په‌یامی لیستی هاوپه‌یمانی کوردستان

بۆ به‌ڕێز به‌ڕێوبه‌ری ڕادیۆی کوردی له‌ باشوری ئوسترالیا – شاری ئه‌ده‌لاید
په‌یامی لیستی هاوپه‌یمانی کوردستان – باشوری ئوسترالیا، شاری ئه‌ده‌لاید

خوشکان... برایان... کوردستانیانی دانیشتوی هه‌‌نده‌‌ران!
کوردانی فه‌‌یلی و ئێزیدیی چه‌‌ندجار به‌‌ش خوراو...!
تورکمانه ‌‌دلسۆزه‌‌کانی کوردستان... کلدوئاشوریه‌ سه‌ربه‌‌رزه‌‌کان!

ڕۆژانی 13، 14، 15ی دیسه‌مبه‌ری ئه‌مساڵ، ڕۆژانی ده‌نگدانن له‌ ده‌ره‌وه‌ی وڵات، بۆ هه‌ڵبژاردنی په‌رله‌مانێکی چوار ساڵه‌ بۆ کۆماری عێراقی فیدڕاڵ. لیستی هاوپه‌یمانی کوردستان، که‌ لیستی یه‌کێتی ریزه‌کانی گه‌ل وهێزه‌ سیاسییه‌کانێتی، ئه‌م جاره‌شیان به‌یه‌ک ریزی له‌م هه‌ڵبژاردنه‌دا به‌شداره‌و متمانه‌یه‌کی ته‌واوی به‌ گه‌لـــی کوردوستان هه‌یه‌ که‌ له‌م پرۆسیسه‌ دیموکراتییه‌دا ده‌نگی بۆ ده‌ده‌ات. یه‌کبوونی هێزه‌ سیاسییه‌کانی کوردستان داوایه‌کی به‌رده‌وامی جه‌ماوه‌ری گه‌له‌که‌مان بووه‌ و بوونی ئه‌م لیسته‌ هاوبه‌شه‌ یه‌کێکه‌ له‌ هێماکانی بوونی ئه‌م یه‌کبوونه‌، که‌ ئاکامه‌که‌ی هێنانه‌دی فراکسێۆنێکی کوردستانی به‌هێز له‌ په‌رله‌مانی عێراقی فیدراڵدا ده‌بێ. ئه‌م ئه‌رکه‌ تێکۆشه‌رانه‌یه‌ ته‌نها له‌ رێگای خه‌ڵکی کوردستان وبه‌پشتگیری کردنی جه‌ماوه‌ره‌وه‌، له‌ ڕێگای ده‌نگدانه‌وه‌ بۆ لیستی ژماره‌ 730 وه‌ ده‌بێ.

هه‌ڵبه‌ته‌ ده‌سه‌ڵاتی کوردستانی له‌ ماوه‌ی چه‌ند ساڵی ڕابووردوودا ئه‌رکی گه‌وره‌ی له‌ بواری په‌یوه‌ندییه‌ ده‌ره‌کییه‌کاندا ئه‌نجام داوه‌ وتوانیوێتی ده‌نگی کوردوستان به‌ ڕای گشتی و ووڵاتانی جیهان وده‌زگا نێوده‌وڵه‌تییه‌کان، بگه‌یه‌نێ. له‌ سه‌ر ئاستی ناوخۆی کوردوستانیشدا کۆمه‌ڵێک ده‌سکه‌وتی ئاشکرای به‌ده‌ستهێناوه‌، له‌ بواره‌کانی ئاوه‌دانکردنه‌وه‌و، کردنه‌وه‌ی زانکۆ وخوێندنگا و بنکه‌ی ته‌ندرووستی و بایه‌خدان به‌ گوزه‌رانی خه‌ڵک و پاراستنی ئاسایشی هاووڵاتیان له‌ سه‌رده‌مێکدا که‌ تیرۆر ده‌یان ووڵاتی دراوسێیی گرتۆته‌وه‌، جگه‌ له‌ بووونی مه‌ودایه‌کی دیموکراسی له‌ کۆمه‌ڵ وله‌ ژیانی سیاسی کوردستاندا، که‌ بێ گومان به‌ تێبینی وبه‌شداری پۆزه‌تیفانه‌ی جه‌ماوه‌ر، له‌ هه‌ڵه‌و که‌موکورییه‌کانی پاک ده‌کرێته‌وه‌. جگه‌ له‌وه‌ی له‌سه‌ر ئاستی عێراقیدا توانرا مۆرکی ده‌ولًَه‌تی عێراق له‌ ده‌وڵه‌تی یه‌ک نه‌ته‌وه‌ی ده‌سه‌ڵاتداره‌وه‌، بکرێ به‌ ده‌وڵه‌تی نیشتمانیی هه‌موو پێکهاته‌ نه‌ته‌وه‌یی وکۆمه‌ڵایه‌تییه‌کان و به‌شێوه‌یه‌کی ئاره‌زوومه‌ندانه‌ بنیاتبنرێته‌وه‌ وگه‌لی کوردستانیش ببێته‌ سه‌نگێکی قورس وکاریگه‌ر له‌ هاوکێشه‌ی سیاسی عێراقدا.

ئه‌م ده‌سکه‌وتانه‌ش که‌ لیستی هاوپه‌یمانی کوردستان به‌ پشتگیری جه‌ماوه‌ره‌وه‌ ئه‌نجامی داوه‌، ڕاده‌ی به‌رزی خواست وداواکارییه‌کان نین، بۆیه‌ کاروانێکی تێکۆشانی سیاسی دیموکراسییانه‌ی درێژمان له‌به‌رده‌مدایه‌، که‌ ده‌بێ به‌یه‌کگرتووی بیبرین، هه‌ر له‌م میانه‌شدا هه‌ڵه‌ وکه‌موکورییه‌کانمان چاککه‌ینه‌وه‌وبتوانرێ ده‌نگی کوردستان له‌ تێکرای یاساکانی داهاتووی په‌رله‌مانی عێراقدا به‌ ئاشکرا دیار بێت و ده‌سکه‌وته‌کانی ده‌ستوور بپارێزرێ و ماوه‌ به‌ نه‌یارانی مافی گه‌له‌که‌مان و دیموکراسی، نه‌درێ.

بۆیه‌ له‌ کاتێدا بانگه‌وازی خۆمان ئاراسته‌ی ئێوه‌ ده‌که‌ین که‌ ده‌نگ بۆ لیسته‌که‌تان، لیستی هاوپه‌یمانی کوردستانی ژماره‌ 730 بده‌ن، داواتان لێده‌که‌ین به‌ ڕوونی وڕاشکاوی ڕه‌خنه‌ی بنیات نه‌رانه‌ له‌ که‌موکوڕییه‌کان بگرن وبه‌به‌رده‌وامی تێبینییه‌کانتان ئاراسته‌ی نوێنه‌رانی خۆتان له‌ نێو لیسته‌که‌دا، بکه‌ن بۆ گه‌یاندنی ده‌نگی ئێوه‌ بۆ هه‌موو بواره‌کانی ده‌سه‌ڵات.

خوشکان، برایان......
ده‌نگدانتان بۆ لیستی هاوپه‌یمانی کوردستان ژماره‌730 ده‌نگدانه‌ بۆ گه‌ڕانه‌وه‌ی که‌رکووک وخانه‌قین وشنگال مه‌نده‌لی و ته‌له‌عه‌فه‌ر و وتێکرای شوێنه‌ دابڕاوه‌کانی کوردستان. ده‌نگی ئێوه‌، ده‌نگدانه‌ دژ به‌ تیرور وجیاکاری نه‌ته‌وه‌ی وئاینی ومه‌زهه‌بی. ده‌نگی ئێوه‌

به‌رنامه‌ی ئیراده‌ی لیستی هاوپه‌یمانی کوردستانه‌.
ده‌نگتان ده‌نگی دیموکراسی وکوردستانی ئازاده‌.
ده‌نگی ئێوه‌ وه‌فادارییه‌ بۆ خێزانی شه‌هیدان .

لیژنه‌ی ته‌نسیقی لیستی هاوپه‌یمانی کوردستان له‌ باشوری ئوسترالیا، شاری ئه‌ده‌لاید

رۆژی دووشه‌ممه 05/12/2005‌

شوێنی ده‌نگدان:

South Australian Registration and Polling Station
73 Grand Junction Road
Rosewater 5013
Adelaide - South Australian