نامه‌یه‌ک و وڵامه‌که‌ی

نامه‌یه‌ک و وڵامه‌که‌ی

پاش ڕوونکرنه‌وه‌که‌ی ئه‌و هێژایه‌ی ناوه‌که‌ی وه‌ک ناوی منه‌و به‌ نوێنه‌رو په‌یڤبێژی حزبی دیموکراتی کوردستان ناسراوه‌و هه‌روه‌ها نوسینی بابه‌تێک له‌ لای منه‌وه‌ به‌ناوی "کێشه‌ی ناو؛ په‌یڤێک له‌سه‌ر ڕوونکردنه‌وه‌یه‌ک" دا، گه‌لێک له‌ دۆستان و خۆشه‌ویستان و خوێنه‌رانی بابه‌ته‌کانی من له‌و په‌یوه‌ندییه‌دا په‌یامیان بۆ ناردووم. ئه‌زیش به‌ پێی ده‌رفه‌ت وڵامم داونه‌وه‌و ڕوونکردنه‌و‌ی پێویستم بۆ نوسیون. ئه‌وه‌ی له‌خواره‌وه‌ هاتوه‌ یه‌کێک له‌و په‌یامانه‌یه‌. دیاره‌ له‌به‌ر ئه‌وه‌ی په‌یامه‌که‌ی ڕه‌خنه‌یه‌و ڕووبه‌ڕووی من کراوه‌ته‌وه‌ بڵاوی ده‌که‌مه‌وه‌ به‌بێ ئه‌وه‌ی ناوی خاوه‌نه‌که‌ی بهێنم. هه‌ر له‌ ژێره‌وه‌ وه‌ڵامه‌که‌ی خۆم و له‌ناویشیدا په‌یامێکی دیکه‌ی تێدایه که‌ له‌و پێوه‌ندییه‌دا بۆم هاتوه‌‌. جارێکی دیکه‌ سپاسی گشت ئه‌و خۆشه‌ویستانه‌ ده‌که‌م که‌ په‌یام و نامه‌یان بۆ ناردووم.‌
تێبینی: ئه‌م په‌یامه‌ به‌ پیتی لاتینی نوسرابوو که‌ بۆ خۆم هێناومه‌ته‌ سه‌ر ڕێنوسی ئارامی.
**************************
بۆ خالید عه‌زیزی
بابه‌ت: سڵاڤ
سڵاڤێکی گه‌رم و گوڕ
من زۆر جار بابه‌ته‌کانی جه‌نابتم خوێندۆته‌وه‌. به‌ڵام باوه‌ڕبکه‌ هه‌ر وه‌م زانیوه‌ کابرای سوێدییه‌. قه‌ت له‌ ئیمه‌یڵ و ناوونیشانت ورد نه‌بوومه‌وه‌. ڕه‌نگه‌ ئه‌وه‌ کاری پیری بێت. به‌ڵام ئه‌وه‌ی منی زیاتر تووشی سه‌ر سوڕمانکرد شێوه‌ی وه‌ڵامدانه‌وه‌که‌ی جه‌نابت بوو. ڕه‌نگه‌ ئه‌گه‌ر ئه‌م وه‌ڵامه‌ له‌م پاڵتاکه‌ کوردیانه‌ دا بیسترابا زۆر سه‌یر نه‌بوایه‌ که‌ زۆرکه‌س بێ‌ هه‌ست به‌ به‌رپرسی قسه‌ ده‌که‌ن، به‌ڵام له‌ که‌سێک که‌ داوای نوسه‌‌ری ده‌کا زۆر به‌ دوره‌. کابرا داوایه‌کی له‌ جه‌نابت کردوه‌ ده‌کرا به‌ شێوه‌یه‌کی هێمنانه‌ چاره‌سه‌ری بکه‌ن مه‌یدان بۆ هه‌ندێک که‌س که‌ هه‌میشه‌ ده‌یانه‌وێ له‌ ئاوی لێڵ ماسی بگرن خۆش نه‌ده‌بوو. ڕه‌نگه‌ بڵێی ئه‌م کابرایه‌ خه‌رفاوه‌ چۆن کابرا نوێنه‌ری ‌حزب بێ وتاری ئاوا ناته‌با له‌گه‌ڵ سیاسه‌تی حزب ده‌نوسێ؟ منیش هه‌ر له‌به‌ر ئه‌وه‌ ده‌مخوێنده‌وه‌. جاروباریش ده‌مکوت ئافه‌رم. ئه‌وه‌م به‌ وه‌رچه‌رخانێک ده‌زانی. هیوادارم وه‌ڵامی منیش هه‌ر وا تون نه‌بێ. پێت وا نه‌بێ من له‌گه‌ڵ خالید عه‌زیزی گۆرین دۆست و براده‌رم ، هیچ په‌یوه‌ندیه‌کم له‌گه‌ڵدا نیه‌. به‌ڵام هه‌ر له‌ جێیه‌دا وه‌ڵامه‌که‌ی تۆم به‌ دڵ نه‌بوو. نوسه‌ر ده‌بێ مه‌ندوو له‌سه‌ره‌خۆ بێ.
سه‌رکه‌وتو بی
**************************
وڵامه‌که‌ی من بۆ ئه‌و به‌ڕێزه‌
ڕێزدار کاک ................
سڵاوێکی کوردانه‌ی گه‌رم
سپاس بۆ به‌سه‌رکردنه‌وه‌که‌ت. په‌یامه‌که‌تم خوێنده‌وه‌، ده‌ست خۆش و هیودارم له‌ داهاتووشدا له‌ ڕه‌خنه‌و ڕوانگه‌کانی خۆتان بێ به‌شمان نه‌که‌ن. بۆ ئاگاداری له‌و کاته‌وه‌ ڕونکردنه‌وه‌که‌ی هاوناوی به‌ڕێزو په‌یڤه‌که‌ی من بڵاوکراوه‌ته‌وه‌ گه‌لێک په‌یامم بۆ هاتوه‌. به‌ڕێزتان یه‌که‌‌م که‌س بوون‌ که‌ نوسراوه‌که‌ی من به‌ توند و به‌په‌له‌و له‌نوسه‌ران به‌دووری زانی بێت.‌ له‌ ڕاستیدا من داوای نوسه‌ری ناکه‌م و ته‌نیا وه‌ک که‌سێک ڕوانگه‌کانی خۆم نوسیوه‌ و بڵاومکردونه‌وه‌‌. ئه‌وجا من وڵامی ئه‌و به‌ڕێزه‌م نه‌داوه‌ته‌وه‌ و به‌ڵکو چه‌ند تێبینیم له‌سه‌ر ڕوونکردنه‌وه‌که‌ی نوسیوه‌. پاشان، له‌ ناو هه‌موو نوسراوه‌که‌ی مندا بێڕێزی و به‌که‌م گرتنی تێدا نیه‌و یان ئه‌ز هه‌ستم پێنه‌کردوه‌!. باوڕ بکه‌ پاش خوێندنه‌وه‌ی په‌یامه‌که‌ی به‌‌ڕێزتان جارێکی دیکه‌ نوسراوه‌که‌ی خۆم و ڕونکردنه‌‌وه‌‌که‌ی کاک"خالید عه‌زیزی" نوێنه‌ری حزبم خوێنده‌‌وه‌. به‌ڵام هه‌ستم نه‌کرد زێده‌بێژیم کردبێ. گه‌ر هه‌ست بکه‌م نا ڕه‌واییم به‌رامبه‌ر ئه‌و به‌ڕێزه‌ کرد بێت ئه‌وه‌ هه‌رده‌م ئاماده‌ی به‌خۆدا چوونه‌وه‌ و ڕاستکردنه‌وه‌م.
به‌ڕیزتان ده‌بێژن که" ‌کابرا داوایه‌کی له‌ جه‌نابت کردوه‌ ده‌کرا به‌ شێوه‌یه‌کی هێمنانه‌ چاره‌سه‌ری بکه‌ن مه‌یدان بۆ هه‌ندێک که‌س که‌ هه‌میشه‌ ده‌یانه‌وێ له‌ ئاوی لێڵ ماسی بگرن خۆش نه‌ده‌بوو ". کاک .....ی خۆشه‌ویست، بۆخۆت له‌ ڕاگه‌یاندن کارت کردوه‌و شاره‌زایت له‌و بواره‌دا هه‌یه‌. ئه‌و به‌ڕێزه‌ ڕونکردنه‌وه‌ی بۆ گشت لایه‌ک بڵاوکردۆته‌وه‌ و مه‌به‌ست ئاگادار کردنه‌وه‌ی خه‌ڵک و خوێنه‌ران و ...بووه‌. نه‌ک داواکردن له‌من. ناوبراو ژماره‌ ته‌له‌فوون و ئه‌دره‌سی ئیمه‌یڵی منی هه‌یه‌و هه‌روه‌ک‌ به‌ وته‌ی به‌ڕێزتان له‌ "وڵامدانه‌وه" که‌شدا ئاماژه‌م پێداوه‌ به‌ته‌له‌فوون پێکه‌وه‌ سه‌باره‌ت به‌و کێشه‌یه‌‌ په‌یڤیوین. هه‌ر ئه‌وکات پێشنیارم پێکرد که‌" پێکه‌وه‌ ڕونکردنه‌وه‌یه‌ک بۆ ده‌زگاکانی ڕاگه‌یاندن بنوسین"، به‌ڵام ئه‌و هێژایه‌ پێیباش نه‌بوو!. داوای ئه‌و ئه‌وه‌ بوو که‌ پاشگرێک پێشگرێک بۆ ناوه‌که‌م دانێم!!. ئه‌وه‌ش به‌لای منه‌وه‌ نه‌باش بوو. چونکه‌ ده‌یان نوسراوه‌م به‌ به‌بێ پاشگرو پێشگر وه‌شاندوه‌، ئه‌دی ئه‌وان چی لێبکه‌م!. دوایه‌ش من ناوم ئه‌وه‌یه. کورد گوته‌نی"‌ قوڕی کوێ به‌سه‌ر خۆمدا بکه‌م". ئه‌وجا گه‌ر داواکردن له‌من بوایه‌ پێویست نه‌بوو بۆ گشتی بوه‌شێنێ و ناویشی "ڕونکردنه‌وه‌یه‌ک!" بێ. دوایه‌ش ڕوونکردنه‌وه‌که‌ش ده‌کرا به‌ شێوه‌یه‌کی دیکه‌ بێت. بۆ وێنه‌ ده‌کرا: بنوسێ که‌ (ماوه‌یه‌که‌ به‌ هۆی نوسینه‌کانی (فڵانه‌که‌سه‌وه- یان که‌سێک به‌ناوی....)‌ که‌ له‌ ئوسترالیا ده‌ژی کۆمه‌ڵێک پرسیارم ڕووبه‌ڕوو بۆته‌وه‌. به‌ گشت لایه‌کی ڕاده‌گه‌یه‌نم که‌ ئه‌و نوسراوانه‌ هی من نین یان هیچ پێوه‌ندییه‌کیان به‌منه‌وه‌ نیه‌). گه‌لۆ پێت وا نیه‌ باشتر ده‌‌بوو گه‌ر ئه‌و به‌ڕێزه‌ وه‌ک ئه‌وه‌ یان به‌شێوه‌یه‌کی دیکه‌ بینوسیایه‌ ؟. تکا ده‌که‌م جارێکی دیکه‌ ڕونکردنه‌وه‌که‌ی ئه‌و به‌ڕێزه‌ بخوێنه‌وه‌.
ئه‌و به‌ڕێزه‌ که‌ نیازێکی وای هه‌بوو هه‌روه‌ک پێشتر پێشنیارم پێکرد و باشترین ڕێگاش هه‌ر ئه‌وه‌ بوو که‌ پێکه‌وه‌ ڕونکردنه‌وه‌که‌مان بڵاوبکردایه‌وه‌، دڵنیام هیچیش له‌ شان و شه‌وکه‌تی ئه‌و به‌ڕێزه‌ که‌م نه‌ده‌بوه‌وه!!‌و که‌سیش له‌ ئاوی لێڵ ماسی نه‌ده‌گرت.
ڕونکردنه‌وه‌که‌ی ئه‌و به‌ڕێزه‌ منی خستبوه‌ ژێر هێمای پرسیار و وه‌ک ئه‌وه‌ وابوو من به‌ ناڕه‌وا هه‌وڵی به‌کار‌هێنانی ناوی ئه‌وم دابێ!؟. ئه‌وه‌ش ڕه‌وا نیه‌. ئه‌ز پێش ئه‌وه‌ی ئه‌و به‌ڕێزه‌ ببێته‌ نوێنه‌ری حزب نوسینم بڵاوکردۆته‌وه و پاش ئه‌وه‌ش کاری خۆم درێژه‌ پێداوه‌. به‌داخه‌وه‌ نوسراوه‌کانی من پاش ئه‌وه‌ی ئه‌و به‌ڕێزه‌ بوه‌ نوێنه‌ری حزب به‌ناوی ئه‌و تومار کران!!. به‌ڕاستی که‌ په‌یامه‌که‌ی به‌ڕێزتانم خوێنده‌وه‌ سه‌رم سوڕما. ته‌نانه‌ت به‌ڕێزیشتان به‌ هی ئه‌وتان زانیوه‌!.
گه‌‌لێک دۆست و ناسیاو له‌ ناوه‌وه‌ سه‌باره‌ت به‌ نوسراوه‌کانم پێوه‌ندییان پێوه کردوم، و لێیان پرسیوم که‌ هی منن یان هی ئه‌و هاوناوه‌ هێژایه‌ن و ئه‌زیش وڵامم داونه‌وه‌. له‌ناو ئه‌وانه‌ دا براده‌رێک له‌ زانکۆی ....ه‌وه‌ گه‌لێک ده‌ستخۆشانه‌و په‌سند بێژی نوسیبوو. ئه‌ویش وه‌ک به‌ڕێزتان له‌وه‌ی خۆشحاڵ بوو که‌ له‌ ناو حزبدا ڕوانگه‌ی جیا جیا هه‌یه‌و ده‌ربڕینیشیان ئازاده‌. پاشان گله‌‌ییه‌کی له حزب هه‌بوو که‌ وڵامی په‌یام و ئیمه‌یڵان ناده‌نه‌وه‌‌و وادیاره‌ پێیان گرنگ نیه‌ که‌سیان هه‌بێت له‌ ناوه‌وه‌!!. خۆشحاڵی ده‌ربڕیبوو که‌ منی وه‌چنگ که‌وتوه‌. ئه‌زیش به‌درێژی بۆم نوسی و ئاگادارم کرده‌وه‌ که‌ ئه‌و نوسراوانه هی منن و ئه‌دره‌سه‌کانی حزبم به‌ ژماره‌ ته‌له‌فوونیشه‌وه‌ بۆ نوسیی و بۆم نارده‌وه‌ و پێشم گوت که‌ من حزبی نیم یان من ئه‌وه‌ نیم که‌ نوێنه‌ری حزبه‌.
له‌ کۆتاییدا سه‌باره‌ت به‌ مه‌ندیی و له‌سه‌ره‌خۆیی، ده‌بێ بڵێم به‌بێ ئه‌وه‌ی وه‌ک به‌ڕێزتان ده‌بێژن نوسه‌ریش بم، هه‌موو ئه‌وانه‌ی ئه‌ز ده‌ناسن و له‌ نزیکه‌وه‌ ئاگایان له‌ هه‌ڵسوکه‌وتی منه‌ پێیان وایه‌ ئه‌وه‌نده‌ مه‌ندم که‌ بێتامم کردوه‌. ئه‌وه‌ش نموونه‌ی یه‌کێک له‌و په‌یامانه‌ی بۆم هاتبوو:
كاكه خالێدی خۆشه‌ویست
سڵاوی دوباره . هه‌م ڕوونكردنه‌وه‌كه‌ی كاك خالێدی نۆێنه‌ری ح.د م خوێندووه‌ته‌وه هه‌م ئه‌وه‌ی ئێوه‌ش (له كوردستانپۆست). وه‌رامێكی موئه‌ده‌بانه و پڕ بوو. ده‌سته‌كانت خۆش بن. چاوه‌كانت ماچ‌ده‌كه‌م

دڵنیام سه‌رم ئێشاندی و له‌و باره‌وه‌ داوای لێبوردن ده‌که‌م و جارێکی دیکه‌ش سپاس بۆ به‌سه‌رکردنه‌وه‌که‌ت. هیوادارم له‌ داهاتووشدا په‌یوه‌ندیمان پێکه‌وه‌ هه‌بێت و جیاوازی بیرکردنه‌وه‌ نه‌بێته‌ هۆی ساردی. سروشت و مرۆڤ به‌ جیاوازییه‌کانیه‌وه‌ جوان و له‌ دڵا شیرینه‌.
پڕ به‌دڵ هیوای سه‌رکه‌وتنت بۆ ده‌خوازم
له‌گه‌ڵ ڕێزو سڵاوی دوباره‌
خالید عه‌زیزی‌
13ی گه‌لاوێژ 27043ی ئۆگۆست 2004