كوردستان

kurdish weblog

My Photo
Name:
Location: Adelaide, SA, Australia

Friday, December 31, 2004

ساڵی نوێتان پیرۆز

ساڵی نوێتان پیرۆز

ساڵی نوێی 2005 له‌ هه‌موو لایه‌کتان پیرۆز بێت و به‌و هیوایه‌ی ساڵی دادێ ساڵێکی پڕ ده‌ستکه‌وت و سه‌رکه‌وتن بۆ نه‌ته‌وه‌که‌مان و گشت تاکه‌کانی بێت و ساڵی ڕاماڵینی جه‌نگ و زۆرداری و برسیه‌تی له‌جیهان و مه‌ترسیه‌کان له‌سه‌ر ژیانی مرۆڤایه‌تی و سه‌قامگیری ئازادی و پاراستنی مافه‌کانی مرۆڤ بێت.

Friday, December 24, 2004

سه‌رنج!

سه‌رنج!

ئه‌وه‌ دوو ڕۆژه‌ ئیمه‌یله‌کانم ئه‌وانه‌ی @hotmail.comن ناکرێنه‌وه‌ یان به‌ زه‌حمه‌ت ده‌کرێنه‌وه‌. له‌ گه‌ڵ داوای لێبوردن له‌و خۆشه‌ویستانه‌ی په‌یامیان بۆ ناردوم و‌ نه‌متوانیوه‌ وڵامیان بۆ بنێرمه‌وه‌. له‌ ناو بلاگه‌که‌شم هێندێک بابه‌ت بۆخۆیان وون ده‌بن و نازانم کێشه‌که‌ له‌ کوێوه‌ سه‌رچاوه‌ی گرتوه‌!.
تکا له‌ دۆستان ده‌که‌م به‌م ئیمه‌یله‌ پێوه‌ندیم پێوه‌ بکه‌ن: xalid.azizi@gmail.com
له‌گه‌ڵ ڕێزو خۆشه‌ویستی.

Thursday, December 23, 2004

له‌ هه‌گبه‌ی بیره‌وه‌ریه‌کانمه‌وه‌(2)

له‌ هه‌گبه‌ی بیره‌وه‌ریه‌کانمه‌وه‌(2)

ماوه‌یه‌ک بوو ده‌مان پاڵاوت!. له‌‌ پشت جاده‌ بۆ به‌ر جاده‌، له‌ د‌‌شته‌ تاڵ بۆ پاش ئاربه‌باو له‌وێش دیسان بۆ دۆڵی ساڵوک، قوڕنێ و زه‌ربه‌نێ. به‌واتایه‌کی دیکه‌ ئه‌و ساڵه‌ له‌ هه‌موو ڕۆژهه‌ڵاتی کوردستان ڕژیم نه‌خشه‌و پلان و سیاسه‌تێکی نوێی بۆ به‌ چوکداهێنانی هێزی پێشمه‌رگه‌ به‌ڕێوه‌ ده‌برد. نه‌خشه‌ی گه‌مارۆو پلیشاندنه‌وه‌(محاصره و سرکوب) یان گه‌مارۆو داپڵۆسین. به‌ که‌ڵک وه‌رگرتن له‌ وه‌رزی زستان ده‌یخواست ئه‌و نه‌خشه‌ گڵاوه‌ی جێبه‌جێ بکات. ئێمه‌ش ته‌واوی ئه‌و زستان(1986)ه ‌رژیممان توشی ناکامی کردبوو، ئه‌ویش به‌وه‌ی که‌ خۆمان له‌ هێرشه‌‌کان ده‌پاراست و به‌پێی ئه‌و هه‌واڵانه‌ی ڕێکخسته‌کانی خۆمان بۆیان ده‌ناردین له‌ نیازو پیلانی ڕۆژانه‌ێ ڕژیم ئاگادار ده‌بووین و له‌به‌رامبه‌ردا شوێنی خۆمان به‌جێ ده‌هێشت. هه‌رچه‌ند ڕژیم به‌ نه‌هێنی و دزه‌ دزه‌ هێزی کۆ ده‌کرده‌وه‌ و شوێنی پێشمه‌رگه‌ی ده‌دۆزیه‌وه‌، له‌ به‌رامبه‌ردا ئێمه‌ش له‌ پلانه‌که‌یان ئاگادار ده‌بووین و وه‌ک ده‌ڵێن ده‌مانپاڵاوت، واته‌ شوێنی خۆمان به‌جێ ده‌هێشت و به‌لانی که‌مه‌وه‌ هه‌شت نۆ کاتژمێر ڕێگای پێ، به‌ پێی پێشمه‌رگه‌، له‌و شوێنه‌ دوور ده‌که‌وتینه‌وه‌.

ئه‌م خۆدزینه‌وه‌ش له‌ هێرشه‌کانی ڕژیم تاکتیکی ئه‌وکاتی هێزو کۆمیته‌ی شارستان بوو. ئه‌گه‌رچی ئه‌م تاکتیکه‌ تاڕاده‌یه‌ک ڕژیمی توشی ناکامی و دۆژدامانکردبوو، هه‌ر له‌و کاته‌شدا هێزی پێشمه‌رگه‌ی ماندوو کردبوو. به‌ جۆرێک پێشمه‌رگه‌کان ئه‌مه‌یان ناو نابوو "ڕاکه‌ ڕاکه"‌. هێندێک جاریش ده‌گوترا دیسان "حیزبه‌ و سڵامه‌ت به‌"یه‌. به‌ر‌هه‌مێکی دیکه‌ی ئه‌و سیاسه‌ته‌ ئه‌وه‌ بوو که‌ زۆرترین کات ئێمه‌ به‌ ره‌و پشت جاده‌و کوێستانه‌کانی مه‌یدانان هه‌ڵده‌کشاین. ڕژیمیش له‌و ده‌ڤه‌ره‌ به‌شێوه‌یه‌ک له‌ شێوه‌کان هه‌وڵی دوزینه‌وه‌ی ده‌داین. و بۆ وێنه‌ ڕژیم هێزی ده‌نارد بۆ گونده‌کانی نزیک و بناری چیاکانی ئه‌و ده‌ڤه‌ر‌ه‌و هێزیش بێ سێودوو به‌شاخی هه‌ڵده‌گێڕاین!. له‌ وه‌ها کاتێکدا رژیم له‌جیاتی ئه‌وه‌ی وه‌شوێنمان بکه‌وێ، شوێنه‌کانی تۆپ باران ده‌کرد. به‌مه‌ش ده‌یویست هه‌رچی زیاتر ماندوومان بکات. له‌ ڕاستیدا توشی‌ ماندوبونێکی زۆر ده‌بوین. گه‌لێک له‌ پێشمه‌رگه‌و کادره‌کان به‌ ئاشکرا ناڕه‌زایه‌تیان له‌و "ڕاکه‌ ڕاکه‌"یه‌ ده‌رده‌بڕی. ئه‌مه‌ش له‌به‌ر ئه‌وه‌ی پێیان وابوو له‌ لایه‌ک ماندوو ده‌بین و له‌ لایه‌کی دیکه‌شه‌وه‌ ڕۆژێک هه‌ر لوتمان به‌ڕووی ئه‌و هێرشه‌وه‌ ده‌بێ و ناچاریش ئاکامه‌که‌ی بپه‌ژرێنین، هه‌روه‌ها له‌و باوه‌ڕه‌دا بوون که‌ نا‌بێ ئه‌و سیاسه‌ته‌ی‌ ڕژیم گرتویه‌ته‌ به‌ر ته‌نیا به‌ ڕاکه‌ ڕاکه‌ و شوێن چۆڵکردن تێکبشکێنرێ، به‌ڵکوو ده‌بێ ئێمه‌ گوڕپانی شه‌ڕ دیاری بکه‌ین و ڕۆژێک به‌گژ ئه‌و هێرشه‌دا بچینه‌وه‌، به‌مه‌ش له‌ جیاتی ماندوو بوونی خۆمان لمبۆزی دوژمنمان ده‌شکاند.

****
زستان به‌ره‌و کۆتایی ملی ده‌ناو ڕۆژانی مانگی ڕه‌شه‌مه‌ له‌ کۆتایی نزیک ده‌بوونه‌وه‌ و، به‌ هاتنه‌ده‌ری گوڵه‌ نه‌ورۆزه‌، مژده‌ی نزیکبونه‌وه‌ی به‌هارو نه‌ورۆزو خاکه‌لێوه‌ی له‌گه‌ڵ خۆی ده‌هێناو چیدیکه‌ هێزی بێوره‌ی سه‌رماو سۆڵی زستان به‌رگه‌ی نه‌ده‌گرت و هێزی له‌به‌ر بڕابوو. هیزی زۆرداری به‌فر و شه‌خته‌و به‌سته‌ڵه‌ک به‌ره‌و پاشه‌کشه‌ و توانه‌وه‌ ده‌ڕۆیشت. به‌رجاده‌ زیاتر له‌ پشت جاده‌ خاکه‌لێوه‌ی له‌ باوه‌ش گرتبوو. لێوی خاک ناسک و نه‌رم به‌ڕوی گوڵه‌ نێرگزه‌کاندا کرابووه‌وه‌ و نێرگزه‌جاڕ، ئه‌و ده‌ڤه‌ره‌ی داپۆشیبوو. دارو ده‌وه‌ن چرۆیان ده‌رکردبوو. گوڵو گیا و هه‌ڵزو که‌ما له‌بن لێوی خاکه‌وه‌ چه‌که‌ره‌یان کردبوو و به‌ئاسته‌م سه‌ریان وه‌ده‌رنابوو. سروشت به‌ره‌و ژیانه‌وه‌ ملی ڕێی گرتبوو. بورجه‌کانی دار ئاوس و ته‌رازوو پێره‌ژن، به‌ کۆتایی هاتنیان هه‌واڵی ئه‌م مژده‌یان به‌ گوێماندا ده‌چرپاند. به‌رزاییه‌کانی پشتی "سه‌ی کانیالان"،" به‌رده‌ ڕه‌ش"،"حه‌شاری شینکه‌ی"، قوڵه‌نگ"،"پیربه‌شیر و شاخی زه‌ردی"، پشتی سپێدارێ و ساڵوکی سه‌روو کۆخی عه‌به‌شه‌ریف"، به‌گشی ئه‌و ده‌ڤه‌ره‌ ده‌لبه‌نده‌، ئامێزی گه‌رمیان بۆ پێشمه‌رگه‌کان کردبوه‌وه‌و له‌ گه‌ڵ گوندنشینه‌ زه‌حمه‌تکێشه‌کان له‌ یه‌کێک له‌ داویین شه‌وه‌کان و دوایین ڕۆژه‌کانی ڕه‌شه‌ممه‌دا، ئارامیان گرتبوو. مژده‌ی نه‌ورۆز و به‌هاری سروشت زینده‌وه‌رانی مه‌ستی ژیانه‌وه‌ کردبوو. به‌هار وه‌رزی وه‌رزێر و مه‌‌ڕدار و هه‌ژاران چاو چاوێنی ده‌کرد و هیوا به‌ ژیان و ژیانه‌وه‌ له‌گه‌ڵ وه‌ده‌رکه‌وتنی گوڵه‌ نه‌ورۆزه‌کان ڕوناکایی له‌ دڵی مرۆڤه‌کانی ئه‌و هه‌رێمه‌دا ڕواندبووه‌وه‌.
****
ده‌رنگانی شه‌و بێده‌نگی باڵی به‌سه‌ر سروشتدا کێشابوو، هه‌موومان له‌ دیوێکی سێ له‌ چواردا به‌شێوی تێکهه‌ڵکێش خه‌وتبووین. من و ڕیشه‌ هێشتا به ئاگا بووین. یه‌کێک له‌ کوڕه‌کان له‌ده‌ره‌وه‌ چاوه‌دێر بوو. کت و پڕ پێشمه‌رگه‌ی چاوه‌دێر سه‌ری له‌ درگای ژوره‌که‌ هینا ژور گوتی‌ میوانێک له‌ ده‌رێیه‌و کاری پێته‌. ئه‌زیش بێڕاوه‌ستان له‌ درگا وه‌ده‌رکه‌وتم و خۆم گه‌یانده‌ میوانه‌که‌. میوان، یه‌کێک له‌ هاوڕێیانی ڕێکخستنی شار بوو. پاش هه‌واڵ پرسی و چاک و خۆشی نامه‌یه‌کی دایه‌ ده‌ستم. به‌ده‌م کردنه‌وه‌ی نامه‌که‌وه‌ ده‌نگوباسم لێپرسی. ئه‌ویش بێڕاوه‌ستان وه‌ک ئه‌وه‌ی له‌ڕێی پرسیارێکی وا وه‌ستابێ، گوتی: نامه‌که‌ هه‌موو شتێکی تێدایه‌و "داره‌گوێز" به‌وردی نوسیویه‌تی. هێزێکی زۆری دوژمن له‌ ده‌ورتان کۆکراوه‌ته‌وه،‌ هه‌ر ئه‌مشه‌و به‌ته‌مان هێرش بکه‌نه‌ سه‌رتان. له‌ ئێواره‌وه‌ هه‌ر هێزه‌ و ده‌گوازرێته‌وه‌ بۆ سیاومه‌، کانی سوروو ئارمرده. پێشتریش پێگه‌ گه‌وره‌کانی ناوچه‌که‌ هێزێکی زۆری لێ مۆڵدراوه‌ و بێگومان ئه‌وه‌ی ده‌زانن و لێی ئاگادارن!.
ئه‌زیش پێم گوت" به‌ڵی ده‌زانین! به‌ڵام ئه‌وه‌ی نایزانین ئه‌وه‌یه‌ ئه‌وهێزه‌ی هاتونه‌ ئه‌و شوێنانه‌‌ به‌نیازه‌ ئه‌مشه‌و به‌ره‌و کوێ و به‌چلایه‌کدا بجوڵێ. ئایا له‌وه‌ی دڵنیان که‌ دوژمن ئاگای له‌ بوونی ئێمه‌یه‌ لێره‌؟!
ئه‌ویش گوتی: به‌و پێ‌یه‌ که‌ هێزه‌که‌ له‌و شوێنانه‌ کۆکراونه‌وه‌ ڕه‌نگه‌ به‌ره‌و به‌‌رجاده بێت. به‌ڵام ئه‌وه‌ش سه‌د له‌سه‌د نیه‌. له‌وانه‌یه‌ گشگیر‌ بێت و پشت جاده‌و به‌رجاده‌ هه‌موو بگرێته‌وه‌! چونکه‌ هێزه‌که‌ بێ شماره‌!!!
له‌ دواییدا پێم گوت: ‌ با نامه‌که‌ به‌چاکی بخوێنمه‌و‌ه‌ بزانم "داره‌گوێز" چی نوسیوه‌. تۆ ده‌توانی بگه‌ڕێیته‌وه‌ یان بچیته‌ کۆخی(...). له‌وێ پشویه‌ک بده‌ و گه‌ر حه‌زتکرد له‌وێ بمێنه‌وه‌. زۆر سوپاس بۆ ماندوو بونت و سڵاوی داره‌گوێز و هاوڕێیانی دیکه‌ بگه‌یه‌نه‌.

ماڵئاویم لێکرد و ئه‌و ڕۆیشت. پاشان چومه‌‌ ژوره‌وه‌ و نامه‌که‌م له‌ به‌ر ڕۆشنای گڕسۆزه‌که‌دا خوێنده‌وه‌ و ڕیشه‌ش گوێی لێگرت.
به‌ڕێز ...
"سڵاوێکی گه‌رمی شۆڕشگێڕانه‌تان لێ بێو ماندوو نه‌بن.
هاوڕێیان! هه‌روه‌ک ده‌زانن ڕژیم سیاسه‌تی "محاصره و سرکوب"ی گرتۆته‌ به‌رو ماوه‌یه‌که‌ هێزێکی زۆری هێناوه‌ته‌ بانه‌. به‌پێ ئه‌و زانیاریانه‌ی گه‌یشتۆته‌ ده‌ستمان و ئه‌وه‌ی ده‌یبینین، رژیم سیخوڕه‌کانی خستوته‌ گه‌ڕ و به‌رده‌وام شوێن پێتان هه‌ڵده‌گرن. ئێواره‌ دره‌نگ ئاگادار بوین که‌ هێزه‌ مۆڵدراوه‌که‌ی ڕژیم به‌ره‌و سیاومه‌، ئارمرده‌، کانی سور جوڵاون. ده‌سته‌ی زه‌ربه‌تی جاشه‌کانیش هه‌موویان له‌گه‌ڵن.
پێمان وایه‌ ئه‌م شه‌و به‌ دڵنیاییه‌وه‌ هێرشتان بۆ ده‌که‌ن، هه‌ربۆیه‌ پێویسته‌ وریابن و ...
به‌سپاسه‌وه‌
داره‌ گوێز
27.12.1365

****
هه‌واڵه‌که‌ توشی سه‌ر لێشێوانی نه‌کردین. ئه‌وه‌ ڕۆژه‌که‌ بوو که‌ ده‌بوو لێکی ده‌رکه‌ین. جا یان ده‌بوو به ئێمه‌ ببڕێ و ئه‌وان، واته‌ هێزه‌ زۆرو زه‌به‌نده‌که‌ی ڕژیمی داگیرکه‌ری کۆماری ئیسلامی توشی ناکامی بکه‌ین، یانیش به‌ پێچه‌وانه‌. له‌به‌ر ئه‌وه‌ی کاته‌که‌ دره‌نگ ببوو، ده‌رفه‌تی هێچ جێگۆڕکه‌یه‌ک له‌ به‌رده‌مماندا نه‌مابوو. گه‌ر بمان ویستبایه‌ خۆمان له‌و گه‌نگه‌ڵه‌ی ڕزگار بکه‌ین و وه‌ک چه‌ند مانگی ڕابردوو خۆمان بدزینه‌وه‌ و جێیان بۆ چۆڵ بکه‌ین، ئه‌وه‌ کاتی نه‌مابوو. ئه‌مه‌ش جێگای خۆشحاڵی زۆربه‌ی کادرو پێشمه‌رگه‌کان بوو. ده‌رفه‌تی ڕاکه‌ نه‌ما بوو!.

شوێنه‌که‌ ڕێزه‌ یاڵ و دۆڵێکی پڕ له‌ دارستانی پێکه‌وه‌ به‌ستراو بوو. چه‌ند گوند و کۆخی چه‌ند ماڵیی بچوک له‌مدیواودیوی ئه‌و یاڵ و دۆڵانه‌دا هه‌ڵکه‌تبوو. تیره‌ یاڵێکیش هه‌موو یاڵ و شیوه‌کانی پێکه‌وه ده‌به‌سته‌وه‌. هه‌ر له‌ پشتی سپیدارێوه‌ تا ده‌گاته‌ پشتی کۆخی حاجی عه‌به‌. هه‌شت تا ده‌ کیلۆمیتر له‌ ناوه‌ندی شاره‌وه‌ دور بوین. له‌ هه‌موو گوند و کۆخه‌کان ده‌سته‌یه‌کی کوڕه‌کانی لێ دامه‌زرابوو. شوێنه‌که‌ له‌ ڕووی ستراتیژی جه‌نگیه‌وه‌ به‌لای ئێمه‌وه‌ په‌سه‌ند بوو(من و ڕیشه‌). ئه‌و کاته‌ که‌ هه‌واڵه‌که‌مان پێگه‌یی کاتژمێر له‌ دوانزه‌ی شه‌و تێپه‌ڕی کردبوو. به‌ بێ ئه‌و هه‌واڵه‌ش بڕیارمان دابوو که‌ کاتژمێر پێنجی به‌یانی به‌شێکمان به‌ره‌و به‌رزاییه‌کان هه‌روه‌ک نه‌ریتی هه‌میشه‌ییمان، هه‌ڵکشێین. پاش گه‌یشتنی هه‌واڵه‌که‌ به‌ هه‌سته‌وه‌ خه‌وتین! و چاوه‌ڕوان ماینه‌وه‌.

هه‌موو کاتژمێره‌کان که‌ چاوه‌دێر ده‌گۆڕدرا به‌ ئاگا ده‌هاتم و که‌روێشکه‌، گوێ کوڵاخ ده‌خه‌وتمه‌وه‌. بۆخۆشم چاوه‌دێری چوار بۆ پێنج بووم. فه‌ره‌ج که‌ له‌ پێش منه‌وه‌ بوو کاتی چونه‌ ده‌ره‌وه‌ی، پێم گوت مه‌یه‌ به‌ شوێنمدا، بۆخۆم ده‌ێمه‌ ده‌ر.

ئه‌مجاره‌ خه‌وم لێنه‌که‌وته‌وه‌ و هه‌ستام خۆم به‌ست و کڵاشه‌که‌م به‌ سینگمه‌وه‌ ناو پشم له‌ دیوار‌ قایم کردوو چاوه‌ڕێ مام. زیاتر له‌ ده‌خوله‌کی مابوو بۆ پێنج که‌ فه‌ره‌ج خۆیکرد به‌ ژوردا و گوتی لای سه‌یکانیلانه‌وه‌ ته‌که‌یه‌!!. سه‌ی کانیلانیش گوندێکی چه‌ند ماڵی بوو که‌ به‌ ڕوکاری شاره‌وه‌‌و له‌ودیوو شوێنه‌که‌ی ئێمه‌وه‌ بوو که‌ ده‌سته‌یه‌کی لکی سێی لێبوو. منیش گوتم بڕۆ ده‌ره‌و‌‌ه‌ ئه‌وه‌ ئێمه‌ش دێین. هه‌ندێک له‌ کوڕه‌کان هه‌ر زوو ڕاپه‌ڕین و خۆیان گورجکردو وه‌ده‌رکه‌وتن، که‌چی یه‌ک دویه‌ک له‌ کوڕه‌کان به‌زه‌بری زۆر هه‌ڵمده‌ستاندن و چه‌ک و چۆڵم به‌ کۆڵدا ده‌دان، که‌چی به و حاڵه‌ش به‌ئاگا نه‌ده‌هاتن. زۆر خه‌و گران و به‌ زه‌حمه‌ت بوون. به‌هه‌ر کێشه‌یه‌ک بێت هه‌ڵم ئه‌ستاندن و وه‌ده‌رکه‌وتین و بێ سێودوو به‌ره‌و به‌رزاییه‌که‌ی پشتی کۆخی حاجی عه‌به‌ هه‌ڵگه‌ڕاین. به‌شێوه‌یه‌کی نیوبازنه‌یی له‌ ڕیزی یه‌که‌وه‌ چه‌کبه‌ده‌ست و پێشمه‌رگانه‌ به‌ره‌و سه‌ر ملمان پێوه‌نا. هێندی پێنه‌چوو که‌ گه‌یشتینه‌ سه‌ر به‌رزاییه‌که‌. وادیار بوو پێشایی ڕه‌وه‌ی دوژمن‌ نه‌گه‌یشتبوه‌ ئه‌وێ. ئه‌مه‌ش مانای ئه‌وه‌ بوو شوێنێکی گرنگ له‌ ده‌ستی ئێمه‌دا بوو. ئه‌و به‌رزاییه‌ بۆ ئێمه‌ گرنگی تایبه‌تی هه‌بوو بۆیه‌ش به‌شێک له‌ کوڕه‌کانمان له‌وێ به‌جێ هێشت و بۆخۆمان به‌ره‌و تیره‌یاڵی نێوان قوڵه‌نگ و سه‌یکانیلان داکشاین. هێشتا به‌ته‌واوی ڕووناک نه‌بوو بوه‌وه که‌ گه‌یشتینه‌ هاوڕێیانی دیکه‌مان و ئه‌وانه‌ی سه‌ی کانیالان. من و سوره‌ له‌ پێشه‌وه‌ گه‌یشتین و که‌ دیتمان هه‌موو ده‌ست له‌سه‌ر په‌له‌ پیتکه‌ دامه‌زراون و که‌س ده‌نگی لێوه‌ نایه.‌ سه‌‌رمان سوڕما. "به‌ ئێمه‌ش ده‌ڵێن داموکێن ئه‌وه‌تان لێره‌یا!". پرسیم ئه‌دی بۆ ته‌که‌یان لێناکه‌ن به‌ته‌مای چین؟ ووتیان چاوه‌ڕێین فه‌رمانده هێز بگاتێ بزانین چیبکه‌ین. منیش گوتم فه‌رمانده‌ی چی و ته‌ڕه‌ماشی چی ئه‌وه‌ جاش و پاسدار له‌وێدان یان ته‌که‌یان لێبکه‌ین و سه‌ریان نیشین یانیش ده‌بێ بۆیان چۆڵکه‌ین. فه‌رمانده‌ تازه‌ ده‌ڵێ چی!! سێ لێره‌وه‌ و دوان‌ له‌و لایتره‌وه‌ هێندێکیش به‌لای خوارێدا بۆیان سه‌رده‌که‌وین! خۆ له‌وه‌ زیاتر نیه‌. سوره‌ش گوتی تڕحێو !! کوڕه‌ لێده‌ن بابه،‌ لێده‌ن لێ، فه‌رمانده‌!. چاوشینیش گوتی: .. شوان تا دانیشێ مه‌ڕه‌که‌ی دور ده‌که‌وێته‌وه‌. به دوای ئێمه‌دا ڕیشه‌ و شێخ جه‌مال و ئه‌وانی دیکه‌ گه‌یشتن. دیاره‌ بێکه‌س و ژماره‌یه‌کی ک.شارستان گه‌یشتبوون. سه‌رتان نه‌ ئێشێنم من وه‌کی دیکه‌ کادری کومیته‌ ناوچه‌و لک بووم، به‌ڵام له‌کاتی وادا لاسارو بێگوێ بووم. هه‌ر بۆیه‌ش من و سوره‌و چاوشین هه‌ستاینه‌ سه‌ر پێو گوتمان وا ئێمه‌ ڕۆیشتین. ده‌ستمان به ڕشاندن کردو به‌ره‌و شوێنی هێزه‌کانی دوشمن به‌ده‌م تیره‌یاڵه‌که‌وه‌، که‌وتینه‌ جوڵه‌. پێم وایه‌ ده‌مه‌ترێک هه‌روا چوینه‌ پێشه‌وه‌. کتووپڕ له‌ ناو ده‌وه‌نانه‌وه‌ ئه‌وانیش ئێمه‌یان داگرت. به‌‌ڵام چ داگرتنێک!؟. منیان له‌ زه‌وی گه‌وزاند و چاوشین و سوره‌‌ش به‌ په‌ل‌‌ پڕوزه‌ خۆیان گه‌یانده‌وه‌ کوڕه‌کان.
زۆر له‌ نزیکیانه‌وه‌ که‌وتم. سه‌ره‌تا وام ده‌زانی پێکراوم و به‌ڵام هه‌ستی پێناکه‌م. زۆریش به‌لامه‌وه‌ گرنگ نه‌بوو چونکه‌ هێنده‌ له‌ نزیکیانه‌وه‌ که‌وتبوم که‌ پێم وابوو تازه‌ من فت. چه‌که‌که‌م زیاتر له‌میترێک له‌‌ده‌ستم په‌ڕیبوو. ڕێگه‌ی هه‌ستانه‌وه‌یان نه‌‌ده‌دام. بنکه‌ دارێکی لێبوو که‌ به‌فریام که‌وتبوو، سه‌رم خستبوه‌ پاڵی!. بمتوانیایه‌ خۆم هێبده‌ بچوک ده‌کرده‌‌وه‌ که‌ به‌ ڕاده‌ی بنه‌ داره‌که‌ زیاتر نه‌بێ به‌ڵام نه‌ده‌کرا!!. لێگدا لێگدا ته‌که‌ له‌‌شوێنه‌که‌ی من ده‌کرا. سوره‌و چاوشین که‌ به‌ دۆخی منیان ده‌زانی که‌وتبوونه‌ هه‌راو هاوار. هه‌ر زوو زوو ته‌که‌یان له‌ شوێنی دوژمن ده‌کرد بۆ ئه‌وه‌ی سه‌رنه‌په‌ژرێن په‌لاماری من بده‌ن. گوێم له‌ده‌نگی سوره‌ بوو ده‌یگوت کوره‌ فریا که‌ن! ‌ ... گیرا. ئه‌وه‌ی ده‌یگوت نه‌یده‌گوته‌وه‌ به‌واته‌یه‌کی دیکه‌ هه‌رچی به‌ زاریدا بهاتبایه‌ ده‌یگوت و ته‌که‌شی ده‌کرد.
هه‌ستم ده‌کرد زۆربه‌یان په‌رۆشی دۆخی منیانه‌ و که‌وتوونه‌ جوڵه‌. به‌تایبه‌ت ئه‌وانه‌ی لکی سێ. نزیک ده‌ خوله‌کێک دۆخه‌که‌ به‌م جۆره‌ بوو. له‌م ماوه‌دا منیش بیرم له‌ وه‌کرده‌وه‌ که‌‌ نارنجۆکه‌م بۆ سه‌نگه‌ری دوژمن فڕێ بده‌م. به‌ڵام ئه‌و هه‌وڵه‌شم بێ ئاکام بوو. نارجۆکه‌که‌م که‌وتبوو. تۆزێک هه‌ستم به‌ نائومێدی کردو خه‌ریک بوو دڵنیا ده‌بووم که‌ تازه‌ ئه‌ز فت بووم. کێشه‌که‌ ئه‌وه‌ بوو که‌ کڵاشه‌که‌م له‌به‌ینی من و سه‌نگه‌ری دوژمن دا که‌وتبوو. مه‌وداشمان هێنده‌ نه‌بوو گه‌ر ته‌که‌ی به‌دره‌وامی پشته‌وم نه‌بایه‌ ده‌یانکردمه‌ بێژنگ.

ورده‌ ورده‌ هه‌ستم ده‌کرد له‌ کوژرانم دڵنیا بوون، بۆیه‌ش ته‌که‌یان له‌شوێنی نه‌ده‌کرد. منیش نه‌ده‌جوڵام و چاوه‌ڕوانی ده‌رفه‌ت بووم که‌ خۆم بگه‌یه‌نمه‌وه‌ چه‌که‌که‌م و دوا چانسی خۆم تاقیبکه‌مه‌وه‌. هه‌ر له‌و هزرانه‌دا بووم که‌ له‌ لای خواره‌وه‌ی شیوه‌که چاوم که‌وت به‌ قاله‌وسوو، سه‌لیم کاویان، مسته‌فا چکۆل(هه‌ر سێکیان به‌ده‌ستی ڕژیم گیانیان لێسێندرا و چونه‌کاروانی گیان به‌ختکردوانی ڕێگای ڕزگاری کوردستان). ئه‌وان به‌ ماته‌مات به‌ره‌و لای سه‌نگه‌ری داگیرکه‌ران هه‌ڵده‌کشان و هاوکات له‌ لای پشتیشه‌وه‌ چاوشین و سوره‌و شێخ جه‌مال(دواتر له‌ لایه‌ن ڕژیمه‌وه‌ گیراو پاشان ئێعدام کرا) و ئه‌وانی دیکه‌ ده‌ستیان به هێرشکردن بۆ پێشه‌وه‌کرد. ئه‌وه‌ باشترین ده‌رفه‌ت بوو بۆ من و یه‌کسه‌ر فڕکه‌مکرده‌ چه‌که‌که‌م و ده‌م له‌سه‌ر پشت شان به‌ شانی ئه‌وان بۆ پێشه‌وه‌!. له‌ماوه‌ی یه‌ک دوو خوله‌کدا ئه‌و سه‌نگه‌ره‌‌ی پێشه‌ومان شوێنی گرت. له‌ ڕێی ده‌ستکه‌وت و کارتی پێناس نه‌ده‌وه‌ستاین. به‌ دروشمدان و به‌ شێوه‌یه‌کی زۆر چاوه‌ڕوان نه‌کراو ته‌نیا له‌ماوه‌ی ماوه‌یه‌کی کورتدا هێزی دوژمن توشی تێک شکانێکی وه‌ها بوو که‌ ته‌نانه‌ت نه‌یانتوانی خۆیان ساز بده‌نه‌‌وه‌ و له‌ فه‌رمانده‌یی و پێگه‌ نزیکه‌کانیشه‌وه‌ جموجوڵ ڕاوه‌ستابوو. چونکه‌ نه‌یانده‌زانی هێزه‌کانیان له‌ کوێن و چیان به‌سه‌رهاتوه‌ و به‌ وته‌ی خۆیان"زد انقلاب" له‌ کوێیه‌. هه‌مووی ئه‌و بێنه‌و به‌ره‌یه‌ نزیک به‌ چلوپێنج خوله‌کێکی خایاند.

له‌به‌ر ئه‌وه‌ی لکی چوار شوێنه‌که‌یان(پشتی سپیدارێ) به‌ جۆرێک بوو که‌ هه‌موو هێزه‌ تێکشکاوه‌که‌ی دوژمن ده‌بوو به‌سه‌ر ئه‌واندا تێپه‌ڕێ، ئه‌وجا خۆی ده‌رباز بکات ناچار توشیان به‌ شه‌ڕێکی تونده‌وه‌ بوو. دیاره‌ پێشمه‌رگه‌کانی ئه‌و لایه‌ تا دره‌نگ نه‌یان زانیبوو که‌ ئه‌وه‌ی ئاوا هێزه‌کانی دوژمن به‌سه‌ریاندا باریبوو له‌به‌ر ئازایه‌تیان نه‌بوو به‌ڵکوو له‌ ترسان و له‌ ناچاریان بوو. هێزه‌کانی دوژمنیش نه‌یان ده‌زانی که‌ له‌‌وێش پێشمه‌رگه‌‌ی لێیه‌ و ئازایانه‌‌ به‌ریان پێگرتوون.

ئه‌وه‌ی ڕاستی بێت دوژمن بۆ گه‌مارۆی ئێمه‌ هاتبوو به‌ڵام بۆخۆیان که‌وتبوونه‌ گه‌مارۆی ئێمه‌وه‌و به‌ خه‌ویش ئه‌و دۆخه‌یان نه‌دیبوو‌. بۆ هه‌ر لایه‌ک ده‌چون هێزی پێشمه‌رگه‌ به‌ره‌نگاریان ده‌بوون و ئه‌مه‌ش ئه‌وانی له‌ په‌لوپۆ خستبوو. شپرزه‌ و سه‌ر لێشێواو په‌له‌کاژه‌یان ده‌کرد. له‌ ڕاستیدا ئه‌وه‌ی لاقێکی هه‌بوو بێت دوانی دیکه‌ی قه‌رز ده‌کردو هه‌ڵده‌هات. له‌م ماوه‌یه‌‌دا له‌ کۆڵی ئێمه‌وه‌ ڕیشه‌ برینداربوو. ئه‌ویش زۆر نه‌بوو بۆخۆی ده‌یتوانی بڕواو هه‌روا له‌پێشیشه‌وه‌ بوو. هێرشه‌که‌مان به‌رده‌وام بوو تا ئه‌وه‌ی ده‌رچوو بوو به‌ره‌و شار ده‌م له‌سه‌ر پشت هه‌ڵده‌هات. هێزه‌کانمان ئه‌وانه‌‌ی له‌ پێشه‌وه‌ بوون هه‌موو له‌سه‌ر ئه‌و تیره‌ یاڵه‌ی پشتی سپیدارێ یه‌کمان گرته‌وه‌. تا ئه‌و کاته‌ سێ پێشمه‌رگه‌ گیانیان سپاردبوو هه‌شت که‌سیشمان بریندار بوو. به‌ڵام هێزی دوژمن هه‌شتا نه‌وه‌د که‌سێکیان لێکوژرابوو. حه‌وت یان نۆ که‌سمان به‌ دیل گرتبوو. چه‌ک و چۆڵێکی زۆر له‌و شیوو دۆڵه‌دا که‌وتبوو. چه‌ند به‌کرێگیراوی تاوانباریش له‌و شه‌ڕه‌دا کوژران. ته‌رمی بریندارو قوربانیه‌کانی خۆمان گوێسته‌وه‌و شوێنی شه‌ڕه‌که‌مان به‌جێ هێشت. ئه‌ویش له به‌ر ئه‌وه‌ی به گه‌یشتنه‌وه‌ی پێشایی هێزه‌ تێکشکاوه‌که‌ی دوژمن بۆ ناوشار له‌وه‌ی دڵنیا بووین که‌ شوێنی تێکهه‌ڵچوونه‌که‌ کوێرانه‌ تۆپ باران ده‌کات. ئه‌وه‌نده‌ی له‌بیرم مابێت، که‌ریم گه‌نمانی، عبدوله‌ چکۆل و عه‌به‌ شوێی گیانیان به‌خت کرد و ته‌رمه‌کانیانمان له‌گه‌ڵ برینداره‌کان گواسته‌وه‌.

سه‌ره‌تا پێمان وابوو که‌ هێزه‌که‌ هه‌ر ئه‌وه‌نده‌ بوو که‌ هاتبوه‌ ئه‌و شوێنه‌ و ئێمه‌ش تێکمان شکاندبوو. به‌ڵام داوتر تێگه‌یشتین که‌ دۆڵی ساڵوک و که‌نده‌ڵ و قوڕنێ و زه‌ربه‌نێ و لای گه‌وره‌دار هه‌موو هێزی زۆروبۆری دۆژمنی بۆ هاتبوو. سه‌یر له‌وه‌دابوو که‌ تێکشکانی هێزه‌کانی دوژمن له لای ئێمه‌وه‌ فه‌رمانده‌یی هێزه‌کانی دیکه‌ی توشی سه‌ر سوڕمان و نا ئومێدی کردبوو. فه‌رمانده‌ی ئه‌و به‌شه‌ی که‌ پشتی قوڕنێ و زه‌ربه‌نێ و چه‌مـی ساڵوکی پێسپێردرابوو، له‌کاتێکدا که‌ وه‌ک سوارچاکێکی سه‌رکه‌وتوو له‌سه‌ر بانه‌کانی گوندی قوڕنێ فه‌خری ده‌فرۆشت و پێاسه‌ی به‌سه‌ردا ده‌کردن، هه‌واڵی ئه‌و تێکشکانه‌ی هێزه‌کانیان ده‌بیستێ. فه‌رمانده‌ی دوژمن توشی دۆخێکی وا ده‌بێ که‌ یه‌کسه‌ر ده‌ره‌جه‌کانی سه‌ر شانی داده‌دڕێنێ و به‌ به‌ری که‌وشه‌کانی له‌سه‌ر زه‌وی پێخوستی ده‌کات و فه‌رمان ده‌دات که‌ هێزه‌کانیان بگه‌ڕێنه‌وه. خه‌ڵکی گوندی ناوبراو په‌یڤێکیان له‌ زاری فه‌رمانده‌ی تێکشکاوانه‌وه‌ ده‌گێڕایه‌وه‌ که‌ له‌و کاته‌دا گوتبووی که‌ هه‌واڵه‌که‌ی پێگه‌یشتبوو، به‌داخه‌وه‌ له‌بیرم نه‌ماوه‌‌.

مسته‌فه‌وی که‌ یه‌کێک له‌ دیله‌کان بوو له‌ گه‌ڵ چه‌ند دانه‌ی دیکه‌یان به‌ ئێمه‌ بوون و ئێمه‌ش له پشت "چاویان" له‌ سه‌ر ڕه‌وه‌زه‌کانی شاخی زه‌ردی و به‌رزایی حه‌شاری شینکه‌ی خۆمان مڵاس دابوو. دوژمن خه‌رێکی تۆپ بارانی شوێنی شه‌ڕه‌که‌ بوو. به‌ڵام تازه‌ وه‌ک کورد ده‌ڵێن "وه‌ک تڕی بن گۆم وابوو نه‌ ده‌نگی هه‌بوو نه‌ بۆن!!". تۆپ بارانه‌که‌ کوێرانه‌ بوو. به‌ شێوه‌ی"شه‌لم کوێرم که‌س نابوێرم" ده‌یان هاویشت. بۆیه‌ش ئێمه‌ ته‌نێ خه‌می گوندیه‌کانمان بوو.

له‌و به‌رزاییه‌ هه‌روا چاوه‌ڕوانی ڕۆژ ئاوابوون بوین. میله‌کانی کاتژمێر به هێواشی ده‌جوڵا و ئێمه‌ش به‌ په‌له‌ بووین. له‌ لایه‌ک له‌به‌ر ژیانی برینداره‌کان که‌ یه‌ک دوویه‌کیان برینه‌کانیان دژوار بوو. له‌و لای تریشه‌وه‌ پێشمه‌رگه‌ وه‌ک نه‌ریتێکی شه‌ڕی پارتیزانی ده‌مه‌و به‌یانی تاده‌گاته‌ نیوه‌ڕۆ هه‌وڵ ده‌دا خۆی له‌ تێکهه‌ڵچوون بپارێزێ، ئه‌ویش گه‌ر بۆی بگونجێ. چونکه‌ له‌ نیوه‌ڕۆ به‌ولاوه‌ چه‌ک و زه‌خیره‌ی به‌رگری به‌رگه‌ ده‌گرێ.، به‌ڵام گه‌ر له‌ به‌یانیه‌وه‌ به‌رده‌وام تێوه‌گلێی ئه‌وه‌ دژواره‌ په‌کت نه‌که‌وێ. به‌ هه‌‌ر حاڵ هه‌روه‌ک نه‌ریتی پێشمه‌رگانه‌ پاش شه‌ڕ هه‌ڵپه‌ڕکێ و گۆرانی شتێکی ئاسایی بوو. ته‌نانه‌ت ئه‌گه‌ر چه‌ند هاوڕێیه‌کیشمان له‌ده‌سه‌ت دابێت. ئه‌وڕۆژه‌ وه‌نه‌بێ هه‌ڵپه‌ڕیبین به‌ڵام یه‌کێک له‌ کوڕه‌کان که‌ هه‌میشه‌ شمشاڵی له‌گه‌ڵ خۆی ده‌گێڕا و شمشاڵ ژه‌نێکی چاکیش بوو ده‌ستی کرد به‌ شمشاڵ ژه‌نین. له‌گه‌ڵ هێندێک هه‌وای چه‌پڵه‌مان لێده‌دا و بۆ هه‌ندێکیشیان له‌ هزران ڕاده‌چوین. له‌م کاته‌دا مسته‌فه‌وی که تا ئه‌و کاته‌ بارودۆخی ژیانی بۆ ده‌گێڕاینه‌وه‌، له‌گه‌ڵ دیله‌کانی دیکه‌ ده‌ستیان کرده‌ گریان. ئێمه‌ش دڵخۆشیمان ده‌دانه‌وه‌ و پێمانده‌گوتن خۆشبه‌ختن که‌ گیراون و گیانتان ڕزگار بوه‌ تازه‌ بۆ ده‌گرین؟ ئه‌وانیش وه‌ک ڕه‌سوڵی نادری ده‌ڵی زیاتر له‌ بانگێیان ده‌دا!!. پاش ماوه‌یه‌کی پاڕانانه‌وه‌ی ئه‌وان و دڵخۆشی دانه‌وه‌ی ئێمه‌ ژیر بوونه‌وه‌.

ورده‌ورده‌ ئێواره‌ هات و شه‌وێکی دیکه‌ هاته‌وه‌. وه‌ک ده‌ڵێن شه‌و قه‌ڵای مێرانه‌ دوژمنیش پاش کاتژمێر چواری ئێواره‌ ته‌نیا له‌ نێو مۆڵگه‌کانی ده‌سه‌ڵاتی هه‌بوو ئه‌وی دیکه‌ی له‌ده‌ست هێزی گه‌لدا بوو. به‌ره‌و ساڵوکی سه‌روو داگه‌ڕاین و له‌وێ له‌گه‌ڵ هه‌موو هێز یه‌کمان گرته‌وه‌. به‌گه‌یشتنی ساڵوک زانیمان که‌ برایه‌کی ڕیشه‌ که‌ له‌ ڕیزی دوژمدا بوو به‌ دیلگیراوه‌. ڕیشه‌ هه‌ر گوێی له‌و هه‌واڵه‌ بوو زۆر تێکچوو. خۆی ڕاپسکاند که‌ بیکوژێ!!. ده‌یگوت بریا ته‌رمه‌که‌تم ببینایه‌ نه‌ک ئه‌و که‌ڵافه‌ته. زۆرمان هه‌وڵدا تا پێملمان کرد که‌ واز بێنێ و لێیگه‌ڕێ. پاش ماوه‌یه‌ک دامان مرکانده‌وه.

بێگومان یه‌که‌م ئه‌رکی ئه‌مشه‌ومان ڕه‌وانه‌کردنی بریندارو دیله‌کانه‌ بۆ ناوه‌ندی. ڕێگایه‌کی هه‌شت نۆ کاتژمێری به‌ به‌تاڵی نه‌ک به‌ هه‌شت بریندارو ژماره‌یه‌ک دیله‌وه‌. کاتێک گه‌یشتین هێز به‌ هه‌موو هزری خۆی بڕیاریداو‌ه‌ لکی سێ هه‌ر ئه‌مشه‌و بریندارو دیله‌کان به‌ره‌و ناوه‌ندیی ببات!!. منیش به‌ بیستنی ئه‌م بڕیاره‌ به‌ڕاستی هه‌ڵبه‌زیمه‌وه‌. حه‌وت بریندارو له‌وانیش زیاتر دیل به‌ لکی سێدا که‌ ژماره‌که‌ی هێنده‌ له‌ دیل و برینداره‌کان زیاتر نه‌بوو، شتێکی سه‌مه‌ره‌ بوو!. ئه‌ویش ڕێگایه‌کی دژوارو هه‌ڵه‌مووت و به‌و ساردو سه‌رمایه‌. هه‌رچی هه‌وڵمانداو شێرو ڕێویمان بۆ کاکی فه‌رمانده‌ هێزو کۆمیته‌ی شارستان هێنایه‌وه‌ نه‌چوو به گوێیاندا و گوتیان هه‌ر ئه‌وه‌یه‌. ئێمه‌ش داوامانکرد هه‌ر هیچ نه‌بێ تا خه‌رجه‌ک له‌گه‌ڵمان بن له‌وێوه‌ بۆخۆمان ده‌ڕۆین!!. دڵنیا بووم که‌ به‌ لکی سێ ئه‌و کاروانه‌ نه‌ده‌گه‌ینرایه‌ شوێنی مه‌به‌ست و گه‌ریش بگه‌ینرایه‌ ئه‌وه‌ ڕه‌نگه‌ زۆر به‌ شپرزه‌یی.

تێبینی: جارێ لێره‌دا با به‌س بێت و ئه‌و به‌شه‌ی لێره‌ به‌دواوه‌ تا ده‌گه‌ینه‌ کارێزه‌ بۆ ده‌رفه‌تێکی دیکه‌. به‌ڵام با له‌ یادم نه‌چێت که‌ ئه‌و چالاکیه‌ وه‌ک" نه‌ورۆزانه‌ی هێزی شه‌هیدانی وردی بۆ خه‌ڵکی کوردستان" له‌ ڕادیۆ ده‌نگی کوردستان خوێندرایه‌وه‌. تکاش له‌وانه‌ ده‌که‌م که‌ ئه‌م بیره‌وه‌ریه‌ ده‌خوێننه‌وه‌ و ئاگایان له‌ ورده‌کاریه‌کانی ئه‌و شه‌ڕه‌ هه‌یه یان یه‌کێک له‌ به‌شداره‌کانی بوون،‌ پێویست بوه‌ بیگونجێنم ئاگادارم بکه‌نه‌وه‌.

Wednesday, December 22, 2004

كۆنگره‌ی ژنی كورد له‌ تاران فرۆشرا!

راپۆرتی چۆنییه‌تی به‌رِیَوه‌چوونی كۆنگره‌ی «ژنی كورد» له‌ تاران....كۆنگره‌ی ژنی كورد له‌ تاران فرۆشرا!
له‌ سایتی په‌یامنێر وه‌رگیراوه‌
په‌یامنیَری تاران-له‌ هۆڵی كۆنگره‌وه
‌شه‌ش مانگ له‌مه‌و به‌ر خویَندكارانی كانوونی كازیوه‌ی زانكۆی تاران هاتنه‌ سنه‌ و له‌گه‌ڵ چالاكانی بزاڤی ژنان باسی به‌رِیَوه‌بردنی كۆنگره‌ی «ژنی كورد»یان كرد و برِیاریان دا كه‌ باسی «ژن» ناكه‌نه‌ كه‌ره‌سه‌ و ئامیَری خۆهه‌ڵكیََشان و مه‌به‌ستیان ته‌نیا خزمه‌ت به‌ پرسی ژنی كورده‌.ژنانی چالاكی سنه‌ش له‌سه‌ر ئه‌و برِیاره‌ وتار و لیَكۆڵینه‌وه‌یان ئاماده‌ كرد و بۆ ئه‌و كۆنگره‌ له‌ ئیَران و عیَراق و توركیا و ئه‌ورووپا ریَكلامیان كرد. به‌رِیَوه‌به‌رانی كانوونی كازیوه‌ له‌ جیاتی ئه‌وه‌ی به‌ قه‌د توانی ئابووری خۆیان پیَ راكیَشن، ده‌ستیان كرد به‌ پرِژوبڵاوی و به‌ بیانووی پیَویستی به‌ پاره‌، كۆنگره‌یان زۆر به‌ ساكاری فرۆشت به‌ دوو پیاوی دژه‌ژن كه‌ جگه‌ له‌وه‌ی بۆ هه‌ڵسوكه‌وتی ناشیرین له‌گه‌ڵ ژنانی خۆیان به‌ ناوبانگ بوون، ئه‌وه‌ی هه‌ڵسوكه‌وتی ناحه‌زه‌ دژ به‌ ژنانی چالاك كردبوویان و كۆسپی بزاڤی ژنان له‌ كوردستان بوون. سه‌ره‌رِای ئه‌وه‌ش ئه‌م دوو پیاوه‌ هیچ پیَوه‌ندییه‌كیان به‌ چالاكی ژنانه‌وه‌ نه‌بووه‌ و خاوه‌ن هیچ نووسین و چالاكی له‌م بواره‌دا نین. ئه‌مانه‌ به‌ تازه‌یی ئه‌نستیتـۆی كوردیان له‌ شاری سنه‌ وه‌ك ئه‌نستیتۆ كوردی تاران دامه‌زراندووه‌ و...كانونی كازیوه‌ ئه‌م فرۆشتنه‌ی تا دوایین رۆژه‌كان شارده‌وه‌ و له‌ ئاكامدا ناوی «ژن» و پرسی «ژن»یان گۆرِیه‌وه‌ به‌ پاره‌. له‌ دوو رۆژی به‌رِیَوه‌چوونی كۆنگره‌دا ئه‌م دوو پیاوه‌ جگه‌ له‌وه‌ی وتاری لاوازی خۆیان كه‌ له‌وه‌ پیَش بۆ فستیڤاڵی گه‌لاویَژ ناردبوو و ره‌ت كرابووه‌وه‌، به‌ زۆری پاره‌ و هه‌رِه‌شه‌ خسته‌ نیَو وتاره‌كان و مافی چه‌ند وتاری‌تر وه‌ك وتاری خانمی «ناهیدی موحه‌ممه‌دی» شاعیری ئیلامی و چه‌ند كه‌سی‌تریان پیَشیَل كرد، دوای خویَندنه‌وه‌ی وتاری هه‌ر ژنیَكیش هیَرشیان ده‌كرده‌ سه‌ری و ئه‌وه‌ی شتی ناحه‌زه‌ ده‌یانوت. خویَندكاره‌كانی كانوونی كازیوه‌ش له‌به‌ر پاره‌كه‌ بیَده‌نگ بوون.خانمی «دیبا عه‌لیخانی» ئه‌ندامی ریَكخراوه‌ی «پشتیوانی له‌ ژنان» وتاریَكی له‌سه‌ر قه‌تڵی نامووسی پیَشكه‌ش كرد و ئاماژه‌ی به‌وه‌ كرد كه‌ 11 ژن له‌ ماوه‌ی ئه‌م دوو ساڵه‌دا به‌ هۆی شه‌ره‌ف له‌ كوردستان كوژراون. هه‌ر له‌م حه‌فته‌ی رابردووشدا ژنیَكی ئارایشگه‌ر له‌ گه‌رِه‌كی فه‌ره‌جه‌ی سنه‌ له‌سه‌ر شه‌ره‌ف كوژراوه‌. «بیَهزادی خۆشحالی» (یه‌كیَك له‌وانه‌ی كۆنگره‌ی كرِیبوو) هیَرشی خسته‌ سه‌ر خاتوو دیبا و وتی: ئه‌و ژنه‌ ئارایشگه‌ره‌ فاحیشه‌ بووه‌ و خانووی فه‌سادی بووه‌ و ئه‌و ژنانه‌ی ده‌چوون بۆ لای ده‌یكردن به‌ فاحیشه‌!!! كه‌واته‌ كوشتنیان جیَی خۆی بووه‌. هه‌روه‌ها وتی: فیَمیَنیسته‌كان مه‌به‌ستیان به‌ره‌ڵڵایی سیَكسیه‌!!!جیَگای سه‌رنجه‌ كه‌ «خۆشحاڵی» به‌ 33 ساڵ ته‌مه‌نه‌وه‌ خۆی به‌ خاوه‌نی 52 كتیَب ده‌زانێ (وا دیاره‌ هه‌ر له‌ كاتی له‌دایكبوونیه‌وه‌ خه‌ریكی نووسینه‌!!!) وه‌ك كه‌سیَكی زۆر ئاسایی له‌سه‌ر فیَمیَنیزم ده‌دویَ و دیاره‌ هیچی لیَ تیَناگات. له‌ جیهانیَكدا كه‌ كوشتن له‌سه‌ر شه‌ره‌ف ره‌ت ده‌كریَته‌وه‌ و له‌ ستۆكهۆڵم و له‌نده‌ن كۆرِی له‌سه‌ر ده‌گیریَ، كه‌سانیَك لایه‌نگری قه‌تڵی نامووسین و خۆیان به‌ رووناكبیر و نویَنه‌ری نه‌ته‌وه‌ی كوردیش ده‌زانن!!«خۆشحاڵی» وڵامی بۆ ئه‌و خویَندكارانه‌ نه‌بوو كه‌ پرسیاریان كرد: «چۆن ده‌توانی حوكمی فه‌ساد بۆ ئه‌و ژنه‌ بدات و بۆچی ده‌بێ تاوانی مه‌رگ بیَت و تاوانی پیاوان له‌م كیَشه‌دا چیه‌؟»***وتاری خانمی «نگین شیَخولئیسلامی» ئه‌ندامی «ریَكخراوه‌ی ژنانی كوردی پاریَزه‌ری مافی مرۆڤـ و ئاشتی» له‌سه‌ر ئایدیۆلۆژیای رزگاری ژن و پیَشنیاری پیَكهاتنی ئه‌رته‌شی فه‌رهه‌نگی-كۆمه‌ڵایه‌تی-زانستی ژنان بوو. دیسان «خۆشحاڵی» هیَرشی كرده‌ سه‌ر ئه‌ویش، به‌ڵام خاتوو نگین ئازایانه‌ ده‌مكوتی كرد.***وتاری خانمی «فه‌ریده‌ی ئه‌مینولئیسلامی» ئه‌ندامی «ریَكخراوه‌ی پشتیوانی له‌ مافی ژنان» له‌سه‌ر راپۆرتی لیَكۆڵینه‌وه‌كانی بوو و ریَژه‌ی زۆر به‌ نرخی سه‌باره‌ت به‌ توندوتیژی دژ به‌ ژنان تیَدا بوو. له‌ كاتی په‌یڤی خانمی ئه‌مینولئیسلامیدا به‌ خۆشحاڵیه‌وه‌ «خۆشحاڵی» و هاوكاره‌كه‌ی له‌وێ نه‌بوون و به‌م هۆیه‌ش هیَرش نه‌كرایه‌ سه‌ری.***پرِكیَشه‌ترین وتار، وتاری خانمی «دوكتۆر روئیا تلوعی» بوو به‌ نیَوی «بزووتنه‌وه‌ی ژنانی كورد، بزووتنه‌وه‌یه‌كی كۆمه‌ڵایه‌تی یان فیَمیَنیستی؟». ویَرِای ئه‌وه‌ی كه‌ خاتوو روئیا باوه‌رِی به‌ شه‌پۆلی سیَیه‌می فیَمیَنیزم و پیَناسه‌ی فیَمیَنیزمیَكی كوردیه‌، خه‌ریكی نووسینی كتیَبیَكیش له‌سه‌ر ئه‌م بابه‌ته‌یه‌. «خۆشحاڵی» هیَرشیَكی زۆر توندوتیژی كرده‌ سه‌ر خاتوو روئیا و وتی: فیَمیَنیزمی كوردی دۆرِاوه‌ و تاكو بزووتنه‌وه‌ی نه‌ته‌وه‌یی نه‌گاته‌ ئاكام، ژنی كورد مافی نیه‌ باس له‌ بزووتنه‌وه‌ی خۆی بكات!!! ئه‌م باسه‌ جیَگه‌ی سه‌رسوورِمانه‌ به‌ هۆی ئه‌وه‌ی كه‌ كورده‌كانی باكوور له‌ توركیاش هه‌ر هه‌مان كیَشه‌ی كورده‌كانی رۆژهه‌ڵاتیان هه‌یه‌، به‌ڵام ژنانیَك وه‌ك «له‌یلا زانا» و «فه‌له‌كناس ئوجاق» و... هتد خه‌ریكی چالاكین و له‌ هه‌مان كاتدا كه‌ بۆ بزووتنه‌وه‌ی نه‌ته‌وه‌یی تیَده‌كۆشن، ئاستی بزاڤی ژنی كوردیان له‌ دنیادا بردۆته‌ سه‌ر.«خۆشحاڵی» قسه‌یه‌كی سه‌یر و سه‌مه‌ره‌ی ده‌كرد كه‌ چونكه‌ له‌ هه‌ڵه‌بجه‌ و ئه‌نفال ژن و پیاوی كورد به‌ یه‌ك ریَژه‌ و یه‌ك شیَوه‌ كوژراون، كه‌واته‌ له‌ كورددا ژن و پیاوی كورد به‌رابه‌رن!!!!! به‌ هۆی ئه‌وه‌ی كه‌ ناوبراو باوه‌رِی به‌ «سانترالیزمی دیموكراتیك» و «به‌رزه‌كورد»ه‌!!! (بیَگومان خۆی له‌ ناوه‌ندی ئه‌و سانترالیزمه‌ دیموكراتیكه‌دایه‌ و «به‌رزه‌كوردی» خه‌یاڵیش خۆیه‌تی كه‌ ریَبه‌ری هه‌موو كوردانه‌) هه‌وڵ ده‌دا به‌ روانگه‌یه‌كی فاشیستی و ره‌گه‌زپه‌رستانه‌وه‌ هه‌موو شتیَك ته‌نانه‌ت بزووتنه‌وه‌ی خویَندكارانی كورد و بزووتنه‌وه‌ی ژنانی كورد بخاته‌ بازنه‌ی پیَناسه‌كانی بیری ته‌سكی خۆیه‌وه‌.«دوكتۆر روئیا تلوعی» ده‌ڵیَ: «ئه‌م روانگه‌ توندوتیژه‌ ئاكامیَكی له‌ نیَو كورددا نابێ و ته‌نانه‌ت له‌ جیهانی ئیمرِۆشدا ناتوانێ جیَگایه‌ك بۆ خۆی وه‌دۆزێ. بزاڤی ژنان و بزاڤی خویَندكارانی كورد به‌ پیَی پیَناسه‌ی بزاڤی نوێ، به‌ شیَوه‌ی تۆرِیَكی پان و به‌رینه‌ كه‌ ریَبه‌رایتیه‌كی دیار و كاریزماتیكی نیه‌ و گروپه‌ جیاوازه‌كان له‌گه‌ڵ ئه‌وه‌ی ئامانجی تایبه‌تی خۆیان هه‌یه‌، له‌سه‌ر ئامانجه‌ هاوبه‌شه‌كان ریَك كه‌وتوون و ئه‌م بزاڤگه‌له‌ش پیَگه‌یه‌كی دیموكراتیكیان هه‌یه‌. كه‌واته‌ هه‌وڵ بۆ ریَبه‌رایه‌تی ئه‌م بزووتنه‌وانه‌ و بزووتنه‌وه‌ی نه‌ته‌وه‌یی كورد له‌ لایه‌ن دارِیَژه‌رانی بیرۆكه‌ی «به‌رزه‌كورد» هه‌وڵیَكی بیَ ئاكامه‌. كه‌سانی وه‌ك «خۆشحاڵی» له‌وانه‌یه‌ پیَیان وا بێ كه‌ خویَندكاران زۆر به‌ هه‌ست و ئیحساساتین و هه‌ر به‌و هۆیه‌ ئه‌مان ده‌توانن بیانخه‌ڵه‌تیَنن، به‌ڵام خویَندكارانی ئیَمه‌ ئه‌وه‌نده‌ عاقڵن كه‌ ئه‌گه‌ر ویستبیَتیان ریَبه‌رانیَكیش هه‌ڵبژیَرن له‌ نیَو هیَزه‌ خاوه‌ن بیروبرِواكانی خۆیان هه‌ڵیده‌بژیَرن و پیَویستیان به‌ بیرۆكه‌ فاشیستیه‌ خانه‌نشینه‌كان نیه‌.بزاڤی ژنانیش كه‌ ئه‌نستیتۆ كوردی سنه‌ی ترساندووه‌، بزاڤیَكی حاشاهه‌ڵنه‌گره‌ و به‌ جنیَو و سووكایه‌تی ریَگای لیَ ناگیردرێ. بزووتنه‌وه‌ی نه‌ته‌وه‌ییش خاوه‌نی حیزبگه‌لی خۆیه‌تی و ئه‌م حیزبانه‌ش به‌ یارمه‌تی بزاڤه‌ نویَكان وه‌ك بزاڤی ژنان و بزاڤی خویَندكاران و هه‌ڵبژاردنی ستراتژی و سیاسه‌تی نوێ ده‌توانن مافی نه‌ته‌وه‌یی گه‌لی كورد به‌ ده‌ست بیَنن و پیَویستیان به‌ ریَبه‌رایه‌تی «به‌رزه‌كوردی» خه‌یاڵی نیه‌.دوایین به‌رنامه‌ی كۆنگره‌ بریتی بوو له‌ میَزگردیَك كه‌ كچانی خویَندكار گله‌یی زۆریان له‌ «خۆشحاڵی» و هاوكارانی كرد كه‌ كۆنگره‌یان كردۆته‌ ده‌سخرِه‌ی خۆیان و له‌ شیَوه‌ی زانستی به‌ده‌ریان كردووه‌ و ئاژاوه‌یان ناوه‌ته‌وه‌.له‌م میَزگرده‌دا «خۆشحاڵی» ئاماژه‌ی به‌ 483 په‌رده‌ی دووراوی كچان له‌ سنه‌ كرد و بیَ ئه‌وه‌ی قه‌یرانی كۆمه‌ڵایه‌تی و ئابووری گشت ئیَران بیَنیَته‌ به‌ر چاو، داوای وڵامی له‌ فیَمیَنیزم ده‌كرد!!! هه‌روه‌ها ئاماژه‌ی به‌وه‌ كرد كه‌ له‌ زه‌ماوه‌ندیَكی یه‌كیَك له‌ بنه‌ماڵه‌ گه‌وره‌كانی سنه‌دا جلوبه‌رگی كچان زۆر داپۆشراو نه‌بووه‌ و ئه‌م چاوی به‌ ناوكی كچیَك كه‌وتووه‌. كه‌واته‌ فه‌ساد و گه‌نده‌ڵی بنه‌ماڵه‌كانی سنه‌ی داگرتووه‌!!! «ساعدی» هاوكار و دۆستی ناوبراو، به‌ هۆی ئه‌وه‌ی له‌ سلیَمانی ئیجازه‌ی داوه‌ ژنه‌كه‌ی له‌چكی به‌ سه‌ره‌وه‌ نه‌بێ، زۆر شانازی به‌ رۆشنبیر بوونی خۆیه‌وه‌ كرد!!!له‌ كۆتایی كۆنگره‌كه‌دا ریَگایان له‌ خویَندنه‌وه‌ی به‌یاننامه‌ی «كانوونی به‌رگری له‌ مافی منداڵانی كوردستان» و «ریَكخراوه‌ی پشتیوانی له‌ ژنان» كرد كه‌ له‌وه‌دا داوا له‌ كۆماری ئیسلامی كرابوو ده‌ست له‌ به‌ردباران و ئیعدام و... هتد هه‌ڵگریَ. برِیَك وتیان ته‌نانه‌ت له‌ پیاوانی نووسه‌ری ئه‌و به‌یاننامه‌شیان داوه‌.زۆر جیَگای داخه‌ كه‌ سووكایه‌تی به‌ كۆنگره‌ی ژنی كورد كرا، له‌ حاڵیَكدا به‌رِیَوه‌چوونی ئه‌م كۆنگره‌ له‌ تاران له‌ نواندنی رواڵه‌تیَكی سه‌ركه‌وتوو له‌ نه‌ته‌وه‌ی كورددا ده‌یتوانی به‌سوود بیَ. به‌ هه‌رحاڵ چالاكانی بزاڤی ژنان تیَگه‌یشتن كه‌ بزووتنه‌وه‌ی ژنان ته‌نیا به‌ ده‌ست ژنان و بۆ ژنانه‌ و له‌ بزووتنه‌وه‌ی نه‌ته‌وه‌ییشیان جیاواز نیه‌ و پیَویستی به‌ ریَبه‌رایه‌تی فاشیسته‌كان نیه‌. (هه‌روا كه‌ له‌ چه‌ندین چاوپیَكه‌وتن و دیمانه‌یه‌كدا نووسه‌رانی ژنی رۆژهه‌ڵات ئاماژه‌یان به‌وه‌ كردووه‌)
چه‌ند خاڵیَكی سه‌رنج‌رِاكیَش:* وتاری خاتوو «شه‌هلا ده‌باغی» به‌ ناوی «ژنانی شاعیر و دیسكۆرسی فیَمیَنیستی» و وتاری كاك «پۆڵا سه‌عیدیش» خویَندرایه‌وه‌.* «ساعدی» وتی: ئیَمه‌ هاتینه‌ ناو كۆنگره‌ی ژنان تا نه‌هیَڵین برِیَك له‌ ژنان به‌رچاو بن.* فیلمی ئه‌م كۆنگره‌یه‌ به‌ گشت رووداوه‌كانیه‌وه‌ وه‌ك به‌ڵگه‌ راستیه‌كان ده‌رده‌خات.

Friday, December 17, 2004

له‌ هه‌گبه‌ی بیره‌وه‌ریه‌کانمه‌وه‌(1)

له‌ هه‌گبه‌ی بیره‌وه‌ریه‌کانمه‌وه‌(1)

...زیاتر له‌ شه‌ش مانگێک بوو پێشمه‌رگه‌ بووم!، نیوه‌ شه‌وێک له‌ ناکاو ته‌ک وتۆک ده‌ستی پێکرد. ده‌ڵێن زه‌ینی مناڵی تیژه‌ و هه‌موو ورده‌کاریه‌کانی ده‌ورانی مناڵی تێته‌وه‌ بیر.. گه‌لێک هه‌وڵده‌ده‌م ڕوداوه‌کان چۆن بوون وایان بگێڕمه‌وه‌، به‌ڵام مخابن گشت ورده‌کاریه‌کانم نایه‌ته‌وه‌ یاد و ناچار که‌رت و په‌رت ئه‌وه‌ی ده‌توانم بیانهێمه‌وه‌ به‌رچاوو ده‌ی گێڕمه‌وه‌.

به‌ڵێ، به‌ده‌نگی ته‌که‌، هه‌مووان هه‌ستاین و به‌ره‌و شوێنی تێکهه‌ڵچوون و ڕه‌وه‌ی دوژمن ڕۆیشتین. هێشتا ئێمه‌ نه‌گه‌یشتبووین که‌ پێشمه‌رگه‌کانی پارێزه‌ری گاکڕ(چیایه‌کی به‌رزی پشت شاره‌دێ ئارمرده‌) پاشه‌کشه‌یان کرد. یه‌کێک له‌ پێشمه‌رگه‌کان مه‌حمه‌د ڕه‌زایی(حه‌مه‌ چاوجوان) پێکرابوو، تا گه‌ێندرایه‌ دامێنی چیا گیانی له‌ده‌ستدا و چوه ناو کاروانی گیانبه‌ختکردوانی ڕێگای ئازادی کوردستان. جگه‌ له‌ حه‌مه‌چاوجوان پێشمه‌رگه‌یه‌کی دیکه‌ له‌و چیایه‌ له‌گه‌ڵ دوسێ که‌س له‌ پێشمه‌رگه‌کانی هێزی به‌رگری، ئه‌رکی پاراستنی گاکریان پێسپێردرا بوو. وه‌نه‌بێ ئه‌وانی هێزی به‌رگری وه‌ک پێشمه‌رگه‌ سه‌ره‌کیه‌کان ته‌یار و پۆشته‌ بوو بن. ئه‌وه‌نده‌ی ئه‌ز له‌بیرم بێت له‌سه‌ر لوتکه‌ چیای گاکڕ سه‌نگه‌رێکی سه‌ر داپۆشراوی لێهه‌ڵکه‌ندرابوو. شه‌وو ڕۆژ ده‌بوو پێشمه‌رگه‌ی هێزی به‌رگری که‌ له‌ خه‌ڵکی ئاسایی پێک ده‌هاتن لێ بێ. شه‌وانه‌ش دو پێشمه‌رگه‌ی لکی سێ ده‌چوون تا به‌یانی و دڵنیابوون له‌ نه‌هاتنی هێزی دوژمن له‌وێ ده‌مانه‌وه‌. ئه‌وانه‌ی هێزی به‌رگری به‌ چه‌که‌وه‌ نه‌ ده‌چوون و هه‌ر له‌وێ سێ چوار تفه‌نگی یانزه‌ تیر، بڕنۆ و ئیم یه‌کی لێبوو که‌ نۆبه‌داره‌کان ده‌یاندا به‌وانه‌ی دوای خۆیان. چه‌که‌کانیش نه‌ باش بوون و نه‌ فیشه‌ک و که‌ره‌سته‌ی پێویستیان له‌گه‌ڵدا بوو. ئه‌مانه‌ هه‌رکام چیروکی خۆیان هه‌یه‌و باسی هه‌ر شتێک ده‌که‌ین بۆ خۆی ورده‌ شتی لێده‌ بێته‌وه‌. وه‌ک ده‌ڵێن هه‌ر وانێکه‌و ورده‌وانێکی لێده‌ بێته‌وه‌.

سه‌رتان نه‌ئێشێنم، ئاوایی ئارمرده‌ وه‌ک شوێنێکی شه‌ڕ لێدراوو چۆڵ، بێده‌نگ و ماته‌م گرتوو، له‌و ده‌مه‌و به‌یانه‌دا ده‌تگوت خه‌می حه‌مه‌ چاوجوان دایگرتوه‌ وه‌ک فرمێسکێکی قه‌تیسماوی داوه‌ریوی کالانی چاوی دایکێکی جه‌رگ سوتاو، کڕ به‌ سنگی چیای گاکڕو (ده‌شت قسنێ)وه‌ هه‌ڵکوڕما بوو.

چۆڵ چۆڵ، درگا و په‌نجه‌ره‌کان له‌سه‌ر گازه‌ره‌ی پشت بوون. هه‌رکه‌س ده‌ستی ژن و منداڵی خۆی گرتوه‌و له‌ شه‌وو ڕۆژیانه‌وه‌ ئاواییان به‌جێ هێشتوه‌. پێش ئه‌وه‌ی به‌ته‌واوی ڕووناک بێته‌وه‌ من و چه‌ند که‌سی دیکه‌ که‌ بچوکه‌که‌یان من بووم به‌ناو ئاواییدا تێپه‌ڕین و دیمه‌نی چۆڵ و ماتی شاره‌که‌ سێبه‌ری ده‌خسته‌ سه‌ر داهاتوو. سێبه‌رێک که‌ تانوکه‌ش وه‌ک په‌ڵه‌یه‌کی تاریک ئاسمانی ئه‌و ده‌ڤه‌ره‌ی به‌ر نه‌داوه‌ و وه‌ک دێوه‌زمه‌ دایپۆشیوه‌. بنکه‌ی ڕێکخراوو لک چۆڵ بوون و که‌سی تێدا نه‌مابوو. به‌ره‌و خوار ئاویی و کۆخی سه‌ید ئه‌لی داپه‌ڕینه‌ خوار.

پێشمه‌رگه‌و خه‌ڵکێکی زۆر به‌ده‌وری ته‌رمی ئه‌و تێکۆشه‌ره‌وه‌ ئاپۆره‌یان دابوو. حه‌مه‌ له‌و تێکۆشه‌ره‌ وریاو چاونه‌ترسانه‌ی ئه‌و سه‌رده‌مه‌ بوو. کادری سیاسی لکی سێ و خاوه‌ن خۆشه‌ویستیه‌کی تایبه‌تی بوو. له‌وه‌ش زیاتر حه‌مه‌ هاوشاری و هاوگه‌ڕک و ته‌نانه‌ت تێکه‌ڵی بنه‌ماڵه‌ییشمان هه‌بوو‌. بۆیه‌ش په‌ژاره‌یه‌کی زۆر دایگرتم. ته‌مه‌نم گه‌لێک بچووک بوو. به‌جۆرێک که‌ ئاسان نه‌بوو که‌ هه‌ست به‌ کووڵایی خه‌می ئه‌و کۆسته‌ بکه‌م، به‌واتایه‌کی دیکه‌، مناڵ بووم مناڵ!!. ئه‌و قالۆره‌ی به‌شانمه‌وه‌ بوو ناوی ژ-3 بوو، که‌ له‌شانم ده‌کرد به‌ ئاسته‌م له‌ زه‌وی جیا ده‌بووه‌وه‌. به‌و حاڵه‌ش نه‌متوانی به‌ری داوه‌رینی فرمێسکه‌کانی ناو کالانی چاوه‌کانم بگرم و به‌خوڕ به‌سه‌رگۆنامدا هاتنه‌ خواره‌وه‌و به‌ره‌و ناخی زه‌وی خلۆر بوونه‌وه‌.

باسی ئه‌وه‌ بوو له‌ کوێ به‌خاکی بسپێرن و چۆن ماڵه‌وه‌یان ئاگادار بکه‌ن. کورد گوته‌نی ئه‌وکاته‌ ئه‌ز نه‌سه‌ری سیر بووم و نه‌ بنچکی پیواز. بۆیه‌ش ئه‌زو گه‌لێکی وه‌ک من هه‌ر چاوه‌ڕێ به‌رپرس و ده‌مڕاست و ...ان بووین تابزانین بڕیار چیه‌و چ ده‌که‌ین. پاش چێشته‌نگاوێ بڕیاری ڕۆیشتن درا. ئه‌وکات من هه‌ڕه‌م له‌بڕه‌ی نه‌ده‌کرده‌وه‌ و بۆ هه‌ر شوێن و جێگه‌یه‌ک ده‌ڕۆیشتن بۆم تازه‌ بوو. کۆخه‌کانی ده‌وروبه‌ری ئاواییش چۆڵ ببوون و که‌سی تێدا نه‌مابوو. له‌ یه‌کێک له‌ کۆخه‌کان لامانداو بۆخۆمان ده‌ستمان به‌ چێکردنی هه‌ڵواکردوو ئه‌و ژه‌مه‌مان له‌کۆڵ کرده‌وه‌!.
هه‌روا به‌ره‌و ئه‌و شوێنه‌ یه‌ک یه‌ک و دوو دوو به‌ باریکه‌ ڕێ و بزنه‌ ڕێیاندا ڕێگه‌مان ده‌بڕی، کاتێکمانزانی ئه‌وانی پێشه‌وه‌ ڕاوه‌ستاون و چاوه‌ڕێن هه‌مووان بگه‌نه‌ ئه‌وێ. دیاربوو له‌و ماوه‌ ڕێڕۆیشتنه‌دا بریاری دیکه‌ دراوه‌.
یه‌کێک له‌ بڕیاره‌کان ئه‌وه‌بوو که‌ من و یه‌کدو که‌سی دیکه‌ که‌ سه‌ر به‌ڕێکخراوی پاش ئاربه‌با بوین به‌ره‌و بله‌کێ بچین و منی مێرمناڵیان دابوو به‌ گومرکی بله‌کێ!. که‌ پێان گوتم ته‌که‌ له‌ سه‌رم ده‌هات. گومرک چیه‌و بله‌کێ کوێ‌یه؟..‌ نازانم!!!. به‌ڵێ ڕێکه‌وتین. به‌ چه‌می برینجاڕاندا داگه‌ڕاین و تاگه‌یشتینه‌ چه‌می بله‌کێ و له‌وێش به‌ره‌و بله‌کێ هه‌ڵگه‌ڕاین. گه‌یشتینه‌ بله‌کێ و منیا دایه‌ ده‌ست که‌‌سێک به‌ نێوی سه‌یفه‌ی ئه‌مین نژاد*. دیاره‌ ئه‌م به‌ڕێزه‌ به‌رپرسی گومرکی بله‌کێ بووه‌و وادیاربوو هه‌ر بۆخۆشی به‌ته‌نێ بوو. یان من نایه‌ته‌ هزرم که‌ پێشتر که‌سی دیکه‌ی له‌گه‌ڵ بووبێ. به‌هه‌ر حاڵ لێره‌وه‌ ژیانی من پێی نایه‌ قۆناخێکی دیکه‌وه‌.

بله‌کێ گوندێک بوو که‌ تا سنوری باشور مه‌ودایه‌کی زۆری نه‌بوو. ڕۆژانه‌ به‌ ده‌یان و سه‌دان بار کوتاڵ و شه‌کرو برنج و که‌لوپه‌لی دیکه‌ ده‌هاته‌ ئه‌وێ و ئاودیوی سنور ده‌کرا. ئه‌وه‌نده‌ی بزانم له‌و دیوه‌وه‌ شه‌کرو برنج و شیرو ...له‌و شتانه‌ ده‌هات و له‌م دیویشه‌وه‌ کوتاڵ و شتی دیکه‌ ئاو دیوو ده‌کرا. شه‌وانه‌ تا به‌یانی له‌سه‌ر ئه‌و ڕێ‌یه‌ ڕاده‌وه‌ستام و بارم گومرک ده‌کردن. دیاره‌ هێندێک له‌ کاروانچیه‌کان ناوی خاوه‌ن باره‌که‌یان ده‌داو ژماره‌ی باره‌کان و منیش وه‌ره‌قه‌م بۆ ده‌بڕین و پاشان سبه‌ینێ ده‌چوین پاره‌که‌یمان له‌ خاوه‌ن بار وه‌رده‌گرت.
ڕۆژانه‌ کارم به‌ سێناییتر بوو!. کاری بنکه‌ واته‌ چێشت لێنان و چالێنان و گه‌ڕان له‌ ناو بارخانه‌که‌دا بۆ باری نوێ و ئه‌و بارانه‌ی که‌ شه‌وی ڕابردوو هاتبوون تا گومرکیان لێ وه‌رگرم. بنکه‌که‌مان له‌ ناو خانویه‌کی به‌رزدابوو که‌ ژێره‌که‌ی دوکانی حه‌مه‌ چکۆل بوو سه‌ره‌که‌شی دوو به‌ش بوو به‌شێکیان بنکه‌ی ئێمه‌و به‌شه‌که‌ی دیکه‌ش بنه‌ماڵه‌ی شه‌هید عه‌لیه‌ ڕه‌شی تێدا بوو.
ته‌نی ئه‌ز به‌شه‌و گومرکم ده‌کرد. به‌رپرسیش که‌ که‌سێکی که‌ته‌ی زله‌و ورگن بوو زۆرتر خه‌ریکی قلیان کێشان بوو!. هه‌ندێک براده‌ریشی له‌ بله‌کێ بوون که‌ شه‌وانه‌ له‌کاتێکدا من ڕێگه‌م کۆنتڕۆڵ ده‌کرد ئه‌و له‌گه‌ڵ براده‌ره‌کانی خه‌ریکی دانیشتن و خواردن و خواردنه‌وه‌ بوو.

ڕۆژێک بۆ شێوو کوڵکردن داگه‌ڕام بۆ چه‌مه‌که‌ی خوار ئاوایی. هاوین بوو و بایه‌کی فێنک ئه‌و دۆڵه‌ێ داگرتبوو. له‌ پێشدا پانتۆڵ و کراسم شتن و به‌سه‌ر به‌ردی ناوچه‌مه‌که‌دا هه‌ڵمخستن، پاشان چوومه‌ ناو ئاوه‌که‌ و ماوه‌یه‌ک مه‌له‌مکردو دواتر خۆم وشککرده‌وه‌ و ویستم جلو به‌رگه‌کانم له‌به‌ر بکه‌مه‌وه‌، کاتێک چاو ده‌گێڕم پانتۆڵ دیار نیه. خه‌م دایگرتم. به‌ خۆم ده‌گوت له‌وه‌یه‌ که‌سێک بردبێتی و یان به‌گاڵته‌ لێ شاردبمه‌وه‌.. هزرم بۆ ئه‌وه‌ نه‌ده‌چوو که‌ با بردبێتی یان که‌وتبێته‌ ئاوه‌که‌وه‌ و ئاوه‌که‌ له‌گه‌ڵ خۆیا بردبێتی. هه‌رچۆنێک بوو ده‌سته‌و ئه‌ژنۆ دانیشتم. هه‌ر ئه‌و پانتۆڵه‌م هه‌بوو. دنیام لێ وێکهاتبوه‌وه‌. ئاخر چۆن به‌و ڕوته‌ڵیه‌ بچمه‌وه‌ بۆ بنکه‌. یان له‌ بنکه‌ به‌بێ پانتۆڵ چ بکه‌م. ڕوناکاییم شک نه‌ده‌برد. ماڵه‌وه‌شمان نازانم پاش ئه‌و ڕۆژه‌ی لێک دابڕاین له‌ کوێ گیرساونه‌وه‌. ناو گیرفانیشم کێچ له‌ به‌تاڵیان سه‌وزه‌ڵێ و سه‌وزه‌ڵێیان تیایدا ده‌گوت. به‌تاڵ و حه‌تاڵ. یارمه‌تی پێشمه‌رگه‌ ئه‌وکات 250تمه‌‌ن بوو، ئه‌ویش نه‌ما بوو، بۆ پانتۆڵکرینیش نه‌ ده‌بوو. به‌هار حاڵ کێشه‌ی پانتۆڵ هه‌موو هزرو بیری داگیرکردبووم. هزری مێر منداڵانه‌م ڕێی بۆ هیچ شوێنێک نه‌ده‌برد. ته‌نیا هیوام ئه‌وه‌ بوو شه‌و بێت و به‌ په‌ناو په‌سیواندا خۆم بگه‌یه‌نمه‌وه‌ بنکه‌. ترسیشم له‌ کاکی به‌ر پرس هه‌بوو که‌ بڵێی چۆن له‌گه‌ڵم هه‌ڵسوکه‌وت بکات!. له‌سه‌ر به‌ردێکی هه‌ڵتروشکابووم و له‌گژ هزران ڕاچووبووم. سێبه‌ر ورده‌ورده‌ پڕ ده‌بوون و ڕۆژ به‌ره‌و ئاوابوون ملی نابوو. کت وپڕ ده‌نگێکی به‌رز له‌سه‌ر ته‌باره‌ به‌رزه‌که‌ی پشت چه‌مه‌که‌وه‌ بانگی ‌کرد:
خااااالییید.. خااااااالییید...!!!
یه‌کسه‌ر ناسیمه‌وه‌. ئه‌نوه‌ر** کوڕی عه‌لیه‌ ڕه‌شی دراوسێ بنکه‌که‌مان. هاوته‌مه‌نی خۆم بوو.
له‌خۆشیان هه‌ڵبه‌زیمه‌وه‌و وڵامم دایه‌وه‌.
گوتی ئه‌وه‌ بۆ نایه‌یته‌وه‌ بۆ بنکه‌ لێره‌ چده‌که‌ی؟
گوتم: پانتۆڵه‌که‌م نه‌ماوه‌.. نازانم چی لێهاتوه‌..؟
گوتی: بۆ نه‌ماوه‌ چی لێهاتوه‌؟!
گوتم: نازانم.. تا مه‌له‌م کرد و هاتمه‌وه‌ تماشامکرد نه‌ماوه‌!
ئه‌م گوتوبێژه‌ به‌ ده‌نگی به‌رزو ئه‌و له‌ شوێنی خۆی منیش له‌ شوێنی خۆم.
سه‌ره‌نجام ئه‌نوه‌ر گوتی دانیشه‌ ئێسته‌ ده‌چم پانتۆڵی خۆمت بۆ دێنم!
منیش چاوه‌ڕێ مام و گه‌لێکش خۆشحاڵ بووم که‌ ئه‌نوه‌ر ئه‌و چاکه‌یه‌ی له‌ ته‌کدا کردم و له‌و چه‌ڵه‌مه‌یه‌ ڕزگاری کردم. پاش سی چل خوله‌ک ئه‌نوه‌ر پانتۆڵێکی خۆی بۆ هێنام و پێکه‌وه‌ گه‌ڕاینه‌وه‌ بۆ بنکه‌. کاتێک گه‌ڕامه‌وه‌ بۆ بنکه‌ کاکی به‌رپرس گرژو مۆن بوو. چیرۆکه‌که‌م بۆ گێڕایه‌وه‌، به‌ڵام هه‌ر گوێشی نه‌بزوت و سه‌ر خۆی نه‌هێنا. واته‌ گوێی لێخه‌واند. منێک که‌ ڕۆژانه‌ چه‌پکه‌ کاغه‌زی بۆ ده‌که‌مه‌ پاره‌و هه‌موو ئێواره‌یه‌ک ده‌یخه‌مه‌ ناو ده‌ستی! به‌هزریا نه‌هات که‌ من پێشمه‌رگه‌م و پانتۆڵم نه‌ماوه‌و پانتۆڵێکم بۆ بکڕێ. ڕۆژ و مانگ تێپه‌ڕین و من هه‌ر پانتۆڵه‌ ئه‌مانه‌ته‌که‌ی ئه‌نوه‌رم له‌پێدایه‌. چیرۆکی ئه‌م پانتۆڵه‌ ده‌ماوده‌م ده‌گاته‌ ماڵه‌وه‌ و ئه‌وانیش زۆر نیگه‌ران ده‌بن!. به‌هه‌ر کوێره‌وه‌ریه‌ک بوه‌ ده‌ستێک کراسو پانتۆڵم بۆ ده‌کڕن و ده‌ستاوده‌ست بۆم ڕه‌وانه‌ ده‌که‌ن. پاش ماوه‌یه‌ک پێم گه‌یشت و گه‌لێک گه‌شامه‌وه‌.

سه‌ره‌ڕای ئه‌و خراپی و بێده‌ربه‌ستیه‌ی کاکی به‌رپرس من به‌ بێ ماندوبوون شه‌وانه‌ تا دره‌نگانی به‌یانی له‌سه‌ر ڕێی کاروانچیان ڕاده‌وه‌ستام و بارم گومرک ده‌کرد و سبه‌ی ئێواره‌که‌شی پاش چنینه‌وه‌ی هه‌موو پاره‌که‌ دوده‌ستی و به‌ ئه‌ژمارده‌ ڕاده‌ستی کاکه‌ سه‌یفه‌م ده‌کرد. یه‌کێک له‌و شه‌وانه‌ کاروانێک هات و ئه‌زیش داوای گومرکم لێکردن.. کارونچیه‌کان گوتیان که‌ باری مه‌لا عه‌لی بانوانن. وه‌ک پێشتریش باسمکرد له‌ نێوان ئێمه‌و خاوه‌ن بارو کاروانچیه‌کان بڕاو متمانه‌‌ به‌یه‌ککردن هه‌بوو. هه‌ربۆیه‌ له‌ کاتی وادا وه‌ره‌قه‌ی گومرکه‌که‌م ده‌بڕی و ده‌مدایه‌ ده‌ستی کاروانچیه‌کان و سبه‌ی له‌ خاوه‌ن بار، که‌ دوکان و شوێنیان له‌ بازاڕی بله‌کێ هه‌بوو پاره‌که‌یانم به‌ پێ ئه‌و له‌تکه‌ وه‌ره‌قانه‌ی لای خۆم ده‌مایه‌وه‌ وه‌رده‌گرت. بۆ ئه‌و بارانه‌ی مه‌لا عه‌لی بانوانیش حه‌وت وه‌ره‌قه‌ یان چه‌کی په‌نجا تمه‌نیم بۆ بڕین. به‌یانی هه‌روه‌ک ڕۆژانی پێشتر که‌ ڕومکرده‌ دوکانی مه‌لا عه‌لی و داوای 350 تمه‌نه‌م لێکرد، مامۆستا فه‌رموویان که‌ باری من نه‌بوون و من ئه‌مشه‌و بارم بۆ نه‌هاتوه‌. کوره‌ دایکت چاک، باوکت چاک!!.. من شه‌وی ڕابردوو وه‌ره‌قه‌ی حه‌وت بارم به‌ناوی به‌ڕێزتانه‌وه‌ بڕیوه!.. هیچ‌. هه‌رچی هه‌وڵمدا مه‌لا نه‌چوه ژێر باری ئه‌وه‌ی که‌ باره‌کان هی ئه‌و بوون و پاره‌که‌م بداتێ. سه‌رتان نه‌ ئێشێنم منیش ده‌ست له‌ .... درێژتر به‌ نابه‌دڵی هاتمه‌وه‌. کاتێک چیروک و به‌سه‌رهاتم بۆ کاکی به‌رپرس گێڕایه‌وه‌ و پێمگوت حاڵ و حساو ئاواسه‌، ئه‌ویش پێ خسته‌ که‌وشێکیه‌وه‌ و گوتی ئیلانه‌و بیلانه‌ ده‌بێ بۆ خۆت پاره‌ی ئه‌و وه‌ره‌قانه‌ بده‌ی!.
ئه‌وجا سه‌رم لێ ماسی و نه‌مده‌زانی چ بکه‌م و چۆن ئه‌و پاره‌ی بده‌مه‌وه‌ به‌ کاکی به‌ر پرس و ئیتر بۆی به‌قوڕێ بگرم و بڕۆم بۆ شوێنێکی دیکه‌. وه‌ک له‌سه‌ره‌‌وه‌ ئاماژه‌م پێدا یارمه‌تی مانگانه‌ 250 تمه‌ن بوو. واته‌ ده‌بوو دو هه‌یڤان ڕاوه‌ستم تا پاره‌ی بۆ باری مه‌لا عه‌لی بانوان بده‌م که‌ حاشای لێکرد!!.
سه‌ری مانگ نزیک بوه‌وه‌ و منیش چاوه‌ڕێم ڕۆژه‌کان زوو تێپه‌ڕن و له‌و به‌قوڕێگیراوه‌ی ڕزگاریم بێت. وادیار بوو ئه‌وجار به‌خت ڕووی تێکردبووم. کاتێک که‌ سه‌ری مانگ هات و کاکی به‌رپرس ویستی یارمه‌تیه‌که‌م وێدا، پێی گوتم که‌ یارمه‌تی بۆته‌ 350 تمه‌ن. منیش به‌بێ ئه‌وه‌ی سه‌ر خۆمی بێنم له‌ دڵه‌وه‌ خۆشحاڵ بووم. به‌رپرسی به‌ڕێز! وه‌بیری هێنامه‌وه‌ که‌ 350تمه‌ن بێجێم و ئه‌زیش له‌ڕێی نه‌وه‌ستام ڕسته‌که‌ی ته‌واو بکات و گوتم ئه‌و 350 تمه‌نه‌ یارمه‌تیه‌ی بخه‌ره‌جێگای. کاکی به‌رپرسیش بێ دوودڵی په‌سه‌ندی کرد. پاشان به‌ عه‌رزیم گه‌یاند که‌ من چیدیکه‌ ناخوازم له‌م بنکه‌یه‌ بمێنم و ده‌مه‌وێ بڕۆم بۆ کۆمیته‌ی شارستان. ئه‌ویش گه‌لێکی مینگه‌ مینگ گرته‌وه‌ و پێمل نه‌ده‌بوو. پاشان گوتم ماوه‌یه‌که‌ ماڵه‌وه‌م نه‌دیوه‌ و وه‌ڕزیمکردون ده‌مه‌وێ سه‌ردانێکی ماڵه‌وه‌ بکه‌م. به‌وه‌یان ڕازی بوو .. ئیتر هه‌ر ئه‌و ڕۆژه‌ وه‌ڕێکه‌وتم و خۆم گه‌یانده‌ کۆمیته‌ی شارستان که‌ له‌ گوندی نیروانی بناری سورکێو بوو، له‌وێ مامه‌و‌‌ه‌و هه‌ر ‌له‌وێوه‌ هه‌واڵی ماڵه‌وه‌م زانی.
تا به‌سه‌رهاتێکی دیکه‌ به‌ دوعا!
تێ بینی:
* گه‌لێک له‌ بیره‌وه‌ریه‌کانی ژیانی پێشمه‌رگایه‌تیم له‌ ده‌فته‌ری بیروه‌ریدا ده‌نوسیه‌وه‌ و لێره‌و له‌وێ به‌جێم هێشتوه‌و به‌ ئه‌مانه‌ت داومه‌ به‌ دۆست و ئاشنایان تا بۆم هه‌ڵگرن، به‌ڵام به‌داخه‌وه‌ زۆربه‌یان فه‌وتاون و نه‌ماون. ئه‌وه‌ی که‌ نوسیومه‌ته‌وه‌ بیرهێنانه‌وه‌یه‌ و ساڵ و ڕۆژ و مانگی نازانم!. گه‌ر جار جار ده‌رفه‌ت هه‌بێت به‌رکوڵێکیان لێده‌نوسمه‌وه‌. دیاره‌ زۆرتر واباوه‌ باسی شه‌ڕو چالاکی پێشمه‌رگانه‌ بنوسرێ و بگێڕدرێته‌وه و که‌متر خۆ له‌ قرێژی و ناشیرینیه‌کان ده‌درێ‌. به‌ڵام من وه‌ک له‌گه‌ڵ زۆر شتی باودا ته‌بانیم له‌گه‌ڵ ئه‌و باوه‌شدا ناتابه‌م. ژیانی پێشمه‌رگایه‌تی گه‌ر گه‌لێک شتی جوان و بۆ خۆڕانانی تێدا بوه‌، گه‌ر گه‌لێک ڕوداوی جێگای سه‌رنج و چالاکی ئازایانه‌ و له‌خۆ بوردوویی بێوێنه‌ی تێدا بوه‌. گه‌لێک شتی نه‌شیاو ڕوداوی نه‌خوازراوو هه‌ڵسوکه‌وتی دور له‌ ژیریشی تێدا هه‌بووه. ئه‌مه‌ سه‌ره‌ڕای ڕوداوگه‌لی خۆش و پێکه‌نیندار.‌ له‌ به‌ر ئه‌وه‌ جێیخۆیه‌تی بنوسرێنه‌وه‌.
**سه‌یفه‌ی ئه‌مین نژاد یه‌ک دوساڵ دواتر گه‌ڕایه‌وه‌ بن سێبه‌ری ڕژیم.***ئه‌نوه‌ر کوڕی گیانبه‌ختکردو عه‌لی حه‌نیفی ناسراو به‌ عه‌لی‌یه‌ ڕه‌ش، تێکۆشه‌رێکی گیانبه‌ختکردوو قارمان بوو که‌ دوژمن به‌ عه‌لی سیا ده‌ی ناسی و به‌ناوهێنانی نه‌تره‌یان ده‌چوو. له‌ شه‌ڕی جاده‌ی بانه‌ سه‌رده‌شت گیانی له‌ده‌ست دا. ئه‌نوه‌ریش پاش ئه‌‌وه‌ی چه‌ندین ساڵ پێشمه‌رگه بوو، گه‌ڕایه‌وه‌ بۆ لای ڕژیم و له‌ دژی ئامانجه‌کانی باوکی ده‌ستی دایه‌ چه‌ک و سه‌ره‌نجام هه‌ر به‌ده‌ستی ڕێبوارانی ڕێگای باوکی گیانی له‌ده‌ستدا!. ئه‌نوه‌ر هێشتا منداڵکار بوو که‌ توشی ئه‌و چاره‌ نوسه‌ قرێژه‌ هات.

Monday, December 13, 2004

ئه‌مجاره‌یان گوڵه‌كه‌ له‌ سه‌ر سنگی دایكی پانئێرانیسته‌كان درا به‌ڵام له‌ لایانپه‌ژاك وه‌
نووسینی: ئازاد

ٌپاش نیوه‌ٌڕۆی ٌڕۆژی پێنجشه‌ممه‌ 9ی دیسامبر2004ی زایینی, سیمینارێك بۆ فه‌ره‌حی په‌هله‌وی ژنی حه‌مه‌ٌڕه‌زای په‌هله‌وی شای پێشووی ئێرانّّ, له‌ هۆڵی كۆنفٌڕانسه‌كانی ئاكادیمی كولتووری هێلسینكی فینلاند پێك هات, كه‌ ژماره‌یه‌كی زۆر له‌ ئێرانی یه‌كانی دانیشتووی ئه‌و وڵاته‌ له‌و سیمیناره‌ دا به‌شدار بوون.
له‌ سیمیناره‌كه‌دا فه‌ره‌ح په‌هله‌وی وتارێكی پێشكه‌شی به‌شدار بووان كرد كه‌ له‌گه‌ڵ ناٌڕه‌زایه‌تی چه‌ند كه‌سێك له‌ دژبه‌رانی ٌڕژیمی پاشایه‌تی له‌ ئێراندا به‌ره‌وٌڕوو بووه‌وه‌ و دژبه‌ران به‌ دروشمی مردن بۆ په‌هله‌وی دژایه‌تی خۆیان له‌گه‌ڵ ئاماده‌ بوونی ناوبراو له‌و شوێنه‌ ده‌ربٌڕی. هه‌ر له‌و كاته‌ دا كه‌سێك به‌ناوی خالید ئه‌حمه‌دی شاخه‌یێك گۆڵی پێشكه‌شی فه‌ره‌ح كرد و به‌ نوێنه‌رایه‌تی خه‌ڵكی كوردستان له‌ ٌڕۆژهه‌ڵاتی كوردستان "فه‌رمووی"!! گه‌لی كورد هیچ كێشه‌یێكی له‌گه‌ڵ گه‌لانی ئێراندا دا نیه‌ و هه‌ر حكوومه‌تێك له‌ ئێراندا ده‌سه‌ڵات به‌ ده‌سته‌وه‌ بگرێت ئه‌بێ مافه‌كانی گه‌لی كورد ده‌سه‌ته‌به‌ر بكات ئێمه‌ له‌گه‌ڵ یاسا وٌڕێساكانی حكومه‌ت دا دژایه‌تیمان هه‌یه‌ وكورد ئه‌یه‌وێت له‌گه‌ڵ گه‌لانی ئێراندا و له‌ ژێر سێبه‌ری ده‌سه‌ڵاتێكی دیمۆكراتیك دا ژیانێكی ئازادیان هه‌بێت.
ناوبراو له‌ درێژه‌ی وكاله‌ت كردنه‌كه‌ی دا گووتی: ئێستا گه‌لی كورد وه‌ك ساڵانی پیشوو نیه‌, ئێستا كورد هه‌مووی یه‌كگرتووه‌و ئه‌م یه‌كگرتنه‌ش په‌ژاك دروستی كردووه‌. ئێستا زۆربه‌ی هه‌ره‌ زۆری كورده‌كانی به‌شی ٌڕۆژهه‌ڵات لایانگر و پشتگیری په‌ژاكن و په‌ژاك چ له‌ بواری سه‌ربازی و چ له‌ بواری سیاسی دا له‌ زۆربه‌ی ناوچه‌كانی ٌڕۆژهه‌ڵاتی كوردستان داهه‌یه‌ و خه‌ریكی كار وتێكۆشانه‌.به‌ڵێ خوێنه‌ری هێژا ئه‌مه‌ش مۆدیلێكی دیكه‌ له‌ هاوده‌نگی و هاوئاهه‌نگی له‌گه‌ڵ داگیر كه‌رانی كوردستان وبكووژانی ٌڕۆڵه‌كانی ئه‌م گه‌له‌ به‌شخووراوه‌یه‌. ساڵ و عه‌یامان ئه‌یان گووت شه‌رع شیو و دۆڵی زوره‌ به‌ڵام وادیاره‌ ئه‌م شیو ودۆڵه‌ شموولی سیاسه‌تیش ئه‌كات یان به‌ واتایێكی دیكه‌ ٌڕه‌نگه‌ ناوچاوانی سیاسه‌تیشی گرتبێته‌وه‌.
باشه‌ تۆ بڵێیت به‌ٌڕاستی ئه‌م به‌ناو نوێنه‌رانه‌ی گه‌لی كورد ئاگایان له‌ ٌڕابردوو ئه‌م گه‌له‌ هه‌ژاره‌ بێت؟
رۆژێك حیزبی دێمۆكٌڕات له‌گه‌ڵ حیزبی پان ئێرانیست دا بڵاوكراوه‌ی هاوبه‌ش ئیمزا وبڵاو ئه‌كاته‌وه‌ و ٌڕۆژێكی دیكه‌ نوێنه‌ری تازه‌ كووره‌ی گه‌لی كورد له‌ رۆژهه‌ڵاتی كوردستان, كه‌ به‌وته‌ی خۆیان له‌ سه‌دا 99ی خه‌ڵكیان له‌گه‌ڵه‌ به‌م شێوه‌یه‌ چه‌پكه‌ گۆڵ ئه‌دات به‌ ژنی كۆنه‌ شایێك كه‌ له‌ ده‌ورانی ٌڕه‌ش ونگٌڕیسی پاشایه‌تی مێردی ئه‌م ژنه‌دا بوو به‌سه‌دان ٌڕۆڵه‌ی قاره‌مانی ئه‌م گه‌له‌ بێ سه‌رو شوێن كران, به‌ پیلانی حكومه‌ته‌كه‌ی حه‌مه‌ ٌڕازا بوو كه‌ ٌڕێكه‌وتننامه‌ی شوومی ئه‌لجه‌زایر له‌ گه‌ڵ حكوومه‌تی فاشیستی به‌عس دا مۆر كرا و پاشان نسكۆی شۆٌڕشی مه‌زنی ئه‌یلوولی به‌ دوا دا هات, كه‌ سه‌ر ئه‌نجامه‌كه‌ی تۆكمه‌ بوونی زیاتری رژێمی مرۆڤ كوژی به‌عسی عیراق و وێران و خاپوور كردنی زیاتر له‌ 4 هه‌زار گوند و ئاوایی باشووری كوردستان وئه‌نفالی 180 هه‌زار كوردی بێ تاوان و 10 هه‌زار بنه‌ماڵه‌ی بارزانی و كیمیابارانی هه‌ڵه‌بجه‌ و...... هه‌زاران نموونه‌ی له‌م جۆره‌ بوون.
كاك خالید وبه‌رێزان به‌ٌڕێوه‌به‌رانی " پارت ژیانی ئازادی كوردستان"!!! ئه‌گه‌ر خانمی فه‌ره‌حی په‌هله‌وی ناناسن و نازانن كێیه‌ بٌڕۆن چاوێك به‌ مێژووی گه‌لی كورد و شۆٌڕشه‌كه‌ی له‌ سه‌ره‌تای درووست بوونی كۆماری كوردستانه‌ و تا كۆتایی ته‌مه‌نی پٌڕ له‌ شه‌رم و شووره‌یی ٌڕژیمی په‌هله‌وی دا بخشێننه‌وه‌ وبزانن ئه‌و ٌڕژیمه‌ چی به‌سه‌ر ئازادی خوازانی كورد له‌و پارچه‌ی كوردستان دا هێناوه‌؟ یان ناكا ئێوه‌ش وه‌ك ٌڕوون كردنه‌وه‌كه‌ی حیزبی دێمۆكٌڕات پاساوێكی بۆ بێننه‌وه‌ و بڵێن ئه‌وه‌ ٌڕۆیشت وٌڕابرد ئه‌م خانمه‌ ئێستا بووته‌ دایكی دێمۆكٌڕاسی و ئێوه‌ش ئه‌تانه‌وێت له‌ داوێنی پٌڕ له‌ ٌڕوحم و خۆشه‌ویستی به‌ٌڕێزیاندا دا مافه‌كانی گه‌لی كورد بحه‌وێننه‌وه‌ و ته‌سه‌للا و ته‌سكینی ده‌رده‌كانی ٌڕابردوومان بده‌ن.
من نازانم چۆن و له‌ كوێوه‌ ئه‌م نوێنه‌رایه‌تی یه‌ دراوه‌ به‌ كاك خالید ئه‌حمه‌دی بچێت بۆ ئه‌و سیمیناره‌ و شاخه‌ گۆڵی ٌڕێز و وه‌فاداری كۆمه‌ڵانی گه‌لی كوردی ٌڕۆژهه‌ڵات پێشكه‌شی فه‌ره‌حی په‌هله‌وی بكات, یان كاك خالید بۆ خۆی سه‌ر به‌خۆ چووه‌وه‌ ئه‌م كرده‌وه‌ ناشرینه‌ی ئه‌نجام داوه‌. له‌ هه‌ردووك حاڵه‌ت دا چ به‌ ئاگاداری حیزبی قاعید(په‌ژاك) و چ به‌بێ ئاگاداری, كرده‌وه‌كه‌ خۆی له‌ خۆیدا كارێكی ناشرین ودزێوه‌ و بۆ هیچ مرۆڤێكی شۆٌڕشگێر و خاوه‌ن هه‌ستێكی نه‌ته‌وایه‌تی خاوێن كه‌ تاقه‌ تۆزێك ئاگای له‌ مێژووی خوێناوی گه‌لی كورد له‌ ٌڕۆژهه‌ڵاتی كوردستان دا هه‌بێت قبووڵ ناكٌرێت و جێگه‌ی رخنه‌ لێ گرتنه‌, به‌ تایبه‌ت كه‌ كاك خالید خۆی و پارته‌كه‌ی وه‌ك نوێنه‌ری زۆربه‌ی گه‌لی ٌ كورد له‌ ڕۆژهه‌ڵات ناساندووه‌. من له‌ كاك خالید و سه‌رۆكه‌كانی كاك خالیدیش ئه‌پرسم ئه‌ری برایینه‌ كێ ئه‌و نوێنه‌رایه‌تییه‌ی به‌ ئینگۆ داوه‌ بٌڕۆن و شاخه‌ گوڵ بده‌ن به‌ فه‌ره‌حی په‌هله‌وی. ناكا ئه‌مه‌ش وه‌ك "دامه‌زرانه‌كه‌تان" بێتّ؟تۆ بڵێیت ئه‌م كرده‌وه‌شیان له‌ ته‌وه‌ره‌ وچوارچێوه‌ی پشت گوێ خستن و به‌ په‌ٌڕاوێز كردنی خه‌باتی چه‌ندین ساڵه‌ی خه‌باتگێٌڕانی ٌڕۆژهه‌ڵاتی كوردستان له‌ ٌڕیزی حیزب وٌڕێكخراوه‌كانی ٌڕه‌سه‌نی ٌڕۆژهه‌ڵات دا بێت؟ خۆ ئه‌گه‌ر وابێت ئه‌وا جێگه‌ی گازنده‌نیه‌ و ئه‌مشیان وه‌ك به‌ فیٌڕۆ دانی خوینی شه‌هیده‌كانمان له‌ لایان سه‌ركرده‌كانی پ ك ك وه‌, چاو لێ ئه‌كه‌ین و هیچ گله‌یێكمان نیه‌. چونكا هه‌ر سه‌رۆكه‌كانی ئه‌م كاك خالیده‌ بوون كاتێك كه‌ كۆمه‌ڵانی دڵسۆزی خه‌ڵكی كوردستان له‌ شاره‌كانی ٌڕۆژهه‌ڵاتی كوردستان بۆ ناٌڕه‌زایه‌تی ده‌ربٌڕین به‌رامبه‌ر گرتنی عه‌بدووڵا ئۆجه‌لان له‌ شاره‌كانی سنه‌ و بانه‌ ومهاباد وبۆكان و مه‌ریوان و سه‌رده‌شت و زۆر شوێنی دیكه‌ی هاتنه‌ سه‌ر شه‌قامه‌كان, و له‌گه‌ڵ هێزه‌ سه‌ركوتكه‌ره‌كانی كۆماری دژی گه‌لی ئیسلامی ئێراندا به‌ره‌وٌڕوو بوونه‌وو وتاقمێكیان گیران و بێ سه‌روشوێن كران, له‌ مێدیا تیڤی ئه‌و كات دا به‌ ٌڕاگه‌یێندراوێكی ٌڕه‌سمی خه‌ڵكی خۆپێشانده‌ریان به‌ به‌كٌڕێگیراوی ئه‌مریكاو ئیسرائیل له‌ قه‌ڵه‌م داو هاوده‌نگ له‌گه‌ڵ كاربه‌ده‌ستانی كۆماری ئیسلامی دا ئه‌و خه‌ڵكه‌ شۆٌڕشگێٌڕه‌و دڵپاكه‌ كه‌ بۆ ئازادی ٌڕێبه‌ره‌كه‌ی ئه‌وان ٌڕژابوونه‌ سه‌ر شه‌قامه‌كان به‌ ئاژاوه‌گێر و تابووری پینجه‌م هێنایه‌ زمان. من هیوا دارم وا نه‌بێت و كاك خالید و ئه‌و كه‌سانه‌ش كه‌ ئه‌ویان ٌڕاسپاردووه‌ كاری وا بكات له‌ ٌڕووی نه‌زانییه‌وه‌ ئه‌و كاره‌یان كردبێت. ئاخر من پێم سه‌یره‌ بۆ ئه‌بێ ئه‌و به‌ناو نوێنه‌رانه‌ی گه‌لی كورد هێنده‌ خۆیان وگه‌له‌كه‌یان له‌ به‌رامبه‌ر فارس وتورك وعه‌ره‌ب دا به‌ بچووك و لاواز بزانن و كرده‌وه‌ی دزێوی ئاوا ئه‌نجام بده‌ن؟ له‌ كوردستانی داگیركراومان له‌لایان داگیركه‌رانی كوردستانه‌وه‌ چ كۆن و چ نوێ جیا له‌ بۆمب و كیمیاوی وكوشتن وماڵوێرانی هیچی دیكه‌ به‌كورد دراوه‌ تاكوو ئێمه‌ بچین و شاخه‌ گوڵ له‌ به‌رۆكی نامووباره‌كیان بده‌ین, یان ناكا له‌ قامووسی ئه‌م سیاسه‌ته‌ نوێیه‌ كه‌ په‌ژاك و ئاپۆچی یه‌كان به‌ دیارییان هێناوه‌ وڵامی بۆمب و كوشتن و زیندان وئه‌شكه‌نجه‌ شاخه‌ گوڵ بێت؟ من پێم وایه‌ ئاوا بٌڕوات ساجده‌ خه‌یرۆڵای ژنی سه‌دام حسیه‌نیش پاش چه‌ند ساڵی دیكه‌ له‌ لایان" پچدك ه‌" وه‌ گوڵ باران ئه‌كٌرێت و ئه‌بێ ژنه‌كه‌ی بۆڵه‌ند ئه‌جه‌ویت ی كۆنه‌ سه‌رۆك وه‌زیرانی توركیه‌ش كه‌ له‌ سه‌رده‌می ده‌سه‌ڵات داریه‌تی مێرده‌كه‌ی ئه‌و دا كاك عه‌بدووڵا ئۆچ ئالان گیراو ته‌سلیمی توركیه‌ كرایه‌وه‌ په‌یكه‌ری زێری بۆ درووست بكرێت. كه‌سێك كه‌ خۆی به‌ نوێنه‌ری زۆربه‌ی گه‌لی ٌڕۆژهه‌ڵاتی كوردستان ئه‌زانێت بۆ ئه‌بێ ئه‌وه‌نده‌ گێل وساویلكه‌ بێت بیر له‌ كار وئاكامی كاره‌كانی نه‌كاته‌وه‌؟ وا دیاره‌ كاك خالید یان كۆنه‌ سه‌ڵته‌نه‌ت خوازه‌ یان له‌و هۆڵه‌ دا ده‌ورووبه‌ری به‌ كیژۆڵه‌ دڵرفێنه‌ فارسه‌كان گیرابوو بۆیه‌ ئاوا زوو خۆی وگه‌له‌كه‌ی و ته‌نانه‌ت ئه‌و به‌ناو چوار دێٌڕه‌ش كه‌وه‌ك په‌یٌڕه‌وه‌ی ناوخۆیی پارته‌كه‌ی نووسراوه‌ و داوای سه‌ربه‌خۆیی كوردستانی گه‌وره‌ ئه‌كات له‌ بیرچووبووه‌وه‌.جێی خۆیه‌تی كه‌ له‌وه‌ش ئاگادار بن كه‌ فه‌ره‌حی په‌هله‌وی و كوره‌كه‌ی نه‌ك هه‌ر نوێنه‌ری خه‌ڵكی ئێران نین به‌ڵكوو ئێستا له‌ ناو خوازیارانی سه‌ڵته‌نه‌ت چ له‌ ناوخۆی ئیران وچ له‌ ده‌ره‌وه‌ی وڵاتیش دا كه‌س به‌ سه‌ركرده‌ و ده‌مٌڕاستیان نازانێت و پیم وایه‌ له‌ داهاتووی ئیرانیش دا هیج ده‌ورێكیان نابیت و نابنه‌ هیچ پارسه‌نگێك. هیوا دارم هه‌م كاك خالید ئه‌حمه‌دی و هه‌میش په‌ژاك به‌ نووسراوه‌یه‌كی ٌڕه‌سمی داوای لێبووردن له‌ گه‌لی كورد و شه‌هیدانی كوردستان به‌تاییبه‌ت شه‌هیدانی ده‌ستی حكومه‌تی پاشایه‌تی و میرده‌ نازه‌نینه‌كه‌ی فه‌ره‌حی په‌هله‌وی له‌ ئێراندا بكه‌ن, هیوا دارم ئه‌مانیش بۆ پاساو هێنانه‌وه‌ بۆ ئه‌م كرده‌وه‌ ناشرینه‌یان كه‌ دووره‌ له‌ گشت ئه‌خڵاقێكی شۆٌڕشگێرانه‌ مێژوویێكی نوێ بۆ رژیمی پاشایه‌تی و فه‌ره‌حی په‌هله‌وی نه‌نووسنه‌وه‌ وه‌ك ئه‌وه‌ی كه‌ حیزبی دێمۆكٌڕات بۆ حیزبی پان ئێرانیستی نووسیبوو.
تێبینی: هه‌واڵه‌كه‌ له‌ ماڵپه‌ٌڕی برووسكه‌ وه‌رگیراوه‌.

Friday, December 10, 2004

به‌شداری تۆش پێویسته‌؟!

ڕاپرسیه‌ك له‌ سایتی "ئیراك فۆ یوو" سه‌باره‌ت به‌ كه‌ركووك ده‌كرێ، به‌شداری تۆش پێویسته‌ و تا ئێستا ئاكامه‌كان له‌ به‌رژه‌وه‌ندی كوردستانیه‌كانه. جا گه‌ر ده‌خوازی به‌شداری بكه‌یت تكایه‌ فه‌رموو ئا لێره‌وه‌>>>>>>

Tuesday, December 07, 2004

ده‌روێـش ئیڵه‌ڵا (وه‌ڵامێك بۆ ٌڕه‌حیمی ٌڕه‌شیدی)

ده‌روێـش ئیله‌ڵڵا
(وه‌ڵامێك بۆ ٌڕه‌حیمی ٌڕه‌شیدی)
نوسینی: ئازاد
خوێنه‌ری هێژا: سه‌ره‌تا پێم خۆشه‌ له‌ سه‌ر هه‌ڵبژاردنی سه‌ردێٌڕی بابه‌ته‌كه‌ ٌڕوون كردنه‌وه‌یه‌ك بده‌م.
ساڵی 1359ی هه‌تاوی كاتێك كه‌ رژیمی كۆنه‌ په‌رستی كۆماری ئیسلامی ئیران به‌ فتوای خۆمه‌ینی و به‌ ئه‌مری سه‌رۆك كۆماری ئه‌و كات (ئه‌بۆلحه‌سه‌نی بنی سه‌در) هێرشی دٌڕندا‌ی خۆی بۆ سه‌ر خه‌ڵكی بێ تاوانی كوردستان ده‌ست پێ كرد, زۆربه‌ی دانیشتوانی شاره‌كان ٌڕوویان له‌ گونده‌كانی ده‌ورووبه‌ری شار كرد. یه‌كێك له‌و شارانه‌ش كه‌ هه‌ڵبه‌ت پاش هه‌موو شاره‌كانی كوردستان كه‌وته‌ به‌ر په‌لامار، شاری بانه‌ بوو. شاری بانه‌ به‌ هۆی هاوسنوور بوونی له‌گه‌ڵ باشووری كوردستان هه‌موو كات له‌ په‌یوه‌ندییه‌كی ناٌڕاسته‌وخۆ دابووه‌ له‌گه‌ڵ باشوور و هه‌ر ئه‌م په‌یوه‌ندییه‌ش وای كردووه‌ كه‌ دانیشتوانی هه‌ر دووك به‌ش كاریگه‌رییه‌كی ٌڕاسته‌وخۆیان هه‌بێت له‌ سه‌ر ژیان و كار وكرده‌وه‌ وته‌نانه‌ت داٌڕشتی باری ئابووری و ئایینی وهتد....
به‌ هۆی ئه‌م په‌یوه‌ندییانه‌وه‌ ته‌ریقه‌تێك كه‌ پێی ئه‌ڵێن ته‌ریقه‌تی قادری و زۆربه‌ی ده‌روێشه‌كانی كوردستان و بگره‌ جیهانیش سه‌ر به‌و ته‌ریقه‌ته‌ن, له‌ ناوچه‌ی بانه‌ دا موریدی زۆر بوو, هه‌ر بۆیه‌ گشت ساڵێك تاقمێك ده‌روێش بۆ سه‌ردانی شێخّ, به‌ یاسایی و به‌ نا یاسایی سنووره‌كانیان ئه‌به‌زاندو و به‌ره‌و شاری پێنجوێن ٌڕێ ئه‌كه‌وتن. به‌ڵام كاتی هێرشی هێزه‌كانی كۆماری ئیسلامی سنووره‌كانی نیوان باشوور و ٌڕۆژهه‌ڵات، یان "حیزبی دێمۆكٌڕاتّ" گووته‌نیّ نێوان ئێران و عێراق كرایه‌وه‌ و ئیتر ئه‌م جار هه‌موو كه‌س ئه‌یتوانی ئاودیوی سنوور ببێت. له‌م ئاشووبه‌ بازاٌڕه‌ دا تاقمێك له‌ خه‌لیفه‌كانی شێخ ده‌ستیان كرد به‌ كۆكردنه‌وه‌ی ده‌روێش و مووریدانی ته‌ریقه‌ت و هه‌ر ٌڕۆژه‌و تاقمێكیان به‌ره‌و (بووبان) كه‌ ماڵی شێخی لێ بوو وه‌ٌڕێ ئه‌خست و به‌م بیانووه‌شه‌وه‌ تاقمێكی به‌رچاو قاچاخچییان له‌گه‌ڵ خۆیان ئاودیوی سنوور ئه‌كرد.
رۆژێك له‌ كاتێكدا كه‌ ده‌روێشه‌كان سه‌رقاڵی زكر و تیغ بازی و زه‌رگ له‌ خۆدان بوون، شێخ هات و سه‌ردانی شوێنی ده‌روێشه‌كانی كرد، هه‌ر له‌م كاته‌دا ده‌روێشێك كه‌ دیار بوو زۆر به‌قووڵی نووقمی زكره‌كه‌ ببوو و كورد گووته‌نی حاڵ گرتبووی, په‌لاماری شێخی داو شێخی دا به‌ زه‌ویدا، وادیار بوو نیازی بوو بیخوات, به‌ هه‌ر حاڵ شیخیان له‌ ژێر ده‌ستی ده‌روێش هێنایه‌ ده‌ره‌وه‌ وله‌ خواردن ٌڕزگاریان كرد. له‌م كاته‌دا شێخی بی چاره‌ كه‌ هیچ رێگه‌یه‌كی ده‌رباز بوونی له‌ ده‌ست ده‌روێشی حاڵ گرتوو بۆ نه‌مابووه‌وه‌ جیا له‌ وشه‌ی (ده‌روێش ئیڵه‌ڵا, ده‌روێش ئیله‌ڵڵا) هیچی دیكه‌ی بۆ نه‌ده‌گووترا. دیاره‌ وشه‌ی ده‌روێش ئیله‌ڵڵا له‌ كاتی زكر كردن دا بۆ ئه‌هوه‌ن كردنه‌وه‌ی ده‌روێشه‌كان له‌ لایان خه‌لیفه‌ یان سه‌رۆكی كۆڕی زكره‌كه‌وه‌ به‌ ده‌روێشه‌ حاڵگرتووه‌كان ئه‌گووترێ.
به‌ڵی خوێنه‌ری به‌ٌڕێز ٌڕه‌نگه‌ بپرسی ئه‌م هه‌موو دٌرێژ دادٌڕیی یه‌ بۆ چی و به‌ چ مه‌به‌ستێكّ؟دوێنی له‌ سه‌ردانێكم بۆ ماڵپه‌ٌڕی گیاٌڕه‌نگ چاوم به‌ وتاٌڕیك له‌ ژێر سه‌ردێٌڕی(حیزبی دێمۆكٌڕات له‌ ٌڕێبازی نه‌ته‌وه‌یی خۆی لاناداُّّّـ وڵامێك بۆ ئه‌وانه‌ی تیر به‌ تاریكی یه‌وه‌ ده‌نێن ـ له‌ نووسینی ٌڕه‌حیم ٌڕه‌شیدی كه‌وت.
كاك ٌڕه‌حیم هه‌ر وه‌ك بڵێیت تازه‌ هاتبێته‌ نێو ٌڕیزه‌كانی حیزبی دیموكراته‌وه‌ ده‌ستی كردوه‌ به‌ تاریف و ته‌مجیدێكی بێ جێگه‌ و ٌڕێگه‌ له‌ حیزبی دیمۆكرات وهێنده‌ به‌ قووڵی چووه‌ته‌ نێو ته‌ریقه‌ته‌كه‌وه‌ كه‌ به‌ٌڕاستی ده‌روێش ئیڵه‌ڵای گه‌ره‌كه‌. ناوبراو له‌ وتاره‌كه‌ی یان باشتر بڵێین تاریف نامه‌كه‌ی دا, هێنده‌ به‌ تۆخی بۆی دا چووه‌، كه‌ له‌ زۆر شوێن دا راسته‌وخۆ سنوور ئه‌به‌زینێت و بوختان بۆ مێژووی حیزبی دیمۆكٌڕات هه‌ڵئه‌به‌ستێت و باسی هێندێك ٌڕووداو ئه‌كات كه‌ من پێم وایه‌ هیچ كات ئه‌و شتانه‌ له‌‌مێژووی حیزبی دێمۆكٌڕاتدا ٌڕوویان نه‌داوه‌.
نووسه‌ر له‌ جیاتی ئه‌وه‌ی وڵامی ئه‌و هه‌موو ٌڕخنه‌ وگازندانه‌ بداته‌وه‌ كه‌ پاش ئیمزا كردنی ٌڕێكه‌وتننامه‌ی حیزبی دێمۆكٌڕات و پان ئێرانیسته‌كان له‌ حیزب گیراوه‌, ده‌ستی كردووه‌ به‌ باس كردن له‌ حیزب و باوه‌ر بوونی ٌڕێبه‌رایه‌تی پێشوو و ئێستای حیزب به‌ هاوفیكری و ٌڕاگۆٌڕینه‌وه‌ له‌گه‌ڵ ٌڕیزه‌كانی خواره‌وه‌ی حیزبدا. ناوبراو له‌ به‌شێكی تاریف نامه‌كه‌ی دا چوونی حیزبی دێمۆكرات بۆ ناو شۆٌڕای نیشتمانی به‌رگری (هه‌وپه‌یمانی له‌گه‌ڵ موجاهدین) وهاتنه‌وه‌ ده‌ره‌وه‌ی له‌ شۆٌڕا وه‌ك به‌ڵگه‌ بۆ پاساو دانه‌وه‌ی ئه‌م هه‌ڵه‌ی ئێستای حیزب به‌ نموونه‌ دێنێته‌وه‌ وده‌ڵی: چۆون وهاتنه‌ ده‌رمان له‌ شۆٌڕای نیشتمانی به‌رگری ئه‌كرێت وه‌كوو به‌ڵگه‌یێك بۆ به‌ خۆ دا چوونه‌وه‌ی حیزب به‌ حیساب بێت. ئیتر كاك ٌڕه‌حیم یا نایزانێت یاخود خۆی لی لا ئه‌دات كه‌ هیچ كام له‌ ئه‌ندامانی ٌڕێبه‌رایه‌تی ئه‌وكاتی حیزب جیا له‌ شه‌هید دكتور قاسملوو، نه‌ ئاگایان له‌ چوونی حیزب بۆ نێًۆ شۆٌڕاو ونه‌ئاگاشیان له‌ هاتنه‌ ده‌ره‌وه‌ی بوو، هه‌روه‌ها وادیاره‌ بێ ئاگایه‌ له‌وه‌ی كه‌ چۆن حیزبی دێمۆكٌڕات ده‌روازه‌كانی كوردستانی بۆ هاتنه‌ناوه‌وه‌ی هێزه‌كانی ٌڕێكخراوی موجاهدین كرده‌وه‌ و به‌م كرده‌وه‌ ناشاییسته‌ گشت دۆڵ وچیاو كانی و گونده‌كانی كوردستان له‌لایان چه‌كداره‌كانی موجاهدینه‌وه‌ نه‌خشه‌یان لێ هه‌ڵگیرا تاوه‌كوو له‌ هێرشه‌كانی داهاتوو بۆ سه‌ر كوردستان كه‌ڵكیان لێ وه‌ر بگیرێت.ته‌نانه‌ت ئاكامی ئه‌و كرده‌وه‌ بێ تێبینییه‌ی حیزبی دێمۆكٌڕات ناوچاوانی شوٌڕش وٌڕاپه‌ٌڕینی كۆمه‌ڵانی خه‌ڵك له‌ باشووری كوردستان به‌ دژی ٌڕژێمی فاشیستی به‌عسیشی گرته‌وه‌ و هه‌ر له‌ ٌڕۆژانی سه‌ره‌تای ٌڕاپه‌ٌڕین دا وڵامی خزمه‌ته‌كانی حیزبی دێمۆكٌڕات و خه‌ڵكی كوردستانمان به‌ هێرشی ناجوانمێرانه‌ی چه‌كداره‌كانی ٌڕێكخراوی موجاهدین بۆ سه‌ر شاری كه‌ركوك و شه‌هید كردنی زیاتر له‌ 500 كوٌڕی كورد له‌و شاره‌دا وه‌رگرته‌وه‌.
كاك ٌڕه‌حیم زۆر نه‌زانانه‌ ده‌ست له‌ مێژووی حیزب و كار وكرده‌وه‌ی ٌڕێبه‌رایه‌تی حیزب وه‌ر ئه‌دات و باس له‌ ٌڕاپرسی گشتی و پرس وٌڕاكردن به‌ ٌڕیزه‌كانی حیزب له‌ لایان ٌڕێبه‌رایه‌تی حیزبه‌وه‌ ئه‌كات. هه‌ر له‌م په‌یوه‌ندییه‌دا دوو كاری شه‌هیدان دكتورعه‌بدولره‌حمانی قاسملوو ودكتور سادقی شه‌ره‌فكه‌ندی وه‌ك نمونه‌ ده‌هێنێته‌وه‌ و له‌ یه‌كێك له‌م نموونانه‌دا ده‌ڵی: ( كاك دكتور سه‌عید بۆ ٌڕاگرتنی شه‌ٌڕ له‌گه‌ڵ پارتی و كۆمه‌ڵه‌و زۆر شتی دیكه‌ هه‌ر له‌و مێتوده‌ی دكتور قاسملووی شه‌هید,) واته‌ وتووێژ وٌڕاپرسی له‌گه‌ڵ ئه‌ندامان وكادر وپێشمه‌رگه‌كانی حیزب داكه‌ڵكی وه‌رئه‌گرت. وه‌ك ئه‌وه‌ی كاك ٌڕه‌حیم بێ ئاگابێت له‌وه‌ی كه‌ هه‌م ده‌فته‌ری سیاسی وكومیته‌ی ناوه‌ندی و هه‌میش ٌڕیزه‌كانی خواره‌وه‌ی حیزب نه‌ك له‌كار وكرده‌وه‌ و وتووێژه‌كانی هه‌ردووك ٌڕێبه‌ری شه‌هیدی حیزب بێ ئاگا بوون، به‌ڵكوو ته‌نانه‌ت به‌ تێپه‌ٌڕ بوونی چه‌ندین سه‌عات به‌سه‌ر شه‌هید بوونی هه‌ردووك ٌڕێبه‌ری حیزب دا وپاش بڵاو بوونه‌وه‌ی هه‌واڵی شه‌هید كردنیان, له‌ هه‌واڵده‌رییه‌كانی دنیاوه‌ له‌ شوێن وجێگه‌ی شه‌هید بوونیان به‌ ئاگا بوون.
نووسه‌ر له‌ به‌شێكی دیكه‌ دا زۆر به‌تووندی هێرش ئه‌كاته‌ سه‌ر ئه‌و كه‌س ولایه‌نانه‌ی كه‌ له‌سه‌ر ٌڕێكه‌وتنی نامووباره‌كی حیزبی دێمۆكٌڕات وحیزبی پان ئێرانیست ـ ی چه‌كمه‌ ٌڕه‌ق ده‌نگی ناٌڕه‌زایه‌تییان ده‌ربٌڕیوه‌ و به‌ هێرش كردنه‌ سه‌ر كۆمه‌ڵه‌ وتاوان بار كردنیان به‌وه‌ی كه‌ حیزبێكی شۆڤێنیستی ئێرانی له‌ دڵی ئه‌وانه‌وه‌ هه‌ڵقووڵیوه‌، بۆ جاٌڕێكی دیكه‌ زۆر بی به‌زه‌یی یانه‌ چه‌قۆ له‌ برینی شه‌ٌڕی براكووژی وه‌ر ئه‌داته‌وه‌، به‌ بێ له‌ به‌ر چاو گرتنی په‌یوه‌ندییه‌ دۆستانه‌كانی نێوان حـ د ك وكۆمه‌ڵه‌، و بێ ئه‌وه‌ی كه‌س ئه‌م ئه‌ركه‌ی پێ سپاردبێت هێرش ئه‌كاته‌ سه‌ر كۆمه‌ڵه‌و به‌ درۆزن و ساخته‌چییان ناو ده‌بات, ئیتر ئه‌وه‌ بێ خه‌به‌ر له‌وه‌ی كه‌ كۆمه‌ڵه‌و پارت و ٌڕێكخراوه‌كانی ده‌ره‌وه‌ی حیزب زۆر درنگتر له‌ كادر وئه‌ندامانی حیزب هه‌ڵوێستیان به‌ دژی ئه‌م كاره‌ی حیزب گرتووه‌. بۆ من وزۆری وه‌ك منیش جیگه‌ی سه‌رسووٌڕمانه‌ بۆ ده‌بێ ٌڕێبه‌رایه‌تی حیزبی دێمۆكٌڕات كه‌ خۆێ به‌ ٌڕێبه‌ر و پێشٌڕه‌وی شۆٌڕش له‌ ٌڕۆژهه‌ڵاتی كوردستاندا ده‌زانێت ئاوٌڕێك له‌ ٌڕابردوو نه‌ده‌نه‌وه‌ و چاوێك به‌ مێژووی حیزب دا نه‌خشێننه‌وه‌ّّّ؟ ناشێ ٌڕێبه‌رایه‌تی حیزب ئاگایان له‌ دامه‌زراندنی یه‌كه‌مین حكوومه‌تی كوردستان وهه‌ڵكردنی ئالای پێرۆزی كوردستان، له‌ لایان سه‌رۆكی ئه‌وكاتی حیزب ویه‌كه‌مین سه‌رۆك كۆماری كورد پێشه‌وا قازی موحه‌مه‌ده‌وه‌ نه‌بێتّ؟!
تۆ بڵێیت حیزبی دیمۆكٌڕات په‌یٌڕه‌وێكی نێوخۆیی دیكه‌ی هه‌بێت جیا له‌وه‌ی كه‌ په‌سند كراوی كۆنگره‌ی 13ی حیزبه‌؟ وا ئاوا به‌ پێچه‌وانه‌ی بٌڕیاره‌كانی كۆنگره‌, ٌڕێبه‌رایه‌تی حیزب زۆر نامه‌سئوولانه‌ به‌نده‌كانی ئه‌ساسنامه‌ وله‌ سه‌رووی هه‌موویانه‌وه‌ درووشمی ستراتیژیكی حیزب (دیاری كردنی مافی فیدرالی بۆ گه‌لی كورد) پێشێل ئه‌كات.
نازانم سوود وبه‌رژه‌وه‌ندییه‌كانی هاوپه‌یمانییه‌كی دیكه‌ له‌گه‌ڵ تاقمێكی شۆڤێنیستی ره‌گه‌زپه‌رست كه‌ تاكوو ئێستاشی له‌گه‌ڵ دابێت كورد هه‌ر به‌ وه‌حشی و خۆیان گووته‌نی (پشت كوهی) ئه‌زانن له‌ چی دایه‌ كه‌ ئاوا حیزبی دێمۆكٌڕاتی خستۆته‌ داوه‌وه‌ و خه‌ریكه‌ هه‌ڵه‌ی هێنانی موجاهدینێكی دیكه‌ بۆ كوردستان دووپات ئه‌كاته‌وه‌؟ناكا حیزبی دێمۆكٌڕات دیسانه‌وه‌ بیهه‌وێت كوردستان بكاته‌وه‌ به‌"لانكه‌ی ئازادی خوازانی ئێران" و رێگه‌ خۆشكه‌ر بێت بۆ ئه‌وه‌ی پارت ورێكخراوه‌ زٌڕه‌ شۆٌڕشگیٌڕه‌ فارسه‌كان بێن و كۆرپه‌ی ویست و حه‌زه‌ گڵاوه‌كانیان له‌و لانكه‌یه‌ كه‌ له‌ نێو ده‌ریای خوێنی كوٌڕی كورددا نووقم بووه‌ بخه‌وێنن؟ئایا ته‌جرووبه‌ی تاڵی هاوپه‌یمانی له‌گه‌ڵ ٌحیزبی تووده‌ وڕێكخراوی چریكه‌كان و ته‌نانه‌ت راه‌كارگه‌ر كه‌ هه‌ره‌ شۆٌڕشگێٌڕه‌كه‌یانه‌ نه‌بووه‌ته‌ سه‌رمه‌شق و بۆ نابێت حیزبی دێمۆكٌڕات ده‌رسێك له‌ كاره‌كانی ٌڕابردووی وه‌ربگرێت؟تۆ بڵێیت كووزووی هه‌نگوینی پان ئێرانیسته‌كان له‌ كووزووی ئه‌وانی دیكه‌ پٌڕتر بێت؟ئایا كاتی ئه‌وه‌ نه‌هاتووه‌ كه‌ بیرێك له‌ داهاتووی حیزب و گه‌له‌كه‌مان كه‌ حیزب خۆی به‌ ٌڕێبه‌ری ئه‌زانێت بكه‌ینه‌وه‌ و رێگه‌ به‌هیچ كه‌س نه‌ده‌ین كه‌ له‌ ژێر ناوی جۆراوجۆر رێكه‌وتننامه‌ بۆ داهاتووی ئه‌م گه‌له‌ به‌شخوراوه‌ له‌گه‌ڵ ئه‌م وئه‌و دامۆر بكات؟
من به‌ كاك ٌڕه‌حیم و گشت هاونه‌وعانی كاك ٌڕه‌حیم ئێژم: با به‌ر له‌وه‌ی كه‌وڵه‌َكه‌ ئاو بیبات وگڵۆڵه‌ی به‌ختی حیزب ونه‌ته‌وه‌كه‌مان بكه‌وێته‌ لێژیّ، به‌ر به‌ گشت ئه‌و پیلان و ٌڕێكه‌وتننامانه‌ بگرین كه‌ به‌ بێ پرسی گه‌ل و بێ ٌڕچاو كردنی قازانج و به‌رژه‌وه‌ندی نه‌ته‌وه‌ییمان ئیمزا ده‌كرێن و با له‌وه‌ زێده‌تر ٌڕێگه‌ به‌كه‌س نه‌ده‌ین كه‌ ٌبڵاوكراوه‌ی هاوبه‌ش له‌گه‌ڵ ئه‌م وئه‌و به‌ خوێنی ئێمه‌ بنووسن!!! ئایا كاتی ئه‌وه‌ نه‌هاتووه‌ كه‌ له‌ چاره‌نووسی خۆمان وگه‌له‌كه‌مان ببینه‌ خاوه‌ن و نه‌هێڵن كه‌سانی هه‌لپه‌رست به‌ قۆزینه‌وه‌ی ئه‌و كه‌ش و هه‌وا ناله‌باره‌ی كه‌ له‌ نێًۆ ٌڕیزه‌كانی حیزب دا هاتۆته‌ ئاراوه‌ بٌڕیار له‌ داهاتووی ئێمه‌ش وحیزب و نه‌ته‌وه‌كه‌شمان له‌ ٌڕۆژهه‌ڵاتی كوردستان دا بده‌ن؟ ده‌ی وه‌ره‌ن با تاقه‌ تۆزێك غیره‌ت به‌ر خۆ بده‌ین و به‌ هه‌ڵه‌كانی حیزب دا بچینه‌وه‌ ئه‌گه‌رچی ئازاره‌كه‌شی له‌ ناخه‌وه‌ بیت وپێش ئه‌وه‌ی به‌ وته‌ی كاك ٌڕه‌حیم كه‌س ولایه‌نه‌كانی دژ به‌ حیزب بكه‌ونه‌ پٌڕوپاگه‌نده‌، با بۆ خۆمان چاره‌سازی ده‌رده‌كانمان بین و تۆمه‌ت وتاوانیش وه‌به‌ر كه‌س نه‌ده‌ین و بۆ جارێكی دیكه‌ش رێ خۆش كه‌ر نه‌بین بۆ هه‌ڵگیرسانه‌وه‌ی شه‌ٌڕێكی لابه‌لای خۆ كووژه‌.
با ئه‌وه‌شمان له‌ بیر نه‌چێت كه‌ مێژوو گشت ئاكار وكرده‌وه‌كانمان تۆمار ئه‌كات و هه‌ڵه‌كانمان وه‌ك به‌ڵگه‌ی ٌڕه‌ش و كرده‌وه‌ باشه‌كانیشمان وه‌ك به‌ڵگه‌ی زێٌڕین له‌ ناخی خۆی داتۆمار ئه‌كات و ئه‌وه‌ خۆمانین كه‌ خۆڵقێنه‌ری چاكه‌ وخراپه‌كانین بۆ داهاتوو.با ٌڕێبه‌رانی به‌ٌڕێزی بزووتنه‌وه‌ی كوردایه‌تیش له‌وه‌ دڵنیا بكه‌مه‌وه‌ كه‌ به‌خۆشییه‌وه‌ ٌڕاده‌ی تێگه‌شتوویی و ده‌ركی سیاسی كومه‌ڵاَنی خه‌ڵكی كوردستان هێنده‌ چووه‌ته‌ سه‌ره‌وه‌ كه‌ تازه‌ ٌڕه‌نگه‌ زۆر به‌ زه‌حمه‌ت مل بۆ ئه‌م جۆره‌ ٌڕێكه‌وتننامانه‌ و زۆری دیكه‌ی له‌م نه‌وعه‌ش ٌڕابكێشن و ئه‌وه‌ی خۆیان پێیان خۆشه بێكه‌ن وگه‌لیش لێی بی ئاگا بێڵنه‌وه‌. ئه‌مٌڕۆكه‌ له‌هه‌موو كاتێك زیاتر هه‌ستی نه‌ته‌وایه‌تی كورد قاییم تره‌ و تازه‌ لاوی كورد ئاماده‌ نابێت بۆ جارێكی دیكه ‌ببێته‌وه‌ ژێر چه‌پۆكه‌ و كۆییله‌ی ده‌ستی داگیركه‌رانی كوردستان.
به‌و ئاواته‌ی كه‌ ئه‌م نووسراوه‌ كورته‌و ئه‌وانی دیكه‌ش، ٌٌڕێبه‌رایه‌تی حیزبی دێمۆكٌڕات له‌ خه‌وی غه‌فڵه‌ت به‌ ئاگا بێننه‌وه‌ و ٌڕێگه‌ خۆش كه‌ر بن بۆ به‌ خۆدا چوونه‌وه‌یان و پاشه‌كشێ له‌م جۆره‌ ٌڕێكه‌وتنانه‌.ئه‌گه‌ر كاك ٌڕه‌حیم گووته‌نی ٌڕێبه‌رایه‌تی حیزب هیچ هه‌نگاوێك به‌ بی ئاگاداری ئه‌ندام وكادر وپێشمه‌رگه‌كانی ناهاویژیت، ده‌با ئه‌م مه‌سه‌له‌یه‌ بخاته‌ ٌڕاپرسییه‌كی گشتی له‌ نێو ٌڕیزه‌كانی خۆی چ له‌ ناوه‌وه‌ی كوردستان و چ له‌ ده‌روه‌ی وڵات داخۆ رای گشتی نێو ٌڕیزه‌كانی حیزب سه‌باره‌ت به‌م مه‌سه‌له‌یه‌ چۆن ئه‌بێت و بٌڕیاری كۆتایی چی ئه‌بێت.

Saturday, December 04, 2004

به‌ڵێ ئه‌م هاوپه‌یمانیه‌ی حزبی دیموکرات لادانه‌ له‌ ڕێبازی نه‌ته‌وه‌یی!

به‌ڵێ ئه‌م هاوپه‌یمانیه‌تیه‌ی حزبی دیموکرات لادانه‌ له‌ ڕێبازی نه‌ته‌وه‌یی!
(چه‌ند تێبینیه‌ک بۆ وڵامنامه‌که‌ی ڕه‌حیم ڕه‌شیدی)

پاش ئه‌و شه‌پۆله‌ ڕه‌خنه‌ و گازنده‌یه‌ی ئاراسته‌ی حزبی دیموکرات کرا سه‌باره‌ت به‌ هاوپه‌یمانی بێ جێیه‌که‌ی له‌گه‌ڵ پان ئێرانیسته‌‌کان، و نوکه‌ش هه‌روا به‌رده‌وامه‌!، چاوڕوانی ده‌کرا که‌ حزبی دیموکرات بێته‌ وڵام و په‌یڤی خۆی و تێڕوانین یان ڕه‌هه‌نده‌کانی گرێدراوی ئه‌و هاوپه‌یمانیه‌ بۆ خه‌ڵکی کوردستان ڕوونبکاته‌وه‌ که‌ له‌گه‌ڵ پان ئێرانیسته‌کان به‌ستویه‌تی و ئه‌و بێده‌نگیه‌ بشکێنێ که‌ له‌ هه‌مبه‌ر ڕه‌خنه‌و گازنده‌کان گرتویه‌تیه‌ پێش. به‌داخه‌وه‌ وادیاره‌ ئه‌م حزبه‌ هه‌روه‌ک له‌ چێکردنی هاوپه‌یمانه‌تیدا زیاتر گرنگی به‌ ئێرانچی و پان ئێرانیسته‌کان ده‌دات، له‌ وڵامدانه‌وه‌شدا هه‌ر ئه‌وان به‌ گرنگ داده‌نێ و نوکی ئاماژه‌ی هه‌ر له‌وانه‌. پاش ئه‌وه‌ی هێز‌ و که‌سه‌ ئێرانیه‌کان و هه‌ندێک له‌ کوردانیش ڕه‌خنه‌یان له‌ حزبی دیموکرات گرت سه‌باره‌ت به‌ چۆنیه‌تی نوسینی‌ نامه‌که‌ی به‌ڕێز مسته‌فا هیجری بۆ ده‌بلیوو بووشی سه‌رۆکی ئه‌مریکا له‌ دوو ڕوانگه‌ی جیاوه‌و به‌ دوو مه‌به‌ست و ئاراسته‌ی جیا، دۆستانی حزبی دیموکرات وڵامی هێڵی ئێرانچی و ناکورده‌کانی به‌ وتارێک به‌ پێنوسی عرفان ره‌هنمون دایه‌وه‌ و له‌ ئاست تێبینی و ره‌خنه‌کانی کوردان خۆیان کڕ کرد. بێگومان ئه‌مه‌ جگه‌ له‌ به‌که‌م گرتنی ڕوانگه‌و بۆچونی تاکه‌کانی نه‌ته‌وه‌که‌ی خۆیان که‌ گوایه‌ حزبی ئه‌وانن ناتوانێ شتێکی دیکه‌ بێت.

له‌مه‌ڕ په‌یوه‌ندی و هاوپه‌یمانی حزبی دیموکرات و پان ئێرانیسته‌کان زۆرتر کوردان وه‌ده‌نگ هاتوون و ڕه‌خنه‌یان له‌ حزبی ناوبراو گرتوه‌، به‌ڵام تا نوکه‌ش ئه‌و حزبه‌ به‌ شێوه‌یه‌کی فه‌رمی یان له‌ ده‌زگاو سایته‌کانی خۆیه‌وه‌ چتێکی ده‌رنه‌بڕیوه‌. ئه‌وه‌ی هه‌یه‌ هه‌ندێک کۆمێنت نوس به‌لایه‌نگری له‌ هه‌ڵوێستی حدکا بۆچونیان ده‌ربڕیوه‌و دوا نوسراوه‌ش که‌ هه‌وڵی وڵامدانه‌وه‌ی به‌ ڕه‌خنه‌و بیزاریه‌کان داوه‌ نوسراوه‌یه‌کی ره‌حیم ڕه‌شیدیه‌ که‌ سه‌ره‌تا دوێنێ هه‌ینی که‌ کاتی تازه‌کردنه‌وه‌ی هه‌فتانه‌ی سایتی دێمانه‌یه‌، به‌ناوی "حیزبی دێموكڕات له رێبازی نه‌ته‌وه‌یی خۆی لا نادات! ـ ولامێك بۆ ئه‌وانه‌ی تیر به تاریكی‌یه‌وه ده‌نێن"، له‌و سایته‌دا وه‌شێنرابوو که‌ دواتر به‌بێ نوسینی هۆیه‌ک له‌ سایتی دێمانه‌ پاککرایه‌وه‌.

به‌هه‌ر حاڵ ئه‌و وڵامه‌ گه‌ر زمان و ڕوانینی حزبی دیموکرات بێت یان نا، چه‌ند تێبینی و لێوردبوونه‌وه‌ به‌ پێویست ده‌زانم. له‌ به‌ر هێچ نا ته‌نێ ئه‌و‌ه‌نده‌ نه‌بێ که‌ منیش یه‌کێک له‌ تیر هاوێژه‌کانم. له‌لایه‌ک بۆ ئه‌و‌ه‌ی به‌و هێژایه‌ بێژم که‌ ئه‌ز تیرم له‌ ڕوناکیدا هاویشتوه‌و به‌ تاریکیشمه‌وه‌ نه‌ناوه‌و له‌ لایه‌کی دیکه‌شه‌وه‌ بۆ ئه‌وه‌ی گرنگی ئه‌و ڕه‌خنانه‌ بۆ ئه‌مڕۆی بزوتنه‌وه‌ی مافخوازانه‌ی گه‌له‌که‌مان زیاتر ڕوون بکه‌مه‌وه‌.

سه‌ره‌تا ئه‌و شێوه‌ له‌ وڵامدانه‌وه‌ که‌ گوایا ئه‌وه‌ی ڕه‌خنه‌ له‌ حزبی دێموکرات بگرێ، ئه‌و حزبه‌و مێژوه‌که‌ی ناناسێ، تیر به‌ تاریکیه‌و‌ه‌ ده‌نێت، دژبه‌ری حزبی دیموکراته، ... وگه‌لێک شتی دیکه‌، شێوه‌یه‌کی به‌سه‌رچوه‌و پێویست ناکات له‌سه‌ریان بپه‌یڤم. ئه‌وانه‌ی ڕه‌خنه‌ ده‌گرن ناڵێم هه‌موویان خاوه‌نی تێڕوانین و بۆچونی خۆیانن و تاڕاده‌یه‌کیش شاره‌زای مێژووی ئه‌و حزبه‌ هه‌ن و ڕه‌نگه‌ زۆر باشیشی بناسن. له‌گه‌ڵ ئه‌وه‌شدا ئه‌و هاوپه‌یمانیه‌ی حزبی کاک ڕه‌حیم هێنده‌ خویایه‌ که‌ حه‌وجێ به‌ قوڵبونه‌وه‌ی فره‌ نیه‌. به‌ بێ ئه‌وه‌ی حزبی پان ئێرانیست بناسی ته‌نێ چکێک له‌ ناوه‌که‌ی ڕابمێنی و ئه‌وه‌نده‌ بزانی"پان ئێرانیست" چیه‌! به‌سه‌ بۆ ئه‌وه‌ی هه‌ڵوێسته‌ له‌سه‌ر ئه‌و شاکارهی حزبی دیموکرات‌ بکه‌یت.

هه‌ر له‌سه‌ره‌تاوه‌ نوسه‌ری وه‌ڵامنامه‌ سه‌باره‌ت به‌ به‌یاننامه هاوبه‌شه‌‌که‌ی نێوان ئه‌و دو حزبه‌‌ ده‌بێژێ" شه‌پۆلێكی ناڕه‌زایه‌تی دژ به حیزبی ئێمه پێكهێناوه و هه‌ر كه‌س و لایه‌نێك ده‌یهه‌وێت به قازانجی خۆی ته‌فسیری بكات و لێكی بداته‌وه". له‌ ڕاستیدا ئه‌وه‌ی ئه‌م به‌یاننامه‌ هاوبه‌شه‌ شه‌پۆلێکی ناره‌زایه‌تی و ڕه‌خنه‌گرتن له‌و ئاکاره‌ بێفه‌ڕه‌ پێکهاتوه‌ گومانی تێدانیه‌و له‌ ڕاستیدا ئه‌و ڕه‌خنه‌و ناره‌زایه‌تی و بێزاریه‌ ڕیزه‌کانی حزبی ڕه‌شیدیشی گرتۆته‌وه‌. دژکرده‌وه‌یه‌کی له‌و شێوه‌یه‌ ئاماژه‌یه‌ به‌ وریایی و تێگه‌یشتوویی ڕۆڵه‌کانی گه‌له‌که‌مان و ناسینی به‌رژه‌وه‌ندییه‌کانی نه‌ته‌وه‌که‌مان. به‌ڵام ئه‌م ڕه‌خنه‌و بێزاری ده‌ربڕینه‌ له‌ لای ئه‌و به‌ڕێزه‌ به‌ دژایه‌تی حزبه‌که‌ی لێک دراوه‌ته‌وه‌. گوایه‌ مادام که‌سانێک له‌کرده‌وه‌یه‌کی بێجێ و بێکه‌ڵکی حزبی دیموکرات هاتونه‌ ده‌نگ و ئه‌و حزبه‌یان دڵسۆزانه‌ به‌ ئاگا هێناوه‌ته‌وه‌ یان باشتره‌ بڵێم ڕایان ته‌کاندوه،‌ که‌ کارێکی بڤه‌ی کردوه‌و له‌گه‌ڵ ئامانج و به‌رژه‌وه‌ندی کورد و حزبی دیموکرات نایه‌ته‌وه‌، دژایه‌تی حزبی دیموکراته‌. له‌ ڕاستیدا ده‌بێ به‌و به‌ڕێزه‌ و گشت ئه‌وانه‌ی که‌ وه‌ک ئه‌و بیر ده‌که‌نه‌وه‌و، ڕه‌خنه‌گران له‌ سیاسه‌ت و هه‌ڵوێست و ئاکاره‌کانی حزبی دێموکرات به‌ دژبه‌رو دوژمنی ئه‌و حزبه‌ ده‌ناسێنن، بێژم که‌ له‌ هه‌ڵه‌دان، هه‌ڵه‌یه‌ک که‌ ته‌نێ حزبی دیموکرات زیانی لێده‌بینێ. ئه‌ز گومانم له‌وه‌دا نیه‌ که‌ له‌ نێو ئه‌وانه‌ی ڕه‌خنه‌ ده‌گرن که‌سانێک یان لایه‌نێک هه‌بێ ئه‌وه‌ به‌ هه‌ل بزانێ و دژی حزبی دیموکرات بێته‌ ده‌نگ یان ڕه‌نگبێ سیخوڕو دوژمنانی گه‌لیش هه‌لی وا بکۆزنه‌وه‌و ده‌هۆڵ بدڕێنن. به‌ڵام پرسیار ئه‌وه‌یه‌ کێ هه‌لێکی وا چێده‌کات که‌ دۆست و دوژمنان وه‌ده‌نگ دێنێ؟. کێ به‌رژه‌وه‌ندییه‌کانی گه‌له‌که‌مانی له‌بیر کردوه‌و گیرفانی بۆ دۆستایه‌تی له‌گه‌ڵ له‌وێچێک شۆڤێنیستی هیچ له‌بارا نه‌بووی دوژمنی مافی بریاردانی چاره‌نوسی گه‌لان هه‌ڵدروه‌و به‌ مه‌ش ده‌بێته‌ ئامانجی ڕه‌خنه‌و بێزاری له‌ لایه‌ن دڵسۆزانی نه‌ته‌وه‌که‌مانه‌وه؟‌ کام هه‌ڵوێست و ئاکاره‌ که‌ ته‌نانه‌ت ئه‌ندامانی حزبی دیموکراتیشی هێناوه‌ته‌ ده‌نگ و ده‌بێژن حزبی دیموکراتی کوردستان و پان ئێرانیست کوجا مه‌رحه‌با!!!!؟. بێگومان جگه‌ له‌ ڕێبه‌رایه‌تی بڕیارده‌ری ئه‌مڕۆی حزبی دیموکرات که‌سی دیکه‌ نیه‌ که‌ به‌کرده‌وه‌ی لاده‌رانه‌ی له‌ ڕێبازی دامه‌زرێنه‌رانی بۆته‌ مایه‌ی توڕه‌ی و بێزاری تاکه‌کانی نه‌ته‌و‌‌ه‌که‌ی. ڕێبه‌رایه‌تیه‌ک که‌ پێچه‌وانه‌ی ئامانج و سیاسه‌ت و به‌رنامه‌ی ڕابردوی حزبه‌که‌ی و سێزده‌هه‌مین کۆنگره‌ی ده‌جوڵێته‌وه‌. ئه‌و حزبه‌ی که‌ دامه‌زرێنه‌ره‌که‌ی، دامه‌زرێنه‌ری یه‌که‌م کۆماری کوردستانه‌ له‌ مێژووداو سوێندی به‌ ئاڵای پیرۆزی کوردستان خوارد.

نوسه‌ری وه‌ڵامنامه‌ له‌ جیاتی وه‌ڵامدانه‌وه‌ی به‌ ڕه‌خنه‌کان، ده‌که‌وێته‌ وێزه‌ی لایه‌نێکی سیاسی که‌ چ په‌یوه‌ندی به‌ باسه‌که‌وه‌ نیه‌. باسه‌که‌ باسی به‌یاننامه‌ی هاوبه‌شی حدکا و پان ئێرانیسته‌کانه‌و گه‌ره‌که‌ وڵامی ئه‌و ڕه‌خنانه‌ بدرێته‌وه‌ که‌ له‌وبه‌ستێنه‌وه‌ له‌ که‌له‌که‌ی حزب سره‌وێنراون. کۆمه‌ڵه‌ میژوی چۆنه‌و له‌ کوێوه‌ هه‌ڵقوڵاوه‌و چ تاوان و هه‌ڵه‌یه‌کی له‌ هه‌مبه‌ر بزاڤی نه‌ته‌وه‌یی ئه‌نجامداوه‌ و ئێستا له‌ کوێ ئه‌و بزاڤه‌دا جێیگرتوه‌، باسێکی به‌ته‌واوی جیایه‌و ده‌کرێ به‌ جیا بکرێ. نوسه‌ر له‌ جیاتی ئه‌وه‌ باشتربوو به‌ هۆکاری دروستبوونی ناره‌زایه‌تیه‌کاندا ڕۆبچوایه‌و بکه‌وتایه‌ هزری ئه‌وه‌ی ئاخۆ حزبێک که‌ خۆی به‌ حزبی نه‌ته‌وه‌یی ده‌زانێ و دروشم و ئامانجگه‌لی نه‌ته‌وه‌یی هه‌بوه‌، بۆچی ئه‌مڕۆ که‌وتۆته‌ به‌ر ڕه‌خنه‌ی ڕێکخراوێک که‌ به‌وته‌ی نوسه‌ر" له دڵی ئه‌مانه‌وه ئێستا توندڕه‌وترین هێزی ئێرانی دژ به و‌‌ه‌دیهاتنی مافه‌كانی كورد له‌دایك بووه كه ئاشكرا گاڵته به كورد و گه‌وره‌كانی كورد و كه‌لتوری كوردستانییه‌كان ده‌كات". ئه‌وانه‌ کۆمه‌ڵه‌ ڕاستیه‌کین که‌ نوسه‌ری وڵامنامه‌‌ باشتره‌‌ بیانپه‌ژرێنێ. هه‌روه‌ها ناوبراو له‌ جێیه‌کدا ئێژێ"به‌شێکیان فێڵبازانه‌ ده‌هۆڵی كوردایه‌تی ده‌‌كوتن". پرسیار ئه‌وه‌یه‌ ئایا ئه‌وانه‌ی ڕه‌خنه‌یان له‌ و هاوپه‌یمانیه‌ گرتوه‌" فێڵبازانه‌ ده‌هۆڵی کوردایه‌تی" لێده‌ده‌ن یان ئه‌وانه‌ی به‌رگری له‌ وه‌ها هاوپه‌یمانیه‌تیه‌کی ده‌که‌ن که‌ به‌ ئاشکرا لادانه‌ له‌ هێڵی به‌رژه‌وه‌ندییه‌کانی نه‌ته‌وه‌که‌مان.

بۆ زانینی ئه‌و به‌ڕێزه‌ گه‌رچی تاڵ یان شیرین، خۆش یان ناخۆش، هه‌ست بکرێ یان نا، هێڵێک هه‌یه‌ پێی ده‌وترێ هێڵی نه‌ته‌وه‌یی و ده‌یان و سه‌‌دان ڕوناکبیرو نوسه‌ر و هونه‌رمه‌ندی کوردستانی که‌ زۆرتر له‌ ده‌ره‌وه‌ی حزب و ڕێکخراوه‌ سیاسیه‌کانن له‌ هه‌موو کوردستانه‌وه‌، له‌و هێڵه‌دا جێده‌گرن و ڕۆژانه‌ چاوه‌دێری ئاکارو هه‌ڵوێست و په‌یڤی حزب و ڕێکخراوه‌ سیاسیه‌کان و ڕێبه‌رانیان ده‌که‌ن و له‌هه‌ر ئاکارو هه‌ڵوێست و په‌یڤێک که‌ له‌ لایه‌ن ئه‌وانه‌وه‌ بێته‌ ڕۆژه‌ڤه‌وه‌ و ده‌رببڕدرێ ورد ده‌بنه‌وه‌و گه‌ر به‌ باری نه‌رێیی یان ئه‌رێیی دابێت، له‌ سه‌ری هه‌ڵوێسته‌ ده‌که‌ن و به‌گژ هه‌ر هه‌ڵوێست و ئاکارو په‌یڤێکدا دێنه‌وه‌ که‌ له‌ دژی به‌رژه‌وه‌ندی نه‌ته‌وه‌که‌مان بێت. گه‌ر ڕۆژانه‌ سه‌ردانی سایت و ماڵپه‌ڕه‌ کوردیه‌کان بکه‌یت ده‌توانی ده‌یان بابه‌ت و نوسین هه‌ڵێنجی که‌ له‌و به‌ستێنه‌دا نوسراون. ئه‌وانه‌ ده‌نگێکن ده‌بێ ببیسترێن و هێزێکن که‌ گه‌ره‌که‌ ببینرێن. ڕاسته‌ له‌ وه‌ڵاتی ئێمه‌ مێدیاو ڕاگه‌یاندن هێشتا جێی نه‌گرتوه‌ و نه‌یتوانیوه‌ وه‌ک هێزی چواره‌م گۆڕه‌پانه‌که‌ داگیربکات و خۆی به‌ته‌واوی بسه‌پێنێ، به‌ڵام به‌ دڵنیایه‌وه‌ ئه‌م هێزه‌ له‌ کۆناخی چێبوون و دروستبووندایه‌ و د‌‌سه‌ڵاتدارو بێده‌سه‌ڵات ده‌بێ به‌ هه‌ندی بگرێ. له‌و ڕۆژه‌وه‌ که‌ به‌یاننامه‌ی حزبی دیموکرات و پانه‌کان بڵاوبۆته‌وه‌ به‌ ده‌یان بابه‌ت نوسراوه‌ و له‌ چه‌ندین گۆشه‌ نیگاوه‌ ئه‌و ئاکاره‌ی حدکا خراوه‌ته‌ به‌ر سیخورمه‌ی ڕه‌خنه‌ی به‌ ئاگاهێنه‌رو ڕاتڵه‌کێنه‌ر و له‌ سایته‌ کوردیه‌کاندا بڵاو بوونه‌ته‌‌وه‌ و دڵسۆزانه‌ نه‌ک فێڵبازانه‌ پێیان له‌سه‌ر هێڵی کوردایه‌تی و به‌رژه‌وه‌ندی نه‌ته‌وه‌یی داگرتوه‌. جا گه‌ر ئه‌و ڕه‌خنه‌گرانه‌ به‌ فێڵبازو ده‌هۆڵ لێده‌ر لێکبدرێنه‌وه‌ یان نا هیچ له‌و ڕاستیه‌ ناگۆڕێ که‌‌ ئه‌و ده‌ورو سه‌رده‌مه به‌سه‌ر چوو که‌ ده‌سه‌ڵاتدارو بڕیارده‌ران به‌ بێ پرینگانه‌وه‌ له‌ هیچ شتێک به ئاره‌زووی خۆیان گاڵته‌ به‌ چاره‌نوسی نه‌ته‌وه‌که‌مان بکه‌ن، شه‌ڕ بکه‌ن ئاشتی بکه‌ن، بکوژن ببڕن و هاوپه‌یمانی پێک بێنن و دوست ودوژمن بۆ نه‌ته‌وه‌ دیاری بکه‌ن و هه‌رشتێک بیانه‌وێ بیکه‌ن و له‌‌ نێو خۆیاندا دیزه‌ به‌ده‌رخۆنه‌ی بکه‌ن و که‌س هیچ نه‌ڵێ و ئه‌وانیش ئه‌سپی ئاره‌زوه‌کانیان گه‌ر به‌ره‌و هه‌ڵدێر یان بوارو ڕێچکه‌ی بێر لینگ بده‌ن. ئه‌مڕۆ ده‌بێ باش ئه‌و ڕاستیه‌ بزانرێ که‌ حزب و ڕێکخراوه‌ سیاسیه‌کان له‌گه‌ڵ گه‌لێکی وشیاردا که‌ خاوه‌نی ده‌یان و سه‌دان ڕوناکبیری وشیارو نه‌ته‌وه‌ییه‌ ڕوبه‌ڕوون.

پاشتریش نوسه‌ر ده‌نوسێ"خۆیان به دایه‌ی دڵسۆزتر له دایك نیشان ده‌‌ده‌ن". ئه‌م ڕسته‌یه‌ ئیدیۆمێکی فارسیه‌ لێره‌دا که‌ڵکی لێوه‌رگیراوه‌. مه‌به‌ستی نوسه‌ر ئه‌وه‌یه‌ که‌ ڕه‌خنه‌گران خۆیان له‌ حزبی دیموکرات به‌ دڵسۆزتر ده‌زانن بۆ نه‌ته‌وه‌که‌مان یان له‌ ڕێبه‌رایه‌تی حزبی دیموکرات خۆیان به‌ دڵسۆزتر ده‌زانن بۆ حزب. لێره‌دا ده‌بێ بێژم نوسه‌ر مافی خۆیه‌تی چۆن ده‌هزرێ به‌ڵام ئه‌ز که‌س له‌ خۆم دڵسۆزتر بۆ نه‌ته‌وه‌که‌م نازانم. گه‌ر ڕه‌خنه‌یه‌ک له‌ حزبی دیموکرات یان هه‌ر هێزێکی گۆڕه‌پانی کوردستان ده‌گرم له‌ خۆشه‌ویستی نیشتمان ونه‌ته‌وه‌که‌م و له‌ پێناوی ڕێگرتن له‌و هه‌ڵه‌و که‌م و کوڕیانه‌ی که‌ داهاتوو و به‌رژه‌وه‌ندی نه‌ته‌وه‌که‌مان ده‌خاته‌ مه‌ترسی. دلنیام زۆربه‌ی ڕه‌خنه‌گران مه‌به‌ستیانه‌ کاروانی خه‌باتی ڕزگاری نه‌ته‌وه‌ به‌‌‌ش مه‌ینه‌ته‌که‌مان به‌ ڕاسته‌ هێڵی به‌رژه‌وه‌ندییه‌کانی نه‌ته‌وه‌که‌ماندا بڕوات، بۆ ئه‌وه‌ی زووتر له‌ مه‌نزڵگه ئاوات نزیک‌ بێته‌وه‌.

نوسه‌ری وڵامنامه‌ له‌ درێژه‌ی نوسینه‌که‌یدا چه‌ند ڕوداوی ناو حزبی دێموکرات و هه‌ڵوێستی ڕێبه‌رانی ئه‌و حزبه‌مان وه‌بیر ده‌ێنێته‌وه‌ و به‌ مه‌ش ده‌یه‌وێ بێژێ که‌ حزبه‌که‌ی ده‌زانێ چده‌کا و چده‌ڵێ. ئه‌وه‌ی له‌ ڕابردوودا کردویه‌تی و گووتویه‌تی هه‌موویان ڕاست و ڕه‌وان و بێگرێو گۆل بون. هه‌ربۆیه‌ حه‌وجێ به‌ ڕه‌خنه‌ و مه‌خنه‌ ناکات. له‌ به‌شێکی ئه‌و وه‌بیرهێنانه‌وه‌دا ده‌نوسێ:" نابێت له بیرمان بچێت كه حیزب له ده‌ییه‌ی 30ی هه‌‌تاویدا بۆ ماوه‌ی 10 ساڵ له ڕێبازی ڕاسته‌قینه و شۆڕشگێڕانه‌ی خۆی لای دابوو(1). له ڕاستیدا ببوو به كلكی حیزبی توده. كه‌س گومانی له‌وه‌دا نییه كه دوكتور قاسملو ئازایانه حیزبی بۆ سه‌ر ڕێبازی ڕاسته‌قینه‌ی خۆی گه‌ڕانده‌وه، خالێكی زێرین كه له مێژووی حیزبدا هه‌میشه بۆ شانازی پێوه‌كردن ده‌شێت. چوون و هاتنه‌ده‌رمان له شۆرای نیشتمانی به‌رگری ئه‌كرێت وه‌كو وه‌ها دیارده‌یه‌ك چاو لێبكرێت له‌و پێوه‌ندییدا". سه‌ره‌تا ده‌بێ بڵێم که‌ براله‌ "نان ئه‌و نانه‌ ئه‌وڕۆ له‌ خوانه‌". ئه‌وه‌ی به‌ڕێزتان باسی ده‌که‌ی هی په‌نجا ساڵ له‌مه‌و پێشه‌. ئه‌وه‌ی حزب ئه‌وکات له‌ ڕێبازی خۆی لایداوه و هۆو دراوه‌ته‌وه‌ سه‌ر خه‌تی خۆی یان کێ هێناویه‌تیه‌وه‌ سه‌ر هێڵ باسی ئه‌مڕۆ نیه‌. ئه‌وه‌ی باسی ئه‌مڕۆیه‌ پاش په‌نجا ساڵ جارێکی دیکه‌ لادانه‌وه‌ له‌سه‌ر خه‌ت و هێڵی کوردایه‌تیه‌ له‌ لایه‌ن ڕێبه‌رایه‌تی ئه‌مڕۆی ئه‌و حزبه‌وه‌. گه‌ر به‌وته‌ی ئێوه‌ ئه‌وکات دوکتور قاسملویه‌ک پاش ده‌ساڵ لادان له‌ ڕێباز و ئامانجی حزب، حزبی هێنابێته‌وه‌ سه‌ر هێڵ! ئه‌دی ئه‌مڕۆ کێ ده‌بێ ڕێگه‌ له‌و لادانه‌ بگرێ و پێش ئه‌وه‌ی دره‌نگ ببێت بیهێنێته‌وه‌ سه‌ر هێڵ. یان که‌سانی وه‌ک ئێوه‌ ده‌خوازن پاش چه‌ند ساڵی دیکه‌ به‌کرده‌وه‌ هه‌ڵه‌ و له‌نگی ئاکاره‌که‌ ده‌رکه‌وێ و که‌سێک بێت و به‌ ڕێبه‌رایه‌تی حزب بڵێ خزمینه‌ له‌ هه‌ڵه‌دان و ئیتر به‌سه‌!!. گه‌لۆ مل به‌ردانه‌وه‌و پاساودانی ئه‌و هه‌ڵه‌و لادانه‌ی ئه‌مڕۆژانه‌ی حزب له‌ ڕێبازی کوردایه‌تی و هێڵی دامه‌زرێنه‌رانی حزب ده‌توانێ چ خزمه‌تێک به‌ حزبه‌که‌تان بکات. باشتر نیه‌ پێش ئه‌وه‌ی که‌وڵه‌که‌ ئاو بیبات بێنه‌وه‌ سه‌رخۆو.
نوسه‌ر له‌درێژه‌ی هه‌مان وه‌بیرهێنانه‌وه‌دا، چون و هاتنه‌ده‌ره‌وی حزبمان بۆ ناو شۆڕای نێشتمانی به‌رگری به‌ ڕوداده‌د‌اته‌وه و ئه‌ویش وه‌ک ئه‌و هاوپه‌یمانیه‌ی ئه‌مڕۆ له‌گه‌ڵ پانه‌کان به‌ شاکاری ڕێبه‌رایه‌تی حزب ده‌قه‌بڵێنێ. لێره‌دا پێویسته‌ وه‌بیر نوسه‌ر بهێنرێته‌وه‌ که‌ چه‌نده‌ چونی حزب بۆ ناو شورای ناوبراو هه‌ڵه‌ بوو ئه‌وه‌نده‌ش شێوه‌ی هاتنه‌ده‌ره‌وه‌ی هه‌ڵه‌ بوو. گه‌ر وه‌ک به‌ڕێزتان ئێژن حزب بۆ خۆی هاتبێته‌در له‌ و شۆڕایه!!‌. نه‌ چۆنیه‌تی چونه‌ ناو ئه‌و شۆڕایه‌ و نه‌ چۆنیه‌تی ده‌ست لێبه‌ربوونی حزبی دیموکرات له‌و شۆرایه‌ بۆ خۆ ڕانان نابێت. پاشان بۆ زانینی نوسه‌ری هێژا حزب له‌ شورا نه‌ هاته‌ده‌ر به‌ڵکوو کرایه‌ده‌ر، واته‌ وه‌ده‌رنرا. گه‌ر چونه‌ ناو ئه‌و به‌ره‌یه‌ به‌ده‌ست حزب بووبێ ئه‌وه‌ هاتنه‌ ده‌ر به‌ده‌ست ئه‌و نه‌بوو.

له‌ شوێنێکی دیکه‌دا نوسه‌ری و‌‌ڵامنامه‌ ده‌نوسێ" دیاره حیزب ده‌بێ به‌ر له‌وه‌ی ئاڵوگۆڕی خێرا و چاوه‌ڕوان نه‌كراو له قه‌وار‌ه‌ و پێوه‌‌ندییه‌كانی خۆیدا پێكبێنێت پێویسته كه بیروڕای گشتی بۆ ئاماده كات و له‌مه‌‌ڕ هه‌ر گۆڕانێك شیكردنه‌‌وه‌‌ی پێویست بدات و خاڵه لاواز و به‌هێزه‌كانی ده‌ستنیشان بكات". ده‌بێ به‌ کاکی نوسه‌ر بێژم کاتی خۆی که‌ حزب چوه‌ ناو شورا زۆربه‌ی ڕێبه‌رایه‌تی حزب تا دوای واژۆکردنی ڕێکه‌وتنه‌که‌ ئاگایان له‌ مه‌حمودی بێ زه‌واد نه‌بوو. نه‌ ڕای گشتی بۆ ئاماده‌کراو نه‌ ڕێزه‌کانی حزب. ئه‌وه‌ی که‌ تۆ پێشنیاری ده‌که‌ی بۆ ڕێبه‌رایه‌تیه‌که‌ت شتێکی باشه‌ و هه‌ر ئه‌و هاوپه‌یمانیه‌ له‌گه‌ڵ پان ئێرانیسته‌ شۆڤێنیسته‌کان، گه‌ر پێشتر شتێکی له‌سه‌ر بگوترایه‌و لانی که‌م له‌ گه‌ڵ ئه‌ندامانی حزبه‌که‌تان بهاتایه‌ته‌ به‌ر باس ئه‌وه‌ کێشه‌که‌ به‌م ڕۆژه‌ نه‌ده‌گه‌یشت و له‌ لایه‌ن هێڵی نه‌ته‌وه‌یی ناوه‌وه‌ی حزبه‌وه‌ ڕێ له‌و هاوپه‌یمانه‌تیه‌ ناپیرۆزه‌ ده‌گیرا. ئه‌وه‌نده‌ی من شاره‌زایم له‌سه‌ر حزب دیموکرات هه‌بێت ژماره‌ی ئه‌وانه‌ی که‌ له‌ هێڵی نه‌ته‌وه‌ییدان له‌ ناو حزبدا زۆرن و ده‌یانتوانی ڕێگر بن له‌سه‌ر ئه‌و کاره‌. له‌وه‌ی دڵنیام گۆڕینی دروشمی خودموختاریش بۆ فیدرالیزم گه‌ر به‌شێکی به‌ ناچاری بوو بێ ئه‌وه‌ به‌شێکی گرنگی ده‌گه‌ڕێته‌وه‌ بۆ بوونی هێڵی نه‌ته‌وه‌یی له‌ ناو ریزه‌کانی حزبدا که‌ سه‌ره‌نجام توانی هه‌رچه‌ند دره‌نگ، ئه‌و گۆڕانه‌ی بسه‌پێنێ.
وه‌ک ده‌بینین ئێستاش حزبی دیموکرات پاش چه‌ند هه‌فته‌ هیچ ڕونکردنه‌وه‌و وڵامدانه‌وه‌یه‌کی بۆ ئه‌و هه‌ڵه‌یه‌ی نیه. جگه‌ له‌و به‌رگرینامه‌یه‌ی که‌ ئێوه‌ نوسیوتانه،‌ نه‌ که‌سی دیکه‌ به‌رگری لێکردوه‌ نه‌ له‌ ده‌زگاکانی ڕاگه‌یاندنی حزبیشه‌وه‌ ورته‌یه‌ک هاتۆته‌ ده‌ره‌وه‌ و وه‌ک بۆخۆشت ده‌زانی ئه‌وه‌ی ئێوه‌ش له‌ هیچ کام له‌ سایته‌کانی حزبدا تا ئه‌م کاته‌ نه‌دیتراوه‌‌و به‌ هه‌ڵوێست و وڵامدانه‌وه‌ی حزب ناژمێردرێ.
به‌داخه‌وه‌ نه‌ریتێک له‌ حزبدا باوه‌ که‌ هه‌ر کارێکی حزب یان هه‌ڵوێستێکیان، چاک یان خراپ، به‌ ژیرانه‌و وردبینانه‌ و سه‌رکه‌وتوانه ده‌ژمێردرێ و پێیدا هه‌ڵده‌درێ. وه‌ڵامدانه‌وه‌ی ئه‌و به‌ڕێزه‌ش له‌و چواچێوه‌و نه‌ریته‌ به‌ده‌ر نیه‌. ‌
نوسه‌ر له‌ به‌شێکی دیکه‌ی وڵامنامه‌که‌دا باسی ئه‌وه‌ ده‌کات که‌ ڕێبه‌رایه‌تی حزب بۆ هه‌ر شتێکی چاره‌نوس ساز پرس و ڕای به‌ ئه‌ندامانی حزب کردوه‌. هه‌ر له‌و پێوه‌ندیه‌دا ده‌نوسێ:"ته‌نانه‌ت ده‌گێڕنه‌وه كه ئاشپه‌زه‌كان بۆ كۆبوونه‌وه‌كه نه‌هاتبوون، به‌ڵام دوكتور له دویان ده‌نێرێت و پرسیان پێده‌كات". به‌داخه‌وه‌ ده‌بێ بێژم وا نیه‌. ڕه‌نگه‌ دوکتور قاسملو یان ڕێبه‌رێکی دیکه‌ی حزب بۆ هه‌ندێک شتی وه‌ک گواستنه‌وه‌ی بنکه‌و باره‌گاکان پرسی به‌ ڕیزه‌کانی خواره‌وه‌ کردبێت به‌ڵام له‌ زۆر بواردا وانیه‌. چونی حزب بۆ نێو شوڕای نیشتمانی به‌رگری هه‌ر له‌سه‌رده‌می ڕه‌وانشاد دوکتور قاسملودا بوه‌ و نه‌ک هه‌ر پرس به‌ ئه‌ندامانی حزب نه‌کرا به‌ڵکو زۆربه‌ی ڕێبه‌رایه‌تی حزب جگه‌ له‌ یه‌کدوو که‌س نه‌بێ ئاگایان لێنه‌بوو. له‌ پاش کۆنگره‌ی هه‌شتی حزب سه‌دان کادرو پێشمه‌رگه‌ به‌ واژۆو تۆمار داوایان له‌ ڕێبه‌رایه‌تی و سکرتێری حزب کرد که‌ کۆنگره‌ یان کۆنفرانسی نائاسایی گرێ بدرێ هیچ وه‌ڵام نه‌درایه‌وه‌ و سه‌ره‌نجام حزب توشی له‌ت بوون هات و ژماره‌یه‌کی زۆریش بێهیوا بوون و وازیان له‌ شۆڕش هێنا. ئاکامی ئه‌و گوێنه‌دانه‌ به‌ داخوازی ژماره‌یه‌کی زۆری له تێکۆشه‌رانی حزب ئه‌وه‌ی لێکه‌وته‌وه‌ که‌ ئێستاش حزب پێوه‌ی ده‌ناڵێنێ!. جا گه‌ر ڕێبه‌ری حزب به‌ ووته‌ی ئێوه‌ ئاشپه‌زه‌کانیشی له‌بیر نه‌کردوه‌ و پرسی پێکردوون چۆن ده‌کرێ گوێ به‌ داوای سه‌دان کادرو پێشمه‌رگه‌ نه‌دا که‌ بڕبڕه‌ی پشتی حزب بوون. پاشان ڕه‌نگه‌ نوسه‌ر نه‌زانێ به‌ڵام بۆ زانیاری نوسه‌ر‌ چێشت لێنه‌ره‌کانیش هه‌ر پێشمه‌رگه‌و کادری حزب بوون!! پرس پێکردن و لێگێڕانه‌وه‌یان بۆ کۆبوونه‌وه‌کان خێر نه‌بووه‌ پێیان بکه‌ن، به‌ڵکو ئه‌رک بوه‌و ده‌بوو بانگ بکرێن.

سه‌رنج ڕاکێش ئه‌وه‌یه‌ که‌ ئه‌م نوسراوه‌ بۆ وڵامدانه‌وه‌ به‌و ڕه‌خنانه‌ نوسراوه‌ که‌ له‌ هه‌مبه‌ر ئه‌و هاوپه‌یمانیه‌ له‌ حزبی نوسه‌ر گیراوه‌، به‌ڵام ته‌نیا به‌ حزبدا هه‌ڵده‌ڵێ و پێ داده‌گرێ که‌ حزبه‌که‌ی نه‌ته‌وه‌ییه‌و کاره‌کانی هه‌مویان شاکارو به‌جێ و به‌وه‌خت بوون و هه‌ر هه‌ڵوێستێکیان گوایه‌ له‌سه‌ر بناخه‌ی لێکدانه‌وه‌ و به‌پێ به‌رژه‌وه‌ندییه‌کانی نه‌ته‌وه‌که‌مانه‌. بۆیه‌ش به‌بڕوای نوسه‌ر ئه‌و ڕه‌خنه‌و بێزاری و هه‌ڵوێستانه‌ی له‌ هه‌مبه‌ر ئه‌و په‌یوه‌ندییه‌ نابه‌جێ‌یه‌ی حزب له‌گه‌ڵ پان ئێرانیسته‌کان گیراون، گشتی قسه‌ و قسه‌لۆکن و له‌وڕێنه‌ به‌ولاوه‌ شتێکی دیکه‌ نین ئه‌وه‌تا کاکی نوسه‌ ئاوا ئێژێ: "ئه‌و سه‌رده‌میش هێرش و په‌لامار و قسه و قسه‌ڵۆكی له‌م چشنه به لافاو هاتنه ئاراوه‌ و درۆ و بوختانی ڕه‌‌نگاوڕه‌نگ بۆ حیزب و ڕێبه‌رییه هۆشیاره‌كه‌ی هه‌ڵبه‌سترا. به‌ڵام ڕه‌وتی زه‌مان ده‌ریخست كه حیزبی دێموكرات و كه‌سایه‌تی دوكتور قاسملو چه‌ند وه‌ستایانه و شاره‌زایانه و قووڵ بۆ باسه‌كان چوون و هه‌ڵسه‌نگاندنیان ژیرانه و زانستی‌یانه بووه. زستان ڕۆیی و ڕووڕه‌شی هه‌ر بۆ خه‌ڵوز مایه‌وه."
هاوپه‌یمانی له‌گه‌ڵ پان ئێرانیستان نه‌ به‌کارێکی وه‌ستایانه‌و شاره‌زایانه‌ ده‌ژمێردرێ و نه‌ک بێرێکی بۆ نه‌ته‌وه‌که‌مان نیه‌ به‌ڵکو به‌ دڵنیاییه‌وه‌ زیانێکی قه‌ره‌بوو نه‌کراویش له‌ حزبی دیموکرات و جوڵانه‌وه‌ی نه‌ته‌وه‌یی و رزگاری خوازانه‌ی کوردستان ده‌دات. حزبی دیموکرات تا ئێستاش وه‌ک هێزێکی کاریگه‌رو خاوه‌ن جێو شوێنی دیار‌ له‌ بزاڤی کوردستاندا ژمارده‌ی له‌سه‌ر ده‌کرێ. هه‌ستیار بوونی ئاکارو هه‌ڵوێستی ئه‌و حزبه‌ له‌وێوه‌ دێت و هه‌ر کارو هه‌ڵوێستێکی ئه‌و حزبه‌ له‌سه‌ر داهاتوویی ئه‌م بزاڤه‌ کاریگه‌ری هه‌یه‌. به‌شێوه‌یه‌ک که‌ گه‌ر به‌ ئاراسته‌ی باش و له‌ به‌رژه‌وه‌ندیی نه‌ته‌وه‌که‌ماندا ڕێبکات ئه‌وه‌ به‌ ئه‌رێی و گه‌ر پێچه‌وانه‌ش بێت به‌ نه‌رێی به‌سه‌ر نه‌ته‌وه‌که‌ماندا ده‌شکێته‌وه‌ و له‌ هه‌ڵدێرگه‌مان نزیک ده‌خاته‌وه‌. ئه‌و هاو په‌یمانیه‌ پێچه‌وانه‌ی به‌رژه‌وه‌ندییه‌کانی نه‌ته‌وه‌که‌مانه‌ و هیچ پاساوێک هه‌ڵناگرێ. حزبی پان ئێرانیست ڕێکخراوێکی مرداره‌وه‌بویی بێ پێگه‌و جه‌ماوه‌ره‌ که‌ له‌وێچێک شۆڤێنیست دروستیان کردوه‌ په‌یڤێکیان نیه‌ که‌ له‌گه‌ڵ ئامانج و به‌رژه‌وه‌ندی حزب و نه‌ته‌وه‌ی کورددا یه‌کدی بخوێننه‌وه‌. به‌ پێچه‌وانه‌ ئه‌وان کورد به‌ به‌ تیره‌و هۆز ده‌ناسن و به‌ به‌شێک له‌ نه‌ته‌وه‌ی فارسی ده‌قه‌بڵێنن و ئامانجیانه‌ که‌ ئه‌فگانستان و تاجیکستان و به‌شه‌کانی دیکه‌ی کوردستانیش بخه‌نه‌وه‌ سه‌ ئێران و به‌مه‌ش نه‌ته‌وه‌ی مه‌زنی ئێران( نه‌ته‌وه‌ی فارس) یه‌ک بخه‌نه‌وه و کوردیش که‌ به‌ به‌شێک له‌ نه‌ته‌وه‌ی فارس ده‌زانن له‌ ناو نه‌ته‌وه‌ی فارسدا بتوێننه‌وه‌‌. ئه‌بوبه‌کر د‌یماسی که‌ وه‌ک نوسه‌ری وڵامنامه‌، ئه‌ندامی حزبه‌ و شانازیشی پێوه‌ده‌کا، به‌ پێچه‌وانه‌ی نوسه‌ر ئه‌و هاوپه‌یمانیه‌ به‌ "دورله‌پڕینسیب وهه‌ست وئوسول وئه‌خلاقی شۆرشگێرانه‌و نه‌ته‌وه‌یی" حزب ده‌زانێ. دیماسی له‌ به‌‌شێکی نوسراوه‌که‌یدا ده‌نوسێ: "بڵێی چ قه‌ومابێ كه‌ح د ك ، ئاماده‌بێ دور له‌پڕینسیب وهه‌ست وئوسول وئه‌خلاقی شۆرشگێرانه‌و نه‌ته‌وه‌یی خۆی ( كه‌تائێستا هه‌میشه‌پابه‌ندی بووه‌ وبه‌وه‌شه‌وه ‌له ‌ناو خه‌ڵك داناسراوه‌ وده‌ناسرێته‌وه‌) له‌گه‌ڵ حیزبێك كه ‌به‌ توێنه‌ره‌وه‌ی نه‌ته‌وه‌ی كورد ، به‌شووینیزمی نه‌ته‌وه‌ی باڵاده‌ست ناسراوه‌، قسه‌بكا، چ ده‌گابه‌وه‌ی كه‌به‌یانی هاوبه‌شیان له‌گه‌ڵ بنووسین !! به‌راستی مرۆڤی كورد به‌بیستنی ئه‌م كاره‌ ، ته‌واوی له‌شی مووچوڕك ده‌كات وخۆزگه‌ی خرابده‌خوازێ. به‌راستی هه‌رچه‌ند له‌به‌رنامه‌ی پان ئێرانیسته‌كان ورد ده‌بمه‌وه‌ هیچ شتێك نابینم كه‌تۆسقاڵه‌زه‌ڕه‌یه‌ك ، نه‌ته‌نیابه‌رژه‌وه‌ندی كورد، به‌ڵكو هی هیچ یه‌ك له‌نه‌ته‌وه‌كانیتری ئێرانی تێدابێت. ئه‌گه‌ربێتوو به‌رنامه‌ی هه‌ردووك لایه‌ن به‌رئاوه‌رد بكه‌ین ، ده‌بێ بلێیین : حیزبی دێمۆكراتی كوردستان وحیزبی پان ئێرانیسم كجا مرحبا !!!!!!!!".

که‌واته‌ به‌جێیه‌ لێره‌دا به‌ ڕه‌شیدی بێژم که‌ ئه‌و ڕه‌خنانه‌ له‌ ڕوناکیدا گیراون و ڕه‌خنه‌گران ده‌زانن ڕه‌خنه‌ له‌چی ده‌گرن و به‌چی تووڕه‌ن. له‌جیاتی پاساو هێنانه‌وه‌ و ناوو ناتۆره‌ له‌ ڕه‌خنه‌گرانتان باشتره‌ بیرێک له‌ داهاتووی حزبه‌که‌تان بکه‌نه‌وه‌ و ڕێ له‌و جۆره‌ ئاکارانه‌ی بگرن. ئه‌و به‌ڕێزه‌ ئه‌گه‌رچی له‌ درێژه‌ی وڵامنامه‌که‌دا دڵنیامان ده‌کاته‌وه‌ که‌" حزب هه‌رگیز له ڕێبازی نه‌ته‌وه‌یی و نیشتمانی خۆی لانادات" به‌ڵام ئه‌زیش به‌ دڵنیاییه‌وه‌ ده‌بێژم به‌ڵێ ئه‌و هاوپه‌یمانیه‌تیه‌ی حزبی دیموکرات له‌گه‌ڵ پان ئێرانیسته‌کان لادانه‌ له‌ ڕێبازی نه‌ته‌وه‌یی و نیشتمانی و له‌گه‌ڵ به‌رژه‌وه‌ندیی نه‌ته‌وکه‌مان ته‌بایی نیه‌. هه‌تا دره‌نگیش نه‌بووه‌ باشتره‌ حزبی دیموکرات خۆی له‌و هاوپه‌یمانیه‌ بکێشێته‌وه‌. و ئه‌رکی هه‌موانیشه‌ که‌ ئه‌م لادانه‌ له‌قاو بده‌ن و هانی ئه‌و حزبه‌ بدرێ که‌ به‌خۆیدا بچێته‌وه‌ و بگه‌ڕێته‌وه‌ سه‌ر پڕنسیپ و ڕێبازی کوردایه‌تی و نه‌ته‌وه‌یی. پاش کۆنگره‌ی سێزده‌ که‌ خودموختاری خرایه‌ ته‌نکه‌ی خۆڵه‌وه‌و فیدراڵی بوه‌ دروشمی حزب ئه‌و هیوایه‌ هه‌بوو که‌ حزب به‌ره‌و هێڵی نه‌ته‌وه‌ی هه‌نگاوی هاویشتوه‌ و چیدیکه‌ پێ له‌سه‌ر ئێرانچیه‌تی داناگرێ. به‌داخه‌وه‌ ئه‌و هاوپه‌یمانیه‌ پێچه‌وانه‌ی ئه‌و هیوایه‌ی سه‌لماندوه‌. هیوادارم نوسه‌ری وڵامنامه‌و حزبه‌که‌ی ده‌نگی" نا"ی نه‌ته‌وه‌که‌یان ببیستن.