Mnale sawa rrfendraweke gerenrayewe bo amezi dayki

مناڵه‌ ساوا ڕفێندراوه‌که‌ گه‌ڕێندرایه‌وه‌ بۆ ئامێزی دایکی

سوه‌یلا ماجدی

ڕۆژی حه‌وتی ئۆگستی 2004 مناڵێکی ته‌مه‌ن سێ هه‌فته‌یی کاتێک دایکی واته‌ ئانیتا له‌ شوێنی ڕاگرتنی ماشین له‌ بازاڕگه‌ی"بریم بانک" له‌ شاری مێلبۆرن خه‌ریکی داگرتنی شمه‌که ‌کڕدراوه‌کانی بوو بۆ ناو سندوقی ماشینه‌که‌ی، له‌ لایه‌ن ژن و پیاوێکه‌وه‌ ڕفێندرا. مۆنتانای ساوا که‌ له‌سه‌ر جێگای خۆی له‌‌ لای پشته‌وه‌ی ماشینه‌که‌دا بوو، ژن و پیاوێک هێرش ده‌که‌نه‌ سه‌ر دایکی. پیاوه‌که‌ که‌ به‌خێرایی ئانیتا له‌ زه‌وی ده‌دا گیراوه‌ی پفکراوی بیبه‌ری به‌سه‌ر ده‌موچاویدا ده‌پژێنێ و هاوکات ژنه‌که‌ پڕده‌داته‌ مۆنتاناو له‌ ماشینه‌که‌ ده‌ریده‌هێنێ و ده‌یڕفێنێ. دوابه‌دوای ئه‌وه‌ هێزه‌کانی پۆلیس ئاگادارده‌کرێنه‌وه‌و ژماره‌یه‌کی 50-60 پۆلیسی دێنه‌ شوێنی ڕوداوه‌که‌. دیاره‌ سیسته‌می ئاسایشی لێره‌ به‌جۆرێک دامه‌زراوه‌ که‌ له‌شوێنێکی وادا که‌سی تاوانبار به‌ سێنایی نه‌توانێ خۆی شوێن ‌وون بکات. کامێرا نه‌هێنیه‌کانی ئه‌و بازاڕگه‌یه‌ وێنه‌ی ئه‌و دوو ڕفێنه‌ره‌یان تۆمارکردوه‌و به‌ پێ ئه‌وزانیاریانه‌ ڕفێنه‌ره‌کان ناسراونه‌وه‌. ڕۆژی دواتر یه‌ک شه‌ممه‌ هه‌شتی ئۆگست ئانتانیای دایک به‌ هاوکاری و یارمه‌تی باوکی داواکارییه‌کی بڵاوکرده‌وه‌و تیایدا داوای له‌ ڕفێنه‌رانی مناڵه‌که‌ی کرد که‌ هه‌رچی زووتر مناڵه‌ ساواکه‌ی بۆ بگه‌ڕێننه‌وه‌. هه‌روه‌‌ها پۆلیسیش وێنه‌ی گومانلێکراوه‌کانی که وه‌ک گوترا‌ به‌هۆی سیسته‌می کامێرای ئاسایش پارێزه‌وه‌ گیرابوون، به‌ شوێنه‌کانی ده‌وروبه‌رو بازاڕگه‌که‌دا بڵاوکرده‌وه‌و داوای له‌ هه‌رکه‌سێک کردبوو که‌ زانیاری سه‌باره‌ت به‌و دووکه‌سه‌ هه‌یه‌ به‌ په‌له‌ ده‌زگاکانی ئاسایش ئاگادار بکاته‌وه‌. جێ ئاماژه‌ پێدانه‌ که‌ باوکی مۆنتانای کۆرپه‌ که‌ ته‌مه‌نی 48ساڵه‌ و له‌گه‌ڵ به‌جیا ده‌ژی، گومانی ئه‌وه‌ی له‌سه‌ر بوه‌‌ که‌ په‌یوه‌ندی به‌‌ کوشتنی پێاوێکه‌وه‌ هه‌بێت که‌ له‌ ساڵی رابردوودا کوژراوه‌، به‌ڵام ده‌وترێ که‌ ڕفاندنی ئه‌م کۆرپه‌ ساوایه‌ هیچ په‌یوه‌ندیی به‌و ڕوداوه‌وه‌ نیه‌.

ڕۆژی دوو شه‌ممه‌ کاتژمێری هه‌شتی و چل خوله‌کی به‌یانی ژنێک به‌ناوی (Lesley Jogger) که‌ بۆ پیاسه‌ به‌لای ماڵێکی کاولدا که‌ که‌سی تێدا ناژی تێده‌په‌ڕێ له‌ ناکاو گوێی له‌ ده‌نگی گریانی مناڵ ده‌بێت. کاتێک جوانتر گوێ ڕاده‌گرێ و گوێقوڵاخ ڕاده‌وه‌ستی تێده‌گات که‌ ده‌نگه‌که‌ ده‌نگی کۆرپه‌ڵه‌ی ساوایه‌. پاش ئه‌وه‌ی له‌ بوونی مناڵێک له‌و خانوه‌ کاوله‌دا دڵنیا ده‌بێ به‌ په‌له‌ ته‌له‌فوون بۆ پۆلیسی فریاکه‌وتن ده‌کات و پۆلیسیش له‌گه‌ڵ ئامبوڵانس ده‌ستبه‌جێ ده‌گه‌نه‌ شوێنه‌که‌ و مناڵه‌ ساواکه‌ ده‌خه‌نه‌ ژێر پشکنینی پزشکی‌یه‌وه‌. ده‌گوترێ که‌ کۆرپه‌ ساواکه‌ ته‌ندروستی باشه‌و جگه‌ له‌وه‌ی که‌ له‌لایه‌ن ڕفێنه‌ره‌کانه‌وه‌ سه‌ری تاشرابوو بۆ ئه‌وه‌ی نه‌ناسرێته‌وه‌، هیچی دیکه‌ی لێنه‌کراوه‌ و له‌ ڕووی ته‌ندروستیه‌وه‌ کێشه‌یه‌کی نیه‌. به‌م جۆره‌ مۆنتانای ساوای بێتاوان گه‌ڕێندرایه‌وه‌ بۆ ئامێزی دایکی و بنه‌ماڵه‌که‌ی وله‌ نه‌خۆشخانه‌ی مناڵانی مێلبرن خرایه‌ ‌ ژێر چاوه‌دێری زێده‌تر.

هه‌ر ئه‌و ڕۆژه‌ که‌ مناڵه‌که‌ دۆزرایه‌وه‌ بۆ پاشنیوه‌ڕۆکه‌ی کاتژمێر 2:30 خوله‌ک ژن و پیاوه‌ ڕفێنه‌ره‌که‌ خۆیان به‌ پۆلیسی بنکه‌ی(Ballarat) له‌ شاری مێڵبرن ناساند.

دایکی مونتانا دوای گرتنه‌وه‌ باوه‌شی مناڵه‌ ساواکه‌ی ووتی: من ده‌مزانی که‌ کۆرپه‌که‌م هیچی لێنایه‌و ساخ و ته‌ندروست ده‌گه‌ڕێته‌وه‌ بۆلام. چونکه‌ من دایکی ئه‌وم و له‌دڵم درابوو. هه‌روه‌ها سوپاسی مێدیای کرد که‌ یارمه‌تی دۆزینه‌وه‌ی مناڵه‌که‌یان داوه‌.

ئه‌و ڕوداوه‌ به‌ڕاستی په‌ژاره‌یه‌کی زۆری خسته‌ دڵی خه‌ڵکه‌وه‌. مناڵێکی کۆرپه‌ڵه‌ی ساوا که‌ ته‌نیا سێ هه‌فته‌یه‌ چاوی هه‌ڵێناوه‌ و پێیناوه‌ته‌ ژیانه‌وه‌، به‌و شێوه‌یه‌ ده‌ڕفێندرێ و پاشانیش له‌ ناوکه‌لاوه‌یه‌کدا جێده‌‌هێڵرێ. به‌ بێده‌سه‌ڵاتی و له‌برسان و له‌سه‌رمان ... ده‌گری و ده‌زیڕێنێ و به‌ بێزمانی هاوار ده‌کا و به‌ ده‌نگی زارۆکانه‌ی یارمه‌تی ده‌وێ!

گه‌لۆ به‌ڕاستی ڕه‌وا نیه‌ ئه‌وانه‌ی ئه‌وکارانه‌ ده‌که‌ن سزای توندیان بدرێ بۆ ئه‌وه‌ی جارێکی دیکه‌ دووپات نه‌بێته‌وه‌و په‌ندی لێوه‌ربگیرێ. تا چیدیکه‌ که‌سانی نێو کۆمه‌ڵگا بۆ چاره‌سه‌ری کێشه‌ی خۆیان! په‌نا نه‌به‌نه‌ به‌ر ئاکاری ئاوا و یاری به‌ هه‌ست و سۆزی دایک و باوکان نه‌که‌ن و کۆرپه‌یه‌کی ساوای وه‌ک مۆنتانا نه‌که‌نه‌ ئامانج و قوربانی نه‌بێ. هیوادارم ئه‌م جۆر ڕوداوانه‌ له‌ ناو کۆمه‌ڵگای مرۆڤایه‌تی ڕوونه‌ده‌نه‌وه‌و که‌س توشی ئازار نه‌بێ.

سه‌رچاوه‌: ڕۆژنامه‌ی ئه‌دڤه‌رتایزه‌ر (Advertiser)‌