌زهه‌بی شیعه‌گه‌رییان بۆ په‌ره‌پێدانی ده‌سه‌ڵاتی سته‌مگه‌ریی فارسی و دیکتاتۆریی که‌سی و ئایینی به‌کاربرد......چه‌ندان نموونه‌ی زه‌ق و به‌هێزده‌بینین که‌ چۆن ئه‌و ده‌سه‌ڵاتدارانه‌ به‌ ناوی ئایینه‌وه‌ له‌ رێ و ڕه‌سمه‌‌کانی ئایینیدا خه‌ڵکیان کوشتووه‌ و خۆیان تا بیناقاقه‌له‌ فه‌ساد و هه‌موو ره‌وشتێکی دژی ئه‌خلاقیدا نوقم بوون ."

پاش سه‌ره‌تاکه‌ی دوکتور میراوده‌لی ، کتێبه‌که‌ ده‌سپێده‌کات . نووسه‌ر‌ سه‌رتا باسی "مه‌زهه‌ب له‌ بۆچوونی فه‌لسه‌فی دا" ده‌کا و به‌ باسی "ئایین و ده‌سه‌ڵات له‌ڕوانگه‌ی ئارکیۆلوژیای زانینه‌وه‌" درێژه‌ی پێده‌دات.که‌ به‌ پوختی باسێکی جیهان رووانگه‌‌ جیاوازه‌کان وقوتابخانه‌ فه‌لسه‌فی و زانستیه‌کان ده‌کات . ئه‌م جار دێته‌ سه‌ر باسی "په‌یوه‌ندی ئایین و ده‌سه‌ڵات" و ڕاسته‌وخۆ و به‌ بێ ترازان و حاشیه‌ ڕۆیشتن، دێته‌سه‌ر باسی پێوه‌ندیی ئایینی ئیسلام و ده‌سه‌ڵات. به‌رێز که‌ریمی به‌مه‌به‌ستی شی کردنه‌وه‌ی ئه‌م چه‌مکه‌، دێته‌ سه‌ر باسی جوولانه‌وه‌ فیکریه‌کان و یه‌که‌ یه‌که‌ باسی هه‌موو جوولانه‌وه‌ فیکریه‌کانی ناو دونیای ئیسلام ده‌کات و کورته‌یه‌ک له‌ بۆچوون و مێژوویان به‌ خوێنه‌ر ده‌ناسێنێ .پاش ئه‌و ناساندنه‌ ، باسێکی دیکه‌ی مێژوویی دێنێته‌ گۆڕ که‌ ئه‌ویش به‌ شێوه‌یه‌ک درێژه‌ی مه‌نتیقیی باسه‌که‌ی پێشووه‌ . له‌م باسه‌دا کاک هاشم به‌ وردی له‌ مێژووی جوولانه‌وه‌ مه‌زهه‌بییه‌کان ده‌کۆڵێته‌ه‌ و ئه‌مجار ده‌یان به‌سێ به‌ ڕاپه‌رینه‌ سیاسی جه‌ماوه‌ریه‌کانه‌وه‌ . که‌ به‌زۆری دژی ده‌سه‌ڵاتی ئیمپراتۆر‌یی ئیسلامی بوون. له‌م باسه‌دا خوێنه‌ر له‌ گه‌ڵ‌ مێژوو و تێکۆشان و سه‌رکه‌وتن و شکسته‌کانی جووڵانه‌وه‌کانی "خه‌وارج" ، "ئه‌بووموسلمی خوراسانی" ، "بابه‌کی خوڕه‌مدین" ، ڕاپه‌رینی "زه‌نگی"یه‌کان ، "قه‌رمه‌تیان ،" غولاتی شێعه‌ "و ... ئاشنا ده‌بێ . پاشآن باسی "حکوومه‌ته‌کانی شیعه‌ له‌ مێژوودا" دێته‌ ئاراوه‌ .له‌م به‌شه‌دا پاش لێکۆڵینه‌وه‌یه‌کی مێژوویی ، به‌رێز که‌ریمی‌ دێته‌ سه‌ر باسی ده‌سه‌ڵاتی "سه‌فه‌وی"یه‌کان و به‌ تێرو ته‌سه‌لی باسی ئه‌م رووره‌شانه‌ی میژووی مروڤایه‌تی ده‌کات . که‌ چۆن ئینسان کوشتن و خواردنی گۆشتی ئینسان ،لایان وه‌کو ئاو خواردنه‌وه‌ بووه.شان به‌ شانی نیشان دانی دڵ ره‌قی و جینایه‌ته‌کانی سه‌فه‌ویه‌کان ، به‌رێز که‌ریمی به‌شێوه‌یه‌کی لۆژیکی باسی شه‌ری داگیر که‌رانه‌ و ته‌ماحی ئابووری و ده‌سه‌ڵات خوازی سه‌فه‌ویه‌کان به‌ هاوکاریی رۆحانییه‌تی شیعه‌ ده‌کات که‌ چۆن بۆ پێشبردنی ئه‌و ئامانجانه‌ به‌ که‌ڵک وه‌رگرتن له‌ مه‌زهه‌بی شیعه‌ ( له‌ به‌رانبه‌ر ده‌سه‌ڵاتی هاوشێوه‌ی خۆی واتا عوسمانییه‌کان که‌ ئه‌وانیش وه‌ک ئه‌مان، مه‌زهه‌بی سونی یان به‌رز کردبووه‌وه‌) شه‌ڕی مه‌زهه‌بی‌یان وه‌ڕی خستووه‌ و کۆمه‌ڵانی خه‌ڵکی ساده‌ دڵ یان نوقمی خورافه‌ و دوواکه‌وتوویی کردوه‌. پاشان له‌ چاپترێکی سه‌ربه‌خۆ دا دێته‌ باسی "شا ئیسماعیل سه‌فه‌وی" و به‌ که‌ڵک وه‌ر گرتن له‌ سه‌رچاوه‌گه‌لێکی زۆر ، لایه‌نه‌ کانی ژیانی پر له‌ تاوان و جه‌نایه‌تی "سوڵتانی ئیسلام په‌نا" ده‌خاته‌ به‌ر باس ولێکۆڵینه‌وه‌ . له‌م به‌شه‌دا باسی "حکوومه‌تی سه‌فه‌وی و رۆحانییه‌تی سه‌رده‌م" ده‌کات و به‌ جوانی ده‌وری فریوکارانه‌ و ته‌ماح و فه‌سادی ئاخونده‌کانیش به‌ به‌ڵگه‌وه‌ ده‌خاته‌ روو . که‌ چۆن کراسی شه‌رعی ده‌که‌نه‌ به‌ر کرداره‌کانی شا ئیسماعیل و کوشتاره‌ به‌کۆمه‌ڵه‌کانی به‌ جێگه‌ی ره‌زامه‌ندیی "خودا"ده‌ناسێنن.

"رۆحانییه‌تی شیعه‌ له‌سه‌رده‌می قاجاره‌کاندا" به‌شێکی دیکی کتێبه‌که‌ی به‌رێز که‌ریمی‌یه‌.له‌م به‌شه‌دا ده‌بینین که‌ پاش سه‌فه‌ویه‌کان که‌ ئاخونده‌کان وه‌ک شه‌رێکی ده‌سه‌ڵات ده‌وریان بینی و شه‌ریکی دزی و تاڵان و جه‌نایه‌تکانی شاکانی سه‌فه‌وی بوون، له‌ سه‌رده‌می قاجاره‌کانیش دا دیسان به‌هه‌مان ده‌سه‌ڵات و سه‌روه‌ت و سامان ده‌گه‌نه‌وه‌ . ئه‌رکی سه‌ره‌کیی ئاخونده‌کانی له‌م دو ده‌سه‌لاته‌دا خۆش کردنی ناکۆکی نێوان شیعه‌ و سونی و په‌ره‌پێدانی دواکه‌وتوویی و خورافه‌ بووه‌. پاش ئه‌م باسه‌ به‌ره‌ به‌ره‌ له‌ شۆڕشی "مه‌شرووته‌" نیزیک دبینه‌وه‌ و به‌رێز که‌ریمی به‌رکوڵی باسی شۆڕشی مه‌شرووته‌ له حه‌ره‌که‌ته‌ رووناکبیریه‌کانی سه‌رده‌می قاجاره‌وه‌ ده‌سپێده‌کات . ئه‌مجار ده‌ور و کاریگه‌ریی ئه‌م رووناکبیرانه‌ له‌ هه‌ڵگیرسانی ئه‌م شۆڕشه‌ به‌ درێژه‌ باسده‌کات. که‌ ناساندنی که‌سایه‌تییه‌ رووناکبیره‌کانی ئه‌و سه‌رده‌مه‌ به‌شێکی دیکه‌ی کتێبه‌که‌ی کاک هاشمی که‌ریمی‌یه‌.

له‌ باسی شۆڕشی مه‌شرووته‌دا (1906- 1909 ز) ئێمه‌ به‌وردی له‌ گه‌ڵ ده‌وری رووخێنه‌ری ئاخونده‌کان و کۆنه‌په‌رستانی دیکه‌ ،که‌ به‌ مه‌شرووعه‌ خوازان ده‌ناسران ، ئاشنا ده‌بین و ده‌بینین که‌ چ ده‌ورێکی کاریگه‌ریان له‌ به‌ شکست کێشانی ئه‌م شۆڕشه‌دا بووه‌ .پاش شۆڕشی مه‌شرووته‌ و رووداوه‌کانی ئه‌م شۆڕشه‌و ئاڵ و گۆڕه‌کانی پێک هاتوو به‌ هۆی ئه‌م شۆرشه‌وه‌ . هه‌روه‌ها ده‌وری مه‌زهه‌ب و ئاخونده‌کان له‌م سه‌رده‌مه‌دا ، نووسه‌ر له‌ گه‌ڵ ره‌وتی روو له‌ پێشی مێژو ده‌مان هێنێته‌ سه‌رده‌می په‌هله‌ویه‌کان و له‌ ره‌زا خانی میر پێنج که‌ پاشتر به‌ کودتا ده‌بێته‌ ره‌زا شا ،ده‌سپێده‌کات . له‌م سه‌رده‌مه‌دا ده‌بینین ،گه‌رچی شۆڕشی مه‌شرووته‌ سه‌رناکه‌وێ ،به‌ڵام به‌ په‌سه‌ند کردنی هێندێک یاسا‌ی مه‌ده‌نی ، ده‌سه‌ڵاتی ئاخونده‌کان تا ڕاده‌یه‌کی به‌رچاو به‌ربه‌ست ده‌کات . پاش به‌ ده‌سه‌ڵات گه‌یشتنی ره‌زا خان به‌ره‌ به‌ره‌ ئاخونده‌کان دێنه‌وه‌ پێش.ره‌زا خان پاش ده‌رکردنی یاسای "ره‌ش" له‌ ساڵی 1310ی هه‌تاوی که‌ تێکۆشانی هه‌رچه‌شنه‌ بیروباوه‌ڕێکی دیموکراسیخواز و پێشکه‌وتنخوازانه‌ی قه‌ده‌غه‌کرد؛ ئه‌و توند و تیژه‌یه‌ی که‌ له‌سه‌ر ئاخونده‌کانی خستبوو هێوه‌ر کرده‌وه‌ . پاش باسی ده‌وری رۆحانییه‌ت له‌ سه‌رده‌می په‌هله‌وی یه‌که‌م دا ، دێته‌ سه‌ر باسی حه‌مه‌ ره‌زا شا واتا دووه‌مین و ئاخرین شای بنه‌ماڵه‌ی په‌هله‌وی . له‌م پێوه‌ندیه‌دا بابه‌تیکی دیکه‌ ده‌بینین که‌ باسی ره‌وته‌ جیاوازه‌کانی ئه‌م سه‌رده‌مه‌ ده‌کات . له‌م به‌شه‌دا ئێمه‌ له‌گه‌ڵ سه‌رهه‌ڵدانی ره‌وته‌ ناوچه‌ییه‌کان وه‌ک پێک هاتنی یه‌که‌م رێکخراوی سیاسیی کوردی ( کۆمه‌ڵه‌ی ژ ک) و پاشتر حیزبی دیموکرات له‌ کوردستانی ئێران ، ئاشنا ده‌بین .هه‌ر له‌ درێژه‌ی ئه‌م باسه‌دا به‌رێز که‌ریمی به‌ ته‌سه‌لی باسی ره‌وتی چه‌پ و مێژووی سه‌رهه‌ڵدانی له‌ ئێران دا ده‌کات و هاوکات سه‌رهه‌ڵدانه‌وه‌ی ئاخونده‌کان به‌ پشتیوانیی ده‌سه‌ڵات و له‌ سه‌روویانه‌وه‌ حه‌مه‌ره‌زا شا باسده‌کات. تا ڕاده‌یه‌ک که‌ ( ئاخونده‌کان)خه‌ت و شوێن بۆ ده‌وڵه‌ت و به‌رنامه‌کانی دیاریده‌که‌ن و له‌ ئاست ره‌وتی ئیسڵاحیی حکوومه‌ت دا ، که‌ به‌ مه‌به‌ستی ده‌قدانی کۆمه‌ڵگه‌ له‌گه‌ڵ ره‌وتی جیهانیی سه‌رمایه‌داری ره‌چاو ده‌کرا، ده‌وه‌ستن . له‌م سه‌رده‌مه‌دایه‌ که‌ خومه‌ینی وه‌ک نوێنگه‌ی دوواکه‌وتوویی و پاشوه‌رۆخوازی دێته‌ مه‌یدان.

لێره‌ به‌دواوه‌ ئێمه‌ له‌گه‌ڵ ره‌وته‌ مه‌زهه‌بییه‌کان هه‌ر له‌ نێهزه‌تی ئازادیه‌وه‌ تا موجاهیدینی خه‌ڵق و لایه‌نگرانی "ویلایه‌تی فه‌قیه‌" ئاشنا ده‌بین و پاشتر کتێبه‌که‌ باسێکی تێر و ته‌سه‌ڵ له‌سه‌ر ئه‌م دیارده‌یه‌ واتا "ویلایه‌تی فه‌قیه‌" ده‌کات و بنج و بناوانی شیده‌کاته‌وه‌ . له‌ درێژه‌دا ده‌گاته‌ باسی هاته‌نه‌ سه‌رکاری کۆماری ئیسلامی و بۆچوونه‌ سیاسی و فقهیه‌‌کانی خومه‌ینی شی ده‌کاته‌وه‌ . که‌ له‌راستیدا بنه‌مای کار و تیکۆشانی حکوومه‌تی ئیسلامین . به‌شی ئاخری کتێبه‌که‌ باسی سیاسه‌ت و رێبازی حکوومه‌تی ئیسلامییه‌ له‌ ناوخۆی ئێران و هه‌روه‌ها له‌ ئاست وڵاتانی دیکه‌ و به‌تایبه‌ت وڵاتانی دراوسێی ئێراندا‌ . به‌رێز که‌ریمی به‌ "وته‌یه‌کی کورت" کۆتایی به‌ کتێبه‌که‌ی دێنی .هه‌ر له‌و کورته‌ وته‌دا ئه‌نجام وه‌رده‌گرێ و به‌ کورتی و به‌ پوختی ڕای خۆیده‌ر ده‌بڕێ و رێگه‌چاره‌ی رژگاریی کۆمه‌ڵانی خه‌ڵک له‌ له‌به‌رچاوگرتنی مافه‌کانی مرۆڤ ، دامه‌زرانی کۆمه‌ڵگه‌ی ڕاسته‌قینه‌ی مه‌ده‌نی ، ره‌خساندنی ده‌رفه‌تی ئابووری و کۆمه‌ڵایه‌تی و سیاسی بۆ هه‌موو ئه‌ندامانی کۆمه‌ڵگه‌ (ژن و پیاو ، شار و لادێ ، هه‌موو نه‌ته‌وه‌کان) ،جیایی دین له‌ ده‌وڵه‌ت ، ئازادیی ڕاگه‌یاندن و.... ده‌بینێ. ئیمه‌ جارێکی دیکه‌ وێرای ده‌سخۆشی کردن له‌ به‌ڕێز کاک هاشمی که‌ریمی ، هیوای سه‌رکه‌وتنی بۆ ئاوات ده‌خوازین و هه‌ر له‌وکاته‌شدا هیوادارین بۆ له‌ چاپدانه‌وه‌ی ئه‌م کتێبه‌ له‌ تیراژی گونجاودا هه‌وڵبدات.
تێبینی: ئه‌م دوو بابه‌ته‌ پێشتیر له‌ سایتی هه‌ڵوێست بڵاوکراونه‌وه‌

Monday, October 10, 2005

عێراق یه‌ک وه‌ڵات و یه‌ک نه‌ته‌وه‌ و یه‌ک ده‌ستووره‌؟



عێراق یه‌ک وه‌ڵات و یه‌ک نه‌ته‌وه‌ و یه‌ک ده‌ستووره‌؟
نوسینی: هیوا گوڵ محه‌ممه‌دی


کاتێک هه‌ڵبژاردن یان ڕاپرسی ده‌کرێ ، نابێ هیچ که‌س و لایه‌نێک بڕیار بدات که‌ ده‌نگده‌ران چۆن ده‌نگ بده‌ن. بنه‌ما دیموکراتیکه‌کان ئه‌وانه‌ن که‌ نابێ که‌س چه‌واشه‌ بکرێ یان بوی دیاری بکرێ که‌ ده‌نگی خۆێ به‌ چ شێوه‌یه‌ک به‌ کار بێنێ. له‌ وه‌ڵاتانی دیکتاتور لێدراو دا هه‌مو ئه‌و بنه‌ما و ئه‌سڵه‌ دیموکراتیک و پێشکه‌تنخۆازانه‌ پێچه‌وانه‌ن و ئه‌وه‌ی حیسابی بۆ نه‌کرێ و سه‌رنجی نه‌درێتێ ده‌نگی گه‌ل و هه‌ڵۆێست و ده‌ربڕین و هه‌ڵبژاردنی ئه‌وانه‌.

له‌ کاتی ده‌سه‌ڵاتی سه‌دام حسێن، دیکتاتوری حه‌بسکراوی عێراقی دا ، خه‌ڵک بانگ ده‌کران بۆ ده‌نگ دان به‌ڵام له‌ سه‌ر به‌رگی ده‌نگدانه‌که‌ ته‌نیا یه‌ک ئاڵترناتیڤ هه‌بو ئه‌ویش به‌ڵێ بو. واته‌ له‌ پێشدا دیاری کرابو که‌ ده‌بێ کێ هه‌ڵبژێردرێ. ئێستا که‌ سه‌دام نه‌ماوه‌ ، هه‌ر هه‌مان کولتور و عه‌قڵ حاکمه‌ و گه‌ل ته‌نیا بۆ به‌ڵێ وتن هه‌قیان هه‌یه‌ بێنه‌ به‌رده‌م سندوقه‌کانی ده‌نگدان.

له‌ باشوری کوردستان یه‌کیه‌تی و پارتی ده‌سه‌ڵاتی موتڵه‌قیان هه‌یه‌ و هه‌مو پۆست و کورسی و مه‌نسه‌به‌کانیان له‌ نێو خۆیان دا دابه‌ش کردوه‌ و ئه‌وه‌ی که‌ ده‌یڵێن و بانگه‌شه‌ی بۆ ده‌که‌ن که‌ گه‌ل بێن و ده‌نگ بده‌ن ته‌نیا گاڵته‌ جاڕی و یاری کردنه‌ به‌ ئه‌قڵ و که‌رامه‌تی تاکی کورد. له‌ کاتی بنیات نانه‌وه‌ی عێراقی لێک هه‌ڵوه‌شاو دا، مام جه‌لال و کاک مه‌سعود بڕیاری خۆیان دا که‌ کورد به‌شداری ئه‌م ده‌سه‌ڵاته‌ کاتیه‌ بکات و به‌ر له‌وه‌ش گه‌ل بچنه‌ به‌رده‌م سه‌ندوقه‌کانه‌وه‌ ئه‌وان هه‌مو شتێکێان بڕانبوه‌وه‌ و قه‌راری خۆیان دابو...

مام جه‌لال و کاک مه‌سعود و شیعه‌کان ڕێک که‌وتبون که‌ پۆستی سه‌رۆک کۆماری و سه‌رۆک وه‌زیران له‌ نێو خۆ دا دابه‌ش بکه‌ن و له‌ کوردستانیش وا ڕێک که‌وتبون که‌ مامه‌ ببێته‌ سه‌رۆک کۆماری عێراق و کاکه‌ش ببێته‌ سه‌رۆکی هه‌رێم. ئێستا له‌ ئه‌ده‌بیاتی ڕه‌سمی یه‌کیه‌تی و پارتی و عه‌ره‌به‌کان دا کوردستان به‌ ده‌گمه‌ن ناوی هه‌یه‌ و هه‌وڵیان ئه‌وه‌یه‌ که‌ هه‌ریم و ئیقلیم به‌کار بێنن و ئه‌وه‌ش سیاسه‌تێکی ته‌عریبکارانه‌ی ناڕه‌وایه‌ بۆ بێ هێزکردنی گێانی نه‌ته‌وه‌ و نیشتمان خۆشه‌ویستی له‌ نێو گه‌ل دا.

یه‌کیه‌تی و پارتی ، مام جه‌لال و کاک مه‌سعود و ئه‌ندامانی پایه‌ به‌رز و نزمی ئه‌و دوو حیزبه‌ گه‌یشتونه‌ته‌ لوتکه‌ی ئاواته‌کانیان. ئه‌و مام جه‌لال و کاک مه‌سعوده‌ی که‌ ڕۆژێ له‌ ڕۆژان چاو له‌ ده‌ستی ئیتلاعاتی ئێرانی بون که‌ وه‌ره‌قه‌ی هاتو چویان بداتێ و لاره‌ملی ئێرانیه‌کان بون تا سه‌فه‌رێکی دره‌وه‌ بکه‌ن ، ئه‌مڕۆ له‌ کۆشکی سپی و پارله‌مانی ئینگلیس و ... دا پێشوازیان لێ ئه‌کرێ و له‌ کوردستانیش له‌ خۆا به‌ولاوه‌ ئه‌وان خۆیان هه‌مه‌کاره‌ن و له‌مپه‌ر و ڕێگریان نیه‌ و که‌س ناتوانێ بڕیار و ده‌ستوره‌کانیان به‌رێته‌ ژێر پرسیار. جۆانترین کۆشک و ته‌لاریان هه‌یه‌ ، باره‌گاکانیان له‌ هی سه‌دام حسێن گه‌وره‌تر و به‌رفراوانترن.

ئه‌مڕۆ مام جه‌لال و کاک مه‌سعود خه‌ڵکی شه‌قڵاوه‌ و مه‌سیف و دوکان ته‌عریب ئه‌که‌ن و له‌ ماڵ و حاڵی خۆیان وه‌ده‌ر ئه‌نێن بۆ ئه‌وه‌ی هه‌موو ده‌وروبه‌ره‌کانیان له‌ خزم و ده‌ست وپێوه‌ندی خۆیان بێ. ئه‌مڕوو ئه‌وه‌ی یه‌کیه‌تی و پارتی بیلێن له‌ سه‌ر ئه‌مر و فه‌رموده‌ی مام جه‌لال و کاک مه‌سعود، ده‌بێ خه‌ڵکی کوردیش هه‌ر ئه‌وه‌ بڵێن و هه‌ر ئه‌وه‌ بکه‌ن، لادان خه‌یانه‌ته‌ و خه‌یانه‌تکار سزای هه‌یه‌.
هه‌تا ئێستا مام جه‌لال و کاک مه‌سعود و یه‌کیه‌تی و پارتی هه‌وڵی ئه‌وه‌یان نه‌داوه‌ که‌ چاره‌نوسی ئاواره‌کانی که‌رکوک دیاری بکرێ و دوو حکومه‌ته‌که‌ش هه‌روا پا له‌ حه‌وان و ده‌سه‌ڵاتادارانی ئه‌و دوو حیزبه‌ش خه‌ریکی گیرفان پڕ کردنن. یه‌کیه‌تی و پارتی ده‌ڵێن ده‌نگ بده‌ن بۆ ده‌ستور واته‌ داهاتوتان مسه‌وه‌گه‌ر بکه‌ن ، ده‌نگ بده‌ن بۆ ده‌دستور واته‌ کۆتایێ به‌ ئه‌نفال بێنن و ...

له‌ عێراق و به‌غداش دروشمه‌کان ڕێک پێچه‌وانه‌ن و سه‌رانی یه‌کیه‌تی وپارتی ڕۆژانه‌ ئه‌یان بینن و ئاگادار و بێده‌نگن. واته‌ له‌گه‌ڵن و دروشمه‌کانیش به‌م جورن
شعب واحد - وطن واحد - دستور واحد
که‌وا بو کورد ده‌نگ به‌ چی بدات ، ئه‌گه‌ر عێراق یه‌ک و ده‌ستور یه‌ک و نه‌ته‌وه‌ش یه‌ک بێت؟ ئه‌ی ئه‌و فیدراڵی و پێکه‌وه‌ ژیانی ئاره‌زۆمه‌ندانه‌ و برایه‌تی کورد و عه‌ره‌ب و تورکمان و ئاسوری-سوریانیه‌ یانی چی؟ عه‌ره‌بێک که‌ هێشتا نه‌ ده‌سه‌ڵاتی هه‌یه‌ و نه‌ ئارامی و نه‌ ڕێبه‌ر، ئاوا بیر ده‌کاته‌وه‌ ئه‌گه‌ر به‌یانی ئه‌وانه‌ی هه‌بو چیمان پێ ده‌ڵێ؟ کاک مه‌سعود بارزانی به‌ڕێوه‌یه‌ بۆ ئیمریکا و عه‌لاویش له‌ هاتوچوی سه‌ری ڕه‌ش دایه‌ ، له‌وه‌ ئه‌چی یاریه‌کی دیکه‌ له‌ پشتی په‌رده‌که‌وه‌ بێ و ئه‌مجاره‌یان مام جه‌لال و جه‌عفه‌ری فت کرێن و ده‌سه‌ڵات بدرێته‌ کاک مه‌سعود و عه‌لاوی.

مام جه‌لال و یه‌کیه‌تی هه‌م عێراقیان ده‌چێ و هه‌م کوردستان و ئه‌مه‌ش په‌یامی شه‌ڕی ناوخۆیێ ئه‌گه‌یه‌نێ و له‌وه‌ ئه‌چێ ئیمریکا بۆ به‌ جێ گه‌یاندنی پیلانه‌کانی ئه‌مجاره‌ش 75 دووباره‌ کاته‌وه‌ به‌ڵام به‌ جورێکی کومودی. من سه‌باره‌ت به‌م به‌ ڕێفراندوم هیچم نه‌نوسی له‌به‌ر ئه‌وه‌ به‌لامه‌وه‌ شانوگه‌ری و گاڵته‌جاڕیه‌. ئه‌و ده‌ستوره‌ی که‌ به‌ر له‌وه‌ بنوسرێ له‌ لایه‌ن مام جه‌لال و کاک مه‌سعوده‌وه‌ به‌ڵێی بۆ وتراوه‌ و پێش ئه‌وه‌ی بکرێته‌ کوردی پارله‌مانی کوردستان بانگ کران که‌ بڵێن به‌ڵێ و پێش ئه‌وه‌ی خه‌ڵکی کورد له‌ ناوه‌رۆکه‌که‌ی بگه‌ن وه‌ک ته‌وق کراوه‌ته‌ ملیان...
ته‌له‌فزیونه‌کانی یه‌کیه‌تی و پارتی ئه‌وه‌نده‌ به‌ گۆڕ باسی هاتنی ئیبراهیم تاتلیس سس ده‌که‌ن بۆ باشوری کوردستان مروڤ وا ئه‌زانی که‌ کورد ڕزگاری بوه‌ و بله‌ش هه‌مو ژیانی خزمه‌تی هونه‌ری ئه‌م گه‌له‌ی کردوه‌. ئاخر نه‌ته‌وه‌یه‌ک ئاوا پێشوازی له‌ ئیبراهیم تاتلیس ێکی دز و نیشتمان فروش بکات بێگومان ئه‌و ده‌ستوره‌شی به‌ باڵا دا ئه‌بڕدرێ... هه‌مو خه‌ڵکی ڕۆژهه‌ڵاتی کوردستان له‌ خۆێن دا گه‌وزا ، ته‌له‌فزیونه‌کانی یه‌کیه‌تی و پارتی یه‌ک له‌ سه‌دی ئه‌و گۆڕه‌ گۆڕه‌یان نه‌کرد که‌ بۆ بله‌ نیشتمان فروشی ئه‌که‌ن...

ئاخر ئه‌گه‌ر مام جه‌لال و کاک مه‌سعود که‌ ڕه‌نج و قوربانی دانی سه‌د ساڵ نه‌ته‌وه‌که‌یان هه‌رزان فروش کرد و که‌رکوک و خانه‌قینیان دوڕاند و بونه‌ کۆڵه‌که‌ی بنیات نانه‌وه‌ی عێراقی عه‌ره‌بی و گه‌لی کوردیان خسته‌وه‌ قه‌فه‌سی یه‌کگرتوی عێراق و و چه‌پڵه‌ یان بۆ لێ بدرێ ، ده‌بێ بۆ برایم تاتلیسیش که‌ زیاتر له‌ 30 ساڵه‌ گورانی کوردی ئه‌نفال ئه‌کا و ئه‌یانگۆڕێ بۆ تورکی ئاوا پێشوازی لێ بکرێ.
ئه‌ری به‌ڕاستی ئێوه‌ چ نوسه‌ر و خاوه‌ن هه‌ڵۆێستێکن که‌ له‌ به‌رانبه‌ر ئه‌و هه‌ڵوێستانه‌ دا بێده‌نگن و سه‌رتان شۆڕ کردوه‌ته‌وه‌.
ڕێبه‌رانی باشور به‌ گریلاکانی باکوری کوردستان ده‌ڵێن تێروریست و به‌ برایم تاتلیس ده‌ڵێن هونه‌رمه‌ندی گه‌وره‌ و شایی بۆ ئه‌گێڕن و ئێوه‌ش بێده‌نگن ، نه‌ک هه‌ر بێده‌نگن به‌ڵکو چاوشۆڕیشن...
کورد له‌ عێراق دا وه‌ک نه‌ته‌وه‌یه‌کی جیاواز هیچ حیسابێکی بۆ نه‌کراوه‌ ، کورد له‌ ده‌ستوری نوێ دا وه‌ک نه‌ته‌وه‌ حیسابی بۆ نه‌کراوه‌ ، کورد له‌ به‌رانبه‌ر ئه‌و هه‌مو ناڕه‌وایه‌تی و ئه‌نفال و شیمیا بارانه‌ی که‌ کراوه‌ هیچی وه‌ر نه‌گرتوه‌ و هیچ وه‌ر ناگرێ ، کورد له‌ داهاتوش دا هه‌ر هه‌مان چاره‌نوسی ده‌بێ که‌ له‌ کاتی شۆڕشی بارزانی دا و له‌ دوای ئاشبه‌تاڵه‌که‌شی هه‌یبوه‌.
ئه‌وانه‌ی که‌ قازانج ده‌که‌ن و به‌ ته‌نه‌که‌ دولار وه‌ر ده‌گرن سه‌رانی یه‌کیه‌تی و پارتین و به‌س. ئه‌وه‌ی که‌ له‌گه‌ل 75 جیاوازه‌ ئه‌وه‌یه‌ که‌ ئه‌وکاته‌ ته‌نیا بارزانی بۆ خۆێ ته‌لیسه‌ دولاره‌کانی وه‌رگرت له‌ پاداشی ئاش به‌تاڵه‌که‌دا، به‌ڵام ئه‌مجاره‌یان مام جه‌لایش شه‌ریکه‌..
عێراق یه‌ک و نه‌ته‌وه‌ یه‌ک و ده‌ستوره‌ یه‌که‌.

051009

Saturday, October 08, 2005

تورکیا و ئه‌وروپا و ( بن لادن) یه‌کان

تورکیا و ئه‌وروپا و ( بن لادن) یه‌کان
PUKmedia
نوسینی: موعه‌مه‌ر قه‌زافی
وه‌رگێڕانی: رێکه‌وت ئیسماعیل ئیبراهیم

به‌ ئه‌ندام بوونی تورکیا له‌ یه‌کێتی ئه‌وروپا دیسان به‌ توندی باڵی کێشایه‌وه‌ به‌سه‌ر ڕوداوه‌ سیاسیه‌کاندا، بۆیه‌ وه‌رگێڕانی ئه‌م وتاره‌ی سه‌رۆکی لیبیا ( موعه‌مه‌ر قه‌زافی )م که‌ له‌ ماڵپه‌ڕه‌که‌ی خۆیدا بڵاوی کردۆته‌وه‌ به‌ پێوست زانی تا خوێنه‌ری کورد به‌ دیوێکی دیکه‌ی دۆسیه‌که‌ ئاشنا بکه‌م.
تورکیاو ئه‌وروپا و بن لادنیه‌کان:

له‌ به‌رژه‌وه‌ندی تورکیادایه‌ که‌ به‌شێک بێت له‌ یه‌کیه‌تی ئه‌وروپا, هه‌روه‌ها له‌ به‌رژه‌وه‌ندی جیهانی ئیسلامیشدایه‌ که‌ گه‌لێکی ئیسلامی وه‌ک تورکیا ئه‌ندامی یه‌کیه‌تی ئه‌وروپا بێت و بکرێت به‌ ئه‌سپه‌که‌ی ته‌راوده‌، به‌ڵام ‌به‌رژه‌وه‌ندی ئه‌وروپا ته‌نها ئه‌وه‌نده‌ ده‌خوازێت‌ تورکیا ئه‌ندامی په‌یمانی ناتۆ بێت و وه‌ک بنکه‌یه‌کی سه‌ربازی به‌کاری بهێنن نه‌ک بیکه‌نه‌ ئه‌ندامێکی یه‌کیه‌تی ئه‌وروپا...

تورکیا دره‌ختێکه‌ ڕه‌گه‌که‌ی له‌ ئاسیادایه‌ و ته‌نها لق و پۆپه‌کانی به‌سه‌ر ئه‌وروپاوه‌ن، ده‌وڵه‌تێکی ئیسلامی سونی یه‌و که‌له‌پورو کلتورو مێژوو ڕه‌وه‌شت و زه‌وقی ڕۆژهه‌ڵاتی هه‌یه‌ و ته‌نانه‌ت ئه‌و پیته‌ لاتینیانه‌شی که‌ به‌کاری ده‌هێنێت نه‌ک هی خۆی نی یه‌ به‌ڵکو ناشرینیشی کردوون...

تورکیا لانکه‌ی شارستانیه‌تێکی مێژویی ڕۆژهه‌ڵاتی مه‌زنه‌، سه‌نته‌ری ئیمپراتۆریه‌تی عوسمانی به‌رفراوان و خه‌لافه‌تی ئیسلامی بووه‌، بۆیه‌ ڕوانینی تورکیا بۆ ئه‌وروپا له‌ ڕووی مێژوویه‌وه‌ ته‌نها فراون خوازیه‌و هیچی تر..تورکیا 55 ساڵه‌ هه‌وڵ ده‌دات که‌ ببێت به‌ ئه‌وروپی به‌ڵام ئه‌مه‌ له‌ به‌ر کۆمه‌ڵێک هۆکاری پراگماتیکی و‌ دوور له‌ خه‌یاڵ پڵاوی نه‌هاتۆته‌ دی.

هه‌وڵی بوونه‌ ئه‌ندامی تورکیا له‌ یه‌کیه‌تی ئه‌وروپا وه‌ک گواستنه‌وه‌ی ئه‌ندامی له‌شی که‌سێکه‌ بۆ که‌سێکی دیکه‌ی بێگانه‌ که‌ نه‌ک هه‌مان گروپی خوێنی نی یه‌ به‌ڵکو لاشه‌ی که‌سه‌که‌ی دیکه‌ قبوڵی ناکات، ته‌نها خاڵی هاوبه‌شیش له‌ نێوانیاندا ئه‌وه‌یه‌ که‌ ئه‌و دوو که‌سه‌ له‌ دوو خانووی دراوسێدا ده‌ژین له‌ سه‌ر یه‌ک شه‌قام!ره‌نگه‌ ئه‌وروپا سود له‌ ده‌ستی هه‌رزانی کرێکاری تورکیا ببینێت به‌ڵام هه‌رگیز له‌ به‌ر هه‌ندێک ماف و ئه‌رک پێ ی خۆش نییه‌ ئه‌و ده‌ستی کرێکاره‌ ده‌ستی وڵاتێکی ئه‌ندامی خۆی بێت.سودی ئه‌وروپا چی یه‌ که‌ ده‌وڵه‌تێکی رۆژهه‌ڵاتی دوواکه‌وتوو (له‌ چاو خۆیاندا) بکاته‌ ئه‌ندامی خێزانی خۆی؟ ده‌وڵه‌تێک که‌ داهاتی تاکه‌ که‌س تیایدا ساڵانه‌ 7 هه‌زار دۆلار تێ په‌ڕناکات له‌ کاتێکدا که‌مترین داهات له‌ ئه‌وروپا 19 هه‌زار دۆلاره‌ له‌ ئیسپانیا و 26 هه‌زاره‌ له‌ ئه‌ڵمانیا! له‌ تورکیا تێکڕای ڕێژه‌ی مردنی منداڵ له‌ هه‌زاردا 45 ده‌بێت به‌ڵام له‌ ده‌وڵه‌تانی ئه‌وروپا ئه‌وڕێژه‌یه‌ له‌هه‌زاردا ته‌نها (4) ده‌بێت، وێرای ئه‌وه‌ش ڕێژه‌ی هه‌ڵئاوسان له‌ تورکیا %70 یه‌ به‌ڵام له‌ ئه‌وروپا ئه‌و ڕێژه‌یه‌ له‌ نێوان 2-3% تێ په‌ڕ ناکات..ئه‌وه‌ی که‌ لێره‌دا گرنگه‌ ئه‌وه‌یه‌ که‌ ئه‌وروپا نایه‌وێت تورکیا بکاته‌ ئه‌سپه‌که‌ی ته‌راوده‌، گرفتی ئه‌وروپا له‌گه‌ڵ ئه‌و توێژه‌دا نی یه‌ که‌ قاڵه‌وه‌بووی سیاسه‌تن و ( ئه‌تاتورک ) پیرۆز ده‌که‌ن، گرفتی ئه‌وروپا له‌گه‌ڵ ئه‌و وه‌چه‌یه‌ی ئێستاو داهاتودایه‌ که‌ ده‌رس و وانه‌ی خۆیان له‌ ئه‌نته‌رنێت و که‌ناڵه‌ ئاسمانیه‌کانه‌وه‌ وه‌رده‌گرن، ئه‌وانه‌ی گوێڕایه‌ڵی په‌یفی فه‌قێ ئاینیه‌کان و (ئوسامه‌ بن لادن)ن، ده‌ڵێن چی ئه‌گه‌ر گوتمان ئه‌مڕۆ هه‌زاران تورک هه‌نه‌ بوونه‌ته‌ ده‌روێشی بن لادن و مه‌لا عومه‌رو دارو ده‌سته‌کانیان؟ بێ گومان ئه‌و هه‌زاران که‌سه‌ ئه‌مڕۆ له‌ تورکیا هه‌نه‌ بۆیه‌ ده‌شڵێین ( ئه‌گه‌ر) بۆ ئه‌وه‌ی زۆر دڵمان دا نه‌خورپێت.. ئه‌مانه‌ پێیان وایه‌ ئه‌وروپا کافره‌ و ته‌نها شایه‌نی ئه‌وه‌یه‌ که‌ به‌ شمشێر فه‌تح کرێت، هه‌روه‌ها بڕواشیان به‌وه‌ نی یه‌ وه‌ک ده‌وڵه‌تی عوسمانی کۆن تا نزیک ( ڤیه‌نا ) بێن و ئیتر بووه‌ستن به‌ڵکو ده‌یانه‌وێت له‌ ئه‌تله‌سیه‌وه‌ بپه‌ڕنه‌وه‌ بۆ ئه‌وبه‌ره‌وه‌ هاوتای عه‌قه‌به‌ی کوڕی نافع که‌ به‌ سواری ئه‌سپه‌که‌یه‌وه‌ له‌ که‌ناری ئه‌تله‌سیه‌وه‌ گوتبووی: سوێند به‌ خوداوه‌ند ئه‌گه‌ر بزانم له‌ پشت ئه‌م ئاوه‌وه‌ ژیان هه‌یه‌و مرۆڤ ده‌ژی هه‌ر به‌م ئه‌سپه‌م ده‌په‌ڕیمه‌وه ‌و هه‌مویانم ده‌کرده‌ موسڵمان.ئه‌و ده‌مه‌ عه‌قه‌به‌ نه‌یده‌زانی که‌ له‌و به‌ر ئاوه‌که‌وه‌ کشوه‌ری ئه‌مه‌ریکا هه‌یه‌، به‌ڵام ئه‌مانه‌ی ئێستا زۆر باش ده‌زانن له‌وبه‌ر ئه‌تله‌سیه‌وه‌ چی له‌ گۆڕێدایه‌...

ئه‌قڵیه‌تی ئه‌م تازانه‌ به‌ جۆرێکی دیکه‌یه‌، ئه‌مانه‌ بڕوایان به‌ هه‌ڵوه‌شاندنه‌وه‌ی حکومی له‌ سێداره‌دان نی یه‌، ئه‌مانه‌ تا ئێستاش پێیان وایه‌ که‌ باشترین سزا بۆ که‌سێک دزی بکات ئه‌وه‌یه که‌ ده‌ستی ببڕیته‌وه‌، ئه‌مانه‌ کار به‌ و ئایه‌تانه‌ ده‌که‌ن که‌ ده‌ڵێت (ولكم فى القصاص حياة يأولى الألباب) و (ومن لم يحكم بما أنزل الله فأولئك هم الفاسقون).
بیجگه‌ له‌وه‌ش ئه‌مانه‌ قایل نابن به‌وه‌ی که‌ تورکیا ئه‌ندامی یه‌کیه‌تی ئه‌وروپا بێت و ئه‌و پارت و ڕیکخراوه‌ سیاسیانه‌ی تورکیاش که‌ ناوێکی ئیسلامیان هه‌ڵگرتووه‌ له‌ سایه‌ی ئه‌م به‌ ئه‌ندام بونه‌دا ڕێگای کاریان لێ بگیرێت و یاسا‌غ کرێن به‌ڵام له‌ ئه‌وروپا هه‌مان ئه‌و پارتانه‌ی که‌ ناوی مه‌سیحیان هه‌بێت ئازاد بن!ئه‌و ئیسلامیه‌ توند ڕه‌وه‌ تازانه‌ی که‌ سبه‌ی ده‌سه‌ڵات به‌ده‌ست ده‌گرن یاخود رای گشتی بۆ خۆیان راده‌کێشن هه‌رگیز ئاماده‌نابن ئه‌ندامی یه‌کیه‌تیه‌ک بن که‌ شه‌ریعه‌تی ئیسلام په‌یڕه‌و نه‌کات و سنوره‌کان دیاری نه‌کات. ڕه‌نگیشه‌ له‌ په‌رله‌مانی ئه‌وروپیدا ببنه‌ زۆرینه‌ چونکه‌ ئه‌وانه‌ هه‌ر ئه‌وه‌نده‌ی هاتنه‌ سه‌ر ده‌سه‌ڵات هه‌رچی یاسای دیاری کردن و ڕیکخستن و که‌م کردنه‌وه‌ی وه‌چه‌ هه‌یه‌ هه‌ڵی ده‌وه‌شێننه‌وه‌، چونکه‌ له‌ بڕوای ئه‌واندا ئه‌و کاره‌ حه‌رامه‌، هه‌مان شێوه‌ ش له‌ زیندووکردنه‌وه‌ی چه‌ند ژنه‌و حه‌ڵاڵ کردنی جاریه‌ دا (که‌ بێ گومان لێره‌دا ژنه‌ مه‌سیحیه‌ ئه‌وروپیه‌کانن).

به‌م جۆره‌ دانشتوانی تورکیا له‌ دانشتوانی هه‌ر ده‌وڵه‌تێکی ئه‌وروپی زیاتر ده‌بێت.نه‌ خشه‌ی ئیسلامیه‌کانی تورکیا بێ گومان به‌ هاوپه‌یمانی له‌گه‌ڵ قاعده‌ی ئه‌وروپادا پاش ئه‌مه‌ ئه‌وه‌ ده‌بێت که‌ پشت له‌ ئه‌وروپیه‌ مه‌سیحیه‌کان بگرن ئه‌مه‌ش له‌ ڕیگای ئه‌لبانیای ئیسلامی و بۆسنه‌ی ئیسلامیه‌وه‌، به‌م جۆره‌ له‌به‌رده‌م ئه‌وروپیه‌کاندا ته‌نها ئه‌وه‌ ده‌مێنێته‌وه‌ یان بێنه‌ ناو ئسیلامه‌وه‌ یان باج به‌ ده‌وڵه‌تی ئیسلامی بده‌ن ،هه‌روه‌ک چۆن جاران له‌ سه‌رده‌می خه‌لافه‌تدا په‌یڕه‌وده‌کرا، ئه‌مه‌ش له‌ قورئاندا هه‌یه‌و فه‌رزیکه‌ له‌ فه‌رزه‌کان، ره‌نگه‌ ئه‌م لێکدانه‌وه‌یه‌ بۆ هه‌ندێک که‌س مایه‌ی سه‌رسوڕمان یان پێکه‌نین بێت به‌ڵام بۆ ئیسلامیه‌کان ئه‌مه‌ په‌یامێکی خودایه‌و ده‌بێت ئه‌وان به‌ جێ ی بێنن.

لێره‌ به‌دوواوه‌ له‌ تورکیادا ئاینده‌ بۆ پارته‌ ئیسلامی و لایه‌نگره‌کانی بن لادنه‌، له‌ تورکیادا که‌ پارتێکی ئیسلامی دروست ده‌بێت خه‌ڵکیکی زۆر ئاماده‌ن ببنه‌ ئه‌ندامی ، له‌ چه‌ند ساڵێکی دیاری کراودا چه‌ندین ملوین که‌س له‌وانه‌ یه‌ک ملوین ئافره‌ت بونه‌ ئه‌ندامی پارتێکی ئیسلامی، به‌م جۆره بن لادن و مه‌لاکان و ده‌سته‌و تاقمه‌کانیان زۆر کامه‌ران ده‌بن ئه‌گه‌ر تورکیا ببێته‌ ئه‌ندامێک له‌ یه‌کیه‌تی ئه‌وروپا..

وێرای هه‌موو ئه‌مانه‌ تورکیا به‌ بوونه‌ ئه‌ندامی له‌ یه‌کیه‌تی ئه‌وروپا چه‌ندین بارو کۆڵی گران له‌ کێشه‌و گرفت و نه‌هامه‌تی له‌گه‌ڵ خۆیدا ده‌هێنێت له‌وانه‌ش کێشه‌ی کورد، مل ملانی تایفه‌گه‌ری، ئه‌گه‌ره‌کانی جه‌نگ له‌ سه‌ر ئاوی دیجله‌و فورات، ئه‌ندام بوونی له‌ ڕیکخراوی ( کۆنگره‌ی ئیسلامی )و ڕه‌گی تورکیا له‌ ده‌وڵه‌ته‌ ئیسلامیه‌کانی ئاسیای ناوه‌ڕاست...

سه‌لجوقیه‌کان و پاشان تورکه‌کان قه‌ومێک بوون که‌ به‌ فتوحات دروست بوون، به‌ فتوحات هاتنه‌ ئه‌نازۆل، به‌ فتوحات گه‌شتنه‌ ئه‌سته‌نبول، هه‌تا نه‌مسا هه‌ر به‌ فتوحات ڕایان کێشا...

ده‌متوانی ئه‌م زه‌نگه‌ مه‌ترسی داره‌ لێ نه‌ده‌م و په‌رده‌ له‌سه‌ر‌ نه‌خشه‌یه‌کی ئه‌وها هه‌ڵنه‌ده‌مه‌وه‌، به‌ڵام لێپرسراوێتیم به‌رامبه‌ر به‌ چه‌سپاندنی ئارامی له‌ سه‌رتاسه‌ری جیهاندا به‌ پله‌ی یه‌که‌م، پێگه‌ی په‌یژه‌ ئاسای ده‌ریای ناوه‌ڕاست که‌ که‌ناره‌کانی باشوری به‌ته‌واوی هی عه‌ره‌به‌و لیبیا له‌م که‌ناره‌ عه‌ره‌بیانه‌ دووهه‌زار کیلومه‌تری هه‌یه‌ و به‌بێ لیبیا که‌ناری باشور بونی نابێت، هه‌موو ئه‌م هۆکارانه‌ وایان لێ کردم که‌ سه‌باره‌ت به‌م دۆزه‌ ستراتیژیه‌ بدوێم و تێزه‌کانم ده‌ربڕم، دۆزێک که‌ ڕه‌نگدانه‌وه‌ی زۆر مه‌ترسی داری له‌سه‌ر وڵاته‌که‌م و ته‌واوی ناوچه‌که‌ ده‌بێت و ته‌واوی جیهان ده‌له‌رزێنێت، به‌ر له‌وه‌ی کاتمان له‌ده‌ست بده‌ین و بڕیارێک بدرێت که‌ هه‌موو ئه‌و ئاکامه‌ مه‌ترسی دارانه‌ی لێ بکه‌وێته‌وه‌...

Friday, October 07, 2005

به‌ ئاماده‌بوونی هه‌زاران هاولاتی ته‌رمی ژنه‌ هونه‌رمه‌ند


به‌ ئاماده‌بوونی هه‌زاران هاولاتی ته‌رمی ژنه‌ هونه‌رمه‌ند
مه‌رزییه‌ فه‌ریقی له‌ شاری سلێمانی به‌خاك سپێردرا

پاش ئه‌وه‌ی ژنه‌ هونه‌رمه‌ندی خۆشه‌ویست، مه‌رزییه‌ فه‌ریقی له‌ ئاکامی نه‌شته‌رگه‌ریه‌کی سه‌رنه‌که‌وتوودا له‌ له‌ ڕۆژی هه‌ڤده‌ی سێپته‌مبه‌ر له‌ شاری ستۆکهۆڵمی پێته‌ختی وڵاتی سوید کۆچی دوایی کرد، دوێنی پاش هه‌وڵێکی فره‌ی لایه‌نه‌ پێوه‌ندییداره‌کان ته‌رمه‌که‌ی، له‌ ڕێگه‌ی فڕگه‌ی نێونه‌ته‌وه‌یی هه‌ولێره‌وه‌ گه‌یشته‌وه‌ خاکی کوردستان و له‌وێش له‌ لایه‌ن هونه‌رمه‌ندانی شاری هه‌ولێرو به‌رپرسانی حزبی و حکومیه‌وه‌ پێشوازی لێکرا. پاش ئه‌وه‌ی شالیاری ڕۆشنبیری، سامی شۆڕش، چه‌ند وته‌یه‌کی پێشکه‌ش کردو ناسر ڕه‌زازی هاوسه‌ری خاتو مه‌رزه‌ش سپاسو ڕێزی زۆر ئاراسته‌ی هه‌موولایه‌ک کرد له‌ نێو ماته‌می ماته‌مگێڕانی هه‌ولێری پایته‌خی هه‌رێمی باشوری کوردستان به‌ره‌و شاری سلێمانی به‌ڕێخرا.
که‌ژاوه‌ی ته‌رمی یای مه‌رزه‌، له‌ ڕێگادا له‌ شارو شارۆچکه‌کان به‌شێوه‌ی شایان پێشوازی لێکراو به‌ هه‌زاران که‌س به‌ په‌رۆشه‌وه‌ له‌سه‌ر جاده‌و شه‌قامه‌کان ماڵئاوییان لێکرد.
له‌ شاری کۆیه‌ خوێنکاران و گه‌نجان به‌ سرودی ئه‌ڕه‌قیب و سڵاوی گه‌رمی دڵی پڕ ئومێدی مه‌ت پێشکه‌ش پێشوازیان له‌ ته‌رمی ئه‌و هونه‌رمه‌نده‌ ڕه‌زا سوک و ده‌نگ به‌سۆزه‌ کرد. و له‌شاری دوکانیش که‌ شوێنی حه‌وانه‌وه‌ ناسرو مه‌رزه‌ بوو، به‌ شێوه‌یه‌کی شایان پێشوازیان لێکردو به‌ڕێزه‌وه‌ به‌ڕێیان کرد.
خه‌ڵکی په‌رۆش و ماته‌مگێڕ له‌ به‌درێژی ڕێگای هه‌ولێر سلێمانی له‌ نزیک گوندوو شارۆچه‌کانیان چه‌پکه‌ گوڵی ڕێزو ئه‌مگناسیان ده‌هاویشته‌ سه‌ر ته‌رمه‌که‌ که‌ له‌ ئاڵای پیرۆزی کوردستان پێچرابوو.
كاتژمێر 45/2 پاشنیوه‌ڕۆی دوێنێ ، كاروانی که‌ژاوه‌ی ته‌رمی ژنه‌ هونه‌رمه‌ندی كورد مه‌رزیه‌ فه‌ریقی گه‌یشته‌وه‌ گردی شه‌هیدان له‌ سلێمانی.
له‌ ڕێوڕه‌سمێکی شکۆدارو شایسته‌‌دا، به‌ئاماده‌بوونی ژماره‌یه‌ک له‌ ئه‌ندامانی مه‌كته‌بی سیاسی و سه‌ركردایه‌تی یه‌كێتیی نیشتانی كوردستان و حزبه‌ کوردستانیه‌کان و به‌رپرسانی حكومه‌ت و نوێنه‌ری سه‌رجه‌م لایه‌ن ورێكخراو پارته‌ سیاسیه‌كان وده‌یان هه‌زار له‌ جه‌ماوه‌ری خه‌ڵكی كوردستان ته‌رمی خاتوو مه‌رزه‌ به‌ خاکی کوردستان سپێردرا. مه‌لا به‌ختیار وه‌ک نوێنه‌ری مام جه‌لال ، سه‌رۆک کۆماری ئێراق، پرسه‌و سه‌ره‌خۆشی ئاراسته‌ی هه‌ردوو بنه‌ماڵه‌ی فه‌ریقی و ره‌زازی كرد. له‌ به‌شێکی وته‌کانیدا گوتی: مه‌رگی مه‌رزیه‌ كۆستێكی گه‌وره‌بوو له‌ هونه‌ری كوردی كه‌وت بۆیه‌ هه‌موومان دڵمان ته‌نگه‌، مه‌رزیه‌ یه‌كێکه‌ له‌شه‌هیده‌نه‌مره‌كانی كوردستان.فه‌تاح زاخۆیی وه‌زیری رۆشنبیری حكومه‌تی هه‌رێمی كوردستان پرسه‌و سه‌ره‌خۆشی ئاراسته‌ی سه‌رجه‌م هونه‌رمه‌ندان و جه‌ماوه‌ری هه‌موو پارچه‌كانی كوردستان كردو وتی هه‌رهونه‌رمه‌ندێك كار بۆ میلله‌ته‌كه‌ی بكات به‌نه‌مریی ده‌مێنێته‌وه‌.
پاشان تاجه‌ گوڵینه‌ی سه‌رجه‌م پارت ولایانه‌كان و كه‌سایه‌تیه‌كان و رێكخراوو هاورێیانی مه‌رزیه‌ له‌سه‌ر گلكۆی هونه‌رمه‌ندی جوانه‌ مه‌رگ دانرا.

دواتر هونه‌رمه‌ند ناسری ره‌زازی له‌وته‌یه‌كیدا وێرای سوپاس و ئه‌مه‌گ ناسی بۆ جه‌ماوه‌ری كوردستان به‌تایبه‌تی جه‌ماوه‌ری خه‌ڵكی سلێمانی، رایگه‌یاند : ئه‌گه‌ر وه‌فاداری و ئاماده‌بوونی كۆمه‌ڵانی خه‌ڵكی كوردستان نه‌بوایه‌ به‌رگه‌ی ئه‌م خه‌مه‌گه‌وره‌یه‌مان نه‌ده‌گرت ، دواتر به‌ناشتنی ته‌رمی مه‌رزیه‌ كۆتایی به‌مه‌راسیمه‌كه‌هات.پێویسته‌ بگوترێ که‌ له‌سه‌ر داوای مه‌رزیه‌ی هونه‌رمه‌ند خۆی، ته‌رمه‌که‌ی گه‌ڕاندرایه‌وه‌ بۆ کوردستان و هه‌ر له‌سه‌ر داوی خۆشی که‌ پێشتر له‌ وتوێژێکی تایبه‌تدا ده‌ریبڕیبوو گۆرانی "له‌و ڕۆژه‌" دای له‌سه‌ر خوێندرا.

بێگومان ئه‌و ڕێزوو ئه‌مه‌گدارییه‌ی که‌ له‌ کاتی کۆچکردنی مه‌رزه‌ خانه‌وه‌ تا ئێستا له‌ لایه‌ن کوردستانیه‌کانه‌وه‌ ده‌رده‌بڕدرێ و به‌ تایبه‌ت پێشوازی جه‌ماوه‌ری باشوری کوردستان له‌ ته‌رمی مه‌رزه‌ ئه‌و ڕاستیه‌ ده‌سه‌لمێنێ که‌ ئه‌وانه‌ی خزمه‌تی نه‌ته‌وه‌که‌یان ده‌که‌ن و له‌گه‌ڵ ئازاره‌کانی ده‌ژین و خه‌بات بۆ ڕزگاری ده‌که‌ن و دڵسۆزانه‌و ئه‌مه‌گدارانه‌و به‌تین و سۆزه‌وه‌، تێده‌کۆشن له‌ لایه‌ن نه‌ته‌وه‌که‌یانه‌وه‌ ڕێزیان لێده‌گیری و نرخی ده‌زاندرێ. مه‌رزه‌ یه‌کێک له‌و هونه‌رمه‌نده‌ نه‌ته‌وه‌ییانه‌ بوو که‌ له‌مێژه‌وه‌ تارمایی سنوره‌ ده‌ستکرده‌کانی له‌ مێشکیدا سڕیبوه‌وه و به‌کرده‌وه‌ خه‌باتی بۆ به‌ ڕاستینه‌کردنه‌وه‌ی ئه‌و سرینه‌وه‌یه‌ ده‌کردو له‌ هه‌ر ده‌ربڕینێکیدا ڕزگاری کوردستان له‌ داگیرکه‌ره‌ ڕه‌نگاو ڕه‌نگه‌کان وێردی زمانی بوو. مه‌رزییه‌ ته‌نانه‌ت خۆی له‌ به‌سترانه‌وه به‌ پارت یان گروپێکی سیاسی ڕزگار کردبوو. چونکه‌ هه‌موو کوردستان وڵاتی خه‌ونه‌کان بوو بۆی، بۆیه‌ش بێ دوو دڵی له‌ هه‌ر شوێنێک خزمه‌تی پێکرابێ کردی و نه‌پرینگایه‌وه‌.

خاتوو تلوعی و دوو ڕۆژنامه‌ڤانی کوردی ڕۆژهه‌ڵات به‌شێوه‌ی کاتی ئازاد کران

خاتوو تلوعی و دوو ڕۆژنامه‌ڤانی کوردی ڕۆژهه‌ڵات
به‌شێوه‌ی کاتی ئازاد کران

خاتوو روئیا تلووعی و دوو ڕۆژنامه‌ڤانی کورد، به‌ له‌بریدانانی یه‌ک ملیارد قڕان، پاش شه‌ستوشه‌ش ڕۆژ ئازادکران. به‌ پێی بڵاڤۆکێکی ڕێکخراوی به‌رگری له‌ مافی مرۆڤی کوردستان، له‌ دوا کاته‌کانی ڕۆژی چوارشه‌ممه‌ 13ی ڕه‌زبه‌ری 2705 خاتوو ڕوئیا تلووعی ڕۆژنامه‌نوس و چالاکی بواری مافه‌کانی مرۆڤ و به‌تایبه‌ت بواری ژنان و سه‌رنوسه‌ری گۆڤاری ڕاسان وێڕای هه‌ردوو ڕۆژنامه‌ڤان ئجلال قه‌وامی و سه‌عید ساعدی، پاش تێپه‌ڕکردنی 66 ڕۆژ له‌ چاڵه‌ڕه‌شه‌کانی کۆماری ئیسلامی ئێران به‌ له‌بریدانانی یه‌ک ملیار قڕان تاکاتی دادگایکردنیان ئازاد کران. وێڕای ده‌ربڕینی خۆشحاڵی له‌ ئازاد بوونی ئه‌و به‌‌ڕێزانه‌ هیوادارین هه‌موو ئه‌وانه‌ی تا ئێستاش له‌ چاڵه‌ڕه‌شه‌کانی داگیرکه‌راندا ماون به‌ زوویی ئازاد بکرێن. ئه‌گه‌ر چی ئه‌و شێوه‌ ئازادییه‌ ناتوانێ ناوی ئازادیی ته‌واوی لێبندرێ و له‌ ڕاستیدا ئه‌وان له‌ به‌ندێکی بچوکه‌وه‌ هاوتونه‌وه‌ بۆ به‌ندیخانه‌ گه‌وره‌که‌ که‌ ژێر سێبه‌ری ڕه‌شی ده‌سه‌ڵاتی داگیرکه‌رانه‌ی کۆماری ئیسلامیه‌. خۆزگه‌و کاروخه‌باتی هه‌موومان له‌ پێناوی ئازادی ئێجگاری و ڕزگار بوون له‌ سێبه‌ری ڕه‌شی ڕژیمی خۆسه‌پێنی کۆماری ئیسلامیه‌.

Thursday, October 06, 2005


قسه‌ یان له‌ شێت ببیسه‌ یان له‌ منداڵ.!
مشعان جبووری وه‌ک نموونه‌یه‌ک

نوسینی: موحسین جوامێر

له‌ سایتی " یه‌کگرتوو " دا هه‌واڵی سیمینارێکم خوێنده‌وه‌، تیایدا پوخته‌ی نێوه‌ڕۆکی بۆچوونه‌کانی مشعان جبووری له‌مه‌ڕ رۆڵ و ده‌ستێوه‌ردانی زاڵمای خه‌لیل زاد له‌ ده‌ستووری ئیتتیحادی و به‌ناوی سوننه‌وه‌، بڵاو کردۆته‌وه‌و ده‌ڵًێ : ئه‌و پێشنییارانه‌ داواکاریی وڵاتی ئیقلیمین، به‌ تایبه‌تی تورکیا.. به‌ڵام به‌ناوی عه‌ره‌بی سوننه‌وه‌ به‌رزی کردوونه‌ته‌وه‌..

سه‌باره‌ت به‌ رۆڵی عه‌ره‌بی سوننه‌ش له‌مه‌ڕ نووسینه‌وه‌ی ده‌ستووردا، مشعان ده‌ڵێ : له‌ناو نوێنه‌ره‌کاندا سه‌ددام، زه‌رقاوی، نیشتمانی وخه‌ڵکی تریش هه‌ن..

له‌ راستیدا، ئه‌و قسانه‌ی مشعان، ئه‌گه‌رچی یه‌که‌م جاره‌ له‌ ئه‌وه‌وه‌ بیسترابن، بۆ هًێندێکیش قسه‌ی بندۆشه‌ک بن و تازه‌ ئاشکرا بووبن و خرابێتنه‌ سه‌ر دۆشه‌ک، وه‌لێ بۆ ئه‌وانه‌ی تۆزقاڵێک له‌ مێژوو و مامه‌ڵه‌ی تورک له‌ گه‌ڵ مه‌سه‌له‌ی کوردا، ئاگادار بن، بڕوا ناکرًێ ئه‌و ڕاستییه‌ نه‌زانن و له‌و فێڵ و فه‌ڕه‌جه‌ی که‌مالیستان نامۆ بن .. جیاوازییه‌که‌ هه‌ر ئه‌وه‌نده‌یه‌ که‌ مشعان هه‌ر که‌ له‌که‌لله‌ی دا، به‌ تایبه‌تی له‌ کوردستان، هه‌رچی له‌ بن به‌ڕێیه‌ ده‌یهێنێته‌ سه‌ر به‌ڕێ ..

ره‌نگبێ قسه‌ی مشعان بۆ عه‌ره‌به‌کان نوێ بێت، وه‌لێ بۆ کورد قه‌وانێکی سواوه‌یه‌، چونکه‌ له‌ مێژه‌ له‌ نێو دۆزه‌خی تورک و پیلانه‌کانیدا خول ده‌خۆنه‌وه‌ و له‌ مه‌رگه‌سات و خوێن و بۆنی باڕووت و ده‌رده‌سه‌ری به‌ولاوه‌، هیچی دیکه‌یان له‌و سیسته‌مه‌ نه‌دیوه‌. ئه‌گه‌ر ورده‌ ده‌سکارییه‌کیشی له‌ جۆری سیاسه‌تی خۆی له‌ حاند هه‌ندێ مافی زۆر بچکۆلانه‌ی نێو وڵاتی خۆیدا کردبێت، له‌ بن زه‌بری شه‌ق و پێله‌قه‌ و مه‌تره‌قی ئه‌وڕوپا بووه‌.

تورکیا هه‌میشه‌ له‌سه‌ر هێڵی شه‌مه‌نده‌فه‌ری خۆی بووه‌ له‌ دژی کورد و کوردستاندا و هه‌رگیز هه‌دای نه‌داوه‌. وه‌ک زلهێزێکی ناوچه‌ش، سه‌باره‌ت به‌ کێشه‌ی کورد، توانیویه‌تی کار له‌سیاسه‌تی وڵاتانی دیکه‌ش بکات، چ وڵاتانی گه‌وره‌ی دنیا و چ وڵاتانی ناوچه‌ وه‌کو سووریا و ئێران.. بۆ ته‌فروتونا کردنی بزاڤی کورد و له‌ به‌ینبردنی ئاواته‌کانیشی، هه‌میشه‌ کاریویه‌تی به‌ قازانجی خۆی ده‌سکه‌وتان هه‌ڵکڕێنێت.
ئه‌گه‌ر له‌ بیرمان بێ، له‌ سه‌ره‌تا و گه‌رمه‌ی نووسینی ده‌ستووردا، شاند له‌ دوای شاند بانگهێشتی تورکیا ده‌کران، هه‌ر له‌ گه‌وره‌ به‌رپرسانڕا بگره‌ تا حیزب و هه‌یئه‌ و کۆمه‌ڵه‌ و عه‌شایه‌ر و که‌سایه‌تییه‌کان..

ئه‌گه‌ر جه‌عفه‌ری و عه‌مماری ئه‌لحه‌کیم به‌ ئاشکرا ده‌دوان و به‌ دڵی تورک و له‌ دژی داخوازییه‌کانی کورد شه‌کریان ده‌شکاند، ئه‌وا کۆبوونه‌وه‌ی به‌دزی و ئاشکرای سه‌یرانگه‌ی ( بۆلو ) ی که‌مێک نزیکی ئه‌نقه‌ره‌، که‌ شاندی هاوپه‌یمانییه‌تی شیعه‌ و مه‌جلیسی ئه‌علا و ته‌وژمی سه‌دری و پارته‌ تورکمانییه‌کان وکه‌سایه‌تییه‌ عیراقییه‌کان و به‌ سه‌رپه‌رشتیی گه‌وره‌ سیاسه‌توانانی تورک وه‌ک عوسمان کورا تورک و حوسێن عه‌ونی، بۆ تۆژینه‌وه‌ له‌ باره‌ی ره‌وتی به‌ڕێوه‌چوونی نووسینه‌وه‌ی ده‌ستوور، نموونه‌ی هه‌ره‌ زه‌قن له‌سه‌ر ئه‌و سیاسه‌ته‌ی تورک شێلگیرانه‌ له‌ دژی کورد پێڕه‌وی کردووه‌ و ده‌شیکا و هه‌رگیزیش چۆکی شل نابێت.

گرفته‌که‌ی ئێمه‌ ته‌نیا له‌وه‌دا نییه‌ گوایه‌ تورک کاریگه‌ریی له‌سه‌ر غه‌یره‌ کوردیش که‌ خۆیان به‌ دۆستی کورد داناوه‌ و داده‌نێن و پێکه‌وه‌ تاڵی و سوێرییان چه‌شتووه‌، هه‌یه‌، بگره‌ به‌ڵایه‌که‌ له‌وه‌ دایه‌ کورده‌که‌یش که‌وته‌ به‌ر شاڵاوی پیلانه‌کانی تورک، له‌ کاتێکدا ده‌یتوانی به‌ هه‌ڵوێستی ( نا ) زۆر پرۆسه‌ی ( نا ) ی نه‌یاران هه‌ر چه‌نده‌ زلیش بووبن، بیانوه‌ستێنێت، به‌ هێزی یاساش.!

ئه‌و نه‌رمینواندنه‌ی کورد به‌رامبه‌ر چه‌ند خاڵێکی ده‌ستوور، هه‌ره‌سێکی گه‌وره‌ بوو و بێئومیدییه‌کی له‌ ده‌روونی کورد هه‌تا به‌رانبه‌ر به‌و چه‌ند به‌نده‌یش که‌ مایه‌ی نیمچه‌ فه‌رامۆشییه‌ک بوون، دروست کرد و متمانه‌ی له‌لاکه‌م کرده‌وه‌.. بگره‌ هه‌تا بووه‌ هۆی بێزه‌وه‌رکردنی قودسییه‌تی ده‌ستووریش له‌به‌ر چاوی غه‌یره‌ کورد، بۆ ئه‌وه‌ی سڵ له‌ پیاده‌کردن و جێبه‌جێکردنی به‌نده‌کانی بکرێته‌وه‌. زاته‌ن زیانه‌که‌ش هه‌ر کورد ده‌یکات و شه‌قه‌که‌ش هه‌ر ئه‌و ده‌یخوات.

گوتنی ( ده‌ستوور خۆ قوڕئان نییه‌، نه‌گۆڕێت !) که‌ له‌سه‌ر زاری هێندێک له‌ لێپرسراوانی کوردمان ژنه‌فت، هه‌م قسه‌یه‌کی ناشارستانییه‌ و هه‌میش له‌گه‌ڵ رۆحی قوڕئانا ته‌با نییه‌، بگره‌ سه‌رپێچییه‌کی گه‌وره‌شه‌. ده‌ستوور، بۆ وڵاتانی ئه‌وڕوپی ـ بۆ وێنه‌ ـ له‌ جێگه‌ی کتێبی پیرۆزی ئێمه‌ دایه‌، به‌موو لًێلادانی وه‌ک تاوانێک دێته‌ ئه‌ژماردن و به‌ زاراوه‌ی ئێمه‌ ( کوفر )ه‌.. به‌ بۆچوونی ئیسلامیش گرًێبه‌ستێکی کۆمه‌ڵایه‌تییه‌ له‌ ( کۆڕا ـ اجماع ) وه‌وه‌ سه‌رچاوه‌ی گرتووه‌، که‌ له‌ دوای قورئان و سوننه‌وه‌ دێ وبه‌ هه‌ندهه‌ڵگرتن و پێڕه‌وکردنی فه‌رزه‌، نه‌ک هه‌ر یه‌کێ بێ و ده‌ستێکی تێوه‌ردا و لایه‌کی لێ بقرتێنێت و ده‌سکارییه‌که‌ش له‌ ژێرناوی (هه‌موارکردن) بفه‌لسه‌فێنێت.
ده‌ڵێن قسه‌ یا له‌ منداڵ ببیسه‌ یان له‌ شێت، چونکه‌ ئه‌وانه‌ له‌ هیچ شتێک ناپه‌نگێنه‌وه‌ و په‌نا و پێچیان نییه‌..ناڵیم کاک مشعان ـ حاشاکی وی ـ شێته‌، به‌ڵام گریمان شێتۆکه‌یه‌کی هه‌قگۆیه‌..ئه‌گه‌ر تورک ده‌ست له‌ کاری کورد وه‌رنه‌دا و ته‌ُپکه‌وداوی بۆ نه‌نێته‌وه‌، ئه‌ی غه‌یری ئه‌و کێیه‌.؟ ئه‌گه‌ر ره‌وشه‌که‌ ـ تا راده‌یه‌ک ـ به‌ دڵی تورک نه‌بایه‌، ئه‌وها مته‌قی له‌ خۆی ده‌بڕی.؟

ماڵم هه‌قه‌، وه‌ختێک مشعان ده‌یوت کورد ده‌بێت خودان ده‌وڵه‌ت بێت، زۆر عه‌ره‌ب سوژده‌ی بۆ دێوه‌که‌ی به‌غدا ده‌برد.!
خۆزگه‌م کوردیش ناوناوه‌ سیاسه‌توانێکی شێتۆکه‌ی ئه‌وهای هه‌بایه‌، ده‌وجا با خه‌لیل زاد ده‌ڕۆستی بهاتایه‌ و پێی بوێرابایه‌.!

Wednesday, October 05, 2005

محه‌ممه‌دی مه‌لا قادر

له‌هه‌فته‌نامه‌ی مێدیاوه‌:

Monday, October 03, 2005

كورد... سالَصكي تر ئةو محةلانة..!

کورد... ساڵێکی تر ئه‌و محه‌لانه‌..!
نوسینی: موحسین جوامێر

مام جه‌لال له‌ باره‌ی یه‌کگرتنه‌وه‌ی دوو حکوومه‌ته‌که‌ی کوردستان ، له‌ کۆنفرانسه‌ رۆژنامه‌وانییه‌که‌ی دووکان30092005، فه‌رمووی حه‌فته‌ی داهاتوو یه‌کدی ده‌گرینه‌وه‌.. کاک مه‌سعوودیش له‌ پێشترێدا فه‌رمووی چی وای نه‌ماوه‌، له‌و پێنج شه‌ش رۆژه‌ی داهاتوودا ته‌واو ده‌بێت و ئیعلانی ده‌که‌ین.. دواتریش فه‌رمووی ده‌مانه‌وێت به‌ جۆرێک یه‌کدی بگرینه‌وه‌، که‌مترین خه‌له‌ل له‌ ئارادا نه‌بێت..!
هه‌ڵبه‌ت وه‌ک دابونه‌ڕیتێکی سیاسیی کورده‌واری، نه‌حیزبی سێیه‌م و نه‌هی چواره‌م و نه‌ هی دیکه‌ش به‌شدار نه‌بوون، نازانم بۆ که‌س گوێیان لێ رانادێرێت لۆش په‌راوێز کراون..؟ به‌ڵام زاڵمای خه‌لیل زادی به‌ربووک، که‌ وه‌ختێ ده‌یبینم وا له‌ کوردستانه‌، ده‌ڵێم : خوایه‌ هاوار له‌ ده‌ست ته‌ون و به‌سته‌ی وی ! ، ته‌شریفی له‌وێ بوو.

هه‌ڵبه‌ت هه‌موو که‌س ده‌زانێت ئه‌و به‌ڵێنانه‌ یه‌که‌مجار نییه‌، ده‌درێن، وه‌لێ که‌سیش نازانێت ئاخۆ دواجاره‌ یان دیسان قسه‌ی سه‌رزاره‌ ..! ئه‌گه‌ر پیاو هه‌ڵچوونه‌که‌ی مام جه‌لال له‌کاتی وه‌رامی ئه‌و پرسیاره‌دا بخوێنێته‌وه‌ و بیتۆژێته‌وه‌، به‌وه‌ی یه‌کگرتنه‌وه‌ کارێکی ئاسان نییه‌، چونکه‌ زۆر شت ده‌بێ بێنه‌ گۆڕین، بۆیه‌ ده‌بێ سه‌بر بگرین و به‌ حه‌وسه‌ڵه‌ و سه‌لیقه‌ بین... ئه‌وا یه‌کسه‌ر زه‌ینی بۆ ئه‌وه‌ ده‌چێ که‌ ئه‌و به‌ڵێنانه‌ ده‌سپێکی قۆناغێکی دیکه‌ی یه‌کنه‌گرتنه‌وه‌ن.( ئیشاڵڵا هه‌ڵه‌م)

به‌ هه‌موو قه‌ناعه‌تێکه‌وه‌ ده‌ڵێم، هۆی سه‌ره‌کی و ماکه‌ی ئه‌سڵیی ئه‌و دواخستنه‌، نه‌ ته‌کنیکییه‌، نه‌ به‌و مه‌به‌سته‌شه‌ تاکو حکوومه‌تێکی تۆکمه‌ و ته‌کووزی له‌به‌ریه‌کهه‌ڵنه‌وه‌شاو له‌ دوارۆژدا، بنیات بنرًێت ..! بگره‌ کێشه‌ و گرفت و گرێپوچکه‌ی ده‌سه‌ڵات و(هی خۆم بۆ خۆم و هی تۆش ده‌خۆم )ه‌ و چیتر. هه‌تا ئه‌گه‌ر بۆ ماوه‌ی دووسێ مانگیش بێت.! شاهپوور به‌ختیاری دوا سه‌ره‌کوه‌زیرانی شای ئێران، سوور ده‌یزانی حوکمه‌که‌ی هه‌ر بۆ چه‌ند حه‌فته‌یه‌که‌ و نه‌مانی مسۆگه‌ره‌ و ده‌سه‌ڵات له‌ ئاوابوون دایه‌، به‌ڵام دیسان هه‌ر وه‌ریگرت و ده‌ستی پێوه‌ گرت، چونکه‌ نه‌یویست بزانێ ( ئیقبال و زه‌وال هه‌ر نه‌فه‌سێکه‌ ).

هه‌ڵبه‌ت، ململانێ و شه‌ڕه‌ده‌سه‌ڵات مافێکی ڕه‌وایه‌، زاته‌ن دنیا هه‌میشه‌ خه‌ریکی ئه‌وه‌ بووه‌ و مێژوویش ئه‌وها چه‌رخاوه‌، ئێستێًکه‌ش سه‌رقاڵی ئه‌وه‌یه‌ و له‌ داهاتووشدا ئاگردانه‌که‌ به‌ کڵپه‌تر ده‌بێ نه‌ک دابمرکێته‌وه‌، چونکه‌ له‌ خوێنی به‌شه‌ر دایه‌ ... وه‌لێ ئه‌گه‌ر ئه‌و کێبه‌ڕکًێیه‌ له‌ کاتێکدا بکرێت که‌ وڵات له‌ رووی سییاسییه‌وه‌ سه‌قامگیر و ئارام بێ و بتوانێ له‌سه‌ر پێ بوه‌ستێت، ئه‌وا که‌م تا کورتێک به‌ قازانجی گه‌له‌که‌ ته‌واو ده‌بێت..

ده‌کرێ بوترێ، قۆناغی ئێسته‌ی ئێمه‌ خه‌ریکه‌ وه‌ک داری ئاوکزی لێ دێ و ئه‌و کۆشکه‌ی به‌ خوین بنیاتمان نا، به‌ دایه‌ره‌ و ده‌ستوور و فه‌رمانی ته‌رۆرپه‌روه‌ر و جڕوجانه‌وه‌ره‌کانی به‌عس، به‌ده‌ست و ئیمزای خۆمان ده‌یڕمێنین .. بۆیشی هه‌یه‌، ئه‌و بڕه‌ هیوایه‌ی ئه‌مڕۆ هه‌مانه‌، به‌یانی به‌ فه‌توایه‌ک، یان له‌بن فشاری زۆرینه‌ی ده‌نگی پایته‌ختی خوێن و زووخاو و خۆڵه‌مێش و له‌ژێر سًًێبه‌ری داری بێبه‌ری ده‌ستووردا که‌ هه‌ر رۆژێ به‌ ئیمزای کوردان لکێکی لێ هه‌ڵده‌پاچن و نارنجۆکێکی وه‌پاڵ ده‌هاوێژن ، بپووکێته‌وه‌.. هه‌روه‌ک ئێسته‌ سه‌ره‌تاکانی ئه‌و پیلان و ته‌پکه‌وداوه‌، خه‌ریکن و به‌ ئاشکرا سه‌ره‌تاتکێمان له‌گه‌ڵدا ده‌که‌ن وهه‌رجاره‌ سه‌ره‌ڕێیه‌کمان پێ ده‌گرن.. له‌ کاتێًًکدا کورد ـ ده‌کرێ بگوترێ ـ هێشتا له‌ رووی یاساییه‌وه‌ تا راده‌یه‌ک به‌هێزه‌و ده‌توانێ بغه‌زری و به‌ یه‌ک ڤیتۆ هاوکێشه‌کان بگۆڕیت ..

بڕواش ناکرێ جارێکی دیکه‌، هه‌رگیزاوهه‌رگیز وه‌ک ئه‌م ده‌رفه‌ته‌ی ئێستا بۆ کورد ره‌خساوه‌، هه‌ڵکه‌وێته‌وه‌ و بتوانێ وه‌ک ئه‌مجاره‌یان بۆ به‌رژه‌وه‌ندی خۆی، بیقۆزته‌وه‌.. مه‌گه‌ر خوا.!

هه‌ر هه‌ره‌سێکی سیاسیش، ئێسته‌ و له‌ داهاتووی نزیکدا، زه‌برێکی پرزه‌بڕی به‌ دواوه‌یه‌.. زێتر و کاریگه‌ریگه‌رتریش ده‌بێ له‌وه‌ی پًێشوو، چونکه‌ ئه‌گه‌ر له‌ به‌رێدا له‌ ده‌شت و بناری حوکمداریدا لێمان قه‌وما بێت، ئه‌مجاره‌یان له‌ تۆقه‌ڵه‌ی کێوی حوکمداری و ده‌سه‌ڵاته‌وه‌، گلۆری دۆڵی بنده‌ستی و سه‌رکزی وزه‌لیلی ده‌بینه‌وه‌..ئه‌مه‌یان خاڵێکی هه‌ره‌ گرنگه‌.

ئه‌گه‌ر ئه‌مساڵ و پار و پێرار جاک سترۆ و دۆناڵد رامسفیلد وکۆندالیزا رایز ، به‌ سوپاسه‌وه‌ سه‌ردانی ئێمه‌یان کردبێت .. ترسێ ده‌که‌م ساڵی داهاتوو، به‌ تکاوه‌ بتوانین هه‌تا سه‌ردانی زاڵمای خه‌لیل زاد له‌ به‌غدا بکه‌ین.! { له‌ فڕۆکه‌خانه‌ی شام دابه‌زیبووم، ترکوخوا ( به‌قه‌زاوقه‌ده‌ر) دیم ئه‌حمه‌د بنبێللای سه‌رۆکی هه‌ره‌پێشووی جه‌زائیر به‌ته‌نیا له‌ ژوورێک له‌گه‌ڵ فه‌رمانبه‌رێک دانیشتبوو و ده‌ستی نابووه‌ ژێر چه‌نه‌گه‌ی وهه‌ر ده‌تگوت ده‌ستی حه‌سره‌تی مێژوو له‌ ئه‌ژنۆ ده‌دا، چاوه‌ڕێی کاتی فڕینی فڕۆکه‌ی ده‌کرد.. به‌منه‌وه‌ بووینه‌ سێ و دوایی زًێتر، هه‌ڵه‌بجه‌م وه‌بیر هێنایه‌وه‌ و وێنه‌یه‌کیشمان به‌ یه‌که‌وه‌ گرت }.. رۆژان رۆژی له‌ دوایه‌ و په‌ند و عیبره‌ت خراپ نین.
ئه‌گه‌ر ئه‌مساڵ و پار و پێرار و پێشترێ عه‌بدولعه‌زیز ئه‌لحه‌کیم و جه‌عفه‌ری و عه‌للاوی یان شه‌علان، مه‌منوون بوایه‌ن له‌ کوردستان پێشوازییان لێ بکرایه‌ یاخود داڵده‌یان بدرایه‌..ترسێ ده‌که‌م ساڵی داهاتوو، به‌ تکاوه‌ بتوانین بۆ شینگێڕی (له‌ که‌رکوک !) به‌ خزمه‌ت موقته‌دای سه‌در و له‌ به‌غداش به‌ خزمه‌ت عه‌ممار ئه‌لحه‌کیم بگه‌ین.!

ئه‌گه‌ر ئه‌مساڵ و پار و پێرار داوای نیمچه‌ ده‌وڵه‌تێکمان کردبێ.. ترسێ ده‌که‌م ساڵێکی دیکه‌ ئه‌و محه‌لانه‌، یاسای پارێزگه‌کانی (برێمه‌ر)مان ده‌قه‌به‌ڵ بکرًًێت ، چونکه‌ به‌ کرده‌وه‌ سه‌لماندمان که‌ له‌ به‌ڕێوه‌بردنی شار و گوندان سه‌رکه‌وتووتر بووین تا هه‌رێم، باسی ده‌وڵه‌تیش هه‌ر مه‌که‌.!
ده‌ بڵێن وا نییه‌..!